ၸုမ်းၶၢဝ်ႇ ၽူႈတွႆႇႁွၵ်ႈ လႆႈတွင်ႈထၢမ် လုင်းၸၢႆးႁွင်ၶမ်း ႁူဝ်ပဝ်ႈ ပႃႊတီႊ ၵွင်ၸႆး  ဢၼ်တေ ၶဝ်ႈၶႄႉၶႅင်ႇ ပၢင်လိူၵ်ႈတင်ႈ  2015 ၼႂ်းၸႄႈဝဵင်း  ၵဵင်းတုင် ၵမ်းၼႆႉ ။

ထၢမ် - မိူဝ်ႈလဵဝ် လႆႈႁၢင်ႈႁႅၼ်း ၸိူင်ႉႁိုဝ်ဝႆႉ ၽွင်ႈၶႃႈ တႃႇလူင်းႁူၺ်း သူၼ်းတုမ် ၵူၼ်းမိူင်း ။


တွပ်ႇ - မိူဝ်ႈလဵဝ် ဢၼ်လႆႈ ႁၢင်ႈႁႅၼ်းဝႆႉတႄႉ တေလူင်းသူၼ်းတုမ် ၵူၼ်းမိူင်း သေဢၢင်ႈဢၢၼ်း တႃႇပူၵ်းပွင် ပၼ်ၵူၼ်းမိူင်း မိူၼ်ၼင်ႇ ၾၢႆးၾႃႉ ၊ လွင်ႈၵၢပ်းသိုပ်ႇ တိတ်းတေႃႇ ၵႂႃႇမႃး ၊ ၵၢၼ်ပၢႆး မၢၵ်ႈမီး ၊ ပၢႆးပၺ်ၺႃ ၊ ပၢႆးယူႇလီ ၸိူဝ်းၼႆႉ ၵွပ်ႈဝႃႈ တၢင်း ပွတ်းဢွၵ်ႇၶူင်း ႁဝ်းၶႃႈဢေႃႈ ။  ၵဵဝ်ႇၵပ်းလူၺ်ႈ လွင်ႈၸိူဝ်းၼႆႉ ႁဝ်းယင်းတိုၵ်ႉ တူၵ်းလိုၼ်း ပိူၼ်ႈယူႇ ။


ထၢမ် - မိူဝ်ႈပူၼ်ႈမႃး လုင်းႁွင်ၶမ်း လႆႈလူင်း ႁူပ်ႉထူပ်း ၵူၼ်းမိူင်း ၼႂ်းၸႄႈဝဵင်း ၵဵင်းတုင်ၼၼ်ႉ ၵၢင်ၸႂ် ၵူၼ်းမိူင်း ဢၼ်ၶႂ်ႈလႆႈ သေပိူၼ်ႈ ပဵၼ်သင်ၶႃႈ ။


တွပ်ႇ - မိူဝ်ႈလဵဝ်ႈၼႆႉ ၸၢဝ်းႁႆႈ ၸၢဝ်ႈၼႃးဢိူဝ်ႈ ဢၼ်ၶဝ် ၶႂ်ႈလႆႈသေပိူၼ်း ပဵၼ်ၾၢႆၼမ်ႉ ၵွပ်ႈဝႃႈ ၸၢဝ်းၼႃးၶဝ် ၼိုင်ႈပီလႂ် ၶဝ်ႁဵတ်းၼႃး သွင်ပွၵ်ႈ ၼမ်ႉဢၼ် လဵင်ႉၼႃးသမ်ႉ ဢမ်ႇၵုမ်ႇထူမ်ႈ ယွၼ်ႉၼၼ်ႉလႄႈ ယွၼ်းႁႂ်ႈႁဵတ်း ၾၢႆၼမ်ႉပၼ် ။


ထၢမ် - သင်ဝႃႈ လုင်းႁွင်ၶမ်း ထုၵ်ႇလိူၵ်ႈ ပေႉမႃးယဝ်ႉ ၸိုင် ၼႂ်းၸႄႈဝဵင်း ၵဵင်းတုင် လုင်းႁွင်ၶမ်း တေႁဵတ်းသင်ပၼ် ၵူၼ်းမိူင်း ဢွၼ်တၢင်းသုတ်း ၶႃႈ ။


တွပ်ႇ - လွင်ႈတေႁဵတ်း ပၼ်ၵူၼ်းမိူင်းၼႆႉ မၼ်းယူႇတီႈ ၵူၼ်းမိူင်း ယိုၼ်ႈယွၼ်း တုၵ်းမႃးၵွၼ်ႇ ဢၼ်ၶဝ်ၶႂ်ႈလႆႈ သေပိူၼ်ႈ ပဵၼ်သင်ၼႆ ပေႃးၶဝ်ၶႂ်ႈလႆႈသင် လုင်းတေႁဵတ်းပၼ် ဢၼ်ၼၼ်ႉ ဢွၼ်တၢင်း ။


ထၢမ် - ယူႇတီႈ လုင်းႁွင်ၶမ်းသေ တေၶႄႉၶႅင်ႇ ၽူႈတႅၼ်း ၵူၼ်းမိူင်း ၼႂ်းၸႄႈဝဵင်း ၵဵင်းတုင်ၼႆႉ လုင်းႁွင်ၶမ်း မၼ်ႈၸႂ်တေ ပေႉမွၵ်ႈ ၵႃႈႁိုဝ်ၶႃႈ ။


တွပ်ႇ - ဢမ်ႇၸၢင်ႈဝႃႈယဝ်ႉ  ဢဝ်ၵူၼ်းမိူင်း ႁၵ်ႉဝႃႈဢိူဝ်ႈ ၼၼ်ႉတႄႉ ႁဝ်းဝႃႈ 70 %- 80% ၵေႃႈ ႁဝ်းဢမ်ႇၸွမ်း ႁူႉလူး ။ ၼႂ်းၸႄႈဝဵင်း ၵဵင်းတုင်ၼႆႉ ၽူႈတႅၼ်း ၵူၼ်းမိူင်း ဢၼ်တေ ၶဝ်ႈၶႄႉၶႅင်ႇ မီး 12 ၵေႃႉ ၊ 12 ပႃႊတီႊၵွၼ်ႇ  ။


ထၢမ် - တင်ႈတႄႇ မိူဝ်ႈလႆႈ ပိုတ်ႇလုမ်း ပႃႊတီႊ ၵွင်ၸႆးမႃး ထိုင် ယၢမ်းလဵဝ်ၼႆႉ လုင်းႁွင်ၶမ်း လႆႈလူင်း ႁူပ်ႉထူပ်း ၵူၼ်းမိူင်း ၼႂ်းပိုၼ်ႉတီႈ မွၵ်ႈႁူဝ်ၵူၼ်း ၵႃႈႁိုဝ် ဢၼ်ၵူၼ်း ႁူႉၸၵ်း ပႃႊတီႊ ၼႆႉၶႃႈလူး မီးမွၵ်ႈ လၢႆၿိူဝ်ႊသႅၼ်ႊ (%) ၶႃႈ? ။


တွပ်ႇ - ပေႃးဢဝ် ၿိူဝ်ႊသႅၼ်ႊ (%) မၼ်းလၢတ်ႈတႄႉ တေမီးမွၵ်ႈ 70 ၿိူဝ်ႊသႅၼ်ႊ (%) ယဝ်ႉ ပေႃးဢဝ် ဝၢၼ်ႈ / ဢိူင်ႇ လႆႈလူင်းႁူပ်ႉ ၵူၼ်းမိူင်းၸိုင် ႁူမ်ႈဝၢၼ်ႈမၼ်း တေမီး မွၵ်ႈ 140 ဝၢၼ်ႈပၢႆ ။


ထၢမ် - လိုၼ်းသုတ်းၼႆႉ ယူႇတီႈ လုင်းႁွင်ၶမ်းသေ ၶႂ်ႈၾၢၵ်ႇၵႂၢမ်း ပၼ်ပေႃႈမႄႈ ၵူၼ်းမိူင်း တႆးႁဝ်း ၸိူင်ႉႁိုဝ် ၽွင်ႈၶႃႈ ။


တွပ်ႇ - မိူဝ်ႈလဵဝ်ၼႆႉ ဝၢၼ်ႈမိူင်း လႅၵ်ႈလၢႆႈ ပဵၼ်မိူင်း ၻီႊမူဝ်ႊ ၶရေႊသီႊယဝ်ႉ ႁဝ်းထုၵ်ႇလီ ႁတ်းႁၢၼ် ႁဵတ်းသၢင်ႈၵႂႃႇ ၵူၺ်း ။


ၽူႈတႅၼ်း ၵူၼ်းမိူင်း ၼႂ်းၸႄႈဝဵင်း ၵဵင်းတုင် ၸိူဝ်းတေၶဝ်ႈ ၶႄႉၶႅင်ႇ မီး 12 ပႃႊတီႊ ၼႂ်း 12 ပႃႊတီႊသမ်ႉ 1. သုၼ်ႇတူဝ် ၊ 2. ပႃႊတီႊ သၢင်ႇသီႈ (USDP) ၊ 3. ပႃႊတီႊဝ (WNUP) ၊ 4. ပႃႊတီႊ ၵုပ်းၶမ်း (NDF) ၊ 5. ပႃႊတီႊ သိူဝ်ၽိူၵ်ႇ (SNDP) ၊ 6. ပႃႊတီႊ ၵွင်ၸႆး (ESSDDP) ၊ 7. ပႃႊတီႊ ၼူၵ်ႉယုင်း (NLD) ၊ 8.ပႃႊတီႊ ႁူဝ်သိူဝ် (SNLD) ၊ 9. ပႃႊတီႊ ႁူင်းၶဝ်ႈ (NUP) ၊ 10. ပႃႊတီႊ ႁုၼ်ႈမုၼ်း ၸိူဝ်ႉၸၢတ်ႈ (NDP) ၊ 11. ပႃႊတီႊ ဢႃးၶႃႇ (ANDP) ၊ 12. ပႃႊတီႊ လႃးႁူႇ (LNDP) ၸဵမ်ၸိူဝ်ႉၼႆႉ ။


သဵၼ်ႈသၢႆမၢႆ ၽူႈတေမီး သုၼ်ႇ တွတ်ႈၶႅပ်း ၵၢင်ၸႂ် ၼႂ်းပီ 2015 ၼၼ်ႉ ၾၢႆႇၶွမ်ႊမသျိၼ်ႊ ပၢင်လိူၵ်ႈတင်ႈ တေပိုၼ်ႇၽၢဝ်ႇ ပဵၼ်တၢင်းၵၢၼ် ၼႂ်းဝၼ်းတီႈ 14-27/09/2015 လႄႈ တေတိတ်းပႃႉ ၸပ်းၸွမ်း လုမ်း ပွၵ်ႉ / ဝၢၼ်ႈ / ဢိူင်ႇ ၽႂ်မၼ်း ၼႆယဝ်ႉ ။