မိူဝ်ႈပူၼ်ႉမႃး 26/06/2015 ၼၼ်ႉ ပႃႊတီႊၵၢၼ်မိူင်း 67 ၸုမ်း လႆႈၸႂ်ၵၼ်လူင်းလၢႆးမိုဝ်း ပိူင်တိုဝ်းၵမ်ပၢင်လိူၵ်ႈတင်ႈ (Code of Conduct) တီႈဝဵင်းတႃႈၵုင်ႈ ။ ၼႂ်းၸိူဝ်းလူင်းလၢႆးမိုဝ်းၼၼ်ႉ မီးပႃႊတီႊသၢင်ႇသီႈ (USDP) ၊ ပႃႊတီႊၼူၵ်ႉယုင်း (NLD) ၊ ပႃႊတီႊႁူင်းၶဝ်ႈ (NUP) ဢိၵ်ႇပႃးပႃႊတီႊၸိူဝ်းဢၼ်ယူႇၼႂ်း တႅဝ်းႁူမ်ႈ FDA, UNA, NBF ။

ပိူင်တိုဝ်းၵမ်ၼႆႉ ဢမ်ႇၸႂ်ႈလႄႈဝႃႈ တႃဢၢင်ႈဢိင်သေ ၵၢဝ်ႇႁႃပဵၼ်သူပ်းပဵၼ်ၵႂၢမ်း ၼႂ်းလုမ်းၼႂ်းၸႆးဢမ်ႇၸႂ်ႈ ။ ၵူၺ်းၵႃႈ ပဵၼ်တႃႇၼႄဝႃႈ မိူင်းႁဝ်းၶိူဝ်းႁဝ်းၼႆႉ ၵိုင်ႇပဵၼ်မိူင်းၻီႊမူဝ်ႊၶရေႊသီႊ ၊ မီးၾိင်ႈၻီႊမူဝ်ႊၶရေႊသီႊ ၊ တဵမ်ထူၼ်ႈမိူၼ်ပိူၼ်ႈ ၊ ဢမ်ႇၸႂ်ႈၵူၼ်းပႃႇထိူၼ်ႇ (ၵူၼ်းလိူင်း) ၵူၼ်းတူၵ်းတႅမ်ႇ ။ ၽၢၼ်တူဝ် ၵူၺ်းၵႃႈ ဢမ်ႇၽၢၼ်ပိူင်ယဵၼ်ႇငႄႈၵူၼ်း ။


ပေႃးဝႃႈၼႂ်းၸိူဝ်းလူင်းလၢႆးမိုဝ်းၼႆႉ မီး UNA ၵေႃႈ ပႃးပႃႊတီႊႁူဝ်သိူဝ် (SNLD) ႁဝ်း ၊ မီး NBF ၼႆၵေႃႈ ပႃးပႃႊတီႊသိူဝ်ၽိူၵ်ႇ (SNDP) ႁဝ်း ။ ပႃႊတီႊၵွင်ၸႆးႁဝ်းတႄႉ ၵွပ်ႈမႃးလိုၼ်းလင်လႄႈ ဢမ်ႇလႆႈလူင်းလၢႆးမိုဝ်းၸွမ်းသေတႃႉ ထုၵ်ႇလီလႆႈႁူႉၸွမ်းလႄႈတိုဝ်းၵမ်ၸွမ်း ။ ယွၼ်ႉဝႃႈ ပႃႊတီႊၵွင်ၸႆးၵေႃႈ ပဵၼ်ပႃႊတီႊတႆး ၊ တႆးဢၼ်ဝႃႈၼႆႉ ဢမ်ႇၸႂ်ႈၸိူဝ်ႉၸၢတ်ႈဢၼ်တူၵ်းတႅမ်ႇ ပဵၼ်ၸိူဝ်ႉၸၢတ်ႈၸၼ်ႉသုင်ဢိူဝ်ႈ ၼႆၼၼ်ႉ မီးၼႃႈတီႈပုၼ်ႈၽွၼ်း ၼႄပၼ်ပိူၼ်ႈတင်းလုမ်ႈၾႃႉ ၼင်ႇၵၼ် ။


ၼႂ်းပိူင်တိုဝ်းၵမ်ၼႆႉ မီးလၢႆၶေႃႈ ဢၼ်ႁဝ်းလီဢၼ်ႇလီဝူၼ်ႉလႄႈလီၸွမ်း။ ၽႂ်ဢၢၼ်ႇ / ဝူၼ်ႉ / ၸွမ်းၵေႃႈ ပဵၼ်ၵေႃႉၼႄဝႃႈ တႆးႁဝ်းပဵၼ်ၶိူဝ်းသုင် ။ ၽႂ်ဢမ်ႇဢၢၼ်ႇ / ဢမ်ႇဝူၼ်ႉ / ဢမ်ႇၸွမ်းၵေႃႈ တေၼႄဝႃႈ တႆးႁဝ်းပဵၼ်ၶိူဝ်းတႅမ်ႇ ။ ဢမ်ႇၵိုင်ႇတင်းၻီႊမူဝ်ႊၶရေႊသီႊ ။ ဢမ်ႇၵိုင်ႇလွတ်ႈလႅဝ်း ၊ ၵိုင်ႇယူႇပဵၼ်ၶီႈၶႃႈပိူၼ်ႈ ၊ ၵိုင်ႇတင်းယူႇတႂ်ႈဢႃႇၼႃႇသိုၵ်းၵူၺ်း ။


ပိူင်ၸိူဝ်းၼႆႉ မီးသင်လီႁူႉ / ၼႂ်းၸႂ် / လႄႈႁဵတ်းၸွမ်းၵမ်ႈၽွင်ႈ ?

 ယႃႇသိုဝ်ႉသဵင် သိုဝ်ႉၶႅပ်းမႄး ။

 ႁႂ်ႈၼပ်ႉထိုဝ် သုၼ်ႇလွတ်ႈလႅဝ်းၾၢႆႇသိုဝ်ႇၶၢဝ်ႇ ၊ ငိူင်ႉဝႄႈ ယႃႇယႃႉၵဝ်းၵၢၼ်ငၢၼ်းၾၢႆႇသိုဝ်ႇ ၊ ယႃႇၵႂႃႇမွၼ်ငိုၼ်းမွၼ်ၶမ်း ၽူႈသိုဝ်ႇၶၢဝ်ႇ ။

 ငိူင်ႉဝႄႈ ၶေႃႈၵႂၢမ်းဢၼ်ပၼ်ႁႅင်း လွင်ႈပႅင်းၸင်းၵၼ် ၼႂ်းၵႄႈၵၢင်သႃသၼႃ ၊ ၸိူဝ်ႉၶိူဝ်း ၊ ယွမ်ႇၸုမ်းၵူၼ်း ။

 ငိူင်ႉဝႄႈ လွင်ႈသႄႉၼႄးၵၼ် ၵဵဝ်ႇလူၺ်ႈလွင်ႈပဵၼ်ယိင်းပဵၼ်ၸၢႆး ။

 ယႃႇၸႂ်ႉတိုဝ်း သႃသၼႃ ပိူဝ်ႈတႃႇဢဵၼ်းဢၢၼ်းတၢင်းၵၢၼ်မိူင်း ။

 ႁၢမ်ႈသႄႉသွမ်း တိုၵ်းတေႃႇၵၼ် တေႃႇပုၵ်ႉၵူဝ်ႇတူဝ်ၵူၼ်း ။

 ထတ်းသၢင်ပႃႊတီႊႁိုဝ်ႉ ၊ တူဝ်ၼေႃႇၽူႈတႅၼ်းႁိုဝ်ႉ ၼႆၼၼ်ႉ မၼ်းတေလႆႈၵဵဝ်ႇလူၺ်ႈ ပေႃႇလသီႇသဵၼ်ႈတၢင်း ၵၢၼ်မိူင်းၼၼ်ႉလႂ် ၊ ၵဵဝ်ႇလူၺ်ႈလွင်ႈဢၼ်ပႃႊတီႊလႄႈ ၼေႃႈၽူႈတႅၼ်း ဢၼ်ၵဵဝ်ႇၶွင်ႈၼၼ်ႉ လႆႈၶပ်းသၢင်ႈႁၢင်ႈပွင်ၼႃႈၵၢၼ် ၵၢၼ်မိူင်းမႃး မိူဝ်ႈပူၼ်ႉၵွၼ်ႇပႃႈလင် ၼၼ်ႉလႂ်ၵူၺ်း ။

 သင်ၸိူဝ်ႉဝႃႈ ပႃႊတီႊႁိုဝ်ၼေႃႇၽူႈတႅၼ်းႁိုဝ်ႉ လၢတ်ႈ / ႁဵတ်း ပူၼ်ႉပႅၼ်ပိူင်တိုဝ်းၵမ်ၼႆၵေႃႈ မီးသုၼ်ႇၸီႉၸမ်ႈၼႄပၼ်လႆႈ ။


ၸိူဝ်းၼႆႉ မၼ်းပဵၼ်ပိူင်လူင်ၼႂ်း ပိူင်တိုဝ်းၵမ်ပၢင်လိူၵ်ႈတင်ႈ (COC) ။ ႁူဝ်ယွႆႈမၼ်းတႄႉ ၶူၼ်ႉႁႃလႆႈၼႂ်း Facebook ၾၢႆႇမၢၼ်ႈ ၾၢႆႇဢိင်းၵလဵတ်ႈ တေလႆႈယူႇ ။


တႆးႁဝ်းတင်းၼမ် ၸိူဝ်းပဵၼ်ၸၢဝ်းပုတ်ႉထၼၼ်ႉတႄႉ မၢင်ၽဝ်ႇတိုဝ်းၵမ်ၸွမ်း ၵႂၢမ်းသင်ႇသွၼ်ပုတ်ႉထ ဢၼ်ဝႃႈ -

1. ငိူင်ႉဝႄႈ ၵႂၢမ်းပႅတ်ႉလႅၼ် ။

2. ငိူင်ႉဝႄႈ ၵႂၢမ်းသူၼ်းယူင်းႁႂ်ႈပႅင်းၸင်းၵၼ် ၊ ပဵၼ်ၶဵၼ်တေႃႇၵၼ် ၊ တႅၵ်ႇယႅၵ်ႈၵၼ် တူဝ်တေႃႇတူဝ် / ၸုမ်းတေႃႇၸုမ်း ။

3. ငိူင်ႉဝႄႈ ၵႂၢမ်းပႃႇထိူၼ်ႇ လႃႇဝႃႈၵၼ် ။

4.ငိူင်ႉဝႄႈ ၵႂၢမ်း ဢမ်ႇမီးလွင်ႈမီးတၢင်း ၊ ဢမ်ႇမီးၵႃႈမီးၶၼ် ၼႆၵေႃႈ ယင်းတေၵုမ်ႇထူၼ်ႈယူႇယဝ်ႉ ။


ပဵၼ်ႁိုဝ်ၵေႃႈ ပၢင်လိူၵ်ႈတင်ႈၵမ်းၼႆႉ ႁႂ်ႈၼႄလႆႈဝႃႈ တႆးႁဝ်းၼႆႉ ၵိုင်ႇတင်းပဵၼ်ၸိူဝ်ႉၶိူဝ်းဢၼ်ၶိုၼ်ႈယႂ်ႇၵတ်းယဵၼ်လႄႈ လွတ်ႈလႅဝ်းမႃး ၼင်ႇၼႂ်းပိုၼ်းမိူင်းလၢတ်ႈဝႆႉၼၼ်ႉယူႇ ။ ၵူၼ်းတၢင်ႇၸၢတ်ႈမႃးၶီႇၼဵၵ်း ၸႅၵ်ႇၽႄဝႆႉသေတႃႉ ၸႂ်ႁဝ်းၼႆႉ ဢမ်ႇတူၵ်းတႅမ်ႇၵႂႃႇ ၊ ယင်းၶိုၼ်ႈယႂ်ႇယူႇၼႆၼၼ်ႉ ၶႅၼ်ႈတေႃႈပႃးၵၼ်ပၼ်ႁႅင်းၸႂ်တူဝ်ၵဝ်ႇလႄႈ ၵေႃႉသေႈ ပီႈၼွင်ႉၶဝ်သေ ႁတ်းႁတ်းႁၢၼ်ႁၢၼ် လုၵ်ႉၼႄလုမ်ႈၾႃႉသေၵမ်း တိုၵ်းသူၼ်းမႃးၼင်ႇၼႆ ။