ပႃႊတီႊ သိူဝ်ၽိူၵ်ႇ ပိုတ်ႇလုမ်း တီႈပွၵ်ႉ မၢႆ (4) ဝဵင်းၼၢင်း ၊ ဝဵင်းသႅၼ်ဝီ ၸိုင်ႈတႆး ပွတ်းႁွင်ႈ ယွၼ်ႉပေႃႈမႄႈ ၵူၼ်းမိူင်း တုၵ်းယွၼ်းႁႂ်ႈ ပိုတ်ႇလုမ်းပၼ် ပိူဝ်ႈတႃႇ တေပဵၼ်ႁူဝ်ႉ ႁႄႉၵင်ႈပၼ် ၵူၼ်းမိူင်း ။

ပူၼ်ႉမႃး မိူဝ်ႈဝၼ်းတီႈ 02/09/2015 ၶၢဝ်းယၢမ်း 08:00 မူင်း ၸုမ်းပႃႊတီႊ သိူဝ်ၽိူၵ်ႇ ဝဵင်းသႅၼ်ဝီ သိုပ်ႇပိုတ်ႇလုမ်း ပၼ်ၵူၼ်းမိူင်း တီႈပွၵ်ႉမၢႆ (4) ဝဵင်းၼၢင်း ဝဵင်းသႅၼ်ဝီ ၸိုင်ႈတႆး ပွတ်းႁွင်ႇ မီး ၼႃယၵ ၊ ႁူဝ်ပဝ်ႈ ၊ ၵႅမ်ႁူဝ်ပဝ်ႈ လႄႈ ၽူႈၼမ်းၼႂ်း ပႃႊတီႊ သိူဝ်ၽိူၵ်ႇ ၊ ၵွပ်ႈဝႃႈ ပေႃႈမႄႈ ၵူၼ်းမိူင်း တုၵ်းယွၼ်းႁႂ်ႈ ပိုတ်ႇလုမ်းပၼ် ပိူဝ်ႈတႃႇ တေပဵၼ်ႁူဝ်ႉ ႁႄႉၵၢင်ပၼ် ၵူၼ်းမိူင်း ။ လိူဝ်ၼၼ်ႉၵေႃႈ သပ်းလႅင်း ပိုတ်ႇလၢတ်ႈၼႄပၼ် လွင်ႈၼမ်ႉတွၼ်း ၽွၼ်းလီ ၻီႊမူဝ်ႊၶရေႊသီႊ ပဵၼ်ဝႆႉၸိူင်ႉႁိုဝ် ၊  ဢိၵ်ႇတင်း ယိူင်းဢၢၼ်း ပႃႊတီႊသိူဝ်ၽိူၵ်ႇ ဢၢၼ်းပဵၼ် ၽွင်းလူင် မိူင်းတႆး ။


ၽူႈတႅၼ်းၵူၼ်းမိူင်း ၸၢႆးဝုၼ်းၶၢႆႇ သပ်းလႅင်း လၢတ်ႈၼႄ ၵူၼ်းမိူင်း လွင်ႈသုၼ်ႇလႆႆႈ သုၼ်ႇပဵၼ် ၵူၼ်းမိူင်း ၊ လွင်ႈမိူင်း ႁူမ်ႈတုမ် ၸိုၼ်ႈၸၢင်ႇ လႄႈပႃႊတီႊ သိူဝ်ၽိူၵ်ႇ ယိူင်းဢၢၼ်းပဵၼ် ၽွင်းလူင် မိူင်းတႆး ၼႂ်းပီ 2015 ။
ၼႂ်းၸႄႈဝဵင်း သႅၼ်ဝီၼႆႉ ဢၼ်လႆႈပိုတ်ႇ လုမ်းသိူဝ်ၽိူၵ်ႇၵႂႃႇ မီး 23 လုမ်း ၊ လုၵ်ႈၸုမ်းပႃႊတီႊ မီး 5000 ပၢႆ ၼႆယဝ်ႉ ။


တီႈပၢင်ပိုတ်ႇ လုမ်းသိူဝ်ၽိူၵ်ႇ ပွၵ်ႉမၢႆ(4) ဝဵင်းၼၢင်း ၊ ဝဵင်းသႅၼ်ဝီၼႆႉ မီးၽူႈၶဝ်ႈႁူမ်ႈ ၵၢဝ်ႇလၢတ်ႈ ၶေႃႈၵႂၢမ်း 1. ၼႃယၵ လုင်းလၢႆးသႂ်မၢတ်ႈ ၊ 2. ႁူဝ်ပဝ်ႈ လုင်းၸၢႆးမျႃႉမွင်ႇ ၊ 3. ၽူႈတႅၼ်း ၵူၼ်းမိူင်း သႅၼ်ဝီ ၸၢႆးဝုၼ်းၶၢႆႇ ၽူႈၶဝ်ႈႁူမ်ႈ တင်းမူတ်း 141 ၵေႃႉ ပိုတ်ႇပၢႆႉလႄႈ ပူၵ်းတင်ႈ တုင်းပႃႊတီႊ ယဝ်ႉတူဝ်ႈ လီငၢမ်းၵႂႃႇ ၼႆယဝ်ႉ ။


ၽူႈတေၶဝ်ႈ လိူၵ်ႈတင်ႈ ပီ 2015 ၼႂ်းၸႄႈဝဵင်း သႅၼ်ဝီ ၼၢင်းထႃးမေႇ ၽူႈတႅၼ်းသၽႃး ၸႄႈမိူင်း သႅၼ်ဝီ ၶဵတ်ႇလိူၵ်ႈတင်ႈ မၢႆ (1) ၊ ၸၢႆးဝုၼ်ႉမိၼ်ႉ ၽူႈတႅၼ်း သၽႃးၸႄႈမိူင်း သႅၼ်ဝီ ၶဵတ်ႇလိူၵ်ႈတင်ႈ မၢႆ (2) ၊ ၸၢႆးဝုၼ်းၶၢႆႇ ၽူႈတႅၼ်းၵူၼ်းမိူင်း သႅၼ်ဝီ ၸိူဝ်းၼႆႉ ။