တူဝ်တႅၼ်း လူင်ပွင်ၸိုင်ႈ မၢၼ်ႈ တင်းတူဝ်တႅၼ်း ၸုမ်းဝႃႉ ႁူပ်ႉဢုပ်ႇၵၼ် တီႈၵဵင်းတုင် ။ မၢၼ်ႈတိုၵ်းသူၼ်း ႁႂ်ႈဝႃႉ လူင်းလၢႆးမိုဝ်း ၵိုတ်းယိုဝ်း ပတ်းပိုၼ်ႉ တူဝ်ႈမိူင်း (NCA) ၊ ပေႃးဢမ်ႇလူင်း တေလုတ်ႈႁၢမ်း သုၼ်ႇလႆႈ တုၵ်းယွၼ်း ၸႄႈမိူင်း ။

ပူၼ်ႉမႃး မိူဝ်ႈ ဝၼ်းတီႈ 12/09/2015 ၾၢႆႇ လူင်ပွင်ၸိုင်ႈ မၢၼ်ႈ တင်း တပ်ႉသိုၵ်း မိူင်းဝႃႉ ၽွမ်ႉႁူမ်ႈ (UWSA) ႁူပ်ႉထူပ်းၵၼ် တီႈၵဵင်းတုင် တီႈငဝ်ႈလုမ်း တိူင်းသိုၵ်း သၢမ်ၸဵင်ႇ (ၵဵင်းတုင်) ။ တူဝ်တႅၼ်း လူင်ပွင်ၸိုင်ႈမၢၼ်ႈ ၸွမ်သိုၵ်း ယႃႇပျေႉ လၢတ်ႈတီႈ ၸုမ်းဝႃႉဝႃႈ -  ၼႂ်းပၢင် ဢၼ်တေ ၵိုတ်းယိုဝ်း ပတ်းပိုၼ်ႉ တူဝ်ႈမိူင်း (NCA) ၼႆႉ သင်ၸိူဝ်ႉဝႃႈ တပ်ႉသိုၵ်း မိူင်းဝႃႉ ၽွမ်ႉႁူမ်ႈ (UWSA)  ဢမ်ႇၶဝ်ႈႁူမ်ႈ လူင်းလၢႆးမိုဝ်း ၸွမ်းတၢင်ႇမူႇ တၢင်ႇၸုမ်းၸိုင် သုၼ်ႇလႆႈ ဢုပ်ႇဢူဝ်း ၵၢၼ်မိူင်းလႄႈ သုၼ်ႇလႆႈ ယွၼ်းၸႄႈမိူင်း ႁင်းၵူၺ်းၼၼ်ႉ တေၸၢင်ႈ လုတ်ႈႁၢမ်းၵႂႃႇ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၽူႈဢမ်ႇၶႂ်ႈ ဢွၵ်ႇၸိုဝ်ႈ ၼႂ်းဝႃႉ ၵေႃႉၼိုင်ႈ လၢတ်ႈဝႃႈ - လၢတ်ႈႁဝ်းၶႃႈဝႃႈ ပေႃးဝႃႈ ႁဝ်းၶႃႈ ဢမ်ႇလူင်း လၢႆးမိုဝ်း NCA  တေဢမ်ႇလႆႈ ပႃးၼႂ်းၶၵ်ႉတွၼ်ႈ ၵၢၼ်မိူင်း ။ ၵူၺ်းၵႃႈ တပ်ႉသိုၵ်း မိူင်းဝႃႉ ၽွမ်ႉႁူမ်ႈတႄႉ ၸွမ်းၼင်ႇ လႆႈဢွၵ်ႇလိၵ်ႈ ပိုၼ်ၽၢဝ်ႇဝႆႉၼၼ်ႉ တိုၼ်းတေ ဢမ်ႇလူင်း ။ ယွၼ်ႉပိူဝ်ႈ သင်လႄႈ ႁဝ်းၶႃႈဢမ်ႇတၢပ်ႈ လူင်းလၢႆးမိုဝ်း ယဝ်ႉၼႆၸိုင် 25 ပီ လုမ်းလုမ်းၼႆႉ ႁဝ်းၶႃႈႁဵတ်းသၢင်ႈ လွင်ႈငမ်းယဵၼ် ၵၼ်မႃးယဝ်ႉ ဢမ်ႇမီးလွင်ႈ ပိုတ်းယိုဝ်း သိုၵ်းသိူဝ် သင်ၵၼ် ၊ တေၵႂႃႇၵိုတ်းတိုၵ်း ႁဵတ်းသင် ။ မၼ်းပေႃး သုင်လိူဝ် လွင်ႈငမ်းယဵၼ် ဝႆႉယဝ်ႉ- ဝႃႈၼႆ ။


ပူၼ်ႉမႃး မိူဝ်ႈ ဝၼ်းတီႈ 09/09/2015 ၼၼ်ႉၵေႃႈ တိူင်းသိုၵ်း သၢမ်ၸဵင်ႇ (ၵဵင်းတုင်) ႁဵတ်းပၢင်ၵုမ် ၵဵဝ်ႇၵပ်း ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း ။ မိူဝ်ႈၼၼ်ႉ မၢၼ်ႈတင်းဝႃႉ ႁူပ်ႉဢုပ်ႇၵၼ် ယဝ်ႉၵမ်းၼိုင်ႈ ။ လွင်ႈၼႆႉၵေႃႈ ၶႂ်ႈႁႂ်ႈဝႃႉ ၶဝ်ႈမႃးၼႂ်း ၶၵ်ႉၵၢၼ် လွင်ႈငမ်းယဵၼ် ၼင်ႇၵဝ်ႇ - ၽူႈမီး ပုၼ်ႈၽွၼ်း တီႈသုၼ်ၵၢၼ် လွင်ႈငမ်းယဵၼ် မၢၼ်ႈ (MPC) ၵေႃႉၼိုင်ႈ လၢတ်ႈ ။


တပ်ႉသိုၵ်း မိူင်းဝႃႉ ၽွမ်ႉႁူမ်ႈ (UWSA) ၼႆႉ ပေႃးဝႃႈ ၵႂႃႇလူင်း လၢႆးမိုဝ်း ၵိုတ်းယိုဝ်း ပတ်းပိုၼ်ႉ တူဝ်ႈမိူင်း ၸွမ်းၸုမ်း ၸၢဝ်းၶိူဝ်း တၢင်ႇမူႇ တၢင်ႇၸုမ်းၸိုင် တေမီးလွင်ႈ တုမ်ႉတိူဝ်ႉ သုၼ်ႇလႆႈ ၵူၼ်းမိူင်းဝႃႉ ။ ၵွပ်ႈၼၼ် တေဢမ်ႇ လူင်းလၢႆးမိုဝ်းသေ တေၵႂႃႇၶဝ်ႈႁူမ်ႈ ပၢင်ဢုပ်ႇဢူဝ်း ၵၢၼ်မိူင်း ၵမ်းလဵဝ် - ယၢမ်ႈဢွၵ်ႇ လိၵ်ႈပိုၼ်ၽၢဝ်ႇဝႆႉ မိူဝ်ႈ ဝၼ်းတီႈ 04/09/2015 ၼင်ႇၼႆ ။


ပိူဝ်ႈတႃႇ လူင်းလၢႆးမိုဝ်း ၵၢၼ် ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ ၸုမ်းယိပ်း ၵွင်ႈၵၢင်ႇ ၸၢဝ်းၶိူဝ်း မီးယူႇ 20 ၸုမ်း ပၢႆသေတႃႉ မိူဝ်ႈလဵဝ်ၼႆႉ လူင်ပွင်ၸိုင်ႈမၢၼ်ႈ တိုၵ်ႉႁပ်ႉဝႆႉ 15 ၸုမ်းၵူၺ်း ။ မိူၼ်ၼင်ႇ တၢင်ႇမူႇ တၢင်ႇၸုမ်း ၵူဝ်းၵၢင်ႉ (MNDAA) ၊ ၸုမ်းရၶႅင်ႇ (AA) ၸိူဝ်းၼႆႉ မၢၼ်ႈဢမ်ႇႁပ်ႉ ။ မိူၼ်ၼင်ႇ တပ်ႉသိုၵ်း ပူတ်းပွႆႇ ၸိူဝ်ႉၸၢတ်ႈ တဢၢင်း (TNLA) ၼႆၵေႃႈ မၢၼ်ႈတိုၵ်ႉဝႃႈ ႁႂ်ႈမီးၵၢၼ် ဢုပ်ႇဢူဝ်း ၵိုတ်းတိုၵ်း ၸၼ်ႉၸႄႈမိူင်းသေၵွၼ်ႇ ။


ၵၢၼ် ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼႆႉ ဢၼ်ၵိုင်ႇလီ ဝူၼ်ႉတႄႉ တၢင်း ၵူဝ်းၵၢင်ႉၼႆႉ ပဵၼ် ပၢင်တိုၵ်းၵၼ် ဝႆႉယူႇ ။ ၵွပ်ႈၼၼ် ၵူဝ်းၵၢင်ႉၼႆႉ ၵိုင်ႇလီၶဝ်ႈပႃး ဢမ်ႇၶဝ်ႈပႃး ဢၼ်ဝႃႈၼႆႉ ၵိုင်ႇလီ ဢွၵ်ႇၵႂၢမ်းထၢမ် တေႃႇ လူင်ပွင်ၸိုင်ႈ မၢၼ်ႈယူႇ ။ မိူၼ်ၼင်ႇ ၵူဝ်းၵၢင်ႉ ယိုဝ်းမၢၼ်ႈ ဝႆႉယူႇ ၊ သမ်ႉဢမ်ႇပၼ် ၶဝ်ႈပႃး ၼႂ်းၵၢၼ် ၵိုတ်းတိုၵ်း ပတ်းပိုၼ်ႉ တူဝ်ႈမိူင်း ။ ဢၼ်ဢမ်ႇပဵၼ် ပၢင်တိုၵ်းၵၼ် မိူၼ်ၼင်ႇ ၸုမ်းဝႃႉ ၸုမ်းမိူင်းလႃး ၼႆႉသမ်ႉ ဝႃႈတေလႆႈလူင်း လၢႆးမိုဝ်း ၵိုတ်းတိုၵ်း ၸိူဝ်းၼႆႉ ။


ပၢင်ဢုပ်ႇဢူဝ်း တီႈၵဵင်း တုင်ပွၵ်ႈၵမ်းၼႆႉ ၾၢႆႇ ၸဝ်ႈၼႃႈတီႈ လူင်ပွင်ၸိုင်ႈမၢၼ်ႈ ပႃးၶုၼ်ၽွင်း လူင်ႁွင်ႈၵၢၼ်လူင် ၸွမ်ၸိုင်ႈ လႄႈ ၵႅမ်ႁူဝ်ပဝ်ႈ ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်း ႁူမ်ႈတုမ် (UPWC) ဢူးဢွင်ႇမိၼ်း လႄႈ ၽူႈမီး ပုၼ်ႈၽွၼ်း ၾၢႆႇ ၵဵဝ်ႇၶွင်ႈ ၶဝ်ႈႁူမ်ႈ ။ ၾၢႆႇဝႃႉ ပဵၼ် ၽူႈၼမ်းၼႂ်း ၵူႈလွင်ႈလွင်ႈ တပ်ႉသိုၵ်း မိူင်းဝႃႉ ၽွမ်ႉႁူမ်ႈ (UWSA) ပဝ်းယဵဝ်ႇယီး မႃးၶဝ်ႈႁူမ်ႈ ။