ၵူၼ်းၼုမ်ႇ ဝဵင်းၼမ်ႉၶမ်း တေႁူမ်ႈၵၼ် ၸတ်းႁဵတ်းပၢင် ၶုၵ်းထူပ်း ႁႅၼ်းတၢၼ်းပၼ် ၽူႈႁွင်ႉၵႂၢမ်း ၸိုဝ်ႈသဵင်ယႂ်ႇ သၶႁ လူႉသဵင်ႈ သုတ်းမုၼ် ၶွပ်ႈတဵမ် 4 ပီ ။

ၼႂ်းလိူၼ် သႅပ်ႊထႅမ်ႊၿိူဝ်ႊၼႆႉ ၵူၼ်းၼုမ်ႇ ဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ လႆႈၸႂ်ၵၼ် တေၸတ်းႁဵတ်း ပၢင်ႁႅၼ်းတၢၼ်း ယၢတ်ႇၼမ်ႉ ၶႂမ်ႈတဝ်ႈပၼ် သၶႁ ( ၸၢႆးသႅင်ၸိုၼ်ႈ ) မေႃႁွင်ႉ / တႅမ်ႈ ၽဵင်းၵႂၢမ်း ပူၵ်းသူၼ်းတိုၼ်ႇ ၸႂ်ႁၵ်ႉ ၸိူဝ်ႉၸၢတ်ႈ ဢၼ်လူႉသဵင်ႈ သုတ်းမုၼ်ၵႂႃႇ ၶွပ်ႈတဵမ် 4 ပီ ။


မိူဝ်ႈ ပၢင်ၵုမ် ၵူၼ်းၼုမ်ႇ ဢၼ်ၸတ်းႁဵတ်း မိူဝ်ႈ ဝၼ်းတီႈ 30/08/2015 ၼၼ်ႉ လႆႈၸႂ်ၵၼ် တႅပ်းတတ်းဝႃႈ ဝၼ်းတီႈ 15/09/2015 ၼႆႉ တေၸတ်းႁဵတ်း ပၢင်ၶုၵ်းထူပ်း ထိုင်သၶႁ ၊ ၵူၼ်းၼုမ်ႇ ၼႂ်းပိုၼ်ႉတီႈ ၸၢႆးယီႈ လၢတ်ႈၼင်ႇၼႆ ။


“ ဝၼ်းတီႈ 15 လိူၼ် သႅပ်ႊထႅမ်ႊၿိူဝ်ႊၼႆႉ တေၸတ်းႁဵတ်း ပၢင်လူႇတၢၼ်း ယၢတ်ႇၼမ်ႉပၼ် လုင်းသႅင်ၸိုၼ်ႈ တီႈဝတ်ႉ / ၵျွင်းမၢၼ်ႈႁွင်ႇ ။ ပေႃးယဝ်ႉၼၼ်ႉ ထိုင်ဝၢႆးဝၼ်း 3 မူင်းမႃး တေၵႂႃႇတီႈ ႁွင်ႈႁေႃးလူင် ဢၼ်မီး ၼႂ်းပွၵ်ႉ ၼွင်မူဝ်ၼၼ်ႉသေ တေၵႂႃႇသိုပ်ႇ ၸတ်းႁဵတ်းပၢင် ဢုပ်ႇၶႆႈပိုၼ်း သၶႁ ၊ တေလၢတ်ႈလွင်ႈ ၽဵင်းၵႂၢမ်းဢၼ် သၶႁ လႆႈတႅမ်ႈ လႆႈႁွင်ႉမႃး ၸိူဝ်းၼၼ်ႉ ၊ တေဢွၼ်ၵၼ် ၸတ်းပၢင် မူၼ်ႈသိူဝ်း ႁွင်ႉၽဵင်းၵႂၢမ်း ။


ဝၼ်းၸတ်းပၢင် မူၼ်ႈသိူဝ်းၼၼ်ႉ တေႁဵတ်းသိူဝ်ႈ ဢၼ်တွၵ်ႇ (သၵိၼ်ႊ) ႁၢင်ႈ သၶႁ သေ ႁႂ်ႈၵူၼ်း မႃးၶဝ်ႈႁူမ်ႈ ၶဝ်ၼုင်ႈ သိူဝ်ႈၼၼ်ႉ ။ သိူဝ်ႈၼၼ်ႉ တေမီး ၶၢႆပႃးၼႂ်း ပၢင်မူၼ်ႈသိူဝ်း ။ မိူဝ်ႈလဵဝ် လႆႈႁွင်ႉမွၵ်ႇဝႆႉ ၸုမ်းတူင်ႉၼိုင် တူင်ႇဝူင်းၵူၼ်း ၼႂ်းဝဵင်း ၼမ်ႉၶမ်း ၊ ပႃႊတီႊ ၵၢၼ်မိူင်း ၵမ်ႈၽွင်ႈ ၊ ၸုမ်းပိတ်ႉ မၢၵ်ႇၼင် ၼႂ်းဝဵင်း ၼမ်ႉၶမ်း ၸိူဝ်းၼႆႉ ၶဝ်ႈႁူမ်ႈ ႁၢင်ႈႁႅၼ်း တႃႇ ၸတ်းႁဵတ်း ပၢင်ပွႆး - ၸၢႆးယီႈလၢတ်ႈ ။


သၶႁ ( ၸၢႆးသႅင်ၸိုၼ်ႈ ) ၼႆႉ ပဵၼ် မေႃတႅမ်ႈၵႂၢမ်း / ၽူႈႁွင်ႉၵႂၢမ်း ၸိုဝ်ႈသဵင်ယႂ်ႇ ၼႂ်းဝူင်း ၸိူင်းလႅဝ်း ၊ ပဵၼ် ၽူႈၶဝ်ႈႁူမ်ႈ ၵေႃႇတင်ႈဝူင်း ၸိူင်းလႅဝ်းမႃး ။ လိူဝ်သေၼၼ်ႉ တေႃႇထိုင် ပေႃးသဵင်ႈ သုတ်းမုၼ်ၵႂႃႇၼႆႉ လႆႈႁၢပ်ႇ ၵိုတ်ႉၵၢၼ် ၽူႈထတ်းထွင်လိၵ်ႈ တီႈၸုမ်း ၶၢဝ်ႇၽူႈတွႆႇႁွၵ်ႈ ။


ၾၢႆႇၼိုင်ႈ တၢင်းၼိုင်ႈ ပေႃးထိုင်မႃး ဝၼ်းဢႃးတိတ်ႉ ဝၼ်းထီႉ 13/09/2015 ၼႆႉ တၢင်းၸုမ်း ၶၢဝ်ႇၽူႈတွႆႇႁွၵ်ႈၵေႃႈ တေၸတ်းပၢင် ႁႅၼ်းတၢၼ်းပၼ် သၶႁ တီႈဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ ။