မုၵ်ႉၸုမ်း ၸိူဝ်ႉၶိူဝ်းတႆး မိူင်းၶွၼ် ၸတ်းႁဵတ်း ပၢင်ဢုပ်ႇၶႆႈ လွင်ႈၾွၼ်ႉတႆး လွၵ်းပိူင် ယူႊၼီႊၶူတ်ႊ တႃႇသႂ်ႇၼႂ်း မိုဝ်းထိုဝ် ၊ ၶွမ်ႊပိဝ်ႊတိူဝ်ႊ ။

ယိူင်းဢၢၼ်းႁႂ်ႈ ပီႈၼွင်ႉတႆး မေႃလိၵ်ႈတႆး ႁႂ်ႈၸႂ်ႉတိုဝ်း လိၵ်ႈတႆး ၵၼ်ၼမ်မႃး ထႅင်ႈလႄႈ ၵပ်းသိုပ်ႇ တိတ်းတေႃႇ ၶဝ်ႈႁႃၵၼ် လႆႈငၢႆႈ ။


ဝၼ်းတီႈ 13/09/2015 ၶၢဝ်းယၢမ်း 10.20 မူင်း (မိူင်းၶႄႇ) မုၵ်ႉၸုမ်း ၸိူဝ်ႉၶိူဝ်းတႆး မိူင်းၶွၼ် ဢွၼ်ႁူဝ် ၸတ်းပၢင်ဢုပ်ႇၶႆႈ လွင်ႈၾွၼ်ႉလိၵ်ႈတႆး လွၵ်းပိူင် ယူႊၼီႊၶူတ်ႊ တီႈလုမ်း မုၵ်ႉၸုမ်း ၸိူဝ်ႉၶိူဝ်းတႆး မိူင်းၶွၼ် ၸိုင်ႈမိူင်းၶႄႇ တႃႇသႂ်ႇလႆႈ ၼႂ်းမိုဝ်းထိုဝ် လႄႈ ၶွမ်ႊပိဝ်ႊတိူဝ်ႊ လိၵ်ႈတႆး တူဝ်မူၼ်း / လိၵ်ႈတႆးတူဝ်ယၢဝ်း ၸႂ်ႉတိုဝ်းလိၵ်ႈတႆး ၼႂ်းမိုဝ်းထိုဝ် ၼမ်မႃးထႅင်ႈ ၼင်ႇႁိုဝ် လိၵ်ႈလၢႆးတႆး ပေႃးတေ ႁိူဝ်ႈႁိူင်း ၶိုတ်းၸၼ်ႉလူၵ်ႈ (လူဝ်းၵ) လႄႈ ၵပ်းသိုပ်ႇ တိတ်းတေႃႇ ၶဝ်ႈႁႃ ၵၼ်ငၢႆႈ ၼႆယဝ်ႉ ။


ၽူႈၶဝ်ႈ လဵပ်ႈႁဵၼ်း ၵေႃႉၼိုင်ႈ လၢတ်ႈဝႃႈ မိုဝ်းထိုဝ် ဢၼ်သႂ်ႇၾွၼ်ႉ ယူႊၼီႊၶူတ်ႊတႆး ယၢပ်ႇ ပဵၼ် လိပူဝ်ႊ ၊ ၸိၼ်ႊၼီႊ ၊ သႅဝ်းမိ ၸဵမ်ၸိူဝ်ႉၼႆႉ သႂ်ႇယၢပ်ႇ လိူဝ်ပိူၼ်ႈ ၊ ဢၼ်သႂ်ႇ ငၢႆႈသမ်ႉ ပဵၼ် ၶိူင်ႈ ဢေႃႊပူဝ်ႉ ၊ သမ်ႊသုမ်ႊ ၸိူဝ်းၼႆႉသမ်ႉ သႂ်ႇငၢႆႈ ဝႃႈၼႆ ။


ပၢင်ဢုပ်ႇၶႆႈ လွင်ႈၾွၼ်ႉ ယူႊၼီႊၶူတ်ႊ တႆးၼႆႉ ၽူႈမႃးပၼ် ပၢင်သွၼ် ပဵၼ်ၸဝ်ႈၽိဝ်ႇ မိူင်းမၢဝ်း ၊ ၸၢႆးသၢမ်ဢွင်ႇ ၊ ၸၢႆးဢၢႆႈမိၼ်ႉ ၵၢဝ်ႇလၢတ်ႈၼႄ ၵႂႃႇၼင်ႇၼႆ ။


ပၢင်ဢုပ်ႇၶႆႈ လွင်ႈၾွၼ်ႉ တႆးၼႆႉ ၽူႈၶဝ်ႈႁူမ်ႈ လဵပ်ႈႁဵၼ်း တင်းမူတ်း မီး 100 ပၢႆ ပဵၼ် ၸုမ်းလုၵ်ႈႁဵၼ်း ၸၼ်ႉၸွမ် ၊ ၸုမ်း ငဝ်းႁၢင်ႈသဵင်တႆး မိူင်းၶွၼ် လႄႈ ႁၢၼ်ႉၶၢႆၾူၼ်ႊ (မိုဝ်းထိုဝ်) တီႈမိူင်းၶွၼ် ၸဵမ်ၸိူဝ်းၼႆႉ ။