သင်ၶ လႄႈၵူၼ်းမိူင်းၸတ်းႁဵတ်းပၢင်ပွႆး ၶွတ်ႇယွတ်ႈ ယၢတ်ႇၼမ်ႉ ပၢင်ၽိုၵ်းၽွၼ်ႉ ၼႃႈၵၢၼ်ပုတ်ႉထသႃသၼႃ ပွၵ်ႈၵမ်း 6  လႄႈပွႆးႁူမ်ၸူမ်း ဢဝ်ၵုၼ်းမုၼ် ၸဝ်ႈတိုၼ်းတႆး ႁူဝ်ပဝ်ႈလုမ်းပုတ်ႉထသႃသၼႃ မိူင်းမၢဝ်း။

မိူဝ်ႈဝၼ်းတီႈ 21/06/2015 (ပီတႆး 2109 ၼီႈ၊ လိူၼ်ပႅတ်ႇမႂ်ႇ 5 ၶမ်ႈ) လုမ်းပုတ်ႉထသႃသၼႃ မိူင်းမၢဝ်း ၸတ်းႁဵတ်းပၢင်ပွႆးၶွတ်ႇယွတ်ႈ ပၢင်ၽိုၵ်းၽွၼ်ႉ ၼႃႈၵၢၼ်ပုတ်ႉထသႃသၼႃ ပွၵ်ႈၵမ်း 6  လႄႈပွႆးႁူမ်ၸူမ်းဢဝ်ၵုၼ်းမုၼ် ၸဝ်ႈတိုၼ်းတႆး (သင်ၶၸဝ်ႈ တူၼ်ဢၼ်လႆႈႁပ်ႉလိူၵ်ႈတင်ႈပဵၼ် ၵႅမ်ႁူဝ်ပဝ်ႈ ငဝ်ႈငုၼ်းလူင် လုမ်းပုတ်ႉထသႃသၼႃ ၸိုင်ႈမိူင်းၶႄႇ) တီႈဝတ်ႉၸေႈၵဝ်ႇ မိူင်းမၢဝ်း။


ပၢင်ပွႆးၼႆႉ မီးၾၢႆႇသင်ၶၸဝ်ႈ လၢႆတီႈလၢႆတၢင်း လၢႆဝၢၼ်ႈလၢႆမိူင်း ၶိုတ်ႈႁွတ်ႈၶဝ်ႈႁူမ်ႈ။ ၾၢႆႇသင်ၶၸဝ်ႈၼၼ်ႉ မီးၸဝ်ႈၶူးလူင် ၸဝ်ႈသြႃႇၶူဝ်ၶေး၊ ၽူႈတၢင်တူဝ်ၸုမ်းသင်ၶတႆး မိူင်းထႆး၊ ၸုမ်းတၢင်တူဝ် ၶေႃးရဵၵ်ႉသႃရိပုတ်ႉတ မူႇၸေႈ၊ ၽူႈတၢင်တူဝ် သင်ၶၼႃယၵ တူင်ႇဝဵင်းၼမ်ႉၶမ်း၊ ၸဝ်ႈသင်ၶတႆး ၼႂ်းမိူင်းတႂ်ႈၶူင်း၊ မိူင်းတိင် ၵိုင်မ၊ ထုင်ႉမၢဝ်းလႄႈ ၸဝ်ႈသင်ၶၼႂ်းမိူင်းတႆး လၢႆပွတ်းတွၼ်ႈ လၢႆၸႄႈဝဵင်း မိူၼ်ၼင်ႇမိူင်းပၼ်ႇ၊ ၵဵင်းတုင်၊ ပၢင်လူင်၊ မိူင်းသူႈ၊ တႃႈၵုင်ႈ၊ ၵျွၵ်ႉမႄး၊ သီႇပေႃႉ၊ တၢင်ႉယၢၼ်း၊ မိူင်းယႆ၊ ၼမ်ႉလၼ်ႈ၊ ၼမ်ႉပွင်ႈ၊ လႃႈသဵဝ်ႈ၊ သႅၼ်ဝီ ၸိူဝ်းၼႆႉ။ ၼွၵ်ႈသေၼၼ်ႉ ႁူမ်ႈပႃးတၵ်ႉၵႃႇသတ်ႉထႃးတင်းၼမ်တင်းလၢႆ ၶဝ်ႈႁူမ်ႈလူႇတၢၼ်း ယၢတ်ႇၼမ်ႉလႄႈ ႁူမ်ႈယွင်ႈၵုၼ်းမုၼ် ၸဝ်ႈတိုၼ်းတႆး- ၼႆယဝ်ႉ။


လွင်ႈတၢင်းဢၼ်လႆႈယွင်ႈၵုၼ်းယေႃးမုၼ် ၸဝ်ႈတိုၼ်းတႆးၼႆႉ ၵွပ်ႈဝႃႈ တူၼ်ၸဝ်ႈလႆႈႁပ်ႉတၼ်းႁဵင်း ပဵၼ်ၵႅမ်ႁူဝ်ပဝ်ႈ ငဝ်ႈငုၼ်းလူင် လုမ်းပုတ်ႉထသႃသၼႃ ၸိုင်ႈမိူင်းၶႄႇသေယဝ်ႉ လုမ်းပုတ်ႉထသႃသၼႃ မိူင်းမၢဝ်း ၸင်ႇလႆႈႁဵတ်းပဵၼ်ပၢင် ယုၵ်ႉယွင်ႈမၢႆတွင်း။ မူႇၸုမ်းသင်ၶၸဝ်ႈတႆး ၼႂ်းမိူင်းထႆး၊ ၸုမ်းၶေႃးရဵၵ်ႉသႃရိပုတ်ႉတ မူႇၸေႈ၊ ၸုမ်းသင်ၶၼႃယၵလႄႈ တူင်ႇဝဵင်းၼမ်ႉၶမ်းၵေႃႈ လႆႈဢဝ်ၽိုၼ်ဝႂ်ယွင်ႈယေႃး ႁူမ်ၸူမ်းၸွမ်း ယိုၼ်ႈတွၼ်ႈမၢႆၵိုမ်းမႃး- ၼႆယဝ်ႉ။


ၼႂ်းပၢင်ၵႅဝ်ႈၼႆႉ ၸဝ်ႈၶူးတေဝိၼ်တႃၽိပႃလ တၢင်တူဝ်သင်ၶတႆး မိူင်းထႆး၊ ၸဝ်ႈၶူး Dr ဝိၼယႃၸႃရ တၢင်တူဝ်သင်ၶတူင်ႇၼမ်ႉၶမ်း၊ ၸဝ်ႈသြႃႇဝိသုတ်ႉထ တၢင်တူဝ်ၶေႃးရဵၵ်ႉသႃရိပုတ်ႉတသေ မွၵ်ႇလၢတ်ႈ ၶေႃႈၵႂၢမ်းၶိုၵ်ႉတွၼ်း လွၼ်ႉမွၼ်း လီႁူမ်ၸူမ်းၵႂႃႇၽႂ်မၼ်း- ၼႆယဝ်ႉ။


ပၢင်ၽိုၵ်းၽွၼ်ႉပီၼႆႉ လုၵ်ႈႁဵၼ်းသင်ၶမီး 118 လႄႈ ၵူၼ်းႁိူၼ်းၵမ်ႈၽွင်ႈ၊ မီးၽူႈၶဝ်ႈႁူမ်ႈၼမ်တိူဝ်း လိူဝ်ၵူႈပီ။ ပိူင်လၢႆးသွၼ်မၼ်းၵေႃႈ လႆႈဝႃႈၶိုၵ်ႉတွၼ်းလီ။ ၶူးပူင်သွၼ်လႄႈ ၽႃသႃပူင်သွၼ်- 1.ၸဝ်ႈၶူးသုၶမ်း (မႁႃၵမ်မထႃၼႃၸႃရိယ) ပူင်သွၼ် “လၢႆးတႅမ်ႈလၢႆးႁေႃးလႄႈလွင်ႈ Wiki” ။ 2.ၸဝ်ႈၶူးၼၼ်တဝမ်သ (M.A Sri Lanka) “လၢႆးပူင်သွၼ် ၼႂ်းပၢႆးပၺ်ၺႃတၢင်းလိူၵ်ႈ” ။ 3.ၸဝ်ႈတိုၼ်းတႆး (သတ်ႉထမ်မၸေႃးတိၵထၸ) “လွၵ်းလၢႆးပူၵ်းပွင်ၵၢၼ်သႃသၼႃ” ။ 4.ၸဝ်ႈၶူးတေဝိၼ်တႃၽိပႃလ (M.A, Ph.D Candidate) ပူင်သွၼ် “လၢႆးပႃလိ၊ ပုတ်ႉထသႃသၼႃလႄႈ တူင်ႇဝူင်းၵူၼ်း” ။ 5.ၸဝ်ႈသြႃႇၺႃႇၼေႃးၽႃသ (မႁႃသတ်ႉထမ်မ ၸေႃးတိၵထၸ) ပူင်သွၼ် “ပုၼ်ႈၽွၼ်းၸဝ်ႈၼင်ႈၵျွင်း/ ၸဝ်ႈၵွၼ်းဝတ်ႉ” ။ 6.ၸဝ်ႈၶူးၼၼ်တိယ (ထမ်မၸႃရိယ)၊ ၽူႈၼႄတြႃး) ပူင်သွၼ် “ပတိတ်ႉၸ သမုပ်ႉပၢတ်ႈလႄႈ လၢႆးၵမ်ႇမထၢၼ်း”။ 7.ၶူးၸၢႆးမူၼ်း ပူင်သွၼ် “ပိုၼ်ႉႁူႉပၢႆးယူႇလီ”။ 8.ၶူးၸၢႆးမွၼ်း ပူင်သွၼ် “လွင်ႈၶွမ်ႊၽိဝ်ႊတိူဝ်ႊတင်းလူင်” ။ ပၢင်ထမ်းတြႃး သိပ်းၶမ်ႈၵေႃႈ မီးၽူႈထွမ်ႇထမ်းၼမ်ၵိုၼ်း ၵူၼ်းၼမ်ပေႃးလူၼ်ႉဝတ်ႉလူၼ်ႉသႃလႃးၵူႈၶမ်ႈ- ၼႆယဝ်ႉ။

ပၢင်ၽိုၵ်းၽွၼ်ႉၵမ်းၼႆႉ လႆႈႁၼ်ဝႃႈႁဝ်းတိူဝ်းၶဝ်ႈၸႂ် ၾၢႆႇၽႃႇသႃႇၸၢဝ်းၶိူဝ်းႁဝ်းမႃး လိူဝ်သေမိူဝ်ႈ ဝၼ်းဢွၼ်ယူႇယဝ်ႉ။ ပၢင်ၽိုၵ်းၽွၼ်ႉၼႆႉ တေသိုပ်ႇႁဵတ်းသၢင်ႈၵႂႃႇၵူႈပီပီ- ၸဝ်ႈတိုၼ်းတႆး လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။