ၵဵဝ်ႇၵပ်းလွင်ႈ ၸိုင်ႈမိူင်းလူင် မိူင်းမႁႃဢမ်းၼၢၸ်ႈၶဝ်မႃး ၸိမ်ယုင်ႈၵဝ်းၸွမ်း ၶၵ်ႉၵၢၼ်ငမ်းယဵၼ် ၼႂ်းၸိုင်ႈမိူင်းႁူမ်ႈတုမ်မၢၼ်ႈၼၼ်ႉ ဢမ်ႇထုၵ်ႇလီပဵၼ်။ တီႈတႄႉမၼ်း ထုၵ်ႇလီပၼ်ႁႅင်းၵမ်ႉထႅမ် ၶေႃႈလႆႈၸႂ် တူၵ်းလူင်း ဢၼ်ၸုမ်းၸၢဝ်းၶိူဝ်း တင်းလူင်ပွင်ၸိုင်ႈမၢၼ်ႈ ဢုပ်ႇဢူဝ်းၵၼ် ။

ဝၢၼ်ႈမိူင်းႁဝ်း ၸိုင်ႈမိူင်းႁူမ်ႈတုမ်မၢၼ်ႈၼႆႉ ၶဝ်ႈမႃးပႃးၼႂ်း သိုၵ်းယဵၼ် (Cold War) ဢၼ်ၸိုင်ႈမိူင်းယႂ်ႇလူင် မႁႃဢမ်းၼၢၸ်ႈၶဝ် မိူၼ်ၼင်ႇၸိုင်ႈမိူင်း ဢမႄႊရိၵႃႊ တင်းယူႊရွပ်ႊပဵၼ်ၾၢႆႇၼိုင်ႈ ၊ ရတ်ႊသျိူဝ်ႊ တင်းၶႄႇပဵၼ်ၾၢႆႇၼိုင်ႈ ။ ၶဝ်သွင်ၾၢႆႇဢမ်ႇယိုဝ်းၵၼ်ၵမ်းသိုဝ်ႈၵေႃႈ ၶဝ်ဢဝ်တူဝ်တႅၼ်းၶဝ်ယိုဝ်းၵၼ် ။ ၵွပ်ႈၼၼ် ၸင်ႇႁွင်ႉဝႃႈ သိုၵ်းယဵၼ် ဢၼ်ဢမ်ႇၸႂ်ႈသိုၵ်းမႆႈ ။


ၸိုင်ႈမိူင်းလူင်ၶဝ်တႄႉ ပဵၼ်သိုၵ်းယဵၼ်ယူႇ ၊ ၵူၺ်းၵႃႈ ဝၢၼ်ႈမိူင်းႁဝ်းတႄႉ ဢမ်ႇၸႂ်ႈသိုၵ်းယဵၼ် ပဵၼ်သိုၵ်းမႆႈ ။ ႁဝ်းၼႆႉ ပဵၼ်တူဝ်တႅၼ်းၶဝ် ဢၼ်ၶဝ်ဢဝ်ႁဝ်းယိုဝ်းၵၼ်လႄႈ ၵူၼ်းမိူင်းႁဝ်းၵေႃႈ လႆႈလူမ်ႉသုမ်းမႃးၶူဝ်းၶွင် ႁႆႈၼႃးလႄႈ ၸီဝိတ်ႉသၢႆၸႂ်မႃးတင်းၼမ်တင်းလၢႆ ။


တင်ႈတႄႇပီ 2011 မႃး ၸိုင်ႈမိူင်းႁူမ်ႈတုမ်မၢၼ်ႈ ၵေႃႇသၢင်ႈ ႁဵတ်းၶၵ်ႉၵၢၼ်ငမ်းယဵၼ်ၼႆႉ ၸိုင်ႈမိူင်းလူင် ဢၼ်ထုၵ်ႇလီလႆႈၸွႆႈထႅမ်ပၼ်ၼၼ်ႉ သမ်ႉၶဝ်ႈမႃးယုင်ႈၵဝ်းၸွမ်း ။


မိူင်းလူင် 2 မိူင်းလူင်ၼႆႉ တႃႇမိူင်းၼိုင်ႈ (ၵေႃႉထီႉ 1) ၵႃႈပူၼ်ႉမႃးတေႃႇထိုင်ပီ 2011 ပဵၼ်ၽူႈၶဵၼ်ၶုၼ်မိူင်းမၢၼ်ႈ ။ ၵူၺ်းၵႃႈ တင်ႈတႄႇပီ 2011 မႃးၼႆႉ မႃးပဵၼ်ဢူၺ်းၵေႃႉ (တႆးၵေႃႉ) ၶုၼ်မိူင်းမၢၼ်ႈမႃး ။ မိူဝ်ႈဢွၼ်တၢင်း ၵွပ်ႈပဵၼ်ၽူႈၶဵၼ်ၶွင် ၶုၼ်မိူင်းမၢၼ်ႈလႄႈ ယၢမ်ႈၸုၵ်းၾၢႆႇ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း မိူင်းမၢၼ်ႈ ။


ၵူၺ်းၵႃႈ မိူဝ်ႈလဵဝ် ငဝ်းလၢႆးမၼ်းပိၼ်ႈၽိူၼ်ယဝ်ႉ ၊ ၵေႃႉထီႉ 1 ၼႆႉ လွင်ႈဝႃးမၼ်းပဵၼ်ဢူၺ်းၵေႃႉလီ ၶုၼ်မိူင်းမၢၼ်ႈ မိူဝ်ႈလဵဝ်ၼႆႉၼႆၼၼ်ႉ မၼ်းဢမ်ႇသိူင်ႇဢမ်ႇလပ်ႉယဝ်ႉ ။


လိုၼ်းသုတ်း ဢမ်ႇႁိုင်ဢမ်ႇၼၢၼ်းၼႆႉ ၸဝ်ႈၼႃႈတီႈၽွင်းတၢင်ၾၢႆႇဢူၺ်းၵေႃႉၼႆႉ ႁွင်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ်သေ လၢတ်ႈဝႃႈ - ၵၢၼ်ၵိုတ်းတိုၵ်း ပတ်းပိုၼ်ႉၸိုင်ႈမိူင်း (NCA) ၼႆႉ ၸိူဝ်းသူထုၵ်ႇလႆႈ ဢွၼ်ၵၼ်လူင်းလၢႆးမိုဝ်း ။ တီႈတႄႉမၼ်း ထုၵ်ႇလႆႈလၢတ်ႈတီႈ လူင်ပွင်ၸိုင်ႈမၢၼ်ႈဝႃႈ မိူဝ်ႈလဵဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တႃႇလူင်းလၢႆးမိုဝ်း NCA ၼႆႉ မီးယူႇ 21 ၸုမ်း ၊ ႁႂ်ႈလႆႈလူင်းလၢႆးမိုဝ်း တင်း 21 ၸုမ်း ။ တီႈဢေႇသုတ်းမၼ်း ႁႂ်ႈလႆႈလူင်း 18 ၸုမ်း ၊ ၵွပ်ႈပိူဝ်ႈဝႃႈ 18 ၸုမ်းၼႆႉ ပဵၼ်ၸုမ်းယိပ်းၵွင်ႈၵၢင်ႇ ၊ (3 ၸုမ်းဢမ်ႇယိပ်းၵွင်ႈ) ။ လွင်ႈၼႆႉ ၶဝ်ဢမ်ႇၵႂႃႇလၢတ်ႈတီႈမၢၼ်ႈသေ သမ်ႉမႃးလၢတ်ႈတီႈၸၢဝ်းၶိူဝ်းဝႃႈ မီး 16 ၸုမ်းၵေႃႈ တေလႆႈဢွၼ်ၵၼ် လူင်းလၢႆးမိုဝ်းၸိူဝ်းၼႆႉ မၼ်းဢမ်ႇထုၵ်ႇမႅၼ်ႈ ။ တီႈၼႆႈ တိုၼ်းၼႄဝႃႈ ၶဝ်ပဵၼ်ၾၢႆႇ လူင်ပွင်ၸိုင်ႈမၢၼ်ႈလုမ်းလုမ်း ။


ပေႃးၶႂ်ႈႁႂ်ႈမိူင်းမၢၼ်ႈၵတ်းယဵၼ် ပိူဝ်ႈတႃႇ ႁႂ်ႈၸုမ်းၸၢဝ်းၶိူဝ်း လူင်းလၢႆးမိုဝ်း NCA ထုၵ်ႇလႆႈလၢတ်ႈ တီႈလူင်ပွင်ၸိုင်ႈမၢၼ်ႈ ၊ သူၼ်းဢီးတီႈမၢၼ်ႈ ။ ၵူၺ်းၵႃႈ ၶဝ်ႉသမ်ႉၵႂႃႇယူႇၾၢႆႇမၢၼ်ႈသေ မႃးတဵၵ်းတေႃႇၸုမ်းၸၢဝ်းၶိူဝ်းၼႆႉ ဢမ်ႇလီပဵၼ် ။ မႃးတဵၵ်းၸုမ်းၸၢဝ်းၶိူဝ်းလူင်းလၢႆးမိုဝ်းၵေႃႈ သမ်ႉဢမ်ႇဢွၵ်ႇၼႃႈဢွၵ်ႇတႃ ၊ ဢမ်ႇဢွၵ်ႇၶၢဝ်ႇငၢဝ်းထႅင်ႈလူးၵွၼ်ႇ ။


ထႅင်ႈမိူင်းၼိုင်ႈၼႆႉ (ၵေႃႉထီႉ 2) ယူႇၸမ်ႁဝ်း၊ မၼ်းၼႆႉ ၵႃႈၵွၼ်ႇပူၼ်ႉမႃး ပဵၼ်ဢူၺ်းၵေႃႉလီ ၵၼ်တင်းၶုၼ်မိူင်းမၢၼ်ႈမႃး တေႃႇထိုင်ပီ 2011 ။ ၵူၺ်းၵႃႈ ၵွပ်ႈၵေႃႉထီႉ 1 ဢၼ်ယၢမ်ႈပဵၼ်ၽူႈၶဵၼ်တေႃႇ မိူင်းမၢၼ်ႈမႃးၼၼ်ႉ မႃးႁဵတ်းဢူၺ်းလီ တေႃႇမိူင်းမၢၼ်ႈမႃးလႄႈ ၵေႃႉထီႉ 2 ၼႆႉ ပဵၼ်ဢူၺ်းလီ ၵၼ်တင်းၶုၼ်မိူင်းမၢၼ်ႈမႃးသေတႃႉ တင်ႈတႄႇပီ 2012 မႃးၼႆႉ လႆႈၶဵင်ႈၶႅင်ၵၼ်တင်း ၶုၼ်မိူင်းမၢၼ်ႈမႃး ။ မီးလွင်ႈသင်ၵေႃႈ ဢမ်ႇပေႃးၸိုၵ်းပေႃးၸိူဝ်ႈ ၊ လၢတ်ႈတႅၵ်ႇလႅင်းၵမ်းလဵဝ် ၊  ဢမ်ႇၸႂ်ႉၽႃသႃၽွင်းတၢင် ၽႃသႃဢူၼ်ႈဢွၼ်ႇယဵၼ်ႇငႄႈ ၼင်ႇၵႃႈပူၼ်ႉမႃး ။


တူဝ်ယၢင်ႇမၼ်း မိူၼ်ၼင်ႇမိူဝ်ႈပူၼ်ႉမႃး ဝၼ်းတီႈ 05/10/2011 လုၵ်ႈႁိူဝ်းမိူင်းၶဝ် 13 ၵေႃႉ ထုၵ်ႇၶႃႈႁႅမ်တၢႆ လူၺ်ႈလၢႆးႁုၵ်းႁၢႆႉ တီႈၼႂ်းမႄႈၼမ်ႉၶွင် သၢမ်ၸဵင်ႇၶမ်း။ ပေႃးထုၵ်ႇၶႃႈတၢႆယဝ်ႉ ၵႅမ်ၽွင်းလူင်ၾၢႆႇၼွၵ်ႈမိူင်းၶဝ် ႁွင်ႉၽွင်းတၢင်လၢဝ်း / မၢၼ်ႈ / ထႆးသေ တဵၵ်းလၢတ်ႈၶဝ်ဝႃႈ ပဵၼ်ၼမ်ႉမိုဝ်းၽႂ်ၵေႃႈ ၸိူဝ်းသူတေလႆႈ ၸွပ်ႇထတ်းသေ ဢဝ်လိူင်ႈ ။ ဝၢႆးၼၼ်ႉ ၽူႈၶၢၼ်ပၢၵ်ႇၾၢႆႇမၼ်း ၸဝ်ႈၵူၺ်းၼင်ႇၵဝ်ႇ လၢတ်ႈဝႃႈ ၽွင်းမိူင်းလူင်ႁဝ်း လၢတ်ႈၵႂႃႇၼႆႉ မၼ်းဢမ်ႇပေႃးယဵၼ်ႇငႄႈလီ ၊ ဢမ်ႇမိူၼ်ၽႃသႃၽွင်းတၢင် - ၼႆယဝ်ႉ ။


ထႅင်ႈလွင်ႈၼိုင်ႈ ပူၼ်ႉမႃးမိူဝ်ႈလိူၼ်ၾႅပ်ႊၿိဝ်ႊရီႊ 2013  ၾၢႆႇလူင်ပွင်ၸိုင်ႈမၢၼ်ႈလႄႈ ၸုမ်းၸၢဝ်းၶိူဝ်း ဢုပ်ႇဢူဝ်းၵၼ် ၊ ၸိုင်ႈမိူင်းလူင် (ၵေႃႉထီႉ 2) ၵေႃႈႁပ်ႉပဵၼ်ၸဝ်ႈႁိူၼ်း ။ လွင်ႈၼႆႉ လၢႆၾၢႆႇဢွၼ်ၵၼ်ၸူမ်းသိူဝ်းၸွမ်း ၊ ၵွပ်ႈႁၼ်ဝႃႈ ပီႈၼွင်ႉယူႇဢိူမ်ႈၸမ်ႁိမ်းႁဝ်း ဢၼ်ပဵၼ်ၸိုင်ႈမိူင်းလူင် ၵမ်ႉယၼ်ၸွႆႈထႅမ်ႁဝ်း။ လႆႈၸတ်းပၢင်ၵုမ် ဢုပ်ႇဢူဝ်းၵၼ်သေ ၵူႈသမ်ႇၵူႈပိူင် ယဝ်ႉတူဝ်ႈၵႂႃႇလီငၢမ်း တေႃႇပေႃးထိုင် မီးၶေႃႈလႆႈၸႂ်ၶဵၼ်ႇတႅမ်ႈဢွၵ်ႇမႃး ၶေႃႈတူၵ်းလူင်းယုၵ်းယၢင်ႇ။ ၵူၺ်းၵႃႈ ၽိူဝ်ႇမႃးဢၢၼ်ႇၼႄ ၶေႃႈတူၵ်းလူင်းယုၵ်းယၢင်ႇၵေႃႈ မၼ်းပဵၼ်ၵူၼ်းၸွႆႈထႅမ်ၵူၺ်းသေတႃႉ မၼ်းသမ်ႉလုၵ်ႉလၢတ်ႈဝႃႈ တေလႆႈမူၼ်ႉမႄးၵႄႈလိတ်ႈၶေႃႈၼၼ်ႉၶေႃႈၼႆႉ ။ တီႈတႄႉမၼ်း ပၼ်ႁႃဢၼ်ၼႆႉ ပဵၼ်ပၼ်ႁႃ လူင်ပွင်ၸိုင်ႈမၢၼ်ႈတင်း ၸၢဝ်းၶိူဝ်းႁဝ်းၵူၺ်း ၊ မၼ်းဢမ်ႇၵဵဝ်ႇၶွင်ႈတင်းၶဝ် ။ ယွၼ်ႉၼၼ် ပဵၼ်ဢၼ်တုမ်ႉတိူဝ်ႉၸႂ်ၵၼ်ၵႂႃႇ သိုဝ်ႈၽႂ်သိုဝ်ႈမၼ်း ။


လိုၼ်းသုတ်း ပူၼ်ႉမႃးဢမ်ႇႁိုင်ဢမ်ႇၼၢၼ်း ၼႂ်းလိူၼ်ဢေႃႊၵတ်ႊသ် - သႅပ်ႊထႅမ်ႊၿိူဝ်ႊ (2015) ၼႆႉ ယိင်ႈၶႅၼ်းလႆႈႁူႉတႅၵ်ႇလႅင်းမႃး။ မၢင်ၵမ်းၵေႃႈလၢတ်ႈၵမ်းသိုဝ်ႈ ၊ မၢင်ၵမ်းၵေႃႈ ႁႂ်ႈၵူၼ်းတၢင်ႇၵေႃႉလၢတ်ႈတႅၼ်း တီႈလူင်ပွင်ၸိုင်ႈမၢၼ်ႈဝႃႈ - “ ယႃႇပေပၼ်ဢူၺ်းၵေႃႉ (ၵေႃႉထီႉ 1) မႃးၵဝ်းၸွမ်းၵၢၼ်မိူင်းသူ ” ။ ဢၼ်ဢူၺ်းၵေႃႉ ၵေႃႉထီႉ 2 လၢတ်ႈၸိူင်ႉၼႆၼႆႉ မၼ်းပွင်ႇဝႃႈ မိူင်းမၢၼ်ႈ ပဵၼ်ဢူၺ်းၵေႃႉၶဝ်ဢမ်ႇၸႂ်ႈ ၊ ပဵၼ်လုၵ်ႈၼွင်ႉၶဝ် ။


ပေႃးဝႃႈပွၵ်ႈၼႆႉ ႁဝ်းႁဵတ်းၸွမ်းမၼ်းၼႆ ထႅင်ႈပွၵ်ႈၼိုင်ႈမႃးၵေႃႈ တေလႆႈႁဵတ်းၸွမ်းထႅင်ႈ ။ ပေႃးႁဵတ်းၸွမ်းတိၵ်းတိၵ်းၵေႃႈ မိူင်းႁဝ်းၼႆႉ တေပဵၼ်မိူင်းၶဝ်ၵႂႃႇယဝ်ႉ ။ ဢၼ်ၶဝ်ႁဵတ်းသၢင်ႈယူႇၼႆႉ ဢမ်ႇၸႂ်ႈမိူင်းတႆးၵူၺ်း ဢၼ်တေၺႃးၸၢၵ်ႇမၼ်း ၊ ၸိုင်ႈမိူင်းႁူမ်ႈတုမ်မၢၼ်ႈတင်းမိူင်းၵေႃႈ တေၺႃးၸၢၵ်ႇမၼ်းၼင်ႇၵဝ်ႇ ။ ၵွပ်ႈပိူဝ်ႈ ၸိူင်ႉၼၼ်လႄႈ လၢႆးႁဵတ်းလၢႆးသၢင်ႈ ၸိုင်ႈမိူင်းလူင်သွင်မိူင်းၼႆႉ မၼ်းတိုၼ်းဢမ်ႇထုၵ်ႇ ။ တိုၼ်းဢမ်ႇထုၵ်ႇလီႁဵတ်းၸိူင်ႉၼႆ ။


ဢၼ်ၶဝ်သွင်ၸိုင်ႈမိူင်းလူင် ထုၵ်ႇလီႁဵတ်းသၢင်ႈၼႆႉ  ႁဝ်း (ၸုမ်းၸၢဝ်းၶိူဝ်း တင်းလူင်ပွင်ၸိုင်ႈမၢၼ်ႈ) မီးလွင်ႈဢုပ်ႇဢူဝ်းၵၼ် လွင်ႈငမ်းယဵၼ်ၼႆၵေႃႈ ႁႂ်ႈပၼ်ႁဝ်းဢုပ်ႇၵၼ်လီလီ ၊ မီးၶေႃႈလႆႈၸႂ် တူၵ်းလူင်းၵၼ်ၼႆၵေႃႈ ၶဝ်ထုၵ်ႇလႆႈဢွၼ်ၵၼ်ၸွႆႈ ။ ပေႃးပဵၼ်ဢူၺ်းၵေႃႉၵၼ် ထုၵ်ႇလီပဵၼ်ၸိူင်ႉၼၼ် ။ ၶဝ်ဢမ်ႇတၢပ်ႈၵူဝ် ဢမ်ႇတၢပ်ႈမႆႈၸႂ်ဝႃႈ ပေႃးႁဝ်းလႆႈၸႂ်တူၵ်းလူင်းၵၼ်ယဝ်ႉ ႁဝ်းတေၵႂႃႇယူႇၾၢႆႇၼၼ်ႉၾၢႆႇၼႆႉ ၊ ၵူဝ်ၶဝ်တေဢမ်ႇယူႇၾၢႆႇၵဝ် ၸိူဝ်းၼႆႉ ။ ၵွပ်ႈဝႃႈမိူင်းမၢၼ်ႈၼႆႉ ယူႇၼႂ်းၵႄႈၵၢင် ၸိုင်ႈမိူင်းလူင်ၶဝ်ဝႆႉလႄႈ တႃႇမိူင်းမၢၼ်ႈတေယူႇၾၢႆႇၼိုင်ႈသေ သၢၼ်ၶတ်းၾၢႆႇၼိုင်ႈၼၼ်ႉ မၼ်းတေဢမ်ႇႁဵတ်း ။


ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၼႆႉ မၼ်းဢႅဝ်ႇႁႃသိုဝ်ႉၶိူင်ႈၵွင်ႈၵၢင်ႇယူႇ ၊ မၼ်းသိုဝ်ႉၵႃႈႁိုဝ်ၵေႃႈယဝ်ႉ ၸွင်ႇမၼ်းတေၶဵင်ႇလႆႈမိူင်းလူင်ၸိူဝ်းၼႆႉႁိုဝ် ?။ ၵွပ်ႈၼၼ် ၶေႃႈတူၵ်းလူင်း ဝူင်ႈၵၢင်မၢၼ်ႈလႄႈ ၸုမ်းၸၢဝ်းၶိူဝ်းၸိူဝ်းၼႆႉ ၶဝ်ဢမ်ႇတၢပ်ႈမႆႈၸႂ်ဝႃႈ တေမႃးပဵၼ်ၽေးတေႃႇၶဝ်။ ႁဵတ်းႁိုဝ်ၵေႃႈ ၶေႃႈလႆႈၸႂ်တူၵ်းလူင်းၵၼ်ၸိူဝ်းၼႆႉ တိုၼ်းတေပဵၼ်တႃႇ ၼမ်ႉတွၼ်းၽွၼ်းလီ ၸိုင်ႈမိူင်းႁူမ်ႈတုမ်မၢၼ်ႈ လႄႈ ၸိုင်ႈမိူင်းႁိမ်းႁွမ်းၸိူဝ်းၼႆႉ လႆႈလီလႆႈပဵၼ်ၸွမ်းၵူၺ်း ။


တီႈတႄႉမၼ်း ဢမ်ႇမီးၶဝ်ၸိုင်ႈမိူင်းလူင်ၸိူဝ်းၼႆႉသေ ပွႆႇပၼ်ႁဝ်းၸၢဝ်းၶိူဝ်း တင်းမၢၼ်ႈ ဢုပ်ႇၵၼ်ၵူၺ်းၵေႃႈ မၼ်းဢမ်ႇငၢႆႈ ။ ၶဝ်သမ်ႉမႃးၵဝ်းၸွမ်းထႅင်ႈၼႆႉ မၼ်းၶႅၼ်းယၢပ်ႇ ။ မၼ်းမိူၼ်ၵၼ်တင်းပၢၼ်ၵူႈပွၵ်ႈ ။ ပၢၼ်ၵူႈပွၵ်ႈၼႆႉ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇလုၵ်ႉၽိုၼ်ႉ ၸိူဝ်းဢၼ်သၢၼ်ၶတ်း ၶွမ်ႊမိဝ်ႊၼိတ်ႊ ယူႇၾၢႆႇၼိုင်ႈ၊ ၸိူဝ်းၵမ်ႉထႅမ်ၶွမ်ႊမိဝ်ႊၼိတ်ႊ သမ်ႉယူႇထႅင်ႈၾၢႆႇၼိုင်ႈ ၊ ႁဵတ်းႁႂ်ႈၸုမ်းၸၢဝ်းၶိူဝ်းလုၵ်ႉၽိုၼ်ႉ လႆႈတိုၵ်းယိုဝ်းတေႃႇသူႈၵၼ်တင်း ၸုမ်းသိုၵ်းမၢၼ်ႈၵူၺ်းပႆႇပေႃး ၸုမ်းၸၢဝ်းၶိူဝ်းၼင်ႇၵၼ်ၵေႃႈ သမ်ႉတိုၵ်းယိုဝ်းမင်ၵၼ်ထႅင်ႈ ။ မိူဝ်ႈလဵဝ်ၵေႃႈ ပေႃးဢမ်ႇသၢင်ႇထုၵ်ႇ မၼ်းၸၢင်ႈပဵၼ်ၸိူင်ႉၼၼ်ထႅင်ႈ ။


ၸိူင်ႉႁိုဝ်ၵေႃႈယဝ်ႉ မိူင်းတႆးၼႆႉ မၼ်းဢမ်ႇၸၢင်ႈပဵၼ်ၽူႈၶဵၼ် ၵၼ်တင်းမိူင်းလႂ် ၊ မိူင်းတႆးၼႆႉ ၵွပ်ႈၶႂ်ႈယူႇထၢင်ႇႁၢင်ႈလွတ်ႈလႅဝ်းလႄႈ ႁူႉၵႃႈတေလႆႈပဵၼ်ဢူၺ်းၵေႃႉၵူႈၾၢႆႇၼၼ်ႉၵူၺ်း ။