ပႃႊတီႊ ႁူဝ်သိူဝ် (SNLD) ႁူပ်ႉထူပ်း ၵူၼ်းမိူင်းလႄႈ ၸတ်းပၢင်သွၼ် တႃႇပေႉပၢင် လိူၵ်ႈတင်ႈ တီႈဝဵင်းပၢင်လူင် ၊ ပူင်သွၼ် လွင်ႈမၢႆမီႈ တိုဝ်းၵမ် ၽွင်းၶၢဝ်း လိူၵ်ႈတင်ႈ ။ ၶုၼ်ထုၼ်းဢူးဝႃႈ ပိူဝ်ႈတႃႇ ယူႇၼႂ်း သၽႃး ၶတ်းၸႂ် ၵႄႈလိတ်ႈ ပိူင်ငဝ်ႈပိုင်းမိူင်း ။

ဝၼ်းတီႈ 09-10/09/2015 ငဝ်ႈငုၼ်း ၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊ ႁူဝ်သိူဝ် (SNLD) ၸတ်းႁဵတ်းပၢင် ႁူပ်ႉထူပ်း ၵူၼ်းမိူင်း လႄႈ ပၢင်သွၼ် တႃႇပေႉ ၵၢၼ်လိူၵ်ႈတင်ႈ (2015) တီႈဝဵင်းပၢင်လူင် ၸႄႈတွၼ်ႈ လွႆလႅမ် ၸိုင်ႈတႆး ပွတ်းၸၢၼ်း ။ မီးၽူႈယႂ်ႇ ၵူၼ်းလူင် ၼႂ်းပႃႊတီႊ ၊ ၽူႈၶဝ်ႈ ပႃႊတီႊ ၵူႈၸႄႈဝဵင်း ၵူႈၸႄႈတွၼ်ႈ မႃးၶဝ်ႈႁူမ်ႈ ၵူၼ်း 1,500 ပၢႆ - ၼႆယဝ်ႉ ။


ၵဵဝ်ႇၵပ်း လွင်ႈၼႆႉ ပၢင်ႁူပ်ႉထူပ်း ၵူၼ်းမိူင်း ၸတ်းႁဵတ်း မိူဝ်ႈ ဝၼ်းတီႈ 8-10/09/2015 ပွတ်းၼႂ် ။ ဝၼ်းတီႈ 9-10/09/2015 ပၢင်သွၼ် တႃႇပေႉၵၢၼ် လိူၵ်ႈတင်ႈၼႆႉ မီးၵၢၼ် ပူင်သွၼ်ပၼ် မၢႆမီႈ ၵၢၼ်လိူၵ်ႈတင်ႈ ၊ လွင်ႈမၢႆမီႈ ၽူႈတႅၼ်း ၽွင်းၶၢဝ်း လူင်းသူၼ်းတုမ် ႁႃသဵင်ပၢင်လိူၵ်ႈတင်ႈ ၸိူဝ်းၼႆႉ ၽူႈတႅၼ်းၶဝ် တေလႆႈတိုဝ်းၵမ် / ငိူင်ႉဝႄႈ ၸိူင်ႉႁိုဝ် ၸိူဝ်းၼႆႉ ။ လွင်ႈငိုၼ်းၸႂ်ႉၸၢႆႇ (Budget) ဢၼ်ပူၼ်ႉမႃး လႄႈ လွင်ႈၵၢၼ်လူင်း သူၼ်းတုမ် ႁႃသဵင်ၸိူဝ်းၼႆႉ တေၸႂ်ႉတိုဝ်း ငိုၼ်းၵႃႈႁိုဝ်ၸိူဝ်းၼႆႉ ႁႂ်ႈႁဵတ်းသၢႆမၢႆ ပိူဝ်ႈတႃႇ တၢင်ႇၼႄ ဢုပ်ႇလၢတ်ႈၼႄ ၶိုၼ်းဝၢႆးလင် - ၼႆယဝ်ႉ ။


ပၢင်ႁူပ်ႉထူပ်း ၵူၼ်းမိူင်းၼႆႉ ၸတ်းႁဵတ်းတီႈ ဝတ်ႉပိတၵၢတ်ႈ ႁူင်းထမ်း ။ ႁူဝ်ပဝ်ႈ ပႃႊတီႊ ႁူဝ်သိူဝ် ၸဝ်ႈၶုၼ် ထုၼ်းဢူး မွၵ်ႇလၢတ်ႈ ၶေႃႈၵႂၢမ်း မိူဝ်ႈဝၼ်းတီႈ 8 ဝႃႈ - ၵမ်ၸႃတႃ (ၵၢမ်ႇၵျမ်ႇမႃႇ) မိူင်းတႆး မီးၼႂ်းမိုဝ်းၵူၼ်းမိူင်းတႆး ၊ ဢမ်ႇႁိုင် ဢမ်ႇၼၢၼ်းၼႆႉ တေမီး ပၢင်လိူၵ်ႈတင်ႈယဝ်ႉ၊  ပေႃးဝႃႈ ၽူႈၶဝ်ႈ ပႃႊတီႊႁဝ်း ၽွင်းတႅၼ်းႁဝ်း ၶဝ်ႈၵႂႃႇမီး ၼႂ်းသၽႃးၸိုင် ဢၼ်လမ်ႇလွင်ႈ သုတ်းၼႆႉ တေယူႇၼႂ်း သၽႃးသေ တေမူၼ်ႉမႄး ပိူင်ငဝ်ႈပိုင်းမိူင်း ။ ဢၼ်ပဵၼ် ပၼ်ႁႃ ၵူႈလွင်ႈလွင်ႈ ႁဵတ်းႁႂ်ႈ ၵူၼ်းမိူင်း ထူပ်းတၢင်း ယၢပ်ႇၽိုတ်ႇ ၶၢၼ်ၸႂ်ယူႇၼႆႉ ပိူင်လူင်မၼ်း ပဵၼ်ပိူင် ငဝ်ႈပိုင်းမိူင်း - ဝႃႈၼႆ ။


တီႈ ပၢင်ႁူပ်ႉထူပ်း ၵူၼ်းမိူင်းၼၼ်ႉ မီးၽူႈယႂ်ႇ ၵူၼ်းလူင် ၼႂ်းပႃႊတီႊ ႁူဝ်သိူဝ် မိူၼ်ၼင်ႇ ၽူႈၼမ်းၼႂ်း ၵူႈလွင်ႈလွင်ႈ ၊ ၵႅမ်ၽူႈၼမ်းၼႂ်း ဢိၵ်ႇပႃး ၶူးပူင်သွၼ်လူင် လုင်းၸၢႆးၾႃႈ ၸိူဝ်းၼႆႉ ၶဝ်ႈႁူမ်ႈ ။ ၽူႈႁၵ်ႉသူင် သူၼ်ၸႂ်ၵၢၼ် ဝၢၼ်ႈၵၢၼ်မိူင်း ၼႂ်းပွၵ်ႉ ၼႂ်းယွမ်ႇ ၊ ထဝ်ႈဝၢၼ်ႈ ထဝ်ႈၼႃး ၊ ၵူၼ်းၼုမ်ႇၼႂ်းထုင်ႉ ပၢင်လူင် ဢိၵ်ႇတင်း ၽူႈၶဝ်ႈ ၶွမ်ႊမတီႊ ၵူႈၸႄႈဝဵင်း လႄႈ ၽူႈၶဝ်ႈ ၶွမ်ႊမတီႊ ငဝ်ႈငုၼ်း ၸိူဝ်းၼႆႉ ၶဝ်ႈႁူမ်ႈ - ၼႆယဝ်ႉ ။


ၸၢႆးလဵၵ်ႉ ၵႅမ်ၽူႈ ၼမ်းၼႂ်း ပႃႊတီႊ  ဢၼ်ပဵၼ်ပႃး ၽူႈၶၢၼ်ပၢၵ်ႇ ပႃႊတီႊ လၢတ်ႈဝႃႈ - ႁဝ်းၶႃႈ ၶဝ်ႈလိူၵ်ႈတင်ႈ တိူင်းဝဵင်း တႃႈလိူဝ်ႇ (မၼ်းတလေး) ၊ ၼႂ်းၸႄႈဝဵင်း မိူင်းၶၢင် လႄႈ ၸႄႈမိူင်းတႆး တီႈဢၼ် ႁူဝ်ၵူၼ်းတႆး ယူႇၼမ် ၊ ႁဝ်းၶႃႈ တေၶဝ်ႈ လိူၵ်ႈတင်ႈ 158 တီႈၼင်ႈ ၊ ၽူႈတႅၼ်း သၽႃး ၸိူဝ်ႉၸၢတ်ႈ 14 ၵေႃႉ ၊ ၽူႈတႅၼ်း ၵူၼ်းမိူင်း 48 ၵေႃႉ ၊ ၽူႈတႅၼ်း ၸၢဝ်းၶိူဝ်း 2 ၵေႃႉလႄႈ တင်းၽူႈတႅၼ်း သၽႃးၸႄႈမိူင်း 94 ၵေႃႉ ။ ၽူႈတႅၼ်း 158 ၵေႃႉၼႆႉ ၸိုင်ႈတႆး ပွတ်းၸၢၼ်း 56 ၵေႃႉ ၊ ပွတ်းႁွင်ႇ 41 ၵေႃႉ ၊ ပွတ်းဢွၵ်ႇ 39 ၵေႃႉ ၊ တိူင်းဝဵင်း တႃႈလိူဝ်ႇ 4 ၵေႃႉ ၊ မိူင်းယၢင်းလႅင် 14 ၵေႃႉလႄႈ ၸႄႈမိူင်းၶၢင် 11 ၵေႃႉ - ၼႆယဝ်ႉ ။


ၽူႈမႃးၶဝ်ႈ ႁူမ်ႈပၢင် ႁူပ်ႉထူပ်းၵၼ်ၼႆႉ ဝၢႆးႁူပ်ႉထူပ်း ၵၼ်ယဝ်ႉ ဢွၼ်ၵၼ် ၵႂႃႇၸူးတီႈ လၵ်းသဝ်ႁိၼ် ပၢင်လူင်သေ ႁူမ်ႈၵၼ် ထၢႆႇၶႅပ်းႁၢင်ႈ ။ ဝဵင်းပၢင်လူင်ၼႆႉ ပူၼ်ႉမႃးမိူဝ်ႈပီ 1947 ပဵၼ်တီႈ ၸွမ်သိုၵ်းဢွင်ႇသၢၼ်း ၽူႈၼမ်း ၸၢဝ်းၶိူဝ်းမၢၼ်ႈ တင်း ၽူႈၼမ်း ၸၢဝ်းၶိူဝ်း တႆး ၶၢင် ၶျၢင်း လႆႈၸႂ် ႁူမ်ႈၵၼ် လူင်းလၢႆးမိုဝ်း ႁဵတ်းၶေႃႈၵိၼ်ၵႅၼ်ႇ လိၵ်ႈႁူမ်ႈမၢႆ ပၢင်လူင် ။ ပၢင်လူင်ၼႆႉ ပဵၼ်ဝဵင်း ၵိုၵ်းပိုၼ်း ဝဵင်းၼိုင်ႈ ။