ၽူႈမီးၸၼ်ႉ ၾၢႆႇႁူမ်ႇလူမ်ႈသိုၵ်း (ၸယၽ) ၺီႇၺီႇဢွင်ႇ ၊ ၵေႃႉဢၼ်ယိုဝ်း သိုၵ်းဝႃႉဢွၼ်တၢင်းသေ ထုၵ်ႇသိုၵ်းဝႃႉယိုဝ်းတွပ်ႇၶိုၼ်း တီႈၼႃးၵွင်းမူးၼၼ်ႉ လူႉသဵင်ႈၵႂႃႇတီႈ ႁူင်းယႃလူင်မိူင်းသၢတ်ႇ ။

မိူဝ်ႈဝၼ်းတီႈ 24/09/2015 ၼႆႉ ၽူႈမီးၸၼ်ႉ ၼႂ်းၾၢႆႇႁူမ်ႇလူမ်ႈသိုၵ်း (ၸယၽ) ၺီႇၺီႇဢွင်ႇ ဢၼ်လႆႈထဵင်မေႃးၵၼ်တင်း ၽူႈမီးၸၼ်ႉဝႃႉ ၵဵဝ်ႇၵပ်းလွင်ႈပၼ်ႁႃတီႈလိၼ် တီႈၼႃးၵွင်းမူးသေ လၢၵ်ႈၵွင်ႈပွတ်းယိုဝ်း သိုၵ်းဝႃႉဢွၼ်တၢင်းသေ ထုၵ်ႇသိုၵ်းဝႃႉၶိုၼ်းယိုဝ်းတွပ်ႇၼၼ်ႉ မၢၵ်ႇၵွင်ႈတိူဝ်ႉၸပ်းတီႈပုမ် မိူဝ်ႈဝၼ်းတီႈ 23/09/2015 လႄႈလႆႈလူႉတၢႆၵႂႃႇ တီႈႁူင်းယႃလူင်မိူင်းသၢတ်ႇ ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇယဝ်ႉ ။


ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 23/09/2015 ၼၼ်ႉ ဢိင်ၼိူဝ်ပဵၼ်ပၼ်ႁႃတီႈလိၼ်သေ ၽူႈမီးၸၼ်ႉ ၼႂ်းၾၢႆႇႁူမ်ႇလူမ်ႈသိုၵ်း (ၸယၽ) ၺီႇၺီႇဢွင်ႇ ႁိုဝ် ၺီႇၺီႇထုၼ်း တင်း ၽူႈမီးၸၼ်ႉဝႃႉ ႁူပ်ႉထူပ်းဢုပ်ႇဢူဝ်းၵၼ် တီႈၼႃးၵွင်းမူး ။ ဢုပ်ႇၵၼ်ဢမ်ႇႁူႉလိူင်ႈသေ ၺီႇၺီႇဢွင်ႇ ဢမ်ႇႁၢၼ်ႉၸႂ် ဢဝ်ၵွင်ႈယိုဝ်းဝႃႉ ၊ ၾၢႆႇဝႃႉၵေႃႈၶိုၼ်းယိုဝ်းတွပ်ႇလႄႈ မၢၵ်ႇၵွင်ႈတိူဝ်ႉတီႈပုမ် ၊ သူင်ႇၵႂႃႇယူတ်းယႃတူဝ် တီႈမိူင်းသၢတ်ႇ ၊ လႆႈလူႉတၢႆၵႂႃႇ မိူဝ်ႈဝၼ်းတီႈ 24/09/2015 ယၢမ်းၵၢင်ၼႂ် 10:40 မိၼိတ်ႉ - ၵူၼ်းၸမ်ၸႂ် ၼႂ်းတပ်ႉသိုၵ်းမၢၼ်ႈ ၵေႃႉၼိုင်ႈလၢတ်ႈ ။


ထဝ်ႈဝၢၼ်ႈထဝ်ႈၼႃး ၵူၼ်းၼႃးၵွင်းမူး ၵေႃႉၼိုင်ႈၵေႃႈလၢတ်ႈဝႃႈ - တီႈလိၼ်ဢၼ်ပဵၼ်ပၼ်ႁႃၼႆႉ ဢွၼ်တၢင်းပဵၼ်တီႈလိၼ် ဝၢင်းႁိူၼ်းၶႄႇ ၊ မီးၵူၼ်းဝၢၼ်ႈၵေႃႉၼိုင်ႈသိုဝ်ႉဝႆႉ ၊ ၽိူဝ်ႇမၼ်းၵႂႃႇႁႃဢဝ် သမ်ႉဢမ်ႇလႆႈ ၊ သမ်ႉမီးပၼ်ႁႃ ။ ၸုမ်းဝႃႉၵေႃႈဝႃႈ ပဵၼ်တီႈလိၼ်ၶဝ်ၼႆသေ မီးလွင်ႈထဵင်မေႃးၵၼ် ယွၼ်ႉတီႈလိၼ် ။ ၸဝ်ႈၼႃႈတီႈမၢၼ်ႈ ၸယၽ ၸွမ်းၵူၼ်းမိူင်းမႃးသေ မႃးၸွပ်ႇထၢမ်တႂ်ႈတႂ်ႈၼိူဝ်ၼိူဝ် ၊ ၵွပ်ႈဢမ်ႇပွင်ႇၵႂၢမ်းၵၼ်လီ မီးလွင်ႈႁိုတ်းႁၢတ်ႇၸၢတ်ႇသႂ်ႇၵၼ် ၊ ၸယၽ လၢၵ်ႈၵွင်ႈယိုဝ်းသႂ်ႇ ၊ ၾၢႆႇဝႃႉၵေႃႈယိုဝ်းၶိုၼ်း ၊ ၾၢႆႇဝႃႉဝၢတ်ႇၵႂႃႇသွင်ၵေႃႉ ၊ ၾၢႆႇၸယၽတႄႉ တိူဝ်ႉတီႈပုမ်မၼ်းႁၢဝ်ႈႁႅင်းဝႆႉ - ဝႃႈၼႆ ။


ၶၢဝ်ႇဢမ်ႇယိုၼ်ယၼ် လၢတ်ႈဝႃႈ - ၸိူင်ႉၼင်ႇ ၸယၽ မၢၼ်ႈ ၺီႇၺီႇဢွင်ႇ ၵႂႃႇတၢႆတီႈမိူင်းသၢတ်ႇၼၼ်ႉ ၽူႈမီးၸၼ်ႉဢွၼ်ႇ ၼႂ်းတပ်ႉဝႃႉ ၼႂ်းဢၼ်ဝၢတ်ႇၸဵပ်း 2 ၵေႃႉၼၼ်ႉၵေႃႈ ၵႂႃႇလူႉတၢႆၵေႃႉၼိုင်ႈ - ဝႃႈၼႆ ။


ၵဵဝ်ႇၵပ်းဢၼ်ပဵၼ်ပၼ်ႁႃ တီႈလိၼ်ၼႆႉသေ ၽူႈမီးၸၼ်ႉဝႃႉပွတ်းၸၢၼ်း ၵေႃႉၼိုင်ႈလၢတ်ႈဝႃႈ - ပၼ်ႁႃဢၼ်ၼႆႉ မၼ်းပဵၼ်ပၼ်ႁႃသုၼ်ႇတူဝ်ၵူၺ်း ၊ မၼ်းဢမ်ႇၸႂ်ႈပၼ်ႁႃမူႇၸုမ်း ။ ၵွပ်ႈၼၼ် ယုမ်ႇယမ်ဝႃႈ မၼ်းတေဢမ်ႇတုမ်ႉတိူဝ်ႉမူႇၸုမ်း ။ ၵူၺ်းၵႃႈ ၸိူင်ႉႁိုဝ်ၵေႃႈယဝ်ႉ ၶၢဝ်ႇလွင်ႈၼႆႉ ထိုင်ၵႂႃႇငဝ်ႈငုၼ်းတိူင်းသိုၵ်းသၢမ်ၸဵင်ႇ (ၵဵင်းတုင်) ဝႆႉယဝ်ႉ ၊ တေပဵၼ်ပၼ်ႁႃၸိူင်ႉႁိုဝ်မႃးထႅင်ႈ ယင်းပႆႇႁူႉ - ဝႃႈၼႆ ။