ပီႈၼွင်ႉ ႁႅင်းၵၢၼ် 2 ၵေႃႉ ၶပ်းရူတ်ႉၶိူင်းဝႆး ၽႃႇတမ် ၵူၼ်ႈရူတ်ႉလူင် 18 လေႃႉ ၼိူဝ်သဵၼ်ႈ တၢင်းၵဵင်းမႆႇ - လမ်းပုၼ်း ၸိုင်ႈထႆး ယွၼ်ႉမဝ်းလဝ်ႈ ။

ပူၼ်ႉမႃး မိူဝ်ႈဝၼ်းတီႈ 03/09/2015 ၶၢဝ်းယၢမ်း 01:30 မူင်း ၵၢင်ၶိုၼ်း ပီႈၼွင်ႉ ႁႅင်းၵၢၼ် ပဵၼ်တႆး 2 ၵေႃႉ ၸၢႆးဢဵၵ်ႇ တင်း ၸၢႆးဢွင်ႇလူႇ (ၸၢႆးဢိၼ်းထွၼ်း) ယွၼ်ႉမဝ်းလဝ်ႈသေ ၶပ်းရူတ်ႉဝႆး ၽႃႇတမ်ၺႃး ၵူၼ်ႈရူတ်ႉလူင် 18 လေႃႉ တီႈၼိူဝ် သဵၼ်ႈတၢင်း ၵဵင်းမႆႇ - လမ်းပုၼ်း ၸိုင်ႈထႆး တၢႆထင်တီႈ တင်း 2 ၵေႃႉ ။


ၼၢင်းလႅင် ၵေႃႉပဵၼ် ပီႈၼၢင်း ၸၢႆးဢွင်ႇလူႇ လၢတ်ႈဝႃႈ ၼွင်ႉၸၢႆးၶႃႈ လႄႈ တင်းဢူၺ်းၵေႃႉမၼ်း ၸၢႆးဢဵၵ်ႇၼႆႉ ၶဝ်သွင်ၵေႃႉ မႃးဢႅဝ်ႇယႅမ်ႉ ဢူၺ်းၵေႃႉၶဝ် တီႈၵဵင်းမႆႇ ၶႃသွင်ၵေႃႉ ႁဵတ်းၵၢၼ်ယူႇ လမ်းပုၼ်း ။ မိူဝ်ႈၶၢဝ်းပွၵ်ႈမိူဝ်းၼၼ်ႉ ၶဝ်ၵေႃႈ တေမဝ်းလဝ်ႈ ၽွင်ႈ သဵၼ်ႈတၢင်း ဢၼ်ၶဝ် ပွၵ်ႈၵႂႃႇၼၼ်ႉၵေႃႈ မၢင်တီႈ ၾႆးၸွမ်းတၢင်း ဢမ်ႇမီး ၊ တီႈၶဝ် ပဵၼ်သမ်ႉ ပဵၼ်တီႈ ၾႆးဢမ်ႇမီး လပ်းသိပ်ႇဝႆႉ ။ ထႅင်ႈပိူင်ၼိုင်ႈၵေႃႈ သမ်ႉယူႇၵႆ ၶဝ်ၸွင်ႇလႆႈ ၶပ်းရူတ်ႉဝႆး လႄႈၵႂႃႇၽႃႇ တမ်ၺႃး ၵူၼ်ႈရူတ်ႉလူင်  ဝႃႈၼႆ ။


ၸဝ်ႈၼႃႈတီႈ ပလိၵ်ႈၶဝ် လၢတ်ႈတီႈ ၶႃႈတႄႉ ၼွင်ႉၸၢႆး ၶႃႈၶဝ်ၼႆႉ ယူႇၾၢႆႇၽိတ်း ယွၼ်ႉဝႃႈ မဝ်းလဝ်း သမ်ႉ ႁေႃႈႁူတ်ႉဝႆး ၊ မိူဝ်ႈၽွင်းရူတ်ႉလူင် 18 လေႃႉ တေၵူတ်ႉၶဝ်ႈ ၼႂ်းႁူင်းငၢၼ်း ၶဝ်ၵေႃႈ  ၸဝ်ႈရူတ်ႉလူင် 18 လေႃႉ  ပိုတ်ႇၾႆး လဵဝ်ႉယူႇ ၶဝ်သွင်ၵေႃႉ ႁေႃႈမႃးတင်းလင် ဝႆးလႄႈ ၽႃႇတမ်သႂ်ႇ ၵူၼ်ႈရူတ်ႉလူင် ၵမ်းလဵဝ် တေလႆႈဝႃႈ ၶဝ်သွင်ၵေႃႉၼႆႉ ႁေႃႈရူတ်ႉၶိူင်ႈဝႆး ၸဝ်ႈၼႃႈတီႈ ပလိၵ်ႈလၢတ်ႈ ၼင်ႇၼႆ ။


သိုပ်ႇလၢတ်ႈ ထႅင်ႈဝႃႈ ၸဝ်ႈရူတ်ႉလူင် 18 လေႃႉ မႃးၸွႆႈ ငိုၼ်းပၼ်တီႈ ပၢင်ၸႃပၼ ၼွင်ႉၸၢႆးၶႃႈ 5000 ဝၢတ်ႇ ၵူၺ်းၶႃႈ ၊ တေႃႈလဵဝ် ၸဝ်ႈၼႃႈတီႈ ပလိၵ်ႈၶဝ် ဢဝ်ရူတ်ႉၶိူင်ႈ ဢၼ်ၶဝ် ၶီႇမႃးၽႃႇ တမ်ၼၼ်ႉ ၵႂႃႇဝႆႉႁူင်းပလိၵ်ႈ ၸူဝ်ႈၶၢဝ်း ဝႃႈၼႆ ။


လုၵ်ႈဢွၼ်ႇ ၸၢႆးသွင်ၵေႃႉၼႆႉ ၵေႃႉႁေႃႈရူတ်ႉၶိူင်ႈ ပဵၼ်ၸၢႆးဢဵၵ်ႇ ဢႃယု 24 ပီ ပဵၼ်ၵူၼ်း ပၢင်သၢင်း ၸိုင်ႈတႆး ပွတ်းဢွၵ်ႇၶူင်း ၊ ၵေႃႉသွၼ်ႉလင်းသမ်ႉ ၸၢႆးဢွင်ႇလူႇ ဢႃယု 20 ပီ ပဵၼ်ၵူၼ်း ႁူဝ်မိူင်း ၸိုင်ႈတႆး ပွတ်းၸၢၼ်း ႁဵတ်းၵၢၼ်တီႈ လမ်းပုၼ်း ၸႄႈတွၼ်ႈ ၵဵင်းမႆႇ ၸိုင်ႈထႆး ။


တေႃႈလဵဝ် တူဝ်တၢႆ ၸၢႆးဢဵၵ်ႇၼႆႉ မီးဝႆႉတီႈ ႁူင်းယႃသူၼ်ၻွၵ်ႇ ၵဵင်းမႆႇ ဢမ်ႇပႆႇမီး ၺႃႇတိ ပီႈၼွင်ႉၸိူဝ်ႉၶိူဝ်း ၵေႃႉလႂ် မႃးဢဝ်ၵႂႃႇ လုမ်းလႃး ၽၢဝ်ၶၢပ်ႈတူဝ် ။ သင်ဝႃႈ ဢမ်ႇမီး ၸိူဝ်ႉၶိူဝ်း ပီႈၼွင်ႉ မႃးဢဝ်ၵႂႃႇၸိုင် ၸဝ်ႈၼႃႈတီႈ ႁူင်းယႃ တေဢဝ်ၵႂႃႇၽၢဝ် တေပၼ် ဢၼုၺၢတ်ႈဝႆႉ တီႈႁူင်းယႃ 3 ဝၼ်း ။ တူဝ်တၢႆ ၸၢႆးဢွင်ႇလူႇတႄႉ ၸိူဝ်ႉၶိူဝ်းပီႈၼွင်ႉ မႃးဢဝ်ၵႂႃႇ လုမ်းလႃး ၶၢပ်ႈတူဝ်ဝႆႉ တီႈဝတ်ႉတူၼ်ႈၽိုင်ႉ မႄႈရိမ်း ၸႄႈတွၼ်ႈ ၵဵင်းမႆႇ ပူၼ်ႉၶၢပ်ႈတူဝ် ၼႂ်းဝၼ်းတီႈ 7/9/2015 ၼႆယဝ်ႉ ။