ဝၼ်းမိူဝ်ႈၵွၼ်ႇဢွၼ် ၽွင်းဝၢၼ်ႈမိူင်းၼႆႉ ယင်းယူႇတႂ်ႈၽူႈဢွၼ်ႁူဝ်ၸိူဝ်းလုၵ်ႉတီႈ ပၢင်လိူၵ်ႈတင်ႈမႃး ၊ မိူဝ်ႈယင်းပႆႇမီးသိုၵ်း မႃးယိုတ်းဢႃႇၼႃႇ (ဢမ်းၼၢၸ်ႈ)ၼၼ်ႉ မီးလွင်ႈၶႆႈၼႄဢပုမ်ႇ တီႈတႂ်ႈၼႆႉ ။ ၵူၺ်းၵႃႈ ဢမ်ႇပေႃးဢဝ်သႂ်ႇၸႂ်ၵၼ် ။

ၼုမ်ႇ - ပူႇ “ ၵူၼ်း ” တင်း “ ပိူင် ” ၼႆႉ ဢၼ်လႂ်လမ်ႇလွင်ႈလိူဝ်ၶႃႈ ? ။


ပူႇ - ၼႆႉပဵၼ်ၵႂၢမ်းထၢမ် ဢၼ်လီထၢမ်လႄႈ လီတွပ်ႇ ။ ပူႇၵေႃႈတေတွပ်ႇယူႇ ။ ၵူၺ်းၵႃႈ ၸူဝ်ႈပႆႇတွပ်ႇၼၼ်ႉ လၢၼ်တူၺ်းလေႃႉ ဢၼ်လတ်းၼႃႈႁိူၼ်းႁဝ်းၵႂႃႇၼၼ်ႉလူး ။ လေႃႉၵေႃႈပေႉၵႅၼ်ႇထုၵ်ႇတႃ၊ မႃႉၵေႃႈပေႉၵႅၼ်ႇႁၢင်ႈလီ ၊ ၸွင်ႇမၼ်းမီး ၸဝ်ႈမၼ်းယူႇႁႃႉ ? ။


ၼုမ်ႇ - မီးၽႅဝ်လေႃႇပူႇ ။ ၸၢင်ႈၵႂႃႇပဵၼ်ၽႂ် လိူဝ်သေၵူၼ်းမီးလူင် လုင်းၵ ၼႂ်းဝၢၼ်ႈႁဝ်းၼႆႉ ? ။


ပူႇ - ဢေႃႈ။ ဢၼ်ႁေႃႈၵႂႃႇလေႃႉမႃႉၼၼ်ႉ ပဵၼ်တူဝ်လုင်းၵ ႁႃႉ? ။


ၼုမ်ႇ - ဢမ်ႇၸႂ်ႈတူဝ်မၼ်းၶႃႈပူႇ ၊ ပဵၼ်တူဝ်လုၵ်ႈမၼ်း ၸၢႆးၵ ဢွၼ်ႇဢေႃႈ ။


ပူႇ - မၼ်းသမ်ႉတေႁေႃႈၵႂႃႇလႂ်လႃႇၼၼ်ႉ ? ။


ၼုမ်ႇ - တီႈပႃႇတူၼ်ႈထၢၼ် မိူၼ်ၵူႈပွၵ်ႈၶႃႈယဝ်ႉ ၊ ၵႂႃႇၵိၼ်ၵႂႃႇမဝ်း ၼမ်ႉထၢၼ်ၶူမ် တင်းၵေႃႉသေႈမၼ်းၼၼ်ႉၼႃႇ ။


ပူႇ - ဢိူဝ်ႈ ဢိူဝ်ႈ ။ လေႃႉမႃႉၼႆႉ ၼင်ႇႁၢင်ႈတူဝ်လုင်းၵၵေႃႈ ႁၼ်ႁေႃႈၵႂႃႇမႃးယူႇ ပဵၼ်ပွၵ်ႈပဵၼ်ၵမ်း ၊ ပေႃးတူဝ်မၼ်း ႁေႃႈသမ်ႉၵႆႉၵႂႃႇလႂ်လႃႇ ? ။


ၼုမ်ႇ - တူဝ်လုင်းၵတႄႉ ၸႂ်ၵိူဝ်းလီမၼ်းသုင် ၊ ၵႆႉၵႂႃႇၵျွင်းမုၼ်ၸဝ်ႈသေ ထွမ်ႇထမ်းႁိုဝ်ႉ ၊ ဢမ်ႇၼၼ် ၵႂႃႇၶဝ်ႈပၢင်ၵုမ်ဝၢၼ်ႈသေ ဢုပ်ႇဢူဝ်းလွင်ႈၼႃႈဝၢၼ်ႈၼႃႈဢိူင်ႇႁိုဝ်ႉ ၼၼ်ႉယဝ်ႉ ။ ၵူၺ်းၵႃႈ ပူႇသမ်ႉၵုမ်ႇမႃးထၢမ် ၸိူဝ်းၼႆႉလႃႇ ? ။


ပူႇ - ဢိူဝ်ႈ ၊ ဢမ်ႇၸႂ်ႈလႄႈ ပူႇထၢမ်ၼႆႉ တႃႇဝႄႈပႅတ်ႈ ဢမ်ႇတွပ်ႇၵႂၢမ်းထၢမ်လၢၼ်ဢမ်ႇၸႂ်ႈ ။ ၵွပ်ႈၶႂ်ႈႁႂ်ႈလၢၼ်ၶဝ်ႈၸႂ် (ပွင်ႇၸႂ်) “ ၵူၼ်း ” လႄႈ “ ပိူင် ” ၼႆႉ ပိူင်ႈၵၼ် ၸိူင်ႉႁိုဝ်ၼၼ်ႉၵူၺ်း ။


“ ပိူင် ” ႁိုဝ် “ လၵ်းၵၢၼ် ” (Principle, Policy) ႁိုဝ်ၼႆၼၼ်ႉ မိူၼ်လေႃႉတင်းမႃႉဢၼ်ႁဝ်း ႁၼ်မိူဝ်ႈၵႆႈၼၼ်ႉယဝ်ႉ ။ မၼ်းတေၸၢင်ႈ ၶႅမ်ႉလႅပ်ႈၵႅၼ်ႇၶႅင်လီ ၊ ၵူၺ်းၵႃႈ မၼ်းတေၵႂႃႇတၢင်းလီၼႄႇ တၢင်းၸႃႉၼႆၼၼ်ႉ မၼ်းဢိင်ၼိူဝ်ၵူၼ်း ၊ ဢိင်ၼိူဝ်ၵေႃႉပွင်ၵၢၼ်မၼ်း ။ သင်ဝႃႈ ၵေႃႉပွင်ၵၢၼ်မၼ်းပဵၼ်ၵူၼ်းလီ ၵူၼ်းမီးၼမ်ႉၵတ်ႉၼႆ ႁဝ်းၵေႃႈဢမ်ႇပေႃးတၢပ်ႈမႆႈၸႂ်ဝႃႈ ပိူင်မၼ်း ၵၢၼ်မၼ်းတေဢွင်ႇဢမ်ႇဢွင်ႇ ။ ၵူၺ်းၵႃႈ ၵေႃႉပွင်ၵၢၼ်ၼၼ်ႉ ဢမ်ႇပဵၼ်ၼင်ႇၼၼ်ၸိုင် ႁူႉၵႃႈလႆႈမႆႈၸႂ် ။


မိူၼ်ၼင်ႇၼၼ်ယဝ်ႉ ၊ မီးၵူၼ်းလီၵူၺ်း ဢမ်ႇမီးပိူင်လီၵေႃႈ ႁူႉၵႃႈလႆႈမႆႈၸႂ် ။ ၵႃႈၶႂ်ႈပဵၼ်ၵူၼ်းလီ ပိူင်မၼ်း ၵၢၼ်မၼ်းဢမ်ႇထုၵ်ႇၼႆ မၼ်းဢမ်ႇၸၢင်ႈဢွင်ႇ (မိူၼ်ၸဝ်ႈသီႇထၢတ်ႈပဵၼ်ၵူၼ်းလီ သမ်ႉၵႂႃႇတိုဝ်းၵမ် ပိူင်ၶႃတူဝ်ၶႃၶိင်း ႁိုင်ပဵၼ် 6 ပီၵေႃႈ ဢမ်ႇဢွင်ႇၼၼ်ႉယဝ်ႉ) ။


ၼုမ်ႇ - ပေႃးၼၼ် ပူႇၶႂ်ႈဝႃႈ “ ၵူၼ်း ” တင်း “ ပိူင် ” ၼႆႉ လမ်ႇလွင်ႈၼင်ႇၵၼ်ၵႂႃႇၼေႃႈ ။


ပူႇ - ဢိူဝ်ႈ ၶႂ်ႈဝႃႈၼၼ်ယဝ်ႉလၢၼ် ။


ၼုမ်ႇ - ၶွပ်ႈၸႂ်ၶႃႈပူႇ ၊ ၶႃႈလၢၼ်ပွင်ႇၸႂ်ယဝ်ႉ ။


ၽူႈၶူၼ်ႉၶႆႈၼႄၵေႃႈ မုင်ႈမွင်းဝႃႈၵမ်းၼႆႉ တေဢွၼ်ၵၼ်သႂ်ႇၸႂ် ဢပုမ်ႇဢွၼ်ႇၼႆႉယူႇ ။