ဝၼ်းတီႈ 12/9/2015 သိုၵ်းမၢၼ်ႈ ဢၼ်တူင်ႉၼိုင် ၼႂ်းၸႄႈတွၼ်ႈ လွႆလႅမ် မိူင်းပွၼ် ၼၼ်ႉ ယိုဝ်းၵွင်ႈလဵၵ်ႉ / ယႂ်ႇ သႂ်ႇ ဝိႁၢရ် ( ၵျွင်းမုၼ်ၸဝ်ႈ ) ပၢင်တၢင်းလီ ၵၢင်ဝႃႇ ႁဵတ်းႁႂ်ႈ ၵူၼ်းဝၢၼ်ႈ တၢႆထင်တီႈ ၵေႃႉၼိုင်ႈ မၢတ်ႇၸဵပ်း လိူဝ်ႁႅင်း 6 ၵေႃႉ ။

ဝၢႆးသိုၵ်းမၢၼ်ႈ တင်း သိုၵ်းတႆး RCSS/SSA ပဵၼ် ပၢင်တိုၵ်းၵၼ် ဝၼ်းတီႈ 7/9/2015 ယဝ်ႉ သိုၵ်းမၢၼ်ႈ ထႅမ်ႁႅင်းသိုၵ်း ဢမ်ႇယွမ်း 10 တပ်ႉၵွင် တူင်ႉၼိုင် ၾၢႆႇၸၢၼ်း လွႆလႅမ် ၊ ၼႂ်းၼၼ်ႉ ငႃးသိုၵ်းမၢၼ်ႈ ဢၼ်ၼိုင်ႈ ႁွတ်ႈၽႅဝ် ႁိမ်းဝၢၼ်ႈ ဝၢၼ်ႈၼွင်ပႃတႅပ်း ဢိူင်ႇၼွင်လႅင် မူၽိူၵ်ႇ ၾၢႆႇၸၢၼ်း ဝဵင်းမိူင်းပွၼ် ယၢၼ် 18 လၵ်း ၊ ႁၼ်ၵူၼ်းမီး ၼမ်လႄႈ ပွႆႇၵွင်ႈလူင်သႂ်ႇ ၊ ယိုဝ်းၵွင်ႈၵူႈ သႅၼ်းသႅၼ်းသႂ်ႇ တီႈၾုင် ၵူၼ်းၽွင်းႁႅၼ်းလူႇ ၊ ပၢင်ပွႆးတႅၵ်ႇယၢႆႈ ပၢႆႈၽူင်ႉၵေႃႉႁူး ၵေႃႉတၢင်း ။


“ မိူဝ်ႈဝႃးၼႆႉ ၵူၼ်းဝၢၼ်ႈ ဢွၼ်ၵၼ်ၵႂႃႇ ႁၢင်ႈႁႅၼ်း တၢင်းလူႇတီႈ ဝတ်ႉ ။ သိုၵ်းမၢၼ်ႈသမ်ႉ ယူႇၼွၵ်ႈဝၢၼ်ႈသေ မုင်ႈႁၼ် ။ ပွႆႇၵွင်ႈလူင်သႂ်ႇ မွၵ်ႈ 11 မူင်းၼႆႉ ။ ပႃႈၵျႃႇ ဢၼ်ဝႃႈၼၼ်ႉ ဢမ်ႇတၼ်း ႁွင်ႉႁႃပေႃႈ ႁႃမႄႈသႄဢိတ်း ၊ တၢႆထင်တီႈ ” - ၽူႈမီး ပုၼ်ႈၽွၼ်းၼႂ်း RCSS/SSA လၢတ်ႈ ။


ၵူၼ်းမၢတ်ႇၸဵပ်း လုတၢႆ ၼၼ်ႉတႄႉ - ပႃႈၵျႃႇ ဢႃယု 60 တၢႆထင်တီႈ ၊ လုင်းတွင်ႇ ဢႃႇယု 40 တိၼ် မိုဝ်း ၾၢႆၶႂႃ တိူဝ်ႉမၢၵ်ႇ ၶၢတ်ႇပုတ်း ၊ ၸၢႆးသၢင်ႇသူၺ်ႇ ဢႃယု 30 မၢတ်ႇၺႃးတွင်ႉ ၊ ၼၢင်းၶမ်းမူဝ်း 30 တိူဝ်ႉၺႃးမိုဝ်း ၊ ၸၢႆးဢၢႆႈၽေႇ တိူဝ်ႉတိၼ် ၊ ၸၢႆးမေး တိူဝ်ႉၺႃးၸၢၵ်ႇ မၢၵ်ႇတင်းတူဝ်  - ၵူၼ်းၼွင်လႅင် ႁွတ်ႈမိူင်းပွၼ် လၢတ်ႈၼႄ ၼင်ႇၼႆ ။ ( ၼၢင်းၶမ်းမူဝ်း ၊ ၸၢႆးဢၢႆႈၽေႇ လႄႈ ၸၢႆးမေးၼႆႉ ပဵၼ်ပီႈၼွင်ႉၵၼ် )
“ တေႃႈလဵဝ် ၵူၼ်းမၢတ်ႇၸဵပ်းၼၼ်ႉ သူင်ႇယႃတူဝ် တူၼ်ႈတီးယဝ်ႉ ၊ ဢၼ်သိုၵ်းမၢၼ်ႈ တိၵူၼ်းဝၢၼ်ႈၵႂႃႇ 4 ၵေႃႉ ၼၼ်ႉတႄႉ တေႃႇတေႃႈလဵဝ် ယင်းပႆႇပွႆႇ ” - ၸၢႆးၶုၼ်သၢင်ႇ ႁွတ်ႈမိူင်းပွၼ် လၢတ်ႈ ။


သိုၵ်းမၢၼ်ႈ တင်း သိုၵ်းတႆး RCSS/SSA ၼႆႉ ပဵၼ် ပၢင်တိုၵ်းၵၼ် ဝၼ်းတီႈ 7/9/2015 ၊ ပၢင်တိုၵ်းၼၼ်ႉ ၾၢႆႇသိုၵ်းမၢၼ်ႈ တၢႆ 3 ၵေႃႉ ၊ မၢတ်ႇ 4 ၵေႃႉ ႁဵတ်းႁႂ်ႈ သိုၵ်းမၢၼ်ႈ ၸႂ်လမ် ။ လွင်ႈၼႆႉ ၾၢႆႇ RCSS/SSA လၢတ်ႈဝႃႈ ဢမ်ႇၸႂ်ႈ ငဝ်းလၢႆးလီ တႃႇၵၢၼ်သၢင်ႈ လွင်ႈငမ်းယဵၼ် ၊ ဢၼ်လႆႈပဵၼ် ပၢင်တိုၵ်းၵၼ်ၼႆႉ ပဵၼ်ၵွပ်ႈသိုၵ်းမၢၼ်ႈ ႁဵတ်းၸွမ်းၽႅၼ် ၵႂၢတ်ႇလၢင်ႉ ပိုၼ်ႉတီႈ ၽႅၼ်ၵုမ်းၵမ် ပိုၼ်ႉတီႈ လႄႈ ၸင်ႇပဵၼ်ပၢင်တိုၵ်းၵၼ် ဝႃႈၼႆ ။


RCSS/SSA ၼႆႉ တူၵ်းလူင်း ၵိုတ်းတိုၵ်း ၸၼ်ႉမိူင်းႁူမ်ႈတုမ် ၸွမ်း လူင်ပွင်ၸိုင်ႈမၢၼ်ႈ ဝႆႉ ။ ၼႂ်းၸုမ်း ယိပ်းၵွင်ႈ တင်းသဵင်ႈၵေႃႈ ႁၼ်ထိုင်ဝႃႈ RCSS/SSA ထုၵ်ႇၼႄးဝႃႈ ၸမ်ၸႂ် လူင်ပွင်ၸိုင်ႈမၢၼ်ႈ လိူဝ် တၢင်ႇမူႇတၢင်ႇၸုမ်း ။ ယွၼ်ႉၵႆႉ ၶဝ်ႈဢွၵ်ႇၵၼ် တူၵ်းလူင်းၵၼ်ငၢႆႈ လိူဝ်တၢင်ႇၸုမ်း ။