ၵဵဝ်ႇၵပ်းလွင်ႈ တေလူင်းလၢႆးမိုဝ်း လိၵ်ႈၵိၼ်ၵႅၼ်ႇ ၵၢၼ်ၵိုတ်းယိုဝ်း ပတ်းပိုၼ်ႉ တူဝ်ႈမိူင်း (NCA) ၼၼ်ႉ ၸုမ်းဝႃႉ UWSA ၼႃႈလိၼ် ၶိုၵ်ႉတွၼ်းမၢႆ 2 ဢွၵ်ႇၶေႃႈ ပိုၼ်ၽၢဝ်ႇဝႃႈ တေဢမ်ႇပဵၼ် လူင်းလၢႆးမိုဝ်း NCA ၸွမ်းတၢင်ႇၸုမ်း ။ ၼႂ်းၶေႃႈ ပိုၼ်ၽၢဝ်ႇမီး ၼင်ႇၼႆ ။

1.တပ်ႉသိုၵ်း မိူင်းဝႃႉ ၼႃႈလိၼ်ၶိုၵ်ႉ တွၼ်းမၢႆ 2 ၼႆႉ ၶႂ်ႈလႆႈ လွင်ႈငမ်းယဵၼ် တႄႉတႄႉသေ ၶတ်းၸႂ် ႁဵတ်းသၢင်ႈ မႃးၸွမ်း တႃႇသေႇ ။


2.ၵွပ်ႈၼၼ်လႄႈ လူင်ပွင်ၸိုင်ႈ တပ်ႉသိုၵ်း တင်းသၽႃးသေ ႁဵတ်းသၢင်ႈ ပိူဝ်ႈတႃႇ လႆႈၸႂ်ၵၼ် ၵေႃႇသၢင်ႈ လွင်ႈငမ်းယဵၼ် ၸၼ်ႉၸႄႈမိူင်း ၊ ၸၼ်ႉၸိုင်ႈမိူင်း ႁူမ်ႈတုမ် ၸိူဝ်းၼႆႉ လႆႈလူင်းလၢႆးမိုဝ်း ၸွမ်းသေယဝ်ႉ ထိုင်ၶၵ်ႉတွၼ်ႈ ဢၼ်တေလႆႈ လူင်းလၢႆးမိုဝ်းၸွမ်း သၽႃး ဢၼ်လဵဝ်ၵူၺ်း ယဝ်ႉ ။


3. ၼႃႈလိၼ် ၶိုၵ်ႉတွၼ်းမၢႆ 2 ဝႃႉသေ တင်း လူင်ပွင်ၸိုင်ႈ မၢၼ်ႈ လူင်းလၢႆးမိုဝ်း ၵၼ်ၼႆႉ ဢမ်ႇၸႂ်ႈ လိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ၊ မၼ်းပဵၼ် ၶေႃႈလႆႈၸႂ် တႃႇၵေႃႇသၢင်ႈ လွင်ႈငမ်းယဵၼ် ၸွမ်းၵၼ် ။ ၵွပ်ႈၼၼ် ယူႇတီႈ ၼႃႈလိၼ် ၶိုၵ်ႉတွၼ်းမၢႆ 2 ဝႃႉသေ ႁၼ်ထိုင်ဝႃႈ လုၵ်ႉတီႈ ငမ်းယဵၼ်သေ ၵႂႃႇႁဵတ်းၵၢၼ် ၵိုတ်းတိုၵ်း ဢၼ်ဝႃႈၼႆႉ မၼ်းဢမ်ႇၸႂ်ႈ ၵၢၼ်ၵႂႃႇ  တၢင်းၼႃႈ ၊ ႁဝ်းၶႃႈ ၼႃႈလိၼ် ၶိုၵ်ႉတွၼ်းမၢႆ 2 ႁၼ်ထိုင်ဝႃႈ မၼ်းႁူၼ်လင် ၶိုၼ်းဝႆႉ ။


4.ၵွပ်ႈၼၼ်လႄႈ ဢၼ်တေ လူင်းလၢႆးမိုဝ်း လိၵ်ႈၵိၼ်ၵႅၼ်ႇ တင်း လူင်ပွင်ၸိုင်ႈ မၢၼ်ႈ ၵမ်းၼႆႉၼႆႉ ပဵၼ်လိၵ်ႈၵိၼ်ၵႅၼ်ႇ တႃႇတေၵိုတ်း တိုၵ်းပတ်းပိုၼ်ႉ တူဝ်ႈမိူင်း ဝႃႈၼႆသေ တႃႉၵေႃႈ မိူၼ်ၼင်ႇ ၸုမ်းၵူဝ်းၵၢင်ႉ (MNDAA) ၊ တဢၢင်း (TNLA) ၊ တပ်ႉသိုၵ်းရၶႅင်ႇ (AA) ၊ တပ်ႉသိုၵ်း ဢူၺ်းလီၶဝ် 6 ၸုမ်းၸိူဝ်းၼႆႉ သမ်ႉလႆႈထုၵ်ႇ ပၢၵ်ႈပႅတ်ႈ ။ ၵွပ်ႈၼႆ ဢၼ်ပၢၵ်ႈပႅတ်ႈ 6 ၸုမ်းၼႆႉ မၼ်းဢမ်ႇ ၼႄဝႃႈ ပဵၼ်ၵၢၼ် ၵိုတ်းတိုၵ်း ပတ်းပိုၼ်ႉ တူဝ်ႈမိူင်း ။


5.ၵွပ်ႈၼၼ် မူႇၸုမ်းၸိူဝ်း ဢၼ်ၶဝ်ႈပႃး တႃႇတေ ႁၢင်ႈႁႅၼ်း လိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း ၸိူဝ်းၼၼ်ႉၵေႃႈ ၶဝ်ၵေႃႈ ဢမ်ႇပေႃး ၸႂ်ၼိူဝ် လွင်ႈၼႆႉ ။ ၵွပ်ႈၼၼ် တႃႇတေလူင်း လၢႆးမိုဝ်းၵေႃႈ ဢမ်ႇတူဝ်ႈ တၼ်းၵၼ်ဝႆႉ ။


6. လူင်ပွင်ၸိုင်ႈ မိူင်းၶႄႇ ၸႄႈမိူင်း ယုၼ်ၼၼ် တုၵ်းယွၼ်း မိူင်းဝၼ်းတူၵ်း ၶဝ် ယူႊရွပ်ႊ ၊ ဢမႄႊရိၵႃႊ ၊ ၵျပၼ်ႊလႄႈ တုၵ်းယွၼ်းဝႆႉ တီႈၸုမ်းဝႃႉဝႃႈ ယႃႇပေ ၶဝ်ႈပႃး ပၼ်ႁႃ ၵိူတ်ႇၶိုၼ်ႈ ၼႂ်းမိူင်း ပွတ်းႁွင်ႇ ။ ၵွပ်ႈၼႆ ယူႇတီႈ ၼႃႈလိၼ် ၶိုၵ်ႉတွၼ်းမၢႆ 2 ဝႃႉသေ တေလႆႈတိုဝ်းၵမ် ပႂ်ႉပႃး ႁဵတ်းၸွမ်း ၵတိ ဢၼ်ၼႆႉဝႆႉ ။ မိူဝ်ႈပၢင်ၵုမ် ပၢင်သၢင်း ၼၼ်ႉၵေႃႈ တႃႇႁႂ်ႈ မိူင်းဝၼ်းတူၵ်း ၶဝ်ႈပႃး ပၼ်ႁႃ ပွတ်းႁွင်ႇၼၼ်ႉ ၸုမ်းဝႃႉ ဢမ်ႇႁပ်ႉႁွင်းမႃး ။


ၵၢၼ်ဢုပ်ႇဢူဝ်း တႃႇတေလႆႈ ၶေႃႈလႆႈၸႂ် ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ တၢင်းမိူင်း ဝၼ်းတူၵ်းၶဝ် မႃးၶဝ်ႈ ပႃးၸွမ်းယူႇ တႃႇသေႇ ။ ၵွပ်ႈၼႆ ပေႃးလူင်း လၢႆးမိုဝ်း ၶဝ်ၵေႃႈ တေလုၵ်ႉတၢင်း ပွတ်းတူၵ်းသေ မႃးၶဝ်ႈပႃး တၢင်းပွတ်းဢွၵ်ႇ ပဵၼ်တၢင်းၵၢၼ် ယဝ်ႉ ။ ၵွပ်ႈၼၼ် ယူႇတီႈ ၼႃႈလိၼ် ၶိုၵ်ႉတွၼ်းမၢႆ 2 သေ ပေႃးဝႃႈ လူင်းလၢႆးမိုဝ်း လိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ မိူၼ်ၼင်ႇ ႁဵတ်းႁႂ်ႈဝႃႉ ၶဝ်ႈပႃး ၼႂ်းပၼ်ႁႃ ဢၼ်ပဵၼ်ယူႇ တၢင်းပွတ်းႁွင်ႇ မိူၼ်ၵႂႃႇ ႁၼ်လီ ၵမ်ႉထႅမ် မိူင်းဝၼ်းတူၵ်း ၶဝ်ႈပႃး ပၼ်ႁႃ ပွတ်းႁွင်ႇ ၵမ်းလဵဝ်ယဝ်ႉ ။ ၵွပ်ႈၼၼ် ယူႇတီႈ ၼႃႈလိၼ် ၶိုၵ်ႉတွၼ်းမၢႆ 2  ဝႃႉသေ တေဢမ်ႇယႃႉ လႆႈၶေႃႈၵိၼ်ၵႅၼ်ႇ ဢၼ်ပၼ်ၵႂၢမ်းမၼ်ႈဝႆႉ ၼိူဝ်ၸႄႈမိူင်း ယုၼ်ၼၼ် ၸိုင်ႈမိူင်းၶႄႇ ။ ဢမ်ႇၸၢင်ႈ လူင်းလၢႆးမိုဝ်း ၸွမ်း ပၢင်ၵိုတ်းတိုၵ်း တူဝ်ႈမိူင်း ။


7.လိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း ၵၼ်ၼႆႉ ပဵၼ်ၵၢၼ် ယႅၵ်ႈပိုၼ်ႉတီႈ ၵိုတ်းတိုၵ်း ၊ ပဵၼ်တႃႇ မၵ်းမၼ်ႈႁပ်ႉႁွင်း တမ်းဝၢင်း တီႈယူႇတပ်ႉ ၊ ပိူဝ်ႈတႃႇ ၵႄႈလိတ်ႈ ပၼ်ႁႃ ၵၢၼ်သိုၵ်း ၵၼ်ၵူၺ်းလႄႈ ၼႃႈလိၼ် ၶိုၵ်ႉတွၼ်းမၢႆ 2  ဝႃႉ  ႁၼ်ထိုင် ၼင်ႇၼႆ ။ ပေႃးတႄႇႁဵတ်း တီႈလဵၵ်ႉလဵၵ်ႉၵႂႃႇ တႃႇႁႃ ၶေႃႈလႆႈၸႂ် ၵေႃႈတေငၢႆႈ ။


ၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၵၼ် ဢၼ်ဝႃႈၼႆႉ မၼ်းပဵၼ် ဢၼ်ၵႂၢင်ႈၶႂၢင် လိူဝ်ႁႅင်း ၊ ပေႃးဝႃႈ တေမႃးႁဵတ်း တူဝ်ထူပ်း မိုဝ်းၼႆၸိုင် ၸၢင်ႈၵိူတ်ႇၶိုၼ်ႈ ပၼ်ႁႃ လွင်ႈထဵင် မေႃးၵၼ် ၊ ပၼ်ႁႃ ပၢင်တိုၵ်း သိုၵ်းသိူဝ် ဢၼ်ၽႂ်ဢမ်ႇ ၸၢင်ႈလၢမ်းလႆႈ ။


8.ၶေႃႈဢၼ်ပႃးၼႂ်း ၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ ၵဝ်ႉငဝ်ႈမၼ်း ပဵၼ်ပိူဝ်ႈတႃႇ တေမူၼ်ႉ မႄးလႆႈ ပိူင်ငဝ်ႈပိုင်းမိူင်း 2008 ယဝ်ႉ ။ ၵွပ်ႈၼၼ်လႄႈ ယူႇတီႈ လူင်ပွင်ၸိုင်ႈ မၢၼ်ႈသေ တႃႇတေမီးၸႂ် ၸေႇတၼႃႇ ၶႂ်ႈမူၼ်ႉမႄး ပိူင်ငဝ်ႈပိုင်းမိူင်း 2008 သေ ႁဵတ်းဢွၵ်ႇမႃး လိၵ်ႈၵိၼ်ၵႅၼ်ႇ ၼႆႉ မၼ်းဢမ်ႇၸႂ်ႈ ။ တပ်ႉသိုၵ်းမၢၼ်ႈ ၵေႃႈ ယိပ်းၵမ်ဝႆႉ ပိူင်ငဝ်ႈပိုင်းမိူင်း 2008 မၼ်ႈမၼ်ႈ ၵႅၼ်ႇၵႅၼ်ႇ  ၼႄယူႇ မႅၵ်းမႅၵ်းဝႃႈ တေၵႅတ်ႇ ၵင်ႈပိူင်ငဝ်ႈ ပိုင်းမိူင်း 2008 ။


ၵွပ်ႈၼၼ်လႄႈ ပေႃးဝႃႈ တေႁဵတ်းၵၢၼ် တူဝ်ထူပ်းမိုဝ်း ၸွမ်းၵူႈၶေႃႈ ၵူႈၵမ်း ၸိူင်ႉၼင်ႇ ဢၼ်ပႃးၼႂ်း လိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ မၼ်းတေယၢပ်ႇ ။


9.ၼႃႈလိၼ် ၶိုၵ်ႉတွၼ်းမၢႆ 2 ဝႃႉၼႆႉ ပေႃးၵဵဝ်ႇၵပ်း ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ ၼႂ်းၵၢၼ်ဢုပ်ႇဢူဝ်း မႃးၵူႈ ၶၵ်ႉတွၼ်ႈၼႆႉ ဢမ်ႇတွၼ်ႉ ၶဝ်ႈပႃးမႃးၸွမ်း သေပွၵ်ႈ ။ ၶေႃႈၵိၼ်ၵႅၼ်ႇ ဢၼ်တေ ၵိုတ်းတိုၵ်းၵၼ် ဢၼ်ဝႃႈ ၼၼ်ႉၵေႃႈ ၶႂ်ႈပဵၼ်ၸိူင်ႉၼၼ် ၶႂ်ႈႁဵတ်းၸိူင်ႉၼႆ ၸိူဝ်းၼႆႉ ဝႃႉ ဢမ်ႇတုၵ်းယွၼ်း မႃးသေပွၵ်ႈ ။ ၵွပ်ႈၼၼ် ယူႇတီႈ ၼႃႈလိၼ် ၶိုၵ်ႉတွၼ်းမၢႆ 2 ဝႃႉၼႆႉသေ  ၶေႃႈၵိၼ်ၵႅၼ်ႇ ဢၼ်တေ ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ မၼ်းဢမ်ႇတၢင် တူဝ်ၵူၼ်းမိူင်း ၊ မၼ်းဢမ်ႇမီး ၽွၼ်းလီ တႃႇ ၵူၼ်းမိူင်းလႆႈ ။ သင်ၸိူဝ်ႉဝႃႈ ၵႂႃႇလူင်းလၢႆးမိုဝ်း NCA ၸိုင် မိူၼ်ၵႂႃႇႁဵတ်း မႅၼ်ႈတၢင်းၽိတ်း ၼိူဝ်ၵူၼ်းဝၢၼ်ႈ ၵူၼ်းမိူင်း မိူင်းဝႃႉ ၶိုၼ်းၵူၺ်း ။


10.ယူႇတီႈ သိုၵ်းမၢၼ်ႈသေ ၵၢၼ်ဢၼ် ႁၢင်ႈႁႅၼ်းသိုၵ်း လေႃႇတိုၵ်း ၸုမ်းယိပ်း ၵွင်ႈၵၢင်ႇ ၸၢဝ်းၶိူဝ်း တၢင်းပွတ်းႁွင်ႇ ၼႆႉၵေႃႈ ဢမ်ႇၵိုတ်း ။ ၵၢၼ်ၶႃႈႁႅမ် ၵူၼ်းဝၢၼ်ႈ ၵူၼ်းမိူင်းတၢႆ ၼႂ်းပွတ်းႁွင်ႇ ၼႆႉၵေႃႈ ဢမ်ႇၵိုတ်း - ဝႃႈၼႆ ။


11.ၵွပ်ႈၼၼ်လႄႈ ဢိင်ၼိူဝ် ပၢင်ၵုမ်လူင် ဝၼ်းတီႈ 07/05/2015 ၼႃႈလိၼ် ၶိုၵ်ႉတွၼ်းမၢႆ 2 ဢၼ်ႁဵတ်းတီႈ ပၢင်သၢင်း ၼၼ်ႉသေ ၸွမ်းၼင်ႇ လႆႈပိုၼ်ၽၢဝ်ႇၵႂႃႇ တီႈပၢင်ၵုမ်လူင် ၼၼ်ႉသေ တေသိုပ်ႇ သူၼ်းဢီးၵႂႃႇ ႁႂ်ႈပဵၼ်မႃး ပၢင်ဢုပ်ႇဢူဝ်း ၵၢၼ်မိူင်း ၼၼ်ႉယဝ်ႉ ။