သိုၵ်းတဢၢင်း ပႂ်ႉတၢင်း ႁႄႉၵိုတ်း ၵူၼ်းၸၢႆး ၶီႇရူတ်ႉၶိူင်ႈ ႁိမ်းဝၢၼ်ႈ ပၢင်ၸၢမ် ၼႂ်းၸႄႈဝဵ င်းၵျွၵ်ႉမႄး ၊ တီႉၺွပ်းလႆႈ ယႃႈမဝ်းၵမ် ၵႃႈၶၼ်ႁိမ်း သွင်ပၢၵ်ႇသႅၼ် ၊ တီႉၺွပ်းၵူၼ်း ၵႃႉယႃႈဝႆႉ ။

မိူဝ်ႈ ဝၼ်းတီႈ 31/08/2015 ယၢမ်းဝၢႆးဝၼ်း 2 မူင်းၶိုင်ႈ ၊ တပ်ႉသိုၵ်း ပူတ်းပွႆႇၸိူဝ်ႉၸၢတ်ႈ တဢၢင်း (TNLA) တပ်ႉၵွင် 987 တီႉၺွပ်းလႆႈ ယႃႈမဝ်းၵမ် တီႈ ၵူၼ်းၶီႇရူတ်ႉၶိူင်ႈ လမ်းၼိုင်ႈ တီႈႁိမ်းဝၢၼ်ႈ ပၢင်ၸၢမ် ၼႂ်းၸႄႈဝဵင်း ၵျွၵ်ႉမႄး ၸိုင်ႈတႆး ပွတ်းႁွင်ႇ ။


ၵဵဝ်ႇၵပ်းလွင်ႈၼႆႉ သိုၵ်းတဢၢင်း (TNLA) ပႂ်ႉတၢင်း ႁႄႉၵိုတ်း ၵူၼ်းၸၢႆး ၶီႇရူတ်ႉၶိူင်ႈ လမ်းၼိုင်ႈ ၊ ၵူတ်ႇထတ်းတူၺ်း လႆႈႁၼ် တၢင်ႇယႃႈမႃႉမႃး 12,000 မဵတ်ႉ ၊ ၵႃႈၶၼ်ငိုၼ်းမၢၼ်ႈ တူၵ်းမွၵ်ႈ တင်းၼမ်သႅၼ် 180 ။ တူဝ်ၵူၼ်း ၵႃႉယႃႈမႃႉၼႆႉ ၾၢႆႇတပ်ႉ သိုၵ်းတဢၢင်း လႆႈတီႉၺွပ်းၵုမ်းဝႆႉ တေႃႇမိူဝ်ႈလဵဝ် ။


တပ်ႉသိုၵ်း တဢၢင်း TNLA တပ်ႉၵွင် 987 ၼႆႉ ယူႇပႃႈတႂ်ႈ တပ်ႉၸုမ်း 2 ၵုမ်းၵမ် ။ ၼႂ်းၶၢဝ်းတၢင်း ပီၼႆႉမႃးၼႆႉ ၵမ်းၵမ်း ၵႆႉတီႈလႆႈ ယႃႈမဝ်းၵမ် ၊ ၵွပ်ႈဝႃႈ ၼႂ်းၶၢဝ်းတၢင်းပီၼႆႉ (2015) တူင်ႉၼိုင် ၼႂ်းပိုၼ်ႉတီႈ ဢဝ်ၵၢၼ် ၽဵဝ်ႈမူၺ်ႉ ယႃႈမဝ်းၵမ် ပဵၼ်ယႂ်ႇ ။ ဢၼ်တီႉလႆႈ ယႂ်ႇၼမ်ႁႅင်း ပဵၼ်မိူဝ်ႈၼႂ်း လိူၼ်မေႊ (ပဵၼ်ၼႂ်းၵုၼ်လူင်-ႁူဝ်ပၢင်ႇ) ။


မၢႆႇၽူင်းၵျေႃႇ ယၢမ်ႈလၢတ်ႈတီႈ ၸုမ်းၶၢဝ်ႇ ၽူႈတွႆႇႁွၵ်ႈဝႃႈ - ၵူၼ်းဢၼ် ႁဝ်းၶႃႈတီႉလႆႈ ၸိူဝ်းၼႆႉ ပေႃးပဵၼ် ၵူၼ်းၵႃႉယႃႈၵေႃႈ ၺႃးမႂ်ငိုၼ်း ၊ လၢတ်ႈသပ်းၸႅင်ႈၼႄ ယႃႇပေႁႂ်ႈ ၵႃႉၶၢႆထႅင်ႈ ၊ ယိုတ်းဝႆႉ ၶူဝ်းၶွင်သေ ပွႆႇတူဝ်မိူဝ်းၶိုၼ်း ၊ ၶူဝ်းမၼ်း (ယႃႈမဝ်းၵမ်) ၵေႃႈဢဝ် ၾႆးၽဝ်ပႅတ်ႈ ။ ပေႃးဝႃႈ တီႉလႆႈယႃႈၼမ် ထုၵ်ႇမႂ်ငိုၼ်း တင်းဢဝ်တူၵ်းၶွၵ်ႈ ။ ပေႃးဝႃႈ ပဵၼ်ၵူၼ်းၵိၼ်ယႃႈ ဢၼ်ၸၢင်ႈ တိုတ်းပၼ်လႆႈၼၼ်ႉ ၵေႃႈတိုတ်းပၼ် ၊ ဢၼ်ဢမ်ႇ တိုတ်းပၼ်လႆႈ ၼၼ်ႉၵေႃႈ ပၼ်ၾၢင်ႉသေ ႁႂ်ႈပွၵ်ႈမိူဝ်းႁိူၼ်းၶိုၼ်း ၊ ယႃႇပေႁႂ်ႈတီႉလႆႈထႅင်ႈ ၊ ပေႃးတီႉလႆႈထႅင်ႈ တေပၼ် တူတ်ႈတၢမ်ႇၼၵ်းၼႃ ၸိူဝ်းၼႆႉ - ဝႃႈၼႆ ။