ႁွင်ႈၵၢၼ် သႆႊမွၼ်ႊ သၵဵဝ်ႊ (Simon - Skjodt Center) မိူင်းဢမေႊရီႊၵႃႊ ႁၢႆးငၢၼ်းဝႃႈ မိူင်းမၢၼ်ႈၶဝ်ႈပႃးၼႂ်း သဵၼ်ႈမၢႆဢၼ်တေမီးလွင်ႈ ၶႃႈႁႅမ်ၽဵဝ်ႈမူၺ်ႉ ၸိူဝ်ႉၶိူဝ်း ။

မိူဝ်ႈဝၼ်းတီႈ 21/09/2015 သိုဝ်ႇၶၢဝ်ႇဝေႃႊၶျိင်ႊတၼ်ႊၾူတ်သ်ႊ ႁၢႆးငၢၼ်းဝႃႈ - ႁွင်ႈၵၢၼ်သႆႊမွၼ်ႊ သၵဵဝ်ႊ (Simon - Skjodt Center) ႁွင်ႈၵၢၼ်ႁႄႉၵင်ႈၵၢၼ် ၽဵဝ်ႈမူၺ်ႉၸိူဝ်ႉၶိူဝ်း လႆႈဢွၵ်ႇၽိုၼ် ႁၢႆးငၢၼ်းဝႃႈ တေမီးမိူင်း 10 မိူင်း ဢၼ်လၢမ်းၶၢတ်ႈဝႃႈ တေမီးလွင်ႈၶႃႈလၢင်ႉ ၽဵဝ်ႉမူၺ်ႉၸိူဝ်ႉၶိူဝ်း ။ မိူင်း 10 မိူင်းၼၼ်ႉ မီးမိူင်းမၢၼ်ႈပႃးဝႆႉၸွမ်း ဝႃႈၼႆ ။


ၵဵဝ်ႇၵပ်းလွင်ႈၼႆႉ မိူင်းမၢၼ်ႈမီးတိုဝ်ႉတၢင်းသုင်ယွၼ်ႉ ပိူဝ်ႈဝႃႈမီးပၼ်ႁႃၸၢဝ်းၶိူဝ်း လူဝ်ႊႁိၼ်ႊၸႃႊ (Rohingya) ဢၼ်လူင်ပွင်ၸိုင်ႈမၢၼ်ႈ ဢမ်ႇယွမ်းႁပ်ႉဝႃႈ ၶဝ်ပဵၼ်ၵူၼ်းမိူင်းၵိုၵ်းမိူင်း ။ ၵွပ်ႈၼႆႁဵတ်းႁႂ်ႈၸၢဝ်းၶိူဝ်းလူဝ်ႊႁိၼ်ႊၸႃႊ လႆႈထုၵ်ႇၺႃးပူၼ်ႉပႅၼ်သုၼ်ႇလႆႈၵူၼ်း လၢႆၸိူဝ်ႉလၢႆပိူင် ၊ သေဢွၼ်ၵၼ်ၶီႇႁိုဝ်းပၢႆႈၵႂႃႇ ၼႂ်းၼမ်ႉပၢင်ႇလၢႆ ပိူဝ်ႈႁႃတီႈယူႇတၢင်ႇမိူင်း ။


လိူဝ်သေမိူင်းမၢၼ်ႈယဝ်ႉ သဵၼ်ႈမၢႆၸိုဝ်ႈၸိုင်ႈမိူင်း ဢၼ်ၶၢတ်ႈလၢမ်းဝႃႈတေမီးလွင်ႈၶႃႈလၢင်ႉ ၸၢဝ်းၶိူဝ်းၼၼ်ႉ မီးမိူင်း - မိူင်းၼႆႊၸီႊရီႊယိူဝ်ႊ ၊ မိူင်းသူႊၻၢၼ်ႊ ၊ မိူင်းဢႅပ်ႊၾီႊၵႃႊၵၢင် ၊ မိူင်းဢီႊယိပ်ႊ ၊ မိူင်းၶွင်ႊၵူဝ်ႊ ၊ မိူင်းသူဝ်ႊမႃႊလီႊယိူဝ်ႊ ၊ မိူင်းပႃႊၵီႊသထၢၼ်ႊ ၊ မိူင်းသူႊၻၢၼ်ႊတႂ်ႈ လႄႈမိူင်း ဢပ်ႊၵႃႊၼီႊသထၢၼ်ႊ ၸိူဝ်းၼႆႉဝႃႈၼႆ ။