ဝၢႆးလင်လူင်ပွင်ၸိုင်ႈ ပိုၼ်ၽၢဝ်ႇဝႃႈ ဝၼ်းထိ 8 လိူၼ် သႅပ်ႉထႅမ်ႊပိူဝ်ႊ ၼႆႉ ပႃႊတီႊၵၢၼ်မိူင်း ဢၼ်တေၶဝ်ႈလိူၵ်ႈတင်ႈ တႄႇလူင်းသူၼ်းတုမ်ႇ ၵူၼ်းမိူင်းလႆႈယဝ်ႉ ၼႆလႄႈ ပႃႊတီႊၼႂ်းမိူင်းတႆး လၢႆလၢႆပႃႊတီႊ ဢွၼ်ၵၼ်လူင်းသူၼ်းတုမ်ၵူၼ်းမိူင်း ၼႂ်းပိုၼ်ႉတီႈၽႂ်မၼ်း ။ ၼေႃႇၽူႈတႅၼ်းသၽႃး ၸိုင်ႈတႆးပွတ်းဢွၵ်ႇၵေႃႈ ဢွၼ်ၵၼ်လူင်းသူၼ်းတုမ်ၵူၼ်းမိူင်း ။ လွင်ႈတူင်ႉၼိုင်ၶဝ် မီးၸိူင်ႉႁိုဝ် ။ သပ်းလႅင်းၼေၵူၼ်းမိူင်းၸိူင်ႉႁိုဝ် ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ် ၸၢႆးဝုၼ်းတိပ်ႉ ၼေႃႇၽူႈတႅၼ်း ပႃႊတီႊသိူဝ်ၽိူၵ်ႇ ဢၼ်တေၶႄႉၶႅင်ႇ ၼႂ်းသၽႃးၸႄႈဝဵင်းၵဵင်းတုင် ၶဵတ်ႇလိူၵ်ႈတင်ႈမၢႆ (2) ဝႆႉၼင်ႇၼႆၶႃႈဢေႃႈ ။

ထၢမ် - လႆႈယိၼ်းဝႃႈ မိူဝ်ႈဝၼ်းတီႈ 14/09/2015 ပႃႊတီႊသိူဝ်ၽိူၵ်ႇ ၵဵင်းတုင် ၸတ်းႁဵတ်းပၢင်ႁူပ်ႉထူပ်း ၼႂ်းလုၵ်ႈၸုမ်းပႃႊတီႊသိူဝ်ၽိူၵ်ႇ တီႈႁူင်းႁေႃတႆးလိုဝ်ႉ ဝဵင်းၵဵင်းတုင် ၸွင်ႇၸႂ်ႈၶႃႈ ?


တွပ်ႇ - ၸႂ်ႈၶႃႈဢေႃႈ


ထၢမ် - တႄႇၶၢဝ်းယၢမ်းလၢႆမူင်းၶႃႈ ?


တွပ်ႇ - ဝၢႆးဝၼ်း 13:00-15:30 မူင်း။


ထၢမ် - ပၢင်ႁူပ်ႉထူပ်းလုၵ်ႈၸုမ်းပႃႊတီႊၶႃႈလူး လႆႈသပ်းလႅင်းလၢတ်ႈၼႄ သင်ၽွင်ႈၶႃႈ ?


တွပ်ႇ - လႆႈသပ်းလႅင်းလၢတ်ႈၼႄ လွင်ႈပႃႊတီႊတႆး 3 ပႃႊတီႊ ဢၼ်တေလိူၵ်ႈတင်ႈ ၼႂ်းၸႄႈဝဵင်းၵဵင်းတုင် ၊ လိူဝ်ၼၼ်ႉၵေႃႈ ႁႂ်ႈလုၵ်ႈၸုမ်းပွင်ႇၸႂ်ဝႃႈ တႄႇမိူဝ်ႈပီ 2010-2015 ၼႆႉ ပႃႊတီႊလႂ် သမ်ႉႁဵတ်းပၼ် ၵူၼ်းမိူင်း ၸိုင်ႉႁိုဝ်ၽွင်ႈ ႁႂ်ႈလုၵ်ႈၸုမ်းလႆႈႁပ်ႈႁူႉ ။


ထၢမ် - ယူႇတီႈလုၵ်ႈၸုမ်းပႃႊတီႊသေ ဢၼ်ဢမ်ႇပွင်ၸႂ် လွင်ႈသပ်းလႅင်းၼႄ 3 ပႃႊတီႊၼႆႉ ၸွင်ႇမီးၶႃႈ ?


တွပ်ႇ - ဢမ်ႇမီးၶႃႈ ။


ထၢမ် - ယူႇတီႈလုၵ်ႈၸုမ်းပႃႊတီႊသေ ၵဵဝ်ႇၵပ်းလူၺ်ႈ ပၢင်လိူၵ်ႈတင်ႈၼႆႉ ဢၼ်ဢမ်ႇပွင်ႇၸႂ် မီးလွင်ႈသင်ၶႃႈ ?


တွပ်ႇ - ၵမ်ႉၼမ် ၵူၼ်းမိူင်းဢမ်ႇပွင်ၸႂ်တႄႉ ပဵၼ်လွင်ႈတွတ်ႈၶႅပ်းၵၢင်ၸႂ်ယဝ်ႉ မိူဝ်ႈလိူၵ်ႈတင်ႈ ပီ 2010 ၼၼ်ႉ လႆႈၶိတ်ႇဢဝ် ။ ထိုင်မႃး ပီ 2015 သမ်ႉ တေတွၵ်ႇၸုမ်ႈဢဝ် လုၵ်ႈၸုမ်းၶဝ် ထၢမ်ယူႇ တေလႆႈတွၵ်ႇၸုမ်ႈၸိူင်ႉႁိုဝ် ? တေလႆႈတွတ်ႈၶႅပ်းၵၢင်ၸႂ်လၢႆၶႅပ်း ? ႁဝ်းၶႃႈ သပ်းလႅင်းလၢတ်ႈပၼ် လၢႆးတွၵ်ႇၸုမ်ႈလႄႈ လၢႆးတွတ်ႈၶႅပ်းၵၢင်ၸႂ် ပၼ်ယူႇၶႃႈ ။


ထၢမ် -   ၽူႈတႅၼ်းၼႂ်းပႃႊတီႊသိူဝ်ၽိူၵ်ႇ ဢၼ်လႆႈပေႉ လိူၵ်ႈတင်ႈ ပီ 2010 တင်းမူတ်းမီးလၢႆၵေႃႉၶႃႈ ?


တွပ်ႇ - ဢၼ်ၶႃႈႁဝ်းလႆႈႁူႉဝႆႉတႄႉ တင်းမူတ်းမီး 57 ၵေႃႉ မိူဝ်ႈပီ 2010 ။ ထိုင်မႃး ပၢင်လိူၵ်ႈတင်ႈသွမ်ႈမိူဝ်ႈပီ 2012 ၼၼ်ႉ ပေႉထႅင်ႈ 1 ၵေႃႉ ႁူမ်ႈၵၼ်တင်းမူတ်း မီး 58 ၵေႃႉၶႃႈ ။


ထၢမ် - ၽူႈတႅၼ်းဢၼ်လႆႈလုၵ်ႉပႃႊတီႊသိူဝ်ၽိူၵ်ႇသေ ၶၢႆႉၵႂႃႇတင်ႇပႃႊတီႊလူးမီးလၢႆၵေႃႉၶႃႈ ?


တွပ်ႇ - ဢၼ်ၶႃႈႁဝ်းလႆႈႁူႉတႄႉ ၽူႈတႅၼ်း 16 ၵေႃႉ မီးယူႇၼႂ်းသၽႃးၼၼ်ႉ လုၵ်ႈတီႈပႃႊတီႊသိူဝ်ၽိူၵ်ႇ သေ ၶၢႆႉၵႂႃႇပႃႊတီႊႁူဝ်သိူဝ်ၶႃႈ ။


ထၢမ် - ၼႂ်းမိူင်းႁူမ်ႈတုမ်ၼႆႉ  ပေႃးၽူႈတႅၼ်းၶၢႆႉပႃႊတီႊလႂ် ထွၼ်တူဝ်ဢွၵ်ႇလႂ်ၸိူဝ်းၼၼ်ႉ  တေလႆႈပူတ်းၸၼ်ႉၵၢၼ် ၼႆ ၸွင်ႇမီးမၢႆမီႈၶႃႈႁႃႉ ?


တွပ်ႇ - ၼႂ်းမိူင်းမၢၼ်ႈၼႆႉ ဢမ်ႇမီးပၵ်းပိူင် (မၢႆမီႈ) ၸိူင်ႉၼၼ်ႉၶႃႈ ။ ပေႃးၸွမ်းပၵ်းပိူင်မၢႆမီႈ တၢင်ႇမိူင်းၸိုင် ၽူႈတႅၼ်းၼႆႉ ပေႃးၶၢႆႉပႃႊတီႊ ၵႂႃႇၸူးတၢင်ႇပႃႊတီႊ ( တေလႆႈပူတ်းၸၼ်ႉၵၢၼ်တင်းသဵင်ႈ ဢၼ်မီးမႃးၸိူဝ်းၼၼ်ႉ ၼႆတႄႉမီးဢေႃႈ ) ။


ထၢမ် - မိူဝ်ႈဝၼ်းတီႈ 14 ၼၼ်ႉ လႆႈသူၼ်းတုမ် / သပ်းလႅင်းပၼ် လုၵ်ႈၸုမ်း ၸိူင်ႉႁိုဝ်ၽွင်ႈ ?


တွပ် - ႁဝ်းၶႃႈသပ်းလႅင်းလၢတ်ႈၼႄ လုၵ်ႈၸုမ်းတႄႉ ဢမ်ႇၸႂ်ႈဝႃႈ ၵူၼ်းမိူင်းတင်းသဵင်ႈ တေလႆႈတွတ်ႈပၼ်သိူဝ်ၽိူၵ်ႇဢၼ်လဵဝ်  ၊ ၶႂ်ႈႁႂ်ႈၵူၼ်းမိူင်းႁူႉဝႃႈ ၸုမ်းလႂ် ပႃႊတီႊလႂ် ဢိင်ၼိူဝ်ပၵ်းပိူင်ပေႃႊလသီႊ ဢၼ်လႂ်ဝႆႉ ။ လွင်ႈၼႆႉ မၼ်းယူႇတီႈသူၸဝ်ႈသေ လိူၵ်ႈသႂ်ႇၶႃႈ ဢဝ်ပီႈၼွင်ႉၵူၼ်းမိူင်းဝႃႈ ။ လိူၵ်ႈဢၼ်လႂ်ၵေႃႈ လိူၵ်ႈလႆႈ လႆႈသပ်းလႅင်းလၢတ်ႈၵႂႃႇၼင်ႇၼႆ ။


ထၢမ် - မိူဝ်ႈဝၼ်းတီႈ 15 ၼၼ်ႉၶႃႈလူး ။ လူင်းပိုၼ်ႉတီႈ ႁူပ်ႉထူပ်းပေႃႈမႄႈၵူၼ်းၼႆ ဢၼ်ၵူၼ်းမိူင်းဢမ်ႇပွင်ႇၸႂ် ၵႂင်ယူႇၼၼ်ႉ မီးသင်ၶႃႈ ?


တွပ်ႇ - ဢၼ်ၵူၼ်းမိူင်းၵႂင်ယူႇတႄႉ ပႃႊတီႊ 3 ပႃႊတီႊၶႃႈဢေႃႈ ။ ၵႂၢမ်းထၢမ်ၵူၼ်းမိူင်း ထၢမ်တီႈႁဝ်း ၶဝ်တႄႉ ႁဵတ်းသင်လႄႈ ပႃႊတီႊ 3 ဢၼ်ၼႆႉ ဢမ်ႇႁူမ်ႈၵၼ်လႆႈ ၵူၼ်းမိူင်းထၢမ်ၼင်ႇၼႆႉ ။ ႁဝ်းၶႃႈ သပ်းလႅင်းလၢတ်ႈၼႄၵႂႃႇဝႃႈ လွင်ႈၼႆႉ မၼ်းဢိင်ၼိူဝ်လၵ်းၵၢၼ် ပေႃႊလသီႊပႃႊတီႊၽႂ် ပႃႊတီႊမၼ်း ။


ထၢမ် -   လႆႈသပ်းလႅင်းၼေယူႇၶႃႈႁႃႉ ၶေႃႈယိူင်းဢၢၼ်းပႃႊတီႊတႆး သၢမ်ပႃႊတီႊ ။


တွပ်ႇ -  လႆႈသပ်းလႅင်းလၢတ်ႈၼႄၶႃႈဢေႃႈ ။  ၶေႃႈယိူင်းဢၢၼ်း ပႃႊတီႊႁူဝ်သိူဝ် ။ မိူၼ်ၼင်ႇ ဝႃႈ တေႁဵတ်းပႅတ်ႈၸိုင်ႈမိူင်း ဢိင်ၼိူဝ်တီႈလိၵ်ႈႁူမ်ႈမၢႆပၢင်လူင် ။ ပႃႊတီႊၵွင်ၸႆးသမ်ႉ ယိူင်းဢၢၼ်း တေပူၵ်းပွင်တၢင်းမိူင်းတႆးပွတ်းဢွၵ်ႇၶူင်းၶိုၼ်ႈယႂ်ႇ ပၢင်လိူၵ်ႈတင်ႈၼႆႉ တေၶဝ်ႈလိူၵ်ႈတင်ႈ 2 ၸႄႈဝဵင်း ၸႄႈဝဵင်းမိူင်းယၢင်းလႄႈ ၸႄႈဝဵင်းၵဵင်းတုင် ၸႄႈဝဵင်းမိူင်းလႃးတႄႉ တေၶဝ်ႈလိူၵ်ႈဢမ်ႇၶဝ်ႈလိူၵ်ႈယင်းပႆႇႁူႉ သႂ်ႇသၢႆမၢႆၽူႈတႅၼ်းတႄႉလႆႈတၢင်ႇဝႆႉယူႇ လႆႈႁူႉၼင်ႇၼႆ ။ ယိူင်းဢၢၼ်းပႃႊတီႊႁဝ်းၶႃႈ သိူဝ်ၽိူၵ်ႇတႄႉ ၵၢၼ်မိူင်းလႅၵ်ႈလၢႆႈၸိူင်ႉႁိုဝ်ၵေႃႈ ႁဝ်းတေလႅၵ်ႈလၢႆးၸိူင်ႉၼၼ်ၶႃႈ ။ ယဝ်ႉၵေႃႈ ယိူင်းဢၢၼ်းဝႆႉ တႃႇႁဵတ်းလူင်ပွင်ၸိုင်ႈမိူင်းတႆးၶႃႈ ။


ထၢမ် - ၵွပ်ႈသင် တေဢၢၼ်းႁဵတ်းလူင်ပွင်ၸိုင်ႈမိူင်းတႆးၶႃႈ ?


တွပ်ႇ - ၵွပ်ႈဝႃႈ ၼႂ်းသၽႃးၵေႃႈ ပဵၼ်ၵူၼ်းမိူင်းတႆးႁဝ်း ၊ လူင်ပွင်ၸိုင်ႈမိူင်းတႆးၵေႃႈ ပဵၼ်တႆးႁဝ်း ၊ ၵူၼ်းမိူင်းၵေႃႈ ပဵၼ်တႆးႁဝ်း ပဵၼ်ၸၢဝ်းၶိူဝ်းတႆးတင်းၼမ် ၊ ပေႃးၼႆတႄႉ ဝၢၼ်ႈမိူင်းႁဝ်းတေလီဢေႃး ႁဝ်းယိူင်းဢၢၼ်းၸိူင်ႉၼႆၶႃႈ ။


မႂ်ႇသုင်ၶႃႈ