သႅၼ်းၽူႈၼမ်း ၸုမ်းပီႇတုၸိတ်ႉ ငမ်းယဵၼ် ထႃဝွရ်း (ထႃဝရ) ၶၢတ်ႈၵႃးလုၵ်ႉလႃႈသဵဝ်ႈ ၵႂႃႇမူႇၸႄႈ ၊ ထုၵ်ႇၸုမ်းဢမ်ႇႁူႉ ၸၵ်းၾၢႆႇ ပႂ်ႉယိုဝ်းတီႈၶဝ်ႈဝဵင်းမူႇၸႄႈ ၵၢင်ၶမ်ႈၵၢင်ၶိုၼ်း ၊ တိူဝ်ႉဝၢတ်ႇၸဵပ်း ၶဝ်ႈႁူင်းယႃဝႆႉ ။

ဝၼ်းတီႈ 25/09/2015 (မိူဝ်ႈၼႆႉ) ယၢမ်းၵၢင်ၼႂ် 2 မူင်း ၊ ရူတ်ႉ / ၵႃး သႅၼ်း သလုၼ်ႊၵရၢဝ်ႊလမ်းၼိုင်ႈ လုၵ်ႉတီႈလႃႈသဵဝ်ႈ ၵႂႃႇဝဵင်းမူႇၸႄႈ ၊ ၵႂႃႇၺႃးၸုမ်း ဢမ်ႇႁူႉၸၵ်းၾၢႆႇ ပႂ်ႉမူၵ်းယိုဝ်း တီႈၶဝ်ႈဝဵင်းမူႇၸႄႈ ၸိုင်ႈတႆးပွတ်းႁွင်ႇ ။ တေႃႇမၢၵ်ႇၵွင်ႈပေႃးမူတ်းမႅၵ်ႉလႄႈ ၵႃးလမ်းၼၼ်ႉ တိူဝ်ႉမၢၵ်ႇၵွင်ႈလၢႆႁွႆး - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၾၢႆႇယူႇလီ တီႈမူႇၸႄႈ လၢတ်ႈဝႃႈ - ၸၼ်ႉသႅၼ်းၽူႈၼမ်း ပီႇတုၸိတ်ႉၵေႃႉၼိုင်ႈ ဢၼ်ထုၵ်ႇယိုဝ်းၼႆႉ ၊ တိူဝ်ႉသႂ်ႇတီႈႁူဝ်ဝႃႇ ၾၢႆႇသၢႆႉမၼ်း ၊ မၢၵ်ႇၵွင်ႈၶမ်ဝႆႉ လႆႈၵႂႃႇၽႃႇတီႈႁူင်းယႃမူႇၸႄႈ ။ တေႃႇထိုင်မိူဝ်ႈလဵဝ်  တိုၵ်ႉလိုမ်းတူဝ်ဝႆႉ ၊ ၸိုဝ်ႈမၼ်းႁွင်ႉဝႃႈ ၸဝ်ႈႁၢၼ် (ပူဝ်ႇမူး)မူဝ်းဝိၼ်း - ဝႃႈၼႆ ။


ၸဝ်ႈႁၢၼ်မူဝ်းဝိၼ်းၼႆႉ မိူဝ်ႈဝၼ်းတီႈ 24/09/2015 (မိူဝ်ႈဝႃး) မီးၵၢၼ်ႁိပ်ႈၼႅတ်ႈ ဝႃႈၼႆသေ ၵၢင်ၶမ်ႈယၢမ်း 7 မူင်းၶိုင်ႈၼၼ်ႉ ၵႂႃႇၶၢတ်ႈၵႃးလမ်းၼိုင်ႈ လုၵ်ႉတီႈလႃႈသဵဝ်ႈ မုင်ႈၼႃႈ ဢွၵ်ႇၵႂႃႇၸူး မူႇၸႄႈ ။ မိူဝ်ႈႁွတ်ႈထိုင်တၢင်းၶဝ်ႈဝဵင်းမူႇၸႄႈ မွၵ်ႈယၢမ်း 2 မူင်းၼၼ်ႉ ထုၵ်ႇၵူၼ်းၸုမ်းၼိုင်ႈပႂ်ႉယိုဝ်းသႂ်ႇ ။


ၵဵဝ်ႇၵပ်းလွင်ႈၼႆႉ ၵူၼ်းဢၼ်ယၢမ်ႈယူႇၼႂ်းၵၢၼ်လုၵ်ႉၽိုၼ်ႉမႃးလႄႈ ၸမ်ၸႂ်ၸုမ်းပီႇတုၸိတ်ႉၼႆႉ လၢတ်ႈဝႃႈ - ဢၼ်ယိုဝ်းၼႆႉ လႅပ်ႈပဵၼ်ၵူၼ်းႁူႉၵၼ် ႁိုဝ် ၵူၼ်းၼႂ်းၶဝ်ၼင်ႇၵၼ် ၵူၺ်း ၊ ဢမ်ႇလႅပ်ႈၸႂ်ႈၸုမ်းယိပ်းၵွင်ႈၵၢင်ႇ လုၵ်ႉၽိုၼ်ႉ ။ ပေႃးဝႃႈပဵၼ်ၸုမ်းယိပ်းၵွင်ႈၵၢင်ႇ လႆႈၶၢဝ်ႇမၼ်းသေ ပႂ်ႉယိုဝ်းၸိုင် လုၵ်ႉလႃႈသဵဝ်ႈ မႃးတီႈမူႇၸႄႈၼႆႉ ပႂ်ႉယိုဝ်းတီႈတွၼ်ႈလႂ်ၵေႃႈလႆႈ ။ ပႃးၸဵမ်ၵႃးၸဵမ်ၵူၼ်း ႁႃယင်းတေဢမ်ႇႁၼ်ၵွၼ်ႇ ။ ဢၼ်ၼႆႉ မႃးပႂ်ႉယိုဝ်းတီႈမူႇၸႄႈလႄႈ လႅပ်ႈပဵၼ်ၵူၼ်းႁူႉၸၵ်းၵၼ် ၵူၼ်းဢၼ်ယူႇတီႈမူႇၸႄႈသေ ယၢမ်ႈႁူမ်ႈၽၢၵ်ႈ ၵၢၼ်ငၢၼ်းၵၼ် ဢမ်ႇႁၢၼ်ႉၸႂ်ၼိူဝ်ၵၼ်ယဝ်ႉ ငွႆးယိုဝ်းၵူၺ်းၵေႃႈ ၸၢင်ႈပဵၼ်လႆႈ - ဝႃႈၼႆ ။


ၼႂ်းမိူင်းတႆးပွတ်းႁွင်ႇၼႆႉ မီးၸုမ်းယိပ်းၵွင်ႈၵၢင်ႇလၢႆၸုမ်း ။ မိူၼ်ၼင်ႇ ၸုမ်းပီႇတုၸိတ်ႉၵွင်းၶႃးၵူၺ်း မီးမၢႆ 1 တေႃႇထိုင်မၢႆ 5 ။ တၢင်းပွတ်းမူႇၸႄႈ မိူင်းပေႃႈ မီးၸုမ်းတီႇၶုၼ်မျၢတ်ႈ ၊ ၸုမ်းဢူးမိၼ်ႉလုၼ်ႇ ။ တၢင်းပွတ်းၼမ်ႉၶမ်း မီးၸုမ်းပီႇတုၸိတ်ႉၼွင်ၶၢင် ၊ ပီႇတုၸိတ်ႉမျဵဝ်ႉမႃႉ ၊ ၸုမ်းပီႇတုၸိတ်ႉ ဢိူင်ႇပၢၼ်းသေး ဢၼ်ပၢၼ်းသေးၵျေႃႇမိၼ်ႉ ဢွၼ်ႁူဝ် ၸဵမ်ၸိူဝ်းၼႆႉ ။


လိူဝ်သေၼၼ်ႉ ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉၵေႃႈ မီးသိုၵ်းတႆး 2 ၸုမ်း ၊ သိုၵ်းၶၢင် ၊ သိုၵ်းပလွင်ႈ ၊ သိုၵ်းရၶႅင်ႇ ၊ သိုၵ်းၵူဝ်းၵၢင်ႉ ၸိူဝ်းၼႆႉၵေႃႈ တူင်ႉၼိုင်တၢင်းမိူင်းတႆးပွတ်းႁွင်ႇ ။ ထႅင်ႈၾၢႆႇၼိုင်ႈၵေႃႈ ပိူဝ်ႈတႃႇၵႂၢတ်ႇလၢင်ႉ ၽဵဝ်ႈမူၺ်ႉၸုမ်းယိပ်းၵွင်ႈၵၢင်ႇၼႆသေ သိုၵ်းမၢၼ်ႈသူင်ႇႁႅင်းသိုၵ်း ၶဝ်ႈတူင်ႉၼိုင်ၼႂ်းမိူင်းတႆးပွတ်းႁွင်ႇၼႆႉ မီးတပ်ႉၸုမ်းလူင် (တပ်ႉမ) လၢႆလၢႆဢၼ် ၊ မိူၼ်ၼင်ႇ တပ်ႉၸုမ်းလူင် 11 , 33 , 66 , 77 , 88 , 99 ၸိူဝ်းၼႆႉ ။