ၸုမ်း PSLF / TNLA ပိုၼ်ၽၢဝ်ႇ ပေႃးလူင်ပွင်ၸိုင်ႈမၢၼ်ႈ တင်းတပ်ႉသိုၵ်းမၢၼ်ႈ ပၢၵ်ႈပႅတ်ႈဝႆႉ တၢင်ႇမူႇတၢင်ႇၸုမ်းသေ တေလူင်းလၢႆးမိုဝ်း NCA ၼႆ PSLF / TNLA တေဢမ်ႇလူင်းလၢႆးမိုဝ်းၸွမ်း ။

မိူဝ်ႈဝၼ်းတီႈ 28/09/2015 (မိူဝ်ႈဝႃး) ၼႆႉ တႅဝ်းႁူမ်ႈပူတ်းပွႆႇ မိူင်းပလွင်ႈ / တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈ တဢၢင်း (PSLF/TNLA) ဢွၵ်ႇၶေႃႈပိုၼ်ၽၢဝ်ႇ 3 ၶေႃႈ ။


1. တပ်ႉသိုၵ်းမၢၼ်ႈၼႆႉ မိူဝ်ႈလဵဝ် ႁၢင်ႈႁႅၼ်းသိုၵ်းသေၽိုတ်ႉတိုၵ်း တပ်ႉသိုၵ်း TNLA ႁၢဝ်ႈႁႅင်းမႃးလိူဝ်ၵဝ်ႇ ။ ၵွပ်ႈၼၼ် တပ်ႉသိုၵ်းတဢၢင်းႁဝ်းႁၼ်ထိုင်ဝႃႈ ၾၢႆႇသိုၵ်းမၢၼ်ႈဢမ်ႇႁၼ်လီ ဢၼ်ဝႃႈတေလႆႈၶဝ်ႈႁူမ်ႈပႃးတင်းမူတ်း ၼႂ်းၵၢၼ်လူင်းလၢႆးမိုဝ်း NCA ။ ထႅင်ႈပိူင်ၼိုင်ႈၵေႃႈ ၶႂ်ႈဢဝ်လွင်ႈ ပၢင်တိုၵ်းသိုၵ်းသိူဝ်ၸိူဝ်းၼႆႉသေ ႁဵတ်းၵူတ်ႉငေႃးၼိူဝ်ပၢင်လိူၵ်ႈတင်ႈ ဢၼ်တေမႃးၼႆႉ - တပ်ႉသိုၵ်းတဢၢင်း ႁၼ်ထိုင်ၸိူင်ႉၼႆ ။


ၵွပ်ႈၼၼ်လႄႈ ပၢင်လိူၵ်ႈတင်ႈၼႆႉ ၵူၼ်းဝၢၼ်ႈၵူၼ်းမိူင်း ထုၵ်ႇလႆႈတွတ်ႈၶႅပ်းၵၢင်ၸႂ် ထၢင်ႇႁၢင်ႈလွတ်ႈလႅဝ်း ၊ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉ ၵုမ်ႇလႆႈပၢႆႈၽေးသိုၵ်းသိူဝ်ယူႇ ၵူႈမိုဝ်ႉၵူႈဝၼ်း ။


2. PSLF / TNLA ၼႆႉ ဢမ်ႇယွမ်းႁပ်ႉလႆႈ ပိူင်ငဝ်ႈပိုင်းမိူင်း 2008 ပၢင်လိူၵ်ႈတင်ႈပီ 2015 ၵေႃႈ ဢမ်ႇယွမ်းႁပ်ႉၼင်ႇၵဝ်ႇ ။ ၵူၺ်းၵႃႈ ၼႂ်းၼႃႈလိၼ်ဢၼ်တပ်ႉသိုၵ်းတဢၢင်း (TNLA) ၵုမ်းၵမ်ဝႆႉၸိူဝ်းၼႆႉတႄႉ ၶႂ်ႈႁႂ်ႈပဵၼ်ပၢင်လိူၵ်ႈတင်ႈ ထၢင်ႇႁၢင်ႈလွတ်ႈလႅဝ်း ။ ပႃႊတီႊၵၢၼ်မိူင်း ဢၼ်တေၶဝ်ႈလိူၵ်ႈတင်ႈၸိူဝ်းၼႆႉ တပ်ႉသိုၵ်းတဢၢင်း ဢမ်ႇၵမ်ႉထႅမ် ၊ ၵူၺ်းၵႃႈ  ဢၼ်ၶဝ်တေမႃးႁူၺ်းသူၼ်းႁႃသဵင် တႃႇၵၢၼ်လိူၵ်ႈတင်ႈၸိူဝ်းၼႆႉ ဢမ်ႇသၢၼ်ၶတ်း ဢမ်ႇယုင်ႈၵဝ်းၶဝ် ။ ၵွပ်ႈၼၼ်လႄႈ မႃးသူၼ်းတုမ်ႁႃသဵင် ၼႂ်းၼႃႈလိၼ်ဢၼ် တပ်ႉသိုၵ်းတဢၢင်းၵုမ်းၵမ်လႆႈ ထၢင်ႇႁၢင်ႈလွတ်ႈလႅဝ်း။ ၵူၺ်းၵႃႈ ယႃႇပေမႃး ႁူၺ်းသူၼ်းႁႃသဵင် ဢုပ်ႇလၢတ်ႈၵႂၢမ်း ဢၼ်ထၢင်ႇလဵၵ်ႉသႂၢင်းၽႅပ်ႉၼိူဝ် ၵူၼ်းၶိူဝ်းၼိုင်ႈလႄႈ ၶိူဝ်းၼိုင်ႈ ၊ ႁဵတ်းႁႂ်ႈဝူင်ႈၵၢင် ၵူၼ်းၶိူဝ်းၼိုင်ႈလႄႈ ၶိူဝ်းၼိုင်ႈ မီးပၼ်ႁႃၵၼ် ၊  ပေႃးဝႃႈဢုပ်ႇလၢတ်ႈၸိူင်ႉၼႆ တေဢမ်ႇယွမ်းႁပ်ႉလႆႈ ။


3. လူင်ပွင်ၸိုင်ႈမၢၼ်ႈ တင်းတပ်ႉသိုၵ်းမၢၼ်ႈၼႆႉ ပေႃးဝႃႈၵိုတ်းတိုၵ်းပတ်းပိုၼ်ႉတူဝ်ႈမိူင်းယဝ်ႉ ၶႂ်ႈဢဝ်လၢႆးၵၢၼ်မိူင်း ပိူဝ်ႈတႃႇဢုပ်ႇဢူဝ်းၵႄႈလိတ်ႈ ပၼ်ႁႃၵၢၼ်မိူင်းၼၼ်ႉ ၶဝ်ဢမ်ႇမီးၵၢင်ၸႂ် ဢၼ်ၸိုၼ်ႈၸၢင်ႇ ။ ၵွပ်ႈၼၼ် တႃႇတေလူင်းလၢႆးမိုဝ်း NCA ၼႆႉ ၸင်ႇမီးၶေႃႈႁၢမ်ႈၼိူဝ် ၸုမ်းတူဝ်တႅၼ်းၸၢဝ်းၶိူဝ်း EAOs ပိူင်ၼိုင်ႈယဝ်ႉပိူင်ၼိုင်ႈ ။ ၵူၺ်းၵႃႈ PSLF / TNLA ႁၼ်ထိုင်ဝႃႈ လုၵ်ႈၸုမ်း EAOs ၵမ်ႉထႅမ် ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA ) ၊ ၵွပ်ႈၼၼ်  ဢၼ်တေၵိုတ်းတိုၵ်း ပတ်းပိုၼ်ႉတူဝ်ႈမိူင်းၼၼ်ႉ ပိူဝ်ႈတႃႇ ႁႂ်ႈလႆႈၶဝ်ႈပႃးၵူႈမူႇၵူႈၸုမ်းၵေႃႈ တေၶတ်းၸႂ်ၵႂႃႇ ။


ၵူၺ်းၵႃႈ ပေႃးပၢၵ်ႈပႅတ်ႈဝႆႉၸုမ်းၼိုင်ႈသေ ႁႅၼ်းသိုၵ်းလေႃႇတိုၵ်းၸုမ်းၼိုင်ႈ ၊ သမ်ႉတေႁဵတ်းပၢင်လူင်းလၢႆးမိုဝ်း NCA ၵႂႃႇၼႆႉတႄႉ တပ်ႉသိုၵ်း PSLF / TNLA ဢမ်ႇယွမ်းႁပ်ႉလႆႈ ။ ပေႃးႁဵတ်းၸိူင်ႉၼႆ တေဢမ်ႇလူင်းလၢႆးမိုဝ်း NCA ၸွမ်း - ဝႃႈၼႆ ။