မိူင်းမၢၼ်ႈ ႁၢင်ႈႁႅၼ်း တႃႇတေ ပိုတ်ႇလၢၼ်ႇ ထႅင်ႈ 3 တီႈ ၼင်ႇႁိုဝ် လွင်ႈၵႃႉၶၢႆ လႅၼ်လိၼ် မိူင်းမၢၼ်ႈ - မိူင်းထႆး တေတိူဝ်းမႃး လႄႈ ႁႂ်ႈၵူၼ်းဝၢၼ်ႈ ၵူၼ်းမိူင်း ၸွမ်းလႅၼ်လိၼ် ၵႂႃႇမႃးငၢႆႈ လူမ်ဝႃႈၼႆ ။

လၢၼ်ႇ 3 တီႈ ဢၼ်ႁၢင်ႈႁႅၼ်းဝႆႉ ၼၼ်ႉပဵၼ် - ပိုၼ်ႉတီႈ ၵႃႉၶၢႆ လႅၼ်လိၼ်ပွတ်း တၼိၼ်း တယီႇ 2 တီႈ လႄႈထႅင်ႈတီႈ သမ်ႉပဵၼ် ၼႂ်းမိူင်းၵယႃး ဢၼ်ယူႇ ၼႂ်းမိူင်းမၢၼ်ႈ ပွတ်းဢွၵ်ႇ ။


သိုဝ်ႇၶၢဝ်ႇထႆး ႁၢႆးငၢၼ်းဝႃႈ - မိူဝ်ႈလဵဝ် တင်းသွင် မိူင်းတိုၵ်ႉ ဢုပ်ႇၵုမ်ၵၼ် ၼင်ႇႁိုဝ် တေပိုတ်ႇ လၢၼ်ႇတင်း 3 တီႈ ႁႂ်ႈပဵၼ် တၢင်းၵၢၼ် ၊ သင်ဝႃႈလၢၼ်ႇ 3 ဢၼ်ၼႆႉ ပိုတ်ႇမႃး ထႅင်ႈၼႆၸိုင် တေႁဵတ်းႁႂ်ႈ မိူင်းမၢၼ်ႈ -မိူင်းထႆး မီးလၢၼ်ႇၵႃႉ ၶၢႆလႅၼ်လိၼ် တင်းသဵင်ႈ 15 တီႈၼႆယဝ်ႉ ။


လိူဝ်ၼၼ်ႉ တင်းသွင်ၾၢႆႇ ၵေႃႈၶတ်းၸႂ် တႃႇတေပိုတ်ႇ လၢၼ်ႇလႅၼ် လိၼ်ထႆး - တႆးတီႈ ၵိဝ်ႇၽႃဝွၵ်ႈ (ၼွင်ဢုၵ်း) - BP1 လႄႈလၢၼ်ႇ လၵ်းတႅင်ႇ - ပၢင်ၵမ်ႉၵေႃႇ ဢၼ်ယူႇၼႂ်း ဝၢၼ်ႈလၵ်းတႅင်ႇ (ၾင်ႇမိူင်းထႆး)တေႃႇၼႃႈ မိူင်းတႆး ဝၢၼ်ႈပၢင်ၵမ်ႉ ၵေႃႇဢိူင်ႇ မႂ်ႇသုင် ၵိင်ႇၸႄႈဝဵင်း မိူင်းထႃး ၸႄႈ ဝဵင်းမိူင်း တူၼ်ၸႄႈတွၼ်ႈ မိူင်းသၢတ်ႇ ၸိုင်ႈတႆး ပွတ်းဢွၵ်ႇ ။