ယေးငိုၼ်းလူၵ်ႈ (World Bank) တေၸွႆႈထႅမ်မိူင်းႁူမ်ႈတုမ်မၢၼ်ႈ တႃႇငိုၼ်း 400 လၢၼ်ႉၻေႃႊ လႃႊပိူဝ်ႈၵူၼ်းမိူင်းပတ်းပိုၼ်ႉ လႆႈမီးၾႆးၾႃႉၸႂ်ႉ ။

သိုဝ်ႇၶၢဝ်ႇထႆး ႁၢႆးငၢၼ်းဝႃႈ - ယေးငိုၼ်းလူၵ်ႈ World Bank ပိုၼ်ၽၢဝ်ႇဝႃႈတေပၼ်ငိုၼ်းၵမ်ႉ ၸွႆႈငိုၼ်းတႃႇ 400 လၢၼ်ႉၻေႃႊလႃႊၼင်ႇႁိုဝ် တေပူၵ်းပွင်ႁႅင်းၾႆးၾႃႉ မိူင်းမၢၼ်ႈ ဢၼ်တေ ႁဵတ်းႁႂ်ႈၵူၼ်းမိူင်းမၢၼ်ႈပတ်းပိုၼ်ႉ လႆႈၸႂ်ႉၾႆးၾႃႉၼႂ်းၶၢဝ်းတၢင်းပီ 2030 ၼႆႉ - ဝႃႈၼႆ ။


တႃႇၵေႃႇသၢင်ႈႁႅင်းၾႆးၾႃႉၼႆႉ တေၸႂ်ႉၶၢဝ်းယၢမ်းဝၢင်းၽႅၼ် 6 ပီၼႆယဝ်ႉ ၊ ပေႃးဝႃႈၵေႃႇသၢင်ႈယဝ်ႉ တေႁဵတ်းႁႂ်ႈၵူၼ်းမိူင်း 6.2 လၢၼ်ႉၵေႃႉပၢႆလႆႈႁပ်ႉၽွၼ်းလီ လႄႈႁိူၼ်းၵူၼ်း 1 လၢၼ်ႉပၢႆတေလႆႈၸႂ်ႉၾႆးၾႃႉ ။ မိူဝ်ႈလဵဝ်ၼႆႉ ၵူၼ်းမိူင်းမၢၼ်ႈပတ်းပိုၼ်ႉ 70 % ပၢႆဢမ်ႇမီးၾႆးၾႃႉၸႂ်ႉ ။


ၵဵဝ်ႇလူၺ်ႈၾႆးၾႃႉၼႆႉ လူင်ပွင်ၸိုင်ႈမိူင်းႁူမ်ႈတုမ်ႈမၢၼ်ႈ လႆႈႁူမ်ႈမိုဝ်းတင်းတၢင်ႇမိူင်း ၵေႃႇသၢင်ႈၶူင်းၵၢၼ်လူင်လၢႆလၢႆဢၼ် ပိူဝ်ႈတႃႇႁဵတ်းၾႆးၾႃႉ - မိူၼ်ၼင်ႇတီႈမိူင်းတႆးၼၼ်ႉ တိုၵ်ႉၵေႃႇသၢင်ႈၾၢႆ ၊ ၶုတ်းထၢၼ်ႇႁိၼ်ၸဵမ်ၸိူဝ်းၼႆႉ ။ ၵူၼ်းဝၢၼ်ႈ ၵူၼ်းမိူင်းတႄႉဢမ်ႇပေႃး မီးသုၼ်ႇလႆႈၸႂ်ႉၾႆးၾႃႉ ယွၼ်ႉပိူဝ်ႈတေ ၶၢႆပၼ်တၢင်ႇ မိူင်း ၊ ၵူၺ်းၵႃႈဢၼ်ထူပ်းတၢင်းယၢပ်ႇၽိုတ်ႇ လႆႈၶၢႆႉဢွင်ႈတီႈ ၊ ႁၢမ်းတီႈႁဵတ်းႁႃၵိၼ်တႄႉ
ပဵၼ်ၵူၼ်းဝၢၼ်ႈၼႆယဝ်ႉ ။