ၼႂ်းၸိုင်ႈတႆး 16 ၸႄႈဝဵင်း ဢၼ် RCSS/SSA ႁႄႉႁၢမ်ႈဝႆႉၸူဝ်ႈၶၢဝ်း ယႃႇႁႂ်ႈပႃႊတီႊၵၢၼ်မိူင်းၶဝ် လူင်းႁႃသဵင်သူၼ်းတုမ် ၼႂ်းပိုၼ်ႉတီႈၵုမ်းၵမ် ၊ ယွၼ်ႉပႆႇမီးလွင်ႈႁူမ်ႇလူမ်ႈၼၼ်ႉ ပႃးၸဵမ်ပွတ်းႁွင်ႇ / ပွတ်းၸၢၼ်း လႄႈ ပွတ်းဢွၵ်ႇ ။

ပူၼ်ႉမႃး မိူဝ်ႈဝၼ်းတီႈ 16/09/2015 ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး RCSS/SSA ဢွၵ်ႇလိၵ်ႈပိုၼ်ၽၢဝ်ႇဝႃႈ ယွၼ်ႉသိုၵ်းမၢၼ်ႈ ဢဝ်ႁႅင်းသိုၵ်းၵႂၢတ်ႇလၢင်ႉ လမ်းယိုဝ်း RCSS/SSA လႄႈႁဵတ်းႁႂ်ႈ ၵူၼ်းဝၢၼ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၊ ၾၢႆႇၼိုင်ႈၵေႃႈ ၵူၼ်းဝၢၼ်ႈၵူၼ်းမိူင်း ထုၵ်ႇသိုၵ်းမၢၼ်ႈ ပူၼ်ႉပႅၼ်လူလၢႆသုၼ်ႇလႆႈၵူၼ်း ၊ ထုၵ်ႇသိုၵ်းမၢၼ်ႈ တီႉၺွပ်းၵႂႃႇၸွမ်းငႃးသိုၵ်း ၊ ဢဝ်ၵွင်ႈလူင်ယိုဝ်းသႂ်ႇ တီႈမူႇၾုင်ၵူၼ်းယူႇၸိူဝ်းၼႆႉလႄႈ ႁဵတ်းႁႂ်ႈၵူၼ်းဝၢၼ်ႈ လႆႈဝၢတ်ႇၸဵပ်းလူႉတၢႆ ။ ဢိင်ၼိူဝ် ဢမ်ႇမီးလွင်ႈႁူမ်ႇလူမ်ႈသေ RCSS/SSA ၸင်ႇလႆႈဢွၵ်ႇလိၵ်ႈပိုၼ်ၽၢဝ်ႇ ၾၢင်ႉတိူၼ်ပႃႊတီႊၵၢၼ်မိူင်း ႁႂ်ႈၵိုတ်းယင်ႉၵၢၼ်ႁူၺ်းသူၼ်းႁႃသဵင် ၸူဝ်ႈၵႅပ်ႉၸူဝ်ႈၶၢဝ်း - ၼႆယဝ်ႉ ။


ၼႂ်း 16 ၸႄႈဝဵင်း ဢၼ် RCSS/SSA ႁၢမ်ႈပႃႊတီႊၵၢၼ်မိူင်းၶဝ် လူင်းႁႃသဵင်ၸူဝ်ႈၶၢဝ်းဝႆႉၼၼ်ႉ ပဵၼ်ၼႂ်းၸႄႈဝဵင်းၼမ်ႉၶမ်း ၊ ၼမ်ႉတူႈ ၊ ၵျွၵ်ႉမႄး ၊ ၼွင်ၶဵဝ် ၊ သီႇပေႃႉ ၊ မိူင်းၵိုင် ၊ လၢႆးၶႃႈ ၊ ပၢင်လူင် ၊ ၵေးသီး ၊ မိူင်းၼၢႆး ၊ လၢင်းၶိူဝ်း ၊ မွၵ်ႇမႆႇ ၊ ၵုၼ်ႁဵင် ၊ မိူင်းတူၼ် ၊ မိူင်းယွင်း ၊ မိူင်းပဵင်း ၸိူဝ်းၼႆႉ ။ တေႃႇထိုင်ယၢမ်းလဵဝ် ၼႂ်း 16 ၸႄႈဝဵင်းၼႆႉ ပႃႊတီႊၵၢၼ်မိူင်းၶဝ် လူင်းႁႃသဵင်ပႆႇလႆႈ ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ ယၢမ်ႈလၢတ်ႈဝႃႈ - ၼႂ်းပိုၼ်ႉတီႈ ႁဝ်းၶႃႈတူင်ႉၼိုင် 16 ၸႄႈဝဵင်းၼႆႉ ႁဝ်းၶႃႈၵႂႃႇလၢတ်ႈတီႈ လူင်ပွင်ၸိုင်ႈမၢၼ်ႈဝႃႈ ႁဝ်းတေပၵ်းသဝ်းသေ ႁဵတ်းၵၢၼ်ၽုၵ်ႇသွမ်ႈ / ၵၢၼ်လဵင်ႉလူတူဝ်သတ်းၸိူဝ်းၼႆႉ ။ ၵူၺ်းၵႃႈ ဢမ်ႇပဵၼ်မႃးသေၸိူဝ်ႉသေပိူင် ၵူၺ်းပႆႇပေႃး ထိုင်မႃးယၢမ်းလဵဝ်သမ်ႉ တပ်ႉသိုၵ်းမၢၼ်ႈႁႅၼ်းသိုၵ်းၵႂၢတ်ႇလၢင်ႉ လမ်းတိုၵ်းႁဝ်းၶႃႈလႄႈ ႁဵတ်းႁႂ်ႈဢမ်ႇမီးလွင်ႈႁူမ်ႇလူမ်ႈ ။ ၵွပ်ႈၼၼ်လႄႈ တႃႇပႃႊတီႊၵၢၼ်မိူင်းၶဝ် တေလူင်းႁႃသဵင်ၼႂ်း ပိုၼ်ႉတီႈၼႃႈလိၼ် ဢၼ်ႁဝ်းၶႃႈၵုမ်းၵမ်ၼႆႉ ပဵၼ်လွင်ႈယၢပ်ႇ ၊ ၵွပ်ႈၼၼ် ႁႂ်ႈၵိုတ်းယင်ႉဝႆႉၸူဝ်ႈၶၢဝ်း - ဝႃႈၼႆ ။


တၢင်းၼႃႈၼႆႉ တေပဵၼ်ပၢင်တိုၵ်း ဢမ်ႇပဵၼ်ပၢင်တိုၵ်းထႅင်ႈ ၊ ငဝ်းလၢႆးတေလီ ႁိုဝ် တေႁၢႆႉၼၼ်ႉ မၼ်းယူႇတီႈလူင်ပွင်ၸိုင်ႈ လႄႈတင်းသိုၵ်းမၢၼ်ႈၵူၺ်း ။ ၵွပ်ႈၼၼ် ဢၼ်ပဵၼ်ပၢင်တိုၵ်းၵၼ်ယူႇ ယၢမ်းလဵဝ်ၼႆႉၵေႃႈ ပဵၼ်ၵွပ်ႈတပ်ႉသိုၵ်းမၢၼ်ႈ ႁၢင်ႈႁႅၼ်းၵႂၢတ်ႇလၢင်ႉပိုၼ်ႉတီႈ ၊ ႁၢင်ႈႁႅၼ်းတႃႇတေၵုမ်းၵမ်လႆႈ ပိုၼ်ႉတီႈလႄႈ သူင်ႇႁႅင်းသိုၵ်းမႃးၵႂၢတ်ႇလၢင်ႉ ၊ ၸင်ႇလႆႈပဵၼ်ပၢင်တိုၵ်းၵၼ် - ၽူႈၶၢၼ်ပၢၵ်ႇ RCSS/SSA ယင်းလၢတ်ႈၼင်ႇၼႆ ။


ၵဵဝ်ႇၵပ်းလွင်ႈလႆႈပဵၼ်ပၢင်တိုၵ်းၵၼ်သေ ၽူႈမီးၸၼ်ႉတီႈ ႁွင်ႈလုမ်း သုၼ်ၵၢင်လွင်ႈငမ်းယဵၼ်မၢၼ်ႈ (MPC) ဢူးလႃႉမွင်ႇသူၺ်ႇ ၵေႃႈလၢတ်ႈဝႃႈ - ဢၼ်လႆႈပဵၼ် ပၢင်တိုၵ်းၸိူဝ်းၼႆႉ တေလႆႈဝႃႈ မၼ်းပဵၼ်တၢင်းပၢႆမၼ်း ။ ၵွပ်ႈၼၼ် ၼင်ႇႁိုဝ်တေၵႄႈလိတ်ႈပၼ်ႁႃ ပၢင်တိုၵ်းၸိူဝ်းၼႆႉလႆႈၼႆႉ ႁဝ်းၶႃႈတေလႆႈႁဵတ်းသၢင်ႈ ပၢင်ဢုပ်ႇဢူဝ်းၵၢၼ်မိူင်းၵၼ် ။ ၽိူဝ်ႇတႃႉတေဝႃႈ ၵိုတ်းတိုၵ်းသေၵွၼ်ႇ ၊ ယႃႇပေႁႂ်ႈလႆႈပဵၼ်ပၢင်တိုၵ်းသေၵွၼ်ႇ ၸင်ႇဢုပ်ႇဢူဝ်းၵၼ်ၼၼ်ႉ တႃႉႁဝ်းႁၢင်ႈႁႅၼ်း ပိူဝ်ႈတႃႇပဵၼ်ပၢင်ဢုပ်ႇဢူဝ်းၵၢၼ် မိူင်းၵၼ်လႄႈ ႁႂ်ႈၸဵဝ်းႁႄႉလႆႈပၢင်တိုၵ်းသိုၵ်းသိူဝ် ၊ ႁႂ်ႈၸဵဝ်းၵိုတ်းလႆႈပၢင်တိုၵ်းသိုၵ်းသိူဝ် ၼင်ႇႁိုဝ်ပေႃးတေ ဢမ်ႇပဵၼ်သေဢိတ်းၼၼ်ႉ - ဝႃႈၼႆ ။


တပ်ႉသိုၵ်းၸိုင်ႈတႆး RCSS/SSA ၼႆႉ လူင်းလၢႆးမိုဝ်းၵိုတ်းတိုၵ်း ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် သွင်ၶၵ်ႉတွၼ်ႈၵူၺ်းပႆႇပေႃး ၊ မိူဝ်ႈဝၼ်း ၸိုင်ႈမိူင်းႁူမ်ႈတုမ် (12/02/2015) ၶွပ်ႈၶူပ်ႇ 68 ပီၼၼ်ႉၵေႃႈ တူဝ်ၸွမ်သိုၵ်းယွတ်ႈသိုၵ်း ႁွတ်ႈၽႅဝ်ၵႂႃႇတီႈၼေႇပျီႇတေႃႇသေ ၵႂႃႇလူင်းလၢႆးမိုဝ်းလိၵ်ႈၵိၼ်ၵႅၼ်ႇ တင်း ၸွမ်ၸိုင်ႈတဵင်းၸဵင်ႇ ဝႃႈတေႁူမ်ႈၵၼ်သၢင်ႈလွင်ႈငမ်းယဵၼ်လႄႈ တေႁူမ်ႈၵၼ်သၢင်ႈ လွင်ႈၶိုၼ်းလီၵၼ်ၼႂ်းၸိူဝ်ႉၸၢတ်ႈ ၸိူဝ်းၼႆႉ ။


ယွၼ်ႉပိူဝ်ႈၼၼ်လႄႈ RCSS/SSA ၼႆႉ ယင်းလႆႈထုၵ်ႇတၢင်ႇမူႇတၢင်ႇၸုမ်း ၸီႉၼႄးဝႃႈ ၼႂ်းၸုမ်းၸၢဝ်းၶိူဝ်း ယိပ်းၵွင်ႈၵၢင်ႇလုၵ်ႉၽိုၼ်ႉၼႆႉ ပဵၼ်ၸုမ်းဢၼ်ၸမ်ၸႂ်လူင်ပွင်ၸိုင်ႈမၢၼ်ႈ တင်းသိုၵ်းမၢၼ်ႈလိူဝ်တၢင်ႇၸုမ်း - ၼႆယဝ်ႉ ။