ၵူၼ်းဝၢၼ်ႈၼႃးလႅင် ထုင်ႉမိူင်းပဵင်း ၸႄႈတွၼ်ႈတူၼ်ႈတီး ထုၵ်ႇသိုၵ်းမၢၼ်ႈ ယိုဝ်းၵွင်ႈလွၵ်ႇ ၊ တီႉၺွပ်းထတ်းထၢမ် ပေႃႉထုပ်ႉ ၊ ၸီႉၼႄးဝႃႈပဵၼ်သိုၵ်းတႆး ယွၼ်ႉတိုဝ်းမူၵ်ႇႁူဝ်လၢႆး ။

ဝၼ်းတီႈ 29/09/2015 (မိူဝ်ႈဝႃး) ယၢမ်းမွၵ်ႈ 16:45 မူင်း ၊ သိုၵ်းမၢၼ်ႈတႂ်ႈတပ်ႉၸုမ်းလူင် (တပ်ႉမ) 55 ၊ တပ်ႉၶလယ 249 ဢၼ်ၵႂႃႇတူင်ႉၼိုင်တၢင်း မိူင်းပဵင်းၼၼ်ႉ ၵႂႃႇႁၼ်ၵူၼ်းဝၢၼ်ႈ ၼုမ်ႇၸၢႆးၵေႃႉၼိုင်ႈ ၸိုဝ်ႈၸၢႆးတႃႇလ ၵူၼ်းဝၢၼ်ႈၼႃးလႅင် ထုင်ႉမိူင်းပဵင်း တိုဝ်းမူၵ်ႇႁူဝ်လၢႆး ။ သိုၵ်းမၢၼ်ႈတပ်ႉၼႆႉ ယိုဝ်းၵွင်ႈလွၵ်ႇမၼ်းၸၢႆးသေ တီႉၺွပ်းမတ်ႉဢဝ်မၼ်းၸၢႆးၵႂႃႇ ထတ်းထၢမ်တႂ်ႈတႂ်ႈၼိူဝ်ၼိူဝ် ။


ၵဵဝ်ႇၵပ်းလွင်ႈၼႆႉ ယွၼ်ႉၸၢႆးတႃႇလ တိုဝ်းမူၵ်ႇႁူဝ်လၢႆးလႄႈ သိုၵ်းမၢၼ်ႈမၢပ်ႇၼႄးဝႃႈ မၼ်းၸၢႆး ပဵၼ်ၵူၼ်းသိုၵ်းတႆး တပ်ႉသိုၵ်းၸိုင်ႈတႆး RCSS/SSA ၼႆသေ ပေႃႉပၢပ်းထုပ်ႉႁႅမ်ယဝ်ႉ ၸင်ႇပွႆႇပၼ်ၶိုၼ်း မွၵ်ႈႁူဝ်ၶမ်ႈယၢမ်း 6 မူင်း (18:00 မူင်း) - ၼႆယဝ်ႉ ။


ၸၢႆးတႃႇလၼႆႉ ယူႇဝၢၼ်ႈၼႃးလႅင် ထုင်ႉမိူင်းပဵင်း ( လွၵ်ႈၸွၵ်ႇ မိူင်းပဵင်း ၊ ၼႂ်းၸႄႈဝဵင်းႁူဝ်ပူင်း တွၼ်ႈၼိူဝ် ၊ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ။


ပွတ်းတွၼ်ႈၼႆႉ ပဵၼ်ပိုၼ်ႉတီႈၼႃႈလိၼ် ဢၼ်တပ်ႉသိုၵ်းၸိုင်ႈတႆး (RCSS/SSA) တူင်ႉၼိုင် ။ ပွတ်းတွၼ်ႈၼႆႉ ဢိင်ၼိူဝ်သိုၵ်းတႆး RCSS/SSA တင်းသိုၵ်းမၢၼ်ႈ မီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်လႄႈတၢင်းပွတ်းတွၼ်ႈၼႆႉ ပႃႊတီႊၵၢၼ်မိူင်းၶဝ် ၸိူဝ်းၵႂႃႇလူင်းသူၼ်းတုမ်ႁႃသဵင်ၵေႃႈ ဢမ်ႇၸၢင်ႈၵႂႃႇႁႃသဵင်ထၢင်ႇႁၢင်ႈလွတ်ႈလႅဝ်း - ၼေႃႇၽူႈတႅၼ်း ဢၼ်တေၶဝ်ႈၶႅင်ႇ ၸၼ်ႉသၽႃးၵူၼ်းမိူင်း (သၽႃးလၢင်ႈ) ၵေႃႉၼိုင်ႈလၢတ်ႈ ။