ၶွမ်ႊမသျိၼ်ႊ ပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇ ပဵၼ်တၢင်းၵၢၼ် ၸိုဝ်ႈသဵင် ၵူၼ်းမိူင်း ၸိူဝ်းမီးသုၼ်ႇ တွတ်ႈၶႅပ်းၵၢင်ၸႂ် လိူၵ်ႈၽူႈတႅၼ်း ပီ 2015 ။ ႁူဝ်ပဝ်ႈ ၶွမ်ႊမသျိၼ်ႊ ပၢင်လိူၵ်ႈတင်ႈ ဢူးတိၼ်ႇဢေး တိုၵ်းသူၼ်း ႁႂ်ႈၵူၼ်းမိူင်း ၵႂႃႇတူၺ်း ၸိုဝ်ႈၸဝ်ႈၵဝ်ႇ တီႈလုမ်းဢိူင်ႇ / ပွၵ်ႉ ၽႂ်မၼ်း ။

မိူဝ်ႈ ဝၼ်းတီႈ 14/09/2015 ၶၢဝ်းယၢမ်း တွၼ်ႈၸဝ်ႉ ၶွမ်ႊမသျိၼ်ႊ ပၢင်လိူၵ်ႈတင်ႈ ပိုၼ်ၽၢဝ်ႇ ၸိုဝ်ႈသဵင် ၵူၼ်းမိူင်း ၸိူဝ်းမီးသုၼ်ႇ တွတ်ႈၶႅပ်း ၵၢင်ၸႂ် လိူၵ်ႈတင်ႈ ၼႂ်းပီ 2015 ပဵၼ် တၢင်းၵၢၼ် ။ ၸိုဝ်ႈသဵင် ၵူၼ်းမိူင်း ၽူႈမီးသုၼ်ႇ ၸိူဝ်ႉၼၼ်ႉ လႆႈတႅမ်ႈၽိမ်း တိတ်းဝႆႉ တီႈလုမ်း ဢိူင်ႇ / ပွၵ်ႉ ၽႂ်မၼ်း ႁႂ်ႈၵူၼ်းမိူင်း လႆႈၵႂႃႇတူၺ်း သင်ဝႃႈ ၸိုဝ်ႈၽူႈလႂ် ၽိတ်းပိူင်ႈ ႁႂ်ႈၵႂႃႇၸႅင်ႈ လၢတ်ႈပၼ် တီႈၶွမ်ႊမသျိၼ်ႊ ၸႄႈဝဵင်း ၽႂ်မၼ်း တေႃႇထိုင်ဝၼ်းတီႈ 27 ႁၢင်လိူၼ်ၼႆႉ ပဵၼ် ဝၼ်းလိုၼ်းသုတ်း ၼႆယဝ်ႉ ။


ၽူႈပွင်ၵၢၼ် ပႃႊတီႊ ႁူဝ်သိူဝ် ၵဵင်းတုင် လၢတ်ႈဝႃႈ တေႃႈလဵဝ် ၼႂ်းၶၢဝ်းတၢင်း ဝၼ်း / သွင် ဝၼ်းၼႆႉ ၸိုဝ်ႈသဵင် ၵူၼ်းမိူင်း ဢၼ်ၽိတ်းပိူင်ႈ ထွၼ် / ထႅမ်တႄႉ ပႆႇမီး ၵွပ်ႈဝႃႈ တိုၵ်ႉ ပိုၼ်ၽၢဝ်ႇၵူၺ်း ၵူၼ်းမိူင်း ဢၼ်ႁူႉ သေၵႂႃႇတူၺ်း ၵေႃႈမီး ဢၼ်ပႆႇႁူႉ တိူဝ်ႈသေ ပႆႇၵႂႃႇတူၺ်း ၵေႃႈမီး ဝႃႈၼႆ ။


ၵူၼ်းမိူင်း တၢင်းပွတ်း တႃႈၶီႈလဵၵ်း လၢတ်ႈဝႃႈ ၵူၼ်းတၢင်းၼႆႉ ဢၼ်သူၼ်ၸႂ်တႄႉ ၵမ်ႈဢေႇၵူၺ်း ၸိူဝ်းဢၼ် ၵႂႃႇတူၺ်းတႄႉၵေႃႈ ၸိုဝ်ႈၶဝ် မႅၼ်ႈယူႇၼႆဝႃႈ ၸိုဝ်ႈၶဝ်တႄႉ တေဝႃႈ ယူႇတီႈ ၼႂ်းဝၢၼ်ႈ ၽႂ်မၼ်းၵေႃႈ ၶဝ်ပၢဝ်ႇလၢတ်ႈၼႄ ယူႇၶႃႈ ပိူဝ်ႈၵၢၼ်ၼႄႉၼွၼ်း  ႁႂ်ႈၵူၼ်းဝၢၼ်ႈ ၵႂႃႇတူၺ်း ။ သင်ဝႃႈ ၸိုဝ်ႈဢမ်ႇမႅၼ်ႈ ၽိတ်းပိူင်ႈဝႆႉ ၼႆၵေႃႈ ႁႂ်ႈၵႂႃႇၸႅင်ႈ လၢတ်ႈပၼ်ၶဝ် ပၢဝ်ႇလၢတ်ႈပၼ် တၢင်းပွၵ်ႉ ဝႃႈၼႆ ။


ၵူၼ်းမီးသုၼ်ႇ တႃႇတေတွတ်ႈ ၶႅပ်းၵၢင်ၸႂ် လိူၵ်ႈၽူႈတႅၼ်း ပတ်ႉပိုၼ်ႉ တေမီးမွၵ်ႈ 33 လၢၼ်ႉၵေႃႉ ႁူဝ်ပဝ်ႈ ၶွမ်ႊမသျိၼ်ႊ ပၢင်လိူၵ်ႈတင်ႈ ဢူးတိၼ်ႇ ဢေးလၢတ်ႈ ။ ပၢင်လိူၵ်ႈတင်ႈ ၽူႈတႅၼ်း သၽႃးမိူင်း ၵူၼ်းမိူင်း ၊ သၽႃး ၸိူဝ်ႉၸၢတ်ႈ ၊ သၽႃး ၸႄႈမ်ူင်း မိူင်းႁူမ်ႈတုမ် ပတ်ႉပိုၼ်ႉ တေၸတ်းႁဵတ်း ၼႂ်းဝၼ်းတီႈ 08/11/2015 ၼႆယဝ်ႉ ။