ၼႃႈလိၼ်ၶိုၵ်ႉတွၼ်ႈ မၢႆ 4  မိူင်းလႃး ပိုတ်ႇလၢတ်ႈဝႃႈ တေဢမ်ႇႁပ်ႉၸတ်း ပၢင်လိူၵ်ႈတင်ႈ 2015 ၼႆသေတႃႉ ၼေႃႇၽူႈတႅၼ်း လၢႆပႃႊတီႊ ယင်းႁၢင်ႈႁႅၼ်းတူဝ်ႈတၼ်း တႃႇၶဝ်ႈလိူၵ်ႈတင်ႈ ၼႂ်းပိုၼ်ႉတီႈၼၼ်ႉ ။

ပႃႊတီႊတႆး ၸိူဝ်းပဵၼ်ပႃႊတီႊႁူဝ်သိူဝ် ၊ သိူဝ်ၽိူၵ်ႇ ၊ ၵွင်ၸႆး ၼေႃႇၽူႈတႅၼ်း ၸိူဝ်းတေၶဝ်ႈၶႅင်ႇ သၽႃး ၵူၼ်းမိူင်း(တႂ်ႈ) ၊ သၽႃးၸႄႈမိူင်း ၊ ပႃးၸဵမ် ပႃႊတီႊသၢင်ႇသီႈ ၊ ၼူၵ်ႉယုင်း ၊ ၸိူဝ်းတေၶဝ်ႈၶႅင်ႇႁိမ်တီႈၼင်ႈ  သၽႃးၸိူဝ်ႉၶိူဝ်း(ၼိူဝ်) ၸိူဝ်းၼႆႉ ႁၢင်ႈႁႅၼ်းတူဝ်ႈတၼ်း တႃႇၶဝ်ႈႁႃသဵင် ၼႂ်းၼႃႈလိၼ် ၶိုၵ်ႉတွၼ်းမၢႆ  4 မိူင်းလႃး ။


ၸၢႆးဢေး ပႃႊတီႊႁူဝ်သိူဝ် ဢၼ်တေၶဝ်ႈၶႄႉၶႅင်ႇ ၽူႈတႅၼ်း ၸႄႈမိူင်း ၶဵတ်ႇလိူၵ်ႈတင်ႈမၢႆ (1) ၸႄႈဝဵင်းမိူင်းလႃး လၢတ်ႈဝႃႈ - တေႃႈလဵဝ် ၵူၼ်းမိူင်းဢၼ်ယိပ်းဝႆႉ ဝႂ်ၵပ်းတူဝ်  ၼႂ်းၸႄႈဝဵင်းမိူင်းလႃး တေမီးမွၵ်ႈ 1600 ပၢႆ ၊ မိူင်းလႃးဢမ်ႇႁပ်ႉႁဵတ်း ပၢင်လိူၵ်ႈတင်ႈလႄႈ ဢၼ်ၸၢင်ႈၶဝ်ႈၶႅင်ႇ ထိုင်လႆႈသွင်ဢိူင်ႇ - ဢိူင်ႇတႃႈပိင်းလႄႈ ဢိူင်ႇတႃႈပိူမ်း ၊ ဝၢၼ်ႈၵူၼ်းမီးယူႇသဝ်း 25 ဝၢၼ်ႈၼၼ်ႉတႄႉ တေၸတ်းယူႇ ဝႃႈၼႆ ။


ႁဝ်းၶႃႈတႄႉ တေပႂ်ႉထွမ်ႇတီႈၶွမ်ႊမသျိၼ်ႊ ပၢင်လိူၵ်ႈတင်ႈပိုၼ်ၽၢဝ်ႇၵွၼ်ႇ ဢၼ်တေလိူၵ်ႈတင်ႈမီးၶဵတ်ႇလႂ် ဢၼ်တေဢမ်ႇလိူၵ်ႈတင်ႈပဵၼ်ၶဵတ်ႇလႂ် ၊ ပေႃးလိူၼ်ၼႆႉသဵင်ႈၶဝ် တေပိုၼ်ၽၢဝ်ႇဝႃႈၼႆ ။


ၾၢႆႇမိူင်းလႃးတႄႉ ယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - တီႈမိူင်းလႃး ဢမ်ႇမီးပႃႊတီႊ လႂ် ပူၵ်းတင်ႈ ပၵ်းလုမ်းဝႆႉလႄႈ ပႆႇတူဝ်ႈတၼ်းတႃႇႁပ်ႉၸတ်းႁဵတ်း ပၢင်လိူၵ်ႈတင်ႈ ။ ထႅင်ႈၵမ်းတေမႃးတႄႉပႆႇႁူႉ - ဝႃႈၼႆ ။


ၽူႈလဵပ်ႈႁဵၼ်းၶဝ်ထတ်းသၢင်ဝႃႈ - ပေႃးၼႃႈလိၼ်ၶိုၵ်ႉတွၼ်း မၢႆ 2 ဝႃႉဢမ်ႇပၼ်ႁဵတ်း မိူင်းလႃးၵေႃႈတိုၼ်းဢမ်ႇၸၢင်ႈႁဵတ်း ၊ ယွၼ်ႉလႆႈၵဵင်ၸႂ်ဢမ်းၼၢၸ်ႈမိတ်ႉသႁၢႆၵၼ်ဝႃႉ ။ ပေႃး ဝႃႉႁပ်ႉၵေႃႈ မိူင်းလႃးတိုၼ်းႁပ်ႉ  ဝႃႈၼႆ ။


ၼႂ်းပိုၼ်ႉတီႈ ၼႃႈလိၼ်ၶိုၵ်ႉတွၼ်းမၢႆ  4 ၼႆႉ ၶဝ်ႈပႃး သိုဝ်လိုဝ်း တင်း ၼမ်ႉပၢၼ်း ။ ပေႃးဢဝ်ပိူင်ၽွင်း ငမ်းလူင်ပွင်ၸိုင်ႈမၢၼ်ႈဝႃႈ ထုင်ႉသိုဝ်လိုဝ်းၼၼ်ႉ ပဵၼ်တီႈပီႈၼွင်ႉတႆးယူႇသဝ်းၼမ်လႄႈ ၶဝ်ႈပႃးၼႂ်းၸႄႈ ဝဵင်းမိူင်းယၢင်း ၊ ၼမ်ႉပၢၼ်းသမ်ႉ ပဵၼ်တီႈပီႈၼွင်ႉဢႃးၶႃႇယူႇသဝ်းၼမ် သမ်ႉပဵၼ်ဢိူင်ႇ ဢၼ်ၶဝ်ႈပႃး ၼႂ်းၵိင်ႇၸႄႈဝဵင်းမိူင်းယု ၸႄႈဝဵင်းမိူင်းယွင်း ။


ၸုမ်းမိူင်းလႃးၼႆႉ တင်ႈတႄႇၽၢတ်ႇဢွၵ်ႇ ပႃႊတီႊၶွမ်ႊမိဝ်ႊၼိတ်ႉမိူင်းမၢၼ်ႈမႃးၵေႃႈ ၵေႃႇတင်ႈၸုမ်းလွတ်ႈလႅဝ်း ႁင်းၶေႃယဝ်ႉ ။ လႆႈတႄႇၵိုတ်းတိုၵ်းၵၼ်တင်းလူင်ပွင်ၸိုင်ႈသိုၵ်းမၢၼ်ႈမိူဝ်ႈ 1989 သေၵေႃႇသၢင်ႈလွင်ႈငမ်းယဵၼ်တင်း ။ ထိုင်မႃး ပၢၼ်လူင်ပွင်ၸိုင်ႈတဵင်းၸဵင်ႇ ၵေႃႈလူင်းလၢႆးမိုဝ်းၵိုတ်းတိုၵ်း ဝႆႉ ၸၼ်ႉၸႄႈမိူင်း တင်း ၸၼ်ႉ မိူင်းႁူမ်ႈတုမ် ။