ပလိၵ်ႈ လႄႈ သိုၵ်းမၢၼ်ႈ တီႉၺွပ်းၵူၼ်းၵႃႉယႃႈမဝ်းၵမ် တီႈၵၢင်ဝဵင်းလူင်တႃႈၵုင်ႈ ယိုတ်းလႆႈယႃႈမႃႉ 3 လၢၼ်ႉမဵတ်ႉပၢႆ ။

သိုဝ်ႇၶၢဝ်ႇထႆးႁၢႆးငၢၼ်း မိူဝ်ႈဝၼ်းတီႈ 28/09/2015 ၼႆႉဝႃႈ - ႁွင်ႈၵၢၼ်ၾၢႆႇၽဵဝ်ႈမူၺ်ႉယႃႈမဝ်း ၵမ်မၢၼ်ႈ (CCDAC) ႁူမ်ႈၵၼ်တင်း ပလိၵ်ႈ လႄႈသိုၵ်းမၢၼ်ႈ ၶဝ်ႈၵူတ်ႇထတ်းတီႈႁိူၼ်းလင်ၼိုင်ႈ ဢၼ်ယူႇတၢင်းပွတ်းဢွၵ်ႇဝဵင်းတႃႈၵုင်ႈ သေတီႉၺွပ်းလႆႈ ၵူၼ်းၵႃႉယႃႈ 2 ၵေႃႉ 1) တဵင်းထုၼ်း ဢေး(Thein Tun Aye) ဢႃယု 31 ပီ 2) ဢွင်ႇတိၼ်ႇဝိၼ်း ( Aung Tin Win) ဢႃယု 20 ပီ ။


သိုဝ်ႇယင်းႁၢႆးငၢၼ်းဝႃႈၶဝ်သွင်ၵေႃႉၼႆႉပဵၼ်ၸုမ်းၵႃႉၶၢႆယႃႈမဝ်းၵမ်ၸုမ်းယႂ်ႇ ၸုမ်းၼိုင်ႈ ၼႆယဝ်ႉ ။ ဢွင်ႈတီႈႁိူၼ်းၶဝ်ၼၼ်ႉတီႉၺွပ်းလႆႈယႃႈမႃႉ 3,825,000 မဵတ်ႉ လႄႈၶိူင်ႈမိုဝ်းတႃႇႁဵတ်းယႃႈမဝ်းၵမ် ထႅင်ႈတင်းၼမ် ဝႃႈၼႆ ။


ၵဵဝ်ႇၵပ်းလွင်ႈဢၼ်လႆႈတီႉၺွပ်းယႃႈမဝ်းၵမ်ပွၵ်ႈၵမ်းၼႆႉ ယွၼ်ႉပိူဝ်ႈဝႃႈမိူဝ်ႈပူၼ်ႉမႃးဢမ်ႇပေႃး ႁိုင်ၼၼ်ႉၸဝ်ႈၼႃႈတီႈ CCDAC တီႉၺွပ်းလႆႈၸုမ်းၵႃႉယႃႈမဝ်းၵမ် သေသိမ်းလႆႈယႃႈ မႃႉထိုင် 26.7လၢၼ်ႉမဵတ်ႉ ။


ၵဵဝ်ႇလူၺ်ႈလွင်ႈယႃႈမဝ်းၵမ်ၼႆႉ ပႅၵ်ႉသမ်ႉဝႃႈမိူင်းမၢၼ်ႈၶတ်းၸႂ် ၵႄႈလိတ်ႈၽဵဝ်ႈမူၺ်ႉၼႆသေတႃႉ ၵေႃႈ မိူင်းဝၼ်းတူၵ်း ၶဝ်ယင်းပိုၼ်ၽၢဝ်ႇဝႃႈမိူင်းမၢၼ်ႈယင်းပႆႇ ၵႄႈလိတ်ႈပၼ်ႁႃယႃႈ မဝ်းၵမ်လႆႈ ၼႆယဝ်ႉ ။