ပိူဝ်ႈတႃႇ တေပေႉ ၵၢၼ်လိူၵ်ႈတင်ႈ ၼႆႉ ၼေႃႇၽူႈတႅၼ်း ပႃႊတီႊ ႁူဝ်သိူဝ် SNLD တေႁူပ်ႉထူပ်း ၸတ်း ပၢင်သွၼ်တီႈ ဝဵင်းပၢင်လူင် ၸိုင်ႈတႆး ပွတ်းၸၢၼ်း ။

ဝၼ်းတီႈ 08/10/09/2015 (တေထိုင်ၼႆႉ) ၼေႃႇၽူႈတႅၼ်း ငဝ်ႈငုၼ်း ၻီႊမူဝ်ႊ ၶရေႊၸီႊ ၸိူဝ်ႉၶိူဝ်းတႆး (SNLD) တေ ႁူပ်ႉထူပ်းၵၼ်သေ ၸတ်းပၢင်သွၼ် ပိူဝ်ႈတႃႇ ပေႉၵၢၼ်လိူၵ်ႈတင်ႈ (2015) တီႈဝဵင်း ပၢင်လူင် ၸႄႈတွၼ်ႈ လွႆလႅမ် ၸိုင်ႈတႆး ပွတ်းၸၢၼ်း ။


တူဝ် ႁူဝ်ပဝ်ႈ ၸဝ်ႈၶုၼ် ထုၼ်းဢူး လၢတ်ႈဝႃႈ - တေႁူပ်ႉထူပ်း ဢုပ်ႇၵုမ်ၵၼ် ၵဵဝ်ႇၵပ်းလွင်ႈ ပၢင်လိူၵ်ႈတင်ႈ ဢၼ်တေမႃး ၼႆႉလႄႈ ၵဵဝ်ႇၵပ်းလွင်ႈ ပိူင်ၶဝ်ႈ လိူၵ်ႈတင်ႈ ။ တေပၼ် ပၢင်သွၼ်ၵႂႃႇ ၵဵဝ်ႇၵပ်းလွင်ႈ ၵၢၼ်လိူၵ်ႈတင်ႈၼႆႉ တေလႆႈဝႄႈ ၸိူင်ႉႁိုဝ် ၊ ၽွင်းလူင်း သူၼ်းတုမ် ၵူၼ်းမိူင်း ႁႃသဵင်တႃႇ ပၢင်လိူၵ်ႈတင်ႈၼႆႉ  တေလႆႈႁဵတ်း ၸိူင်ႉႁိုဝ် ။ တႃႇတေလႆႈ ၶႅပ်းၵၢင်ၸႂ်ၼႆႉ ပေႃးဝႃႈ လူင်းသူၼ်း တုမ်ၵူၼ်းမိူင်း တေလႆႈၸွမ်း မၢႆမီႈၸိူင်ႉႁိုဝ် ၊ တေပၼ် ပၢင်သွၼ် ၸိူဝ်းၼႆႉ ။ တေလၢတ်ႈၼႄ လွၵ်းလၢႆး ၼင်ႇႁိုဝ် တေဢွင်ႇပေႉ ၵၢၼ်လိူၵ်ႈတင်ႈ - ဝႃႈၼႆ ။


ပၢင်သွၼ်ၼႆႉ တေမီး ၼေႃႇၽူႈတႅၼ်း ၵူႈၸႄႈဝဵင်း ၊ တေမီး ၽူႈပွင်ၵၢၼ် ငဝ်ႈငုၼ်းလႄႈ ၽူႈမီးပုၼ်ႈၽွၼ်း ပႃႊတီႊ ၵူႈၸႄႈဝဵင်း ၶဝ်မႃး ၶဝ်ႈႁူမ်ႈ - ၼႆယဝ်ႉ ။


ယူႇတီႈ ပႃႊတီႊ ႁူဝ်သိူဝ် (SNLD) တမ်းဝၢင်းဝႆႉ ပိူင်ၵၢၼ်ၼၼ်ႉ  တေၸွမ်း ၶေႃႈလႆႈၸႂ် ပၢင်လူင် / ၼမ်ႉၸႂ် ပၢင်လူင်သေ လူင်းမိုဝ်း ႁဵတ်းသၢင်ႈ ၼႄၼမ်ႉ ၼႄတူဝ်ၵႂႃႇ ပိူဝ်ႈတႃႇ ၵေႃႇတင်ႈလႆႈ ၸိုင်ႈမိူင်း ႁူမ်ႈတုမ် ၸိုၼ်ႈၸၢင်ႇ (ၸိုင်ႈမိူင်း ႁူမ်ႈတုမ် ၾႅတ်ႊၻရႄႊလ်) ။ တေၶဝ်ႈ လိူၵ်ႈတင်ႈ ၼႂ်းမိူင်းတႆး ၊ ၸႄႈမိူင်းၶၢင် ၊ ၸိူင်းၸႄႈၵႅင်ႇ (ၸၵၢႆး) ၊ တိူင်းတႃႈလိူဝ်ႇ (မၼ်းတလေး) ၸိူဝ်းၼႆႉ တင်းမူတ်း ၶဵတ်ႇလိူၵ်ႈတင်ႈ  150 ပၢႆ - ၼႆယဝ်ႉ ။