ၼႂ်းၶၢဝ်းတၢင်း 3 ဝၼ်းၼႆႉ သင်ဝႃႈၶူးမေႃသွၼ်လူင် လိၵ်ႈလၢႆးတႆး လုင်းၸၢႆးၾႃႈ ဢမ်ႇမႃးယွၼ်းၼွမ်း ၵႄႈလိတ်ႈ ၶေႃႈၵႂၢမ်းဢၼ်လႆႈလၢတ်ႈၵႂႃႇၸိုင် ႁူဝ်ပဝ်ႈ ပႃႊတီႊသိူဝ်ၽိူၵ်ႇ တေၸႅင်ႈၵႂၢမ်းၵၢဝ်ႇႁႃ (ၸွႆးတြႃး) ။

ဢိင်ၼိူဝ် ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ႁဵတ်းပၢင်ၵုမ် / ႁႃသဵင် တီႈပၢင်လူင် ၸိုင်ႈတႆးပွတ်းၸၢၼ်းသေ ဝွၵ်ႇၸိူၼ်းၶႅၵ်ႇၶိုၵ်ႉတွၼ်း ၶူးပူင်သွၼ်လိၵ်ႈလၢႆးတႆး လုင်းၸၢႆးၾႃႈ မႃးၵၢဝ်ႇလၢတ်ႈၶေႃႈၵႂၢမ်းၼၼ်ႉ တုမ်ႉယွၼ်ႈၸိုဝ်ႈသဵင် ၵုၼ်းမုၼ် (သရေႇ) ၼႃႈတႃႈ ပႃႊတီႊသိူဝ်ၽိူၵ်ႇ (SNDP) ဝႃႈၼႆလႄႈ ႁူဝ်ပဝ်ႈသိူဝ်ၽိူၵ်ႇ ၸၢႆးဢၢႆႈပဝ်း တေၸႅင်ႈၵႂၢမ်းၵၢဝ်ႇႁႃ / ၸွႆးတြႃး ၊ သင်ၸိူဝ်ႉဝႃႈ ဢမ်ႇမႃးယွၼ်းၼွမ်း (တွင်းပၢၼ်ႇ) ၵႄႈလိတ်ႈၶိုၼ်း - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈသိူဝ်ၽိူၵ်ႇ လုင်းၸၢႆးဢၢႆႈပဝ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ - ၼႂ်းၶၢဝ်းတၢင်း 3 ဝၼ်းၼႆႉ တေလႆႈမႃးယွမ်းၼွမ်း ၵႄႈလိတ်ႈ ။ လွင်ႈၼႆႉ တေၵႂႃႇဢုပ်ႇတီႈ ပၢင်ႁူပ်ႉထူပ်းပေႃႈမႄႈၵူၼ်းမိူင်း တီႈသီႇပေႃႉ ။ လွင်ႈၼႆႉ မၼ်းပဵၼ်ၶၻီး (ဢမု) ၵဵဝ်ႇၵပ်းလွင်ႈ ၾၢႆႇပလိၵ်ႈၵႂႃႇယဝ်ႉ ။ ၵွပ်ႈၼၼ် တူဝ်လုင်းၸၢႆးၾႃႉ တၵ်းတေလႆႈမႃးယွၼ်းၼွမ်း (တွင်းပၢၼ်ႇ)ၵႄႈလိတ်ႈ ၵူၺ်းပႆႇပေႃး ၊ တေလႆႈႁဵတ်းပႃးၽႅၼ်ႇၶႅပ်း ဝီႊသီႊၻီႊ (VCD) သေ ၸႅၵ်ႇပိုၼ်ၽႄႈပၼ် - ဝႃႈၼႆ ။


ပူၼ်ႉမႃးမိူဝ်ႈဝၼ်းတီႈ 19/09/2015 ၼႆႉၵေႃႈ ၻီႊမူဝ်ႊၶရႅတ်ႊတိၵ်ႉၶ်ပႃႊတီႊ ၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) လႆႈတႅမ်ႈလိၵ်ႈထိုင်တီႈ ႁူဝ်ပဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈ ၸိုင်ႈမိူင်းႁူမ်ႈတုမ် (UEC) ဝႃႈ ႁႂ်ႈၸၢင်ႈဢဝ်လိူင်ႈလၢဝ်း ဢူးလႃႉၽေႇ ဢၼ်ႁွင်ႉဝႃႈ လုင်းၸၢႆးၾႃႉၼၼ်ႉ  ၸင်ႇလႆႈယိုၼ်ႈလိၵ်ႈထိုင်မႃး ၼႆယဝ်ႉ ။


မိူဝ်ႈလဵဝ် တိုၵ်ႉထိုင်ၶၵ်ႉတွၼ်ႈ တၢင်ႇထိုင်ၶွမ်ႊမသျိၼ်ႊၵၢၼ်လိူၵ်ႈတင်ႈ ၊ ပႆႇထိုင်ၸၼ်ႉ ၸႅင်ႈၵႂၢမ်း ။


ၼႂ်းလိၵ်ႈတၢင်ႇယိုၼ်ႈၸူး ႁူဝ်ပဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈ ၼၼ်ႉ ဝႃႈ -  ဢၼ်ငဝ်ႈငုၼ်း ၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ႁဵတ်းပၢင်ၵုမ် မိူဝ်ႈဝၼ်းတီႈ 08/09/2015 တီႈဝတ်ႉမူၺ်ႇတေႃႇ ဝဵင်းပၢင်လူင်ၼၼ်ႉ ဢူးလႃႉၽေႇ ဢၼ်ႁွင်ႉဝႃႈဢူးၸၢႆးၾႃႉၼၼ်ႉ ၵၢဝ်ႇလၢတ်ႈၶေႃႈၵႂၢမ်းဝႃႈ - ပႃႊတီႊသိူဝ်ၽိူၵ်ႇၼႆႉ လႆႈတီႈယူႇၼႂ်းႁွင်ႈၵၢၼ်လူင်ပွင်ၸိုင်ႈ ၵူႈထၢၼ်ႈထၢၼ်ႈလႄႈ လႆႈတီႈၼင်ႈၼႂ်းသၽႃး ၵူႈတီႈတီႈ ၊ ပၼ်ႊပႃႊမိတ်ႊၶွမ်ႊပၼီႊၶဝ်ၶုတ်းမိူင် ၶုတ်းႁႄႈ ၊ တႅပ်းမႆႉတႅပ်းတွၵ်ႇၼႂ်းမိူင်းတႆးၼႆသေ ယုၵ်ႉၽိုၼ်လိၵ်ႈဢၼ်မီးၸိုဝ်ႈ / မၢႆၼၼ်ႉ ၼႄၼႂ်းပၢင်ၵုမ်…ၸဵမ်ၸိူဝ်းၼႆႉ ။


ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇ တိတ်းတေႃႇ တွင်ႈထၢမ် ၶူးပူင်သွၼ်လိၵ်ႈလၢႆးတႆး လုင်းၸၢႆးၾႃႈၵေႃႈ ဢမ်ႇလႆႈတိုဝ်ႉတၢင်း တႃႇတေလၢတ်ႈတေႃႇ ။ ၵူၺ်းၵႃႈ တိတ်းတေႃႇ ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ် ၸၢႆးၼုတ်း လၢတ်ႈဝႃႈ - ၵဵဝ်ႇၵပ်းလွင်ႈၼႆႉ မိူဝ်ႈလဵဝ် ပႆႇၶႂ်ႈပၼ်တၢင်းႁၼ်ထိုင်သင် - ဝႃႈၼႆ ။


ၶူးပူင်သွၼ်လူင် လိၵ်ႈလၢႆးတႆး လုင်းၸၢႆးၾႃႈၼႆႉ မိူဝ်ႈပီ 1989 ၊ မိူဝ်ႈၽွင်းလုင်းၸၢႆးဢၢႆႈပဝ်း ပဵၼ်ၽူႈၼမ်းၼႂ်း ၵူႈလွင်ႈလွင်ႈ ၼႂ်းပႃႊတီႊႁူဝ်သိူဝ်ၼၼ်ႉ လုင်းၸၢႆးၾႃႈၵေႃႈ ပဵၼ်ၽူႈၶဝ်ႈပႃးတူင်ႉၼိုင်တႄႉတႄႉဝႃႈဝႃႈ ၊ ထိုင်မႃး ပၢင်လိူၵ်ႈတင်ႈပီ 1990 လႆႈပေႉပၢင်လိူၵ်ႈတင်ႈ ၼႂ်းၶဵတ်ႇလိူၵ်ႈတင်ႈမၢႆ 1 ၵျွၵ်ႉမႄး ။


ၵူၺ်းၵႃႈ ဢိင်ၼိူဝ်ၸုမ်းသိုၵ်းမၢၼ်ႈၽွင်းၼၼ်ႉ ယိုတ်းဢမ်းၼၢၸ်ႈ (ဢႃႇၼႃႇ) ဝၢၼ်ႈမိူင်းပႅတ်ႈလႄႈ ၼေႃႇၽူႈတႅၼ်းၶဝ် ၸိူဝ်းပေႉၵၢၼ်လိူၵ်ႈတင်ႈ ဢမ်ႇလႆႈၽႅဝ်ထိုင် ၼႂ်းသၽႃးၵူၺ်းပႆႇပေႃး ၊ လူင်ပွင်ၸိုင်ႈသိုၵ်း သမ်ႉတဵၵ်းၸႂ်ႉႁႂ်ႈၵူၼ်းၸိူဝ်း ယူႇၼႂ်းပႃႊတီႊၵၢၼ်မိူင်းၶဝ် ထွၼ်တူဝ်ဢွၵ်ႇပႃႊတီႊလႄႈ လုင်းၸၢႆးၾႃႈၵေႃႈ လႆႈထွၼ်တူဝ်ဢွၵ်ႇၸဵမ်မိူဝ်ႈၼၼ်ႉ ။ ဝၢႆးမႃး တႄႇႁဵတ်းၵၢၼ်လိၵ်ႈလၢႆးပၢႆပေႇတႆးမႃး ဢမ်ႇလိုဝ်ႈဢမ်ႇယင်ႉ ၊ ၵႂႃႇႁႃပူင်သွၼ် လိၵ်ႈလၢႆးတႆး တီႈတႆးယူႇ ၼႂ်းၸိုင်ႈမိူင်းႁူမ်ႈတုမ်ပတ်းပိုၼ်ႉၼႆႉ ၶႂ်ႈႁွတ်ႈၵူႈတီႈၵူႈလႅၼ် ၊ ႁဵတ်းၵၢၼ်လိၵ်ႈလၢႆးမႃး ၼင်ႇႁိုဝ်ပေႃးတေႁိူဝ်ႈႁိူင်းပိူင်းသႂ်မႃး တေႃႇထိုင်ယၢမ်းလဵဝ် ။


ၶဝ်ႈတူၺ်း ဝီႊၻီႊဢူဝ်း လုင်းၸၢႆးၾႃႈ ၵၢဝ်ႇလၢတ်ႈၵႂၢမ်းတီႈဝဵင်းပၢင်လူင် လႆႈတီႈၼႆႈ - (လိင်ႉ) ။

https://www.facebook.com/snldparty/videos/vl.719420138188118/874668605935342/?type=1&theater