တင်ႈတႄႇဝၼ်း ၶွမ်ႊမသျိၼ်ႊၵၢၼ်လိူၵ်ႈတင်ႈ ဢၼုၺၢတ်ႈပၼ် ပႃႊတီႊၵၢၼ်မိူင်းလူင်းႁႃသဵင်မႃး ပႃႊတီႊသၢင်ႇသီႈ ၸႄႈဝဵင်းမွၵ်ႇမႆႇ ပၵ်းပၢႆႉတူဝ်လိၵ်ႈ သၢင်ႇသီႈတႆး / ပဢူဝ်း ။ ၵွပ်ႈမီးၵူၼ်းသႄႉသွမ်း ၼမ်လႄႈ ပႃႈၼိူဝ်ၶိုၼ်းသင်ႇ လူပ်းမွတ်ႇပႅတ်ႈ ။

တင်ႈတႄႇဝၼ်းတီႈ 19/09/2015 ယၢမ်းၵၢင်ၼႂ်ၸဵမ်ၸဝ်ႉ ၸဝ်ႈၼႃႈတီႈလႄႈၽူႈၶဝ်ႈၸုမ်း ပႃႊတီႊသၢင်ႇသီႈ (USDP) ဢွၼ်ၵၼ်ၵႂႃႇ ၸွမ်းမွတ်ႇပႅတ်ႈၶိုၼ်း ပၢႆႉတူဝ်လိၵ်ႈ ပၵ်းတင်ႈဝႆႉၼႂ်းၸႄႈဝဵင်းမွၵ်ႇမႆႇ ၊ ဢၼ်တႅမ်ႈဝႆႉဝႃႈ သၢင်ႇသီႈတႆး သၢင်ႇသီႈပဢူဝ်းၼၼ်ႉ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ တင်ႈတႄႇမိူဝ်ႈဝၼ်းတီႈ 08/09/2015 ဢၼ်ပဵၼ်ဝၼ်း ၶွမ်ႊမသျိၼ်ႊၵၢၼ်လိူၵ်ႈတင်ႈ ဢၼုၺၢတ်ႈပၼ် ပႃႊတီႊၵၢၼ်မိူင်း လူင်းသူၼ်းတုမ်ႁႃသဵင်မႃးၼၼ်ႉ ၸုမ်းပႃႊတီႊသၢင်ႇသီႈၶဝ် လႆႈပၵ်းတင်ႈပၢႆႉပႃႊတီႊသၢင်ႇသီႈ ၼႂ်းၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်းမႃး ။ ၼႂ်းပၢႆႉၸိူဝ်းၼၼ်ႉ လႆႈတႅမ်ႈလိၵ်ႈမၢၼ်ႈပႃးဝႃႈ သၢင်ႇသီႈတႆး (သျႅၼ်းပျီႇၶၢႆႇၽျူဝ်း) သၢင်ႇသီႈပဢူဝ်း (ပဢူဝ်းပျီႇၶၢႆႇၽျူဝ်း) ။ ဝၢႆးလင် ပူၵ်းတင်ႈပၢႆႉမႃးလႆႈ 11 ဝၼ်းယဝ်ႉ ၸင်ႇၵွႆႈမွတ်ႇၶိုၼ်း ။


ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈဝႃႈ - “ ၸဵမ်မိူဝ်ႈၵၢင်ၼႂ်ၼၼ်ႉ ၶဝ်ဢဝ် ၼမ်ႉယႃႈသီ (Spray) သီၶဵဝ်ၼၼ်ႉ ၸွမ်းသိတ်ႇမွတ်ႇပႅတ်ႈတူဝ်လိၵ်ႈလွင်ႈတႆး လႄႈတင်းပဢူဝ်း ၊ ဝႆႉသၢင်ႇသီႈ (ပျီႇၶၢႆႇၽျူဝ်း) ၼႆလၢႆလၢႆၵူၺ်း ။ တၢင်းဝၢၼ်ႈၼွၵ်ႈတႄႉ ၶဝ်ၵႂႃႇမွတ်ႇပႃး ဢမ်ႇမွတ်ႇပႃး ဢမ်ႇလႆႈႁူႉ ၊ တၢင်းၼႂ်းဝဵင်းတႄႉ ဢမ်ႇလႆႈႁၼ်ယဝ်ႉ ၊ မွတ်ႇပႅတ်ႈၵႂႃႇၼမ်ယဝ်ႉ ” - ဝႃႈၼႆ ။


ၵူၼ်းၼႂ်းပိုၼ်ႉတီႈ ဢၼ်ၸမ်ၸႂ်ပႃႊတီႊသၢင်ႇသီႈ ၵေႃႉၼိုင်ႈၵေႃႈ လၢတ်ႈဝႃႈ - ၵူၼ်းၼႂ်းပိုၼ်ႉတီႈၵေႃႈ ဢွၼ်ၵၼ်တူၵ်ႇလၢတ်ႈၶိူဝ်းလွင်ႈၼႆႉဝႃႈ ဢမ်ႇထုၵ်ႇလီပဵၼ် ၊ ပိူၼ်ႈသႄႉပိူၼ်ႈၼႄးမႃး လႆႈမွၵ်ႈၼိုင်ႈဝူင်ႈၸိူဝ်းၼႆႉယဝ်ႉ ။ ၵွပ်ႈလႆႈငိၼ်းပိူၼ်ႈသႄႉၼႄးလႄႈၸၼ်ႉပႃႈၼိူဝ် လႆႈၸီႉသင်ႇလူင်းမႃး ႁႂ်ႈမွတ်ႇပႅတ်ႈ ၊ ၵွပ်ႈဝႃႈ ယႃႇႁႂ်ႈပိူၼ်ႈလႆႈသႄႉၼႄးဢွၼ်ၼႃႈပၢင်လိူၵ်ႈတင်ႈ ၊ ၸင်ႇလႆႈလူပ်းမွတ်ႇပႅတ်ႈ - ဝႃႈၼႆ ။


“ ဢၼ်ၶဝ်တႅမ်ႈဝႃႈ သၢင်ႇသီႈတႆး သၢင်ႇသီႈပဢူဝ်းၸိူဝ်းၼႆႉ ၸဵမ်ပိုင်း လႅပ်ႈၶဝ်ဢမ်ႇတၢင်ႇလၢတ်ႈ ၵူၼ်းလူင်တၢင်းၼိူဝ် ။ ၶဝ်တႅမ်ႈသေ ပၵ်းပၢႆႉၶဝ်ၵႂႃႇၵူႈတီႈၵူႈတီႈၵူၺ်း ။ မိူဝ်ႈလဵဝ် တၢင်းၼိူဝ်သမ်ႉလႆႈငိၼ်းပိူၼ်ႈၶႃႉထိုင်ၸိုဝ်ႈၶဝ်သေ ၸင်ႇလႆႈၸီႉသင်ႇမွတ်ႇၶိုၼ်း၊ လႅပ်ႈတေပဵၼ်ၸိူင်ႉၼႆ ”- ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈ ။


ၸႄႈဝဵင်းမွၵ်ႇမႆႇၼႆႉ မိူဝ်ႈပၢင်လိူၵ်ႈတင်ႈ ပီ 2010 ၼၼ်ႉ ပႃႊတီႊသၢင်ႇသီႈ ပေႉၵၢၼ်လိူၵ်ႈတင်ႈ လႆႈတီႈၼင်ႈၽွင်းတႅၼ်းၵူၼ်းမိူင်း 1 ၵေႃႉ ၊ ၸႄႈမိူင်း 2 ၵေႃႉ ။ မိူဝ်ႈၼၼ်ႉ ၵူၼ်းၼႂ်းပိုၼ်ႉတီႈၶဝ်ဝႃႈ ပႃႊတီႊသၢင်ႇသီႈလၵ်ႉၶႅပ်းၵၢင်ၸႂ် ၊ ႁဵတ်းဢမ်ႇသိုဝ်ႈၼိူဝ်ၵူၼ်းမိူင်းသေ လႆႈၶႅပ်းၵၢင်ၸႂ်မႃး ။


ၼႂ်းပီ 2015 ၼႆႉ ဢၼ်တေၶဝ်ႈၶေႉၵၢၼ်လိူၵ်ႈတင်ႈ ၼႂ်းၸႄႈဝဵင်းမွၵ်ႇမႆႇ မီးပႃႊတီႊသၢင်ႇသီႈ (USDP) ၊ ပႃႊတီႊႁူဝ်သိူဝ် (SNLD) ၊ ပႃႊတီႊသိူဝ်ၽိူၵ်ႇ (SNDP) ၊ ပႃႊတီႊပဢူဝ်း  တင်း ပႃႊတီႊၼူၵ်းယုင်း (NLD) 5 ပႃႊတီႊၸိူဝ်းၼႆႉ ။