ဝဵင်းတႃႈၶီႈလဵၵ်း ပိုၼ်ၽၢဝ်ႇ သဵၼ်ႈသၢႆမၢႆ ႁူဝ်ၵူၼ်းမိူင်း လွင်ႈပိူင်ယုၵ်းယၢင်ႇ တႃႇတေတွတ်ႈၶႅပ်းၵၢင်ၸႂ် ၼႂ်း ပီ 2015  ၸွမ်းလုမ်းၵွၼ်းပွၵ်ႉ/ဢိူင်ႇ တႃႇၶၢဝ်းတၢင်း 14 ဝၼ်း။

ဝဵင်းတႃႈၶီႈလဵၵ်း ၸိုင်ႈတႆး  ပွတ်းဢွၵ်ႇ တႄႇပိုၼ်ၽၢဝ်ႇ သဵၼ်ႈသၢႆမၢႆၵူၼ်းမိူင်း တႃႇတေထွၼ် /ထႅမ် ၸိုဝ်ႈၵူၼ်းမိူင်း ဢၼ်မီးသုၼ်ႇတေလႆႈတွတ်ႈၶႅပ်းၵၢင်ၸႂ် လိူၵ်ႈၽူႈတႅၼ်း ၼႂ်းပီ 2015 ၼႆႉတင်ႈတႄႇဝၼ်းတီႈ 22/06/2015-05/07/2015 ၶၢဝ်းတၢင်း 14 ဝၼ်း။  ပိုၼ်ၽၢဝ်ႇဝႆႉ ၸွမ်းလုမ်းၵွၼ်းပွၵ်ႉ/ဢိူင်ႇ ႁႂ်ႈၵူၼ်းမိူင်းၵႂႃႇတူၺ်းဝႃႈ ၸွင်ႇပႃးၸိုဝ်ႈ ဢမ်ႇပႃးၸိုဝ်ႈ သင်ဢမ်ႇပႃးၸိုဝ်ႈၸဝ်ႈၵဝ်ႇၸိုင် ႁႂ်ႈပွင်ႇလၢတ်ႈပၼ်တီႈ ၽူႈၵွၼ်းပွၵ်ႉ/ဢိူင်ႇ ၽႂ်မၼ်း။ ၵူၼ်းၸိူဝ်းတၢႆၵႂႃႇယဝ်ႉ တေလႆႈထွၼ်ၸိုဝ်ႈဢွၵ်ႇ (ဝွတ်ႇပႅတ်ႈၸိုဝ်ႈ) ၼႂ်းသဵၼ်ႈသၢႆမၢႆႁူဝ်ႁိူၼ်း ၸဵမ်ၸိူဝ်းၼႆႉ ။

ၸၢႆးၼုမ်ႇတုၺ်ႈလၢတ်ႈဝႃႈ ၸဝ်ႈၼႃႈတီႈၽူႈမီးပုၼ်ႈၽွၼ်းၶဝ် ၵဵပ်းသၢႆမၢႆႁူဝ်ႁိူၼ်းဝႆႉသဵင်ႈသဵင်ႈ လိူဝ်ၼၼ်ႉၵေႃႈ ဢဝ်သၢႆမၢႆၸိုဝ်ႈၵူၼ်းၼုမ်ႇ ဢႃႇယု  18 ပီၶိုၼ်ႈၼိူဝ် ဢၼ်ၵဵပ်းဝႆႉၼၼ်ႉ မႃးတႅမ်ႈသႂ်ႇပႃး၊ ပေႃးတႅမ်ႈယဝ်ႉ ဢဝ်မႃႈၼႄၵူၼ်းမိူင်း တီႈလုမ်းၵွၼ်းပွၵ်ႉ/ဢိူင်ႇၽႂ်းမၼ်း သဵင်ႈသဵင်ႈ၊ ဝၢႆးၼၼ်ႉယဝ်ႉႁႂ်ႈၵူၼ်းမိူင်းမႃးတူၺ်း ဝႃႈ ၸိုဝ်ႈၽႂ်ပႃးဢမ်ႇပႃး၊ ပေႃးဢမ်ႇပႃးၸိုဝ်ႈၸဝ်ႈၵဝ်ႇၼႆၵေႃႈ တေလႆႈၵႂႃႇသႂ်ႇၸိုဝ်ႈသဵၼ်ႈမၢႆ ၽူႈတီႈမီးပုၼ်ႈၽွၼ်းၶဝ်၊ မၢင်ဢၼ်ၵေႃႈတေပႃးၸိုဝ်ႈၵူၼ်းတၢႆဝႆႉ၊ ပေႃးပႃးၼႆၸိုင် တေလႆႈထွၼ်ဢွၵ်ႇ (ဝွတ်ႇပႅတ်ႈ)။

ဝၢႆးသေၵူၼ်းမိူင်းလႆႈတူၺ်းသဵၼ်ႈသၢႆမၢႆ ၸိုဝ်ႈၸိူဝ်းထႅမ်ထွၼ်ဢွၵ်ႇၼႂ်းၶၢဝ်းတၢင်း 14 ဝၼ်းယဝ်ႉ ၾၢႆႇမီးပုၼ်ႈၽွၼ်ႈၶဝ်တေမႄးထတ်းတႅမ်ႈၶိုၼ်းသေယဝ်ႉသိုပ်ႇပိုၼ်ၽၢဝ်ႇပဵၼ်တၢင်းၵၢၼ် ၵႂႃႇၼႆယဝ်ႉ။

လိၵ်ႈပိုၼ်ၽၢဝ်ႇသဵၼ်ႈသၢႆမၢႆလၢႆးၸိုဝ်ႈၼႆႉ တေတိတ်းဝႆႉၸွမ်းလုမ်း ပွၵ်ႉ/ဢိူင်ႇ ဝႆႉ ၶၢဝ်းတၢင်း 14 ဝၼ်း တႃႇတေထွၼ်ထႅမ်ၸိုဝ်ႈ တွၼ်ႈတႃႇၵၢၼ်လိူၵ်ႈတင်ႈၼႂ်းပီ 2015 ၼႆယဝ်ႉ။

လူင်ပွင်ၸိုင်ႈမိူင်းၵေႃႈ ဢမ်ႇပႆႇပိုၼ်ၽၢဝ်ႇဝႃႈ တေလိူၵ်ႈတင်ႈဝၼ်းလႂ်၊ လိူၼ်လႂ်တႄႉတႄႉ။ မၢင်ၵေႃႉၵေႃႈလၢတ်ႈဝႃႈ တေလိူၵ်ႈတင်ႈၼႂ်းႁၢင်လိူၼ်ဢွၵ်ႊထိူဝ်ႊၿိူဝ်ႊ ဢမ်ႇၼၼ်ႁူဝ်လိူၼ်ၼူဝ်ႊဝႅမ်ႊၿိူဝ်ႊ၊ လွင်ႈၼႆႉ ယင်းပႆႇယိုၼ်ႈယၼ်ၼႆယဝ်ႉ။

ဝဵင်းတႃႈၶီႈလဵၵ်ႈၼႆႉ မီး 10 ပွၵ်ႉ၊ 6 ဢိူင်ႇ။ ၼႂ်းၶၢဝ်ႇတႃႇၶီႈလဵၵ်း ဢွၵ်ႇဝႆႉဝႃႈ လိၵ်ႈၽိုၼ်ၽၢဝ်ႇသဵၼ်ႈသၢႆမၢႆၵူၼ်းမိူင်းတႃႇတေတွတ်းၶႅပ်းၵၢင်ၸႂ် ၼႆႉ လႆႈပိုၼ်ၽၢဝ်ႇၵႂႃႇ မိူၼ် မိူင်းတႆးပွတ်းဢွၵ်ႇ/ႁွင်ႇ၊ မိူင်းၶၢင်၊ မိူင်းရၶၢႆႇ၊ တိူင်းဢေႊရႃဝၻီႇ၊ တိူင်းဝဵင်းလိူဝ်ႇ၊ တိူင်းပႃႇၵိူဝ်(ပၵူဝ်း)၊ တိူင်းၸႄႈၵဵင်ႇ(သၵၢႆး)၊ တိူင်းတၼၢဝ်းသီ၊ တိူင်းတႃႈၵုင်ႈ ဢၼ်ၵိုတ်းဝႆႉၸွမ်းၸႄႈတွၼ်ႈလႄႈတိူင်း ၸွမ်းၼၼ်ႉၵေႃႈတေသိုပ်ႇပိုၼ်ၽၢဝ်ႇၵႂႃႇထႅင်ႈ လႆႈႁူႉၼင်ႇၼႆ။