ငဝ်ႈငုၼ်းမုၵ်ႉၸုမ်းလူင် သင်ၶၸိုင်ႈတႆး ၸတ်းပၢင်သွၼ် ၵဵဝ်ႇလူၺ်ႈလွင်ႈထမ်မ ပၼ်မေႃသွၼ် ဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း ပွၵ်ႈဢွၼ်တၢင်းသုတ်း ။

တင်ႈတႄႇဝၼ်းတီႈ 15/09/2015 (မိူဝ်ႈဝႃး) ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆးၸတ်းႁဵတ်း ပၢင်ၾိုၵ်းၾွၼ်ႉ ၼမ်ႉၵတ်ႉပၼ်မေႃသွၼ် 150 ၵေႃႉ ပိူဝ်ႈတႃႇသွၼ်ၼႂ်းႁူင်းႁဵၼ်းထမ်မၼႂ်းပိုၼ်ႉ တီႈၽႂ်မၼ်း ။


ၼႂ်းပၢင်သွၼ်ၼႆႉမီး မေႃသွၼ်11 ဢိူင်ႇၶဝ်ႈႁူမ်ႈ မိူၼ်ၼင်ႇ - ဢိူင်ႇႁူဝ်ၾၢႆလူင် ၊ ၵုင်းၵႅင်း ၊ ၼမ်ႉတိုင်း ၊ ၼွင်လူမ်ႇ ၊ ၼွင်ႁီး ၊ တွင်ၵႂၢႆး ၊ ဝူဝ်းလၢႆး ၊ ၼႃးလေႃး ၊ သၢဝ်းဝႃး ၊ ၼွင်ယၢင်း၊ ၼႃးဝွၼ် ၸိူဝ်းၼႆႉ ။


ပၢင်ၾိုၵ်းၾွၼ်ႉၼႆႉ တေၸတ်းႁဵတ်းတႃႇၶၢဝ်းတၢင်း 5 ဝၼ်း (ဝၼ်းတီႈ 15 – 20/09/2015) ၊ ၵဵဝ်ႇလူၺ်ႈလွင်ႈပုတ်ႉထၸဝ်ႈ ၊ လွင်ႈၶိူဝ်းၸဝ်ႈၾႃႉတႆး ၊ ၾိင်ႈထုင်းသႃသၼႃ ၊ ႁႂ်ႈလုၵ်ႈ လၢၼ်ၵူႈ ၵေႃႉမေႃလွတ်ႈႁေႃးၵႂၢမ်းဝႆးၽြႃး ၊ သွၼ်ၸိူင်ႉႁိုဝ်ၼင်ႇႁိုဝ် လုၵ်ႈႁဵၼ်းပေႃးတေသူၼ်ၸႂ် ၸဵမ်ၸိူဝ်း ၼႆႉ ။


ၸၢႆးတ ၵေႃၵမ်ၵၢၼ်ၸတ်းႁဵတ်းပၢင်ၾိုၵ်းၾွၼ်ႉ လၢတ်ႈဝႃႈ - “ ယွၼ်ႉပိူဝ်ႈပီႈၼွင်ႉ တႆးႁဝ်းၵမ်ၼမ် ပဵၼ်ၸၢဝ်းပုတ်ႉထ လႄႈၼင်ႇႁိုဝ်ပီႈၼွင်ႉလုၵ်ႈလၢၼ် သၢမ်ပၢၼ်ၸဵတ်းသႅၼ်း ပေႃးတေႁူႉလွင်ႈ ၾိင်ႈထုင်းသႃသၼႃသေပူၵ်းပွင် လူလွမ်ထိင်းသိမ်းသႃသၼႃပုတ်ႉ ႁဝ်းႁႂ်ႈပေႃးႁိူဝ်ႈႁိူင်းပိူင်းသႂ်ႇၵႂႃႇ ” ၼႆယဝ်ႉ ။


ပၢင်သွၼ်ပွၵ်ႈၵမ်းၼႆႉ ၸႂ်ႉလိၵ်ႈတႆးလႄႈလိၵ်ႈပႃလီႉ သေမီးၸဝ်ႈၶူးလူင်သီႇရိထမ်ႇမ ဝတ်ႉဝေႇလူႉ ဝုၼ်ႇဝဵင်းတူၼ်ႈတီး၊ ၸဝ်ႈသင်ႇၶ 5 ပႃး လႄႈ မေႃသွၼ် 10 ၵေႃႉ ပူင်သွၼ်ပၼ်။


ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆး ၼႆႉမိူဝ်ႈပူၼ်ႉမႃး ၵေႃႈလႆႈၸတ်းႁဵတ်းပၢင်ၾိုၵ်ႉၾွၼ်ႉ မေႃသွၼ်တွၼ်ႈတႃႇႁူင်းႁဵၼ်းထမ်ႇမ မႃးယဝ်ႉလၢႆတီႈမိူၼ်ၼင်ႇၼမ်ႉၶမ်း ၊ ပၢင်လူင် ၊ မိူင်းသူႈ ၊ မိူင်းပၼ်ၸိူဝ်းၼႆႉ ။