ၵူၼ်းမိူင်းပၼ်ႇ မႃးၶဝ်ႈၵၢတ်ႇ ဝဵင်းၼမ်ႉၸၢင် ပိူဝ်ႈတႃႇၶၢႆၶမ်း ဢဝ်ငိုၼ်းမိူဝ်းသၢင်ႈႁဵတ်းႁိူၼ်း ၊ ထုၵ်ႇၵူၼ်းၸူၵ်းထွင်း / ၽူႈလၵ်ႉၸၵ်ႉၶုတ်ႈ ၸူၵ်းဢဝ်ၶမ်းၼႂ်းထူင် 12 ၵျၢပ်ႈ တင်းငိုၼ်း 6 သႅၼ် ။

ပူၼ်ႉမႃး မိူဝ်ႈဝၼ်းတီႈ 12/09/2015 (ဝၼ်းၽိတ်ႈ လိူၼ်ၵဝ်ႈလပ်း) မီးၼၢင်းယိင်းၵူၼ်းမိူင်းပၼ်ႇ ၵေႃႉၼိုင်ႈ ၸိုဝ်ႈပႃႈဢုင်း တင်းဢူၺ်းၵေႃႉ ႁူမ်ႈၵၼ် 2-3 ၵေႃႉ ၊ ၵႂႃႇဢႅဝ်ႇၵၢတ်ႇ ဝဵင်းၼမ်ႉၸၢင် ပိူဝ်ႈတႃႇၵႂႃႇၶၢႆၶမ်း ဢဝ်ငိုၼ်းမိူဝ်း သၢင်ႈႁဵတ်းႁိူၼ်း ။ ၵူၺ်းၵႃႈ ၵႂႃႇၺႃးၵူၼ်းၸူၵ်းထွင်း / ၽူႈလၵ်ႉၸၵ်ႉၶုတ်ႈ ၸူၵ်းဢဝ်ၶမ်းလႄႈ ငိုၼ်း ဢၼ်သႂ်ႇမႃးၼႂ်းထူင် တီႈၼႂ်းၵၢတ်ႇၵၢင်ဝဵင်း ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ။ လႆႈၵႂႃႇၶမ်း 12 ဝၢတ်ႇ / ၵျၢပ်ႈ လႄႈ ငိုၼ်း 6 သႅၼ် - ၼႆယဝ်ႉ။


ၵူၼ်းၶၢႆၶူဝ်း ၼႂ်းၵၢတ်ႇၼမ်ႉၸၢင် ၵေႃႉၼိုင်ႈလၢတ်ႈဝႃႈ - ပီႈၼွင်ႉမိူင်းပၼ်ႇၶဝ်ၼႆႉ ဢၢၼ်းမႃးၶၢႆၶမ်း ၊ ၽွင်းတိုၵ်ႉၵႂႃႇၸူးႁၢၼ်ႉၶမ်းယူႇၼၼ်ႉ ထုၵ်ႇၵူၼ်းၸူၵ်းထွင်း / ၽူႈလၵ်ႉၸၵ်ႉၶုတ်ႈ လၵ်ႉၸူၵ်းဢဝ်ၶမ်း ၼႂ်းထူင် လူၺ်ႈဢမ်ႇတၼ်းႁူႉတူဝ် ။ ၽိူဝ်ႇၵႂႃႇႁွတ်ႈႁၢၼ်ႉၶမ်းၵေႃႈ ၸူၵ်းတူၺ်းၶမ်း ဢမ်ႇမီးယဝ်ႉ ။ လႆႈၶမ်းၵႂႃႇၵူၺ်းပႆႇပေႃး ပႃးငိုၼ်းၵႂႃႇၸွမ်းထႅင်ႈ 6 သႅၼ်လူးၵွၼ်ႇ - ဝႃႈၼႆ ။


သိုပ်ႇလၢတ်ႈဝႃႈ -  သင်ဝႃႈၶၢႆၶမ်းလႆႈယဝ်ႉ ၸဝ်ႈၶွင်ၶမ်း ဢၢၼ်းဢဝ်ငိုၼ်းမိူဝ်း သၢင်ႈႁဵတ်းႁိူၼ်း ။ ငိုၼ်းတႃႇပုၼ်ႈၼိုင်ႈသမ်ႉ တေဢၢၼ်းဢဝ်ႁႅၼ်းတၢၼ်း ႁဵတ်းၵၢၼ်ၸႃႇၵ လူႇတၢၼ်းၼႂ်းဝၼ်း လိူၼ်ၵဝ်ႈလပ်း (13/09/2015) ၵၢင်ဝႃႇ ။ ၵူၺ်းၵႃႈ လႆႈလူႉသုမ်းၵႂႃႇ တင်းၶမ်းတင်းငိုၼ်း ၼင်ႇၵၼ် - ဝႃႈၼႆ ။


ၵဵဝ်ႇၵပ်းလွင်ႈၼႆႉ လႆႈၵႂႃႇတၢင်ႇလၢတ်ႈတီႈ ၾၢႆႇႁဵတ်းလွင်ႈမူတ်းသႂ် ၼႂ်းၵၢတ်ႇ ၊ ၶဝ်လၢတ်ႈဝႃႈ မီးၵွင်ႈထၢႆႇၵမ်းသိုဝ်ႈ (CCTV) ဝႆႉယူႇ ၊ ထတ်းတူၺ်းၶိုၼ်း ၼႂ်းၼၼ်ႉၵေႃႈလႆႈ ။ ၵူၺ်းၵႃႈ ၽိူဝ်ႇၸဝ်ႈၼႃႈတီႈၶဝ် မႃးၵူတ်ႇထတ်းတူၺ်း ဢမ်ႇႁၼ်သင် ၊ မီးသီလမ်ဝႆႉလၢႆလၢႆၵူၺ်း ။ ဝၢႆးၼၼ်ႉၵေႃႈ လႆႈသိုပ်ႇတၢင်ႇထိုင် ၸဝ်ႈၼႃႈတီႈပလိၵ်ႈ / တီႈတပ်ႉသိုၵ်းၸိူဝ်းၼႆႉ ၊ ၵူၺ်းၵႃႈ ၾၢႆႇလႂ်ၵေႃႈ ဢမ်ႇတီႉၺွပ်းၵူၼ်းႁၢႆႉလႆႈ ႁၢၼ်ႉတေႃႇမိူဝ်ႈလဵဝ် ။


ပူၼ်ႉမႃး ဢမ်ႇႁိုင် ဢမ်ႇၼၢၼ်းၼႆႉၵေႃႈ မီးၵူၼ်းဝၢၼ်ႈၼွင်မူဝ် ၸႄႈဝဵင်းၼမ်ႉၸၢင် သွင်ၵေႃႉပူႇဢွၵ်ႇၽူဝ်မေး ၊ ဢဝ်ၶဝ်ႈၵၢပ်ႇၵႂႃႇၶၢႆ ၼႂ်းဝဵင်းၼမ်ႉၸၢင် ၊ လႆႈငိုၼ်း 12 သႅၼ် ၊ ၽွင်းတိုၵ်ႉဢႅဝ်ႇႁႃ သိုဝ်ႉၶူဝ်းယူႇ ၼႂ်းၵၢတ်ႇၼမ်ႉၸၢင်ၼၼ်ႉၵေႃႈ လႆႈထုၵ်ႇၽူႈလၵ်ႉၸၵ်ႉၶုတ်ႈ ၸူၵ်းထူင်ဢဝ်ငိုၼ်းၵႂႃႇ ၊ ဢမ်ႇႁူႉတူဝ်သေဢိတ်း ၊ ၽိူဝ်ႇတေသိုဝ်ႉၶူဝ်း ၸူၵ်းတူၺ်းငိုၼ်းၼႂ်းထူင် ဢမ်ႇမီးယဝ်ႉ ။


ဢွၼ်ၼႃႈၼၼ်ႉ ၼၢင်းယိင်းသႅၼ်းၶၢဝ်ႉၵေႃႉၼိုင်ႈ ယူႇဝၢၼ်ႈပၢင်ႇလႅင်း ၵႂႃႇဢႅဝ်ႇၵၢတ်ႇ ၼမ်ႉၸၢင်ၵေႃႈ ၺႃးၵူၼ်းႁၢႆႉ / ၵူၼ်းၸၢႆးၵေႃႉၼိုင်ႈ တဵၵ်းလူမ်ႉၼႂ်းၵၢတ်ႇယဝ်ႉ ဝၵ်ႉဢဝ်သၢႆၶေႃးၶမ်း သဵၼ်ႈ 1 ဝၢတ်ႇ (ၵျၢပ်ႈ) လႅၼ်ႈၵႂႃႇပႅတ်ႈ ။ ၽွင်းၼၼ်ႉ ၵူၼ်းၶၢႆၶူဝ်းၼႂ်းၵၢတ်ႇ ၵမ်ႈၽွင်ႈ လႄႈ ၵူၼ်းမႃးၶဝ်ႈၵၢတ်ႇၶဝ် ႁၼ်ၸွမ်းယူႇၵေႃႈ ၽႂ်ဢမ်ႇႁတ်းႁဵတ်းသင် ၊ ဢမ်ႇႁဵတ်းလိုပ်ႈလမ်းၸွမ်း ၵူၼ်းႁၢႆႉ - ၼႆယဝ်ႉ ။


ၵၢတ်ႇဝဵင်းၼမ်ႉၸၢင်ၼႆႉ ပဵၼ်ၵၢတ်ႇ ဢၼ်ၵူၼ်းၵိုၼ်း ငိုၼ်းၶွၼ်ႈၼမ် ၊ မီးၵူၼ်းလၢႆတီႈလၢႆတၢင်း မႃးၶဝ်ႈၵၢတ်ႇ ၊ ပဵၼ်ၵၢတ်ႇဢၼ်ၵိုၼ်း တႄႉတႄႉ ။ ၵႃႈပူၼ်ႉမႃးၵေႃႈ ယၢမ်ႈမီးၵူၼ်းလၵ်ႉ ၸူၵ်းထူင်ၵူၼ်းမႃးၶဝ်ႈၵၢတ်ႇ ၶဝ်သေ သုမ်းၶူဝ်းသုမ်းၶွင် သုမ်းငိုၼ်းၵႂႃႇတင်းၼမ် ၊ ၵူၺ်းၵႃႈ ယွၼ်ႉဢမ်ႇပေႃးသုမ်းၼမ် ၊ ဢမ်ႇၶႂ်ႈသဵင်ႈၶၢဝ်းယၢမ်း ၊ ဢမ်ႇၶႂ်ႈပဵၼ်လိူင်ႈ ပဵၼ်လၢဝ်းလႄႈ ၽႂ်ၵေႃႈပွႆႇမၼ်း ယဝ်ႉၵႂႃႇတိၵ်းတိၵ်း - ၵူၼ်းၼမ်ႉၸၢင် ၵေႃႉၼိုင်ႈ လၢတ်ႈၼင်ႇၼႆ ။


သိုပ်ႇလၢတ်ႈဝႃႈ - လွင်ႈဢၼ်ပဵၼ်ၸိူင်ႉၼႆၼႆႉ ၸဝ်ႈၼႃႈတီႈမၢၼ်ႈ ၾၢႆႇပလိၵ်ႈၶဝ် ၾၢႆႇတပ်ႉသိုၵ်းၶဝ် ၾၢႆႇလိူမ်ႈလႆႇၶဝ် ဢမ်ႇႁဵတ်းသင်ပၼ်လႆႈ ။ ၵွပ်ႈၼႆ ၶႂ်ႈတုၵ်းယွၼ်းၵူႈၾၢႆႇၾၢႆႇ ၊ ၸုမ်းယိပ်းၵွင်ႈၵၢင်ႇ သိုၵ်းၵူၼ်းမိူင်း ၼႂ်းပိုၼ်ႉတီႈ လႄႈ ပႃႊတီႊၵၢၼ်မိူင်းၶဝ် ဢမ်ႇဝႃႈပႃႊတီႊလႂ် ၸိူဝ်းမီးပုၼ်ႈၽွၼ်း ၸွႆႈပၼ်လွင်ႈၼႆႉ ။ တၢင်းၼႃႈၼႆႉ ယႃႇႁႂ်ႈမီးၽူႈလၵ်ႉၸၵ်ႉၶုတ်ႈ ၶူဝ်းၶွင်ၵူၼ်းမႃးၶဝ်ႈၵၢတ်ႇၶဝ်ထႅင်ႈ - ဝႃႈၼႆ ။