ၸုမ်းၵူၼ်းၼုမ်ႇဝဵင်းလၢႆးၶႃႈ တေဢွၼ်ႁူဝ် ၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆးပၢႆးႁၼ် ပွၵ်ႈၵမ်း 2  ၼႂ်း ဝၼ်းတီႈ 18/10/2015 တီႈဝတ်ႉၸွမ်သႅင် ႁူဝ်ၼွင်လူင် ဝဵင်းလၢႆးၶႃႈ - ႁူဝ်ၼႃႈၵူၼ်းၼုမ်ႇ ဝဵင်းလၢႆးၶႃႈ လၢတ်ႈ ။

ပၢင်တၢၼ်ႈၶႆႈဢၼ်တေ ၸတ်းႁဵတ်းပွၵ်ႈၵမ်းၼႆႉ တေမီးၽူႈလူင်ႉလႅၼ်ႇ လၢႆလၢႆၸဝ်ႈမႃးၶဝ်ႈ ႁူမ်ႈဢုပ်ႇဢူဝ်း မိူၼ်ၼင်ႇ ၶူးၸၢႆးၾႃႈ ၶူးပူင်သွၼ်လိၵ်ႈလၢႆးတႆး ၊ ၶူးၸၢႆးသၢင်ႇဢၢႆႈ ၽူႈတႅမ်ႈလိၵ်ႈ ၊ ၶူးၸၢႆးပၢၼ်းႁႅင်း ၶူးတႅမ်ႈၵႃႇတုၼ်း / ႁၢင်ႈလူၼ်ႉတႆး လႄႈ ၶူးၸၢႆးၽူင်းၶွင်ႇ ၽူႈၵွၼ်းႁူင်းႁဵၼ်း လွႆတႆးလီ ၵႃလိ ၸဵမ်ၸိူဝ်းၼႆႉ ဝႃႈၼႆ ။


ၵဵဝ်ႇၵပ်းလွင်ႈၼႆႉ ၸၢႆးလႅင်းႁိူင်း ႁူဝ်ၼႃႈၸုမ်းၵူၼ်းၼုမ်ႇ ဝဵင်းလၢႆးၶႃႈ လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ ဢၼ်ႁဝ်းၶႃႈၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆးပၢႆးႁၼ် ၵမ်းၼႆႉ ပဵၼ်ပွၵ်ႈၵမ်း 2 ၊ ယိူင်းဢၢၼ်းတႄႉ ႁႂ်ႈပီႈၼွင်ႉၵူၼ်းမိူင်းႁဝ်းၶႃႈ ပေႃးတေလႆႈႁပ်ႉႁူႉႁပ်ႉႁၼ် ၵူႈလွင်ႈလွင်ႈ ဢၼ်ပဵၼ်ဢၼ်မီး ၼႂ်းဝၢၼ်ႈမိူင်းႁဝ်း ၊ ၵွပ်ႈဝႃႈပီႈၼွင်ႉၵူၼ်းမိူင်းႁဝ်း ၶၢတ်ႇႁၢမ်းတၢင်းႁူႉတၢင်းႁၼ်ၵေႃႈၼမ်တႄႉတႄႉ ၊ ၵွပ်ႈၼႆလႄႈ ႁဝ်းၸင်ႇလႆႈဢွၼ်ၵၼ်ၸတ်းႁဵတ်း ။


ပၢင်တၢၼ်ႈၶႆႈၼႆႉ ဢမ်ႇၸႂ်ႈဝႃႈ ၵဵဝ်ႇၵပ်းၵၢၼ်မိူင်း - ၸၢႆးလႅင်းႁိူင်းသိုပ်ႇလၢတ်ႈ ၼင်ႇၼႆ ။


မၼ်းၸၢႆးသိုပ်ႇလၢတ်ႈထႅင်ႈဝႃႈ - ပႃႊတီႊသိူဝ်ၽိူၵ်ႇ တႄႉတုၵ်းယွၼ်းဝႃႈ ပၢင်တၢၼ်ႈၶႆႈၼႆႉ ႁႂ်ႈၶၢႆႉၵႂႃႇဝၢႆးလင်ပၢင်လိူၵ်ႈတင်ႈ ။ ၵူၺ်းၵႃႈယူႇတီႈၸုမ်းၵူၼ်းၼုမ်ႇဝဵင်းလၢႆးၶႃႈ သေလႆႈႁၢင်ႈႁႅၼ်းမႃး မွၵ်ႈ 2 လိူၼ်ပၢႆယဝ်ႉ ၊ ၽူႈတေမႃးၶိုၼ်ႈႁွတ်ႈလဵပ်းႁဵၼ်းလႄႈ ၶူးတေမႃးတၢၼ်ႈၶႆႈ ၸိူဝ်းၼၼ်ႉၵေႃႈလႆႈၽိတ်ႈမွၵ်ႇ (ဝွၵ်ႇၸိူၼ်း) ဝႆႉမူတ်ႉယဝ်ႉ ၊ ၵွပ်ႈၼၼ်တေသိုပ်ႇႁဵတ်းၵႂႃႇ ။


ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၶတ်းၸႂ်ၵပ်းသိုပ်ႇတိတ်းတေႃႇ ပိူဝ်ႈတႃႇတွင်ႈထၢမ် တီႈပႃႊတီႊသိူဝ်ၽိူၵ်ႇ ဝဵင်းလၢႆးၶႃႈယူႇ ၊ ၵူၺ်းၵႃႈ ဢမ်ႇတိတ်းတေႃႇလႆႈ ။


မိူဝ်ႈဝၼ်းတီႈ 17/08/2014 (ပီၵၢႆ) ၵေႃႈ လႆႈၸတ်းႁဵတ်း ပၢင်တၢၼ်ႈၶႆႈ မႃးယဝ်ႉပွၵ်ႈၼိုင်ႈ တီႈဝတ်ႉၸွမ်သႅင် ႁူဝ်ၼွင်လူင် ဝဵင်းလၢႆးၶႃႈ ။ ၵူၼ်းမႃးၶိုၼ်ႈႁွတ်ႈလဵပ်းႁဵၼ်း မိူဝ်ႈပီပူၼ်ႉမီး 1,100 ၵေႃႉ ၊ ၶူးဢၼ်မႃးတၢၼ်ႈၶႆႈ မီးၶူးၸၢႆးၾႃႈ ၊ ၶုၼ်ယုင်းၶဵဝ် ၊ ၸၢႆးမိူင်းလႅင်းလႄႈ ၸၢႆးဢူးၶမ်း ၼႆယဝ်ႉ ။