ၾႆးမႆႈ ႁွင်ႈၶၢတ်ႈ / သဝ်း တီႈဝဵင်း လႃႈသဵဝ်ႈ 3 ႁွင်ႈ ၊ မႆႈပႃး ငိုၼ်းမၢၼ်ႈ မၢင်ႁႃႈႁဵင် ဢၼ်သႂ်ႇဝႆႉ ၼႂ်းတိူၵ်ႈ ၸၢတ်ႈၵဝ်ႇ ပဵၼ်ပူၵ်ႉ ပဵၼ်ၼႅပ်ႇ ။

ဝၼ်းတီႈ 03/09/2015 (မိူဝ်ႈဝႃး) ယၢမ်း ၵၢင်ၼႂ်မွၵ်ႈ 09:00 မူင်း တေႃႇထိုင် 09:25 မူင်း ၊ ၵိူတ်ႇၽေး ၾႆးမႆႈတီႈ ႁွင်ႈၶၢတ်ႈ / ႁွင်ႈသဝ်း 2 ၸၼ်ႉလင်ၼိုင်ႈ ၼႂ်းပွၵ်ႉ 1 ဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ။ ႁွင်ႈသဝ်းၼႆႉ ၸၼ်ႉၼိူဝ် ဢၼ်မီး 3 ႁွင်ႈၼၼ်ႉ ထုၵ်ႇၾႆးမႆႈ တင်းမူတ်း - ၼႆယဝ်ႉ ။


ၵူၼ်းလႃႈသဵဝ်ႈ ၵေႃႉၼိုင်ႈ ဢၼ်မီးႁိူၼ်း တေႃႇၼႃႈတီႈ ႁွင်ႈၾႆးမႆႈသေ  ဢၼ်ႁၼ် သိုဝ်ႈၼႃႈ သိုဝ်ႈတႃ လၢတ်ႈၼႄဝႃႈ - ၾႆးမႆႈသေ ၾၢႆႇၶႄ ၾႆးၶဝ်မႃးၸွႆႈ ၸႂ်ႉၶၢဝ်းယၢမ်းမွၵ်ႈ ၶိုင်ႈၸူဝ်ႈမူင်း ၾႆးၸင်ႇၵွႆႈမွတ်ႇ ။ လႆႈႁူႉဝႃႈ ၾႆးမႆႈ ယွၼ်ႉတႆႈတဵၼ်းဝႆႉ ၼိူဝ်ၶဵင်ၽရႃး (ၽြႃး) ၊ ယွၼ်ႉၾႆးမႆႈႁႅင်း ၵႅဝ်ႈၽၵ်းတူ ႁူးလႅင်းတႅၵ်ႇသေ ၾႆးမႆႈ လၢမ်းၵႂႃႇ ၸူးထႅင်ႈႁွင်ႈ ၼိုင်ႈယဝ်ႉ ႁွင်ႈၼိုင်ႈ ၊ တိူၵ်ႈသွင်ၸၼ်ႉ ၊ ၸၼ်ႉၼိူဝ် သၢမ်ႁွင်ႈတိတ်း ၵၼ်ၼၼ်ႉ ၾႆးမႆႈမူတ်း ။


သိုပ်ႇလၢတ်ႈဝႃႈ -  ၾႆးမႆႈ ပႃးငိုၼ်းမၢင် ႁႃႈႁဵင် ဢၼ်သႂ်ႇဝႆႉ ၼႂ်းတိူၵ်ႈလဵၵ်း ပၢၼ်ၵဝ်ႇသေ ပူၵ်ႉဝႆႉ ပဵၼ်ၼႅပ်ႇ ပဵၼ်ၼႅပ်ႇၼၼ်ႉ လမ်ၽိုတ်းၽိုတ်း ၊ တူႈယဵၼ် ၊ ၽတ်ႉလူမ်း ၸိူဝ်းၼႆႉ ငေႃးႁဵဝ်ႇ ၵႂႃႇမူတ်း ။ ၶူဝ်းၶွင် ၼႂ်းႁွင်ႈၼႂ်းႁိူၼ်း လူႉသုမ်းၵွႆမူတ်း ၊ ၵူၺ်းၵႃႈ လွင်ႈၸဵပ်းဝၢတ်ႇ လူႉတၢႆတႄႉ ဢမ်ႇမီး ။ ၽွင်းၾႆး တိုၵ်ႉမႆႈယူႇၼၼ်ႉ လုင်းတႃႇ ၵေႃႉၼိုင်ႈ ၼွၼ်းဢမ်ႇတိုၼ်ႇ ၊ ပိူၼ်ႈလႆႈဢဝ် မၢၵ်ႇႁိၼ် ဝိုတ်ႉသိုင်းသႂ်ႇ တီႈၽၵ်းတူ ႁူးလႅင်း ၊ မၼ်းၸင်ႇတိုၼ်ႇ သေလွတ်ႈၵႂႃႇ - ဝႃႈၼႆ ။