ပွႆးလူင်း ပၢင်သွၼ် ၾိင်ႈငႄႈ ပုတ်ႉထ ၶၢဝ်းမႆႈ ၸတ်းႁဵတ်းတီႈ ဝတ်ႉမိၼ်းလႃႉ ၸႄႈတွၼ်ႈ ဝၢၼ်ႈမေႃႈ မိူင်းၶၢင် ၵူၼ်းၶဝ်ႈႁူမ်ႈ ၼမ် ။

ပူၼ်ႉမႃး မိူဝ်ႈ ဝၼ်းတီႈ 06/09/2015 ၶၢဝ်းယၢမ်း 12:00-17:00 မူင်း ၸုမ်း သင်ၶၸဝ်ႈ ဢွၼ်ႁူဝ် ၸတ်းႁဵတ်း ပွႆးယုၵ်ႉယွင်ႈ ပုတ်ႉထ သႃသၼႃ တီႈ ဝတ်ႉမိၼ်းလ ၸႄႈတွၼ်ႈ ဝၢၼ်ႈမေႃႈ မိူင်းၶၢင် ၼင်ႇႁိုဝ် ၾိင်ႈငႄႈ လိၵ်ႈလၢႆး ၸိူဝ်ႉၶိူဝ်း ၽႃသႃ ပေႃးတေ ဢမ်ႇဝွတ်ႈ ဝၢႆးႁၢႆလႄႈ ႁႂ်ႈၸိူဝ်း ပဵၼ်လုၵ်ႈလၢၼ် လႆႈႁူႉသေ သိုပ်ႇႁဵတ်းသၢင်ႈၵႂႃႇ ။


ပွႆးလူင်း ပၢင်သွၼ်ၼႆႉ မီးၽူႈယႂ်ႇ ၵူၼ်းလူင်လႄႈ သင်ၶၸဝ်ႈ မႃးပိုတ်ႇ ပၢင်ၵၢဝ်ႇလၢတ်ႈ ၶေႃႇၵႂၢမ်း တိုၵ်းသူၼ်ပၼ် ပၼ်ႁႅင်း ၵူၼ်းမႃး ၶဝ်ႈႁူမ်ႈ ။


ၽူႈၵွၼ်း ဝတ်ႉၸေႇယသုၶ ဝၢၼ်ႈမေႃႈ လၢတ်ႈဝႃႈ တႆးတႂ်ႈ ၊ တႆးၼိူဝ် ၊ တႆးမၢဝ်း ၊ တႆးလႅင် ၊ တႆးလမ် ဢမ်ႇၵိုင်ႇလီ ႁွင်ႉၵၼ်ယဝ်ႉ ၊ ႁဝ်းၵိုင်ႇလီ ဢွၼ်ၵၼ်ႁွင်ႉ တႆး ၶေႃႈလဵဝ်ၵူၺ်း ဝႃႈၼႆ ။


ၽူႈၵွၼ်း ဝတ်ႉမိၼ်းလ ၵၢဝ်ႇလၢတ်ႈၼႄ လွင်ႈၶေႃႈ ယိူင်းဢၢၼ်း  မူႉၸုမ်း သင်ၶၸဝ်ႈ ယုၵ်ႉယွင်ႈပုတ်ႉထ သႃသၼႃလႄႈ ၸၢဝ်းၶိူဝ်းတႆး ၸႄႈတွၼ်ႈ ဝၢၼ်ႈမေႃႈ ။ သိုပ်ႇလၢတ်ႈ ထႅင်ႈဝႃႈ ၸွႆႈၵၼ် ၵိၼ်ၸင်ႇဝၢၼ် ၊ ၸွႆႈၵၼ်ႁၢမ် ၸင်ႇမဝ် ၊ ၸွႆႈၵၼ် ဢဝ်ၸင်ႇလႆႈ ၶူးလႄႈ တၵႃႇ တိုၼ်းတေလႆႈ ဢွမ်ႇလွမ်ႈၽွမ်ႉသဵင် ပဵင်းပၢၵ်ႇၵၼ် ဝႃႈၼႆ ။


ၽူႈၵွၼ်းဝတ်ႉ မွင်ၵုင်း ပိုတ်ႇလၢတ်ႈဝႃႈ ႁဝ်းၶိူဝ်းတႆး ယႃႇႁႂ်ႈတၢႆ ၊ ႁၵ်ႉမိူင်းတႆး ယႃႇႁႂ်ႈႁၢႆ ၊  ယႃႇႁၵ်ႉ လၢႆလၢႆ ၊ ႁၵ်ႉတီႈသူပ်း လၢတ်ႈတီႈ သူပ်းၵူၺ်း ဢမ်ႇၵိူတ်ႇၶိုၼ်ႈမႃးလႆႈ တိုၵ်းသူၼ်း လၢတ်ႈၵႂႃႇ ၼင်ႇၼႆ ။


ပွႆးလူင်း ပၢင်သွၼ် ၾိင်ႈငႄႈပုတ်ႉထ ၼႆႉ လႆႈၸတ်းႁဵတ်း ပဵၼ်ပွၵ်ႈၵမ်း တီႈၼိုင်ႈ လႄႈမူႇၸုမ်း သင်ၶၸဝ်ႈ ဢွၼ်ၸတ်းႁဵတ်း ပိူဝ်ႈပဵၼ် ၵၢၼ်ယုၵ်ႉယွင်ႈ ပုတ်ႉထသႃသၼႃ ပုၼ်ႈတႃႇ ၸၢဝ်းၶိူဝ်းတႆး ၼႂ်းၸႄႈတွၼ်ႈ ဝၢၼ်ႈမေႃႈ ၊ မီးၽူႈၶဝ်ႈ ႁူမ်ႈတင်းမူတ်း ႁူမ်ႈတင်း သင်ၶၸဝ်ႈ 50 ပၢႆ လႄႈၵူၼ်းမိူင်း 400 ပၢႆ ၼႆယဝ်ႉ ။


ပၢင်သွၼ် ၾိင်ႈငႄႈ ပုတ်ႉထၼႆႉ လုၵ်ႈႁဵၼ်း ဢၼ်မႃးၶဝ်ႈ တႅမ်ႈတွပ်ႇလိၵ်ႈ မီး 116 ၵေႃႉ ၊ တွပ်ႇၶၢမ်ႈ ပူၼ်ႉၸၼ်ႉ 47 ၵေႃႉ ၊ ဢမ်ႇပူၼ်ႉၸၼ်ႉ 51 ၵေႃႉ ၊ လုၵ်ႈႁဵၼ်း ၸိူဝ်းလႆႈ ရၢင်းဝလ်း (သူး) တီႈ 1-3 မီး 18 ၵေႃႉ ။ ၶူးသွၼ်ၸၢႆး 3 ၵေႃႉ ၊ ၶူးသွၼ်ယိင်း 60 ၵေႃႉ ၶူးသွၼ် တင်းမူတ်း ႁူမ်ႈၵၼ် 63 ၵေႃႉ ။


ပၢင်သွၼ် ၾိင်ႈငႄႈ ပုတ်ႉထၵမ်းၼႆႉ လႆႈတႄႇပိုတ်ႇ သွၼ်မႃး မိူဝ်ႈလိူၼ် 4 - 7 ၶၢဝ်းတၢင်း 3 ၊ ထိုင်မႃးလိူၼ် 9 ၼႆႉ ၸင်ႇလႆႈ ၸတ်းႁဵတ်း ပွႆးလူင်းပၢင်သွၼ် ၼႆယဝ်ႉ ။