ပႃႊတီႊ ႁူဝ်သိူဝ် ယင်းပႆႇလႆႈ ပဵၼ်ဢူၺ်းလီ ပႃႊတီႊလႂ် ၊ ပႃးၸဵမ် ပႃႊတီႊ သၢင်ႇသီႈ ၼူၵ်ႉယုင်း ။ တေ ၶတ်းၸႂ်တႃႇ ပီႈၼွင်ႉ ၸၢဝ်းၶိူဝ်းတႆးလႄႈ တႃႇဝၢၼ်ႈ ႁႂ်ႈၵတ်းယဵၼ် - ႁူဝ်ပဝ်ႈ ၸဝ်ႈၶုၼ် ထုၼ်းဢူး လၢတ်ႈ ။

ႁူဝ်ပဝ်ႈ ငဝ်ႈငုၼ်း ၻီႊမူဝ်ႊ ၶရေႊၸီႊ ၸိူဝ်ႉၶိူဝ်းတႆး (ႁိုဝ်) ပႃႊတီႊႁူဝ်သိူဝ် (SNLD) ၸဝ်ႈၶုၼ် ထုၼ်းဢူး လၢတ်ႈဝႃႈ - တွၼ်ႈတႃႇ တေၶဝ်ႈ ပၢင်လိူၵ်ႈတင်ႈ ၊ တွၼ်ႈတႃႇ ႁဵတ်းၵၢၼ် ၸိူဝ်ႉၸၢတ်ႈၵႂႃႇ မိူဝ်းၼႃႈၼႆႉ ပႃႊတီႊ ႁူဝ်သိူဝ် (SNLD) ယင်းပႆႇလႆႈသၢင်ႈ လွင်ႈၸမ်ၸႂ်ၵၼ် ၊ ႁဵတ်းလွင်ႈ ႁူမ်ႈမိုဝ်းၵၼ် ၊ ႁဵတ်း ဢူၺ်းလီၵၼ် တင်း တၢင်ႇပႃႊတီႊ မိူၼ်ၼင်ႇ ပႃႊတီႊ သၢင်ႇသီႈ / ၼူၵ်ႉယုင်း ၸိူဝ်းၼႆႉ ။ ၵူၺ်းၵႃႈ တေ ၶတ်းၸႂ်ၵႂႃႇ ပိူဝ်ႈတႃႇ ပီႈၼွင်ႉ ၸၢဝ်းၶိူဝ်းတႆးလႄႈ တႃႇဝၢၼ်ႈမိူင်း ႁဝ်းႁႂ်ႈၵတ်းယဵၼ် ယူႇ - ၼႆယဝ်ႉ ။


မၼ်းၸဝ်ႈ လၢတ်ႈၼႄ တီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ - “ မိူဝ်ႈၵူႈပွၵ်ႈတႄႉ ႁဝ်းၶႃႈယၢမ်ႈပႂ်ႉ NLD ယူႇ ၊ ႁဝ်းၶႃႈ ၶႂ်ႈႁူမ်ႈမိုဝ်း ၶဝ်ယူႇ ၊ ႁဝ်းၶႃႈ တေသိုပ်ႇ ယူႇပဵၼ် ၾၢႆႇ သၢၼ်ၶတ်း လူင်ပွင်ၸိုင်ႈႁိုဝ် ၊ ဢမ်ႇၼၼ်ၵေႃႈ တေသိုပ်ႇႁဵတ်းတႃႇ ၻီႊမူဝ်ႊ ၶရေႊၸီႊ တႃႇၸၢဝ်းၶိူဝ်း ၼႂ်းမိူင်းမၢၼ်ႈ ၵႂႃႇႁိုဝ် ။ တႃႇတေ ႁဵတ်းၸိူင်ႉၼႆၼႆႉ ႁဝ်းၶႃႈၵေႃႈ ပႂ်ႉတူၺ်းၶဝ် ယူႇ ။ ၵူၺ်းၵႃႈ မိူဝ်ႈလဵဝ်ၼႆႉ တႅပ်းတတ်းဝႆႉဝႃႈ တေၸုၵ်းမၼ်ႈ ၼိူဝ်ၶႅင်ႈၶႃ တူဝ်ၵဝ်ႇသေ တေသိုပ်ႇပဵၼ် ၾၢႆႇသၢၼ်ၶတ်း လူင်ပွင်ၸိုင်ႈ ၊ ဢၼ် လူင်ပွင်ၸိုင်ႈ ႁဵတ်း ဢမ်ႇထုၵ်ႇမႅၼ်ႈ ၸိူဝ်းၼႆႉ ။ တေၶတ်းၸႂ် လွင်ႈသုၼ်ႇလႆႈ ၸၢဝ်းၶိူဝ်း ၸိူဝ်းၼႆႉသေ  တေဢမ်ႇ ႁဵတ်းဢူၺ်းလီ တင်းၸုမ်းလႂ်ယဝ်ႉ ”- ဝႃႈၼႆ ။


မိူဝ်ႈလဵဝ် ပၢင် လိူၵ်ႈတင်ႈၵေႃႈ ၸမ်မႃး တိၵ်းတိၵ်း ယဝ်ႉလႄႈ ပႃႊတီႊ ၵၢၼ်မိူင်း ၵမ်ႈၼမ် မႅၼ်ႈၽွင်း တိုၵ်ႉဢွၼ်ၵၼ် ၶတ်းၸႂ် ၼင်ႇႁိုဝ် တေၶွတ်ႇၽွတ်ႈ လူင်ပွင်ၸိုင်ႈလႆႈ / ႁူၺ်းသူၼ်း ၵူၼ်းၼႂ်း ပိုၼ်ႉတီႈလႆႈ / ႁူမ်ႈမိုဝ်း ၵၼ်တင်း ပႃႊတီႊ တၢင်ႇဢၼ်လႆႈ ၸိူဝ်းၼႆႉယူႇ ။


ၽူႈ ၸတ်းၵၢၼ် မူႇၸုမ်း ၼႂ်းပႃႊတီႊ သၢင်ႇသီႈ (USDP) ၵေႃႉၼိုင်ႈ ဢၼ်ဢမ်ႇ ၶႂ်ႈဢွၵ်ႇၸိုဝ်ႈ ၊ ဢၼ်ၶတ်းၸႂ် တႃႇဢွင်ႇပေႉ ပၢင်လိူၵ်ႈတင်ႈၼၼ်ႉ လၢတ်ႈၼႄတီႈ ၸုမ်းၶၢဝ်ႇ ၽူႈတွႆႇႁွၵ်ႈဝႃႈ - ပႃႊတီႊ သိူဝ်ၽိူၵ်ႇ (SNDP) လႄႈ ပႃႊတီႊ ဢူၺ်းလီမၼ်းၼႆႉ မိူဝ်ႈလဵဝ် ၶဝ်ၵေႃႈမႃးပဵၼ် ၸုမ်း ဢူၺ်းလီၵၼ် တင်း ပႃႊတီႊ သၢင်ႇသီႈ ဢၼ်ပဵၼ်ၸွမ် ၸိုင်ႈတဵင်းၸဵင်ႇ ဢွၼ်ႁူဝ် ဝႆႉယူႇ ၼႆႉယဝ်ႉ - ဝႃႈၼႆ ။


ႁူဝ်ပဝ်ႈ ပႃႊတီႊ သိူဝ်ၽိူၵ်ႇ လုင်းၸၢႆးဢၢႆႈပဝ်း ၵေႃႈယၢမ်ႈလၢတ်ႈ တီႈ ၸုမ်းၶၢဝ်ႇ ၽူႈတွႆႇႁွၵ်ႈဝႃႈ - ပႃႊတီႊ သိူဝ်ၽိူၵ်ႇ ႁဝ်းတႄႉ ဢမ်ႇပဵၼ် ၶႃႈၽႂ် ၊ ႁဝ်းၶႃႈ ပဵၼ်ၶႃႈ ၵူၼ်းမိူင်းတႆး ၵူၺ်း ။ တေႁဵတ်း ၵၢၼ်တႃႇ ၵူၼ်းမိူင်းတႆး ၊ တႃႇပေႉၵၢၼ် လိူၵ်ႈတင်ႈ ။ ပိူင်လူင်မၼ်း ပိူဝ်ႈတႃႇ ၶွတ်ႇၽွတ်ႈလႆႈ လူင်ပွင်ၸိုင်ႈ မိူင်းတႆး - ဝႃႈၼႆ ။


ထႅင်ႈၾၢႆႇၼိုင်ႈ ပႃႊတီႊ ၼူၵ်ႉယုင်း NLD ၼႆႉ မိူဝ်ႈၵူႈပွၵ်ႈ ယၢမ်ႈၸမ်ၸႂ် ႁူဝ်ပဝ်ႈၵဝ်ႇ ပႃႊတီႊ သၢင်ႇသီႈ ( တူႇရဢူး သူၺ်ႇမၢၼ်း ) ။ မိူဝ်ႈလဵဝ်ၵေႃႈ ၽူႈယႂ်ႇ ၵူၼ်းလူင်ၼႂ်း ပႃႊတီႊ သၢင်ႇသီႈ ၵမ်ႈၽွင်ႈ ယင်းပဵၼ်ဢူၺ်းလီၵၼ် တင်းပႃႊတီႊ ၼူၵ်ႉယုင်းယူႇ - ၽူႈပၵ်းတႃ ပႂ်ႉတူၺ်း ၵၢၼ်မိူင်းၶဝ် လၢတ်ႈၼင်ႇၼႆ ။


ဢၼ် ႁူဝ်ပဝ်ႈ SNLD ၸဝ်ႈၶုၼ်ထုၼ်းဢူး ဢွၼ်ႁူဝ် ၼမ်းၼႃႈသေ ႁပ်ႉပဵၼ် ႁူဝ်ပဝ်ႈ ဝႆႉယူႇ ပဵၼ်ၸုမ်း ဢူၺ်းလီ ၸၢဝ်းၶိူဝ်း ၽွမ်ႉႁူမ်ႈ (UNA) ၊ ၼႂ်းၸုမ်း UNA မီးပႃႊတီႊ 11 ဢၼ် ။ ထႅင်ႈလွင်ႈၼိုင်ႈ ၸုမ်း UNA ပဵၼ်ဢူၺ်းလီ ၵၼ်တင်း ၶွင်ႊသီႊ ႁူမ်ႈတုမ် ၵူႈၸၢဝ်းၶိူဝ်း (UNFC) ။


ႁူဝ်ပဝ်ႈလူင် ၶုၼ်ထုၼ်းဢူး လၢတ်ႈဝႃႈ - “ တီႈၼႂ်း ၵၢၼ်မိူင်းၼႆႉ ၵွပ်ႈသင်လႄႈ ၸုမ်း ၻီႊမူဝ်ႊ ၶရေႊၸီႊ ၊ ၸုမ်း ၸၢဝ်းၶိူဝ်းၶဝ် ၸိူဝ်းၼႆႉ ၵၢၼ်ၶဝ် ဢဵၼ်းဢၢၼ်း ၶဝ်ဢမ်ႇထိုင်တီႈ ဢမ်ႇပဵၼ် ၵၢၼ်လႆႈၼၼ်ႉ ပေႃးမႃး ထတ်းသၢင်တူၺ်း ယွၼ်ႉပိူဝ်ႈ ပေႃႇလသီႇ ယိူင်းဢၢၼ်းၶဝ် ဢမ်ႇမိူၼ်ၵၼ်တင်း ၸုမ်းဢူၺ်းလီ ၶဝ် ။ ယွၼ်ႉၼၼ် ပေႃးတေသိုပ်ႇ ႁူမ်ႈမိုဝ်း ႁဵတ်း ဢူၺ်းလီ တင်း တၢင်ႇၸုမ်းသေ ၵႂႃႇထႅင်ႈ မိူဝ်းၼႃႈ တိၵ်းတိၵ်းၼႆ ႁဝ်းၶႃႈ ၵူဝ်ၵၢၼ် ဢမ်ႇပဵၼ်ၵၢၼ် မိူၼ်ၵဝ်ႇၵဝ်ႇ ။ ၵွပ်ႈၼၼ် ႁဝ်းၶႃႈ တေယူႇ ႁင်းၵူၺ်းသေ ႁဵတ်းၵၢၼ်ၵႂႃႇ ၵူၺ်း - ဝႃႈၼႆ ။


ၸိူင်ႉႁိုဝ် ၵေႃႈယဝ်ႉ ဢၼ်ပဵၼ် ပႃႊတီႊ ၼူၵ်ႉယုင်းတႄႉ ၼႂ်းပၢင်လိူၵ်ႈတင်ႈ ဢၼ်တေမႃးၼႆႉ တေၶဝ်ႈလိူၵ်ႈတင်ႈ ၵူႈတီႈ ၼႂ်းၼႃႈလိၼ် ၸၢဝ်းၶိူဝ်း ၊ ဢမ်ႇဝႆႉသေတီႈ ။ ၵွပ်ႈၼၼ် မိူဝ်ႈလဵဝ် ပႃႊတီႊ ၵၢၼ်မိူင်း ၵမ်ႈၼမ်ၵေႃႈ ဢွၼ်ၵၼ် ထတ်းသၢင်ၸွမ်း လွင်ႈတူင်ႉၼိုင် ပႃႊတီႊ ၼူၵ်ႉယုင်း NLD ဝႆႉယူႇ - ၼႆယဝ်ႉ ။