ပၢင်ၵုမ် ႁူဝ်ႁုပ်ႈပီ ၸုမ်းၶၢဝ်ႇ ၸၢဝ်းၶိူဝ်း BNI ပွၵ်ႈၵမ်းတီႈ 23 ၊ ဢၼ်ၸတ်းႁဵတ်း တီႈဝဵင်း သင်ၶလၿူႊရီႊ ၊ မီးယိူင်းဢၢၼ်း ႁႂ်ႈၽူႈသိုဝ်ႇၶၢဝ်ႇ လႆႈလဵပ်ႈႁဵၼ်း လွင်ႈယူႇ သဝ်းၵိၼ်သၢင်ႈ ပီႈၼွင်ႉ ၸၢဝ်းမွၼ်း ။

တင်ႈတႄႇ ဝၼ်းတီႈ 02-04/09/2015 ၶၢဝ်းတၢင်း 3 ဝၼ်း ၊ မီးၵၢၼ်ၸတ်း ပၢင်ၵုမ် ႁူဝ်ႁုပ်ႈပီ ၽူႈသိုဝ်ႇၶၢဝ်ႇ ၸၢဝ်းၶိူဝ်း (Burma News International-BNI) ပွၵ်ႈၵမ်းတီႈ 23  တီႈၼႂ်းဝဵင်း သင်ၶလၿူႊရီႊ ၸႄႈတွၼ်ႈ ၵၢၼ်းၵျၼၿူႊရီႊ ၸိုင်ႈထႆး ၊ ဢွင်ႈတီႈထုင်ႉ ဢၼ်ၸၢဝ်းၶိူဝ်း မွၼ်း ယူႇသဝ်းၼမ် ။


တီႈပၢင်ၵုမ်ၼၼ်ႉ ၸုမ်းၶၢဝ်ႇ ၵူႈၸၢဝ်းၶိူဝ်း လႆႈႁၢႆးငၢၼ်း ၼႄပၼ် ၼႃႈၵၢၼ် တႃငၢၼ်း ၸုမ်းၽႂ် ၸုမ်းမၼ်း ဢၼ်လႆႈ ႁဵတ်းသၢင်ႈမႃး မီးသင် လၢႆလၢႆ ၊ ၼႃႈၵၢၼ် တႃငၢၼ်း ဢၼ်တေ ႁဵတ်းသၢင်ႈ ၵႂႃႇမိူဝ်းၼႃႈ ၊ လွင်ႈယၢပ်ႇၽိုတ်ႇ လွင်ႈငၢႆႈလူမ် ၼႂ်းၵၢၼ်ငၢၼ်း ၸုမ်းတူဝ်ၵဝ်ႇ ၊ လွင်ႈလီ လွင်ႈၸႃႉ မီးၸိူင်ႉႁိုဝ် ၸိူဝ်းၼႆႉ ၼမ်းဢဝ်မႃး ဢုပ်ႇဢူဝ်းၵၼ် ။


ၼၢႆႇၵသေႃးမုၼ်ႇ ၽူႈၶဝ်ႈၸုမ်း BNI လႄႈပဵၼ်ပႃး ၽူႈထတ်းထွင် လိၵ်ႈၸုမ်းၶၢဝ်ႇ မွၼ်း IMNA လၢတ်ႈၼႄဝႃႈ - ႁဝ်းၶႃႈ လိူၵ်ႈၸတ်းႁဵတ်း ပၢင်ၵုမ် တီႈ သင်ၶလၿူႊရီႊၼႆႉ ပိူဝ်ႈတႃႇ ႁႂ်ႈၸုမ်းၶၢဝ်ႇ ၵူႈၸုမ်းၸုမ်း လႆႈမႃး လဵပ်ႈႁဵၼ်း လွင်ႈယူႇသဝ်း ၵိၼ်သၢင်ႈ ပီႈၼွင်ႉမွၼ်း ၊ ၵွပ်ႈဝႃႈ တီႈၼႆႈၼႆႉ ပီႈၼွင်ႉၸၢဝ်းမွၼ်း လႆႈယူႇသဝ်း မႃးၸဵမ်မိူဝ်ႈ မိုၼ်ႉသိုၼ်းၵွၼ်ႇ ၸဵမ်မိူဝ်ႈ လႂ်လႂ်ယဝ်ႉ ၊ ႁဝ်းၶႃႈ ၶႂ်ႈႁႂ်ႈၸုမ်း ၽူႈသိုဝ်ႇၶၢဝ်ႇၶဝ် လႆႈမႃးႁၼ် လွင်ႈယူႇ လွင်ႈၵိၼ် ၸၢဝ်းမွၼ်း မီးၸိူင်ႉႁိုဝ် ၸိူဝ်းၼႆႉလႄႈ ၸင်ႇလႆႈ ၶပ်းၶိုင်ပၼ်တီႈ သင်ၶလၿူႊရီႊၼႆႉ - ဝႃႈၼႆ ။


လုၵ်ႈၸုမ်း သိုဝ်ႇၶၢဝ်ႇ BNI ၼႆႉ တင်းမူတ်း 13 ၸုမ်း ။ 1.ၸုမ်းမွၼ်း (IMNA) ။ 2.ၸုမ်းၶၢင် (KNG) ။ 3.ၸုမ်းၶၢဝ်ႇၵႃႊလႃႊတၢၼ်ႇ ။ 4.ၸုမ်းၶၢဝ်ႇၽူႈတွႆႇႁွၵ်ႈ (SHAN) ။ 5. ၸုမ်းယၢင်းလႅင် (Kantarawaddy Time) ။ 6.ၸုမ်းမွၼ်း (Phophtaw ဢွၼ်တၢင်းပဵၼ် Kaowao) ။ 7.ၸုမ်းၶျၢင်း (Khonumtung) ။ 8.ၸုမ်းၶၢဝ်ႇၶျၢင်း ၶျိၼ်းဝေႃႊလ် ။ 9.ၸုမ်းယၢင်းၽိူၵ်ႇ (KIC) ။ 10.ၸုမ်းၶၢဝ်ႇမိၸ်ႉၸိမ (Mizzima News) ။ 11.ၸုမ်းၶၢဝ်ႇၸၢဝ်းပုတ်ႉထ- ရၶႅင်ႇ (Niranjara News) ။ 12.သူၺ်ႇႁိၼ်းတႃႇ (Shwehintha) ။ 13.ၸုမ်းသိုဝ်ႇၶၢဝ်ႇ တၢၼ်ႇလုၼ်ႇထၢႆႊမ် ၸိူဝ်းၼႆႉ။