ပႃႊတီႊႁူဝ်သိူဝ် လူင်းသူၼ်းတုမ် ၵူၼ်းမိူင်းတီႈ ဝၢၼ်ႈၵွင်းၵဝ်ႇ ဢိူင်ႇမိူင်းလဵၼ်း ၵိင်ႇၸႄႈဝဵင်းတႃႇလိူဝ်ႇ ၸိုင်ႈတႆးပွတ်းဢွၵ်ႇသေ ၸီႉၸႅင်ႈသပ်းလႅင်းၼႄ တၢင်းယိူင်းဢၢၼ်းပႃႊတီႊႁူဝ်သိူဝ်။

ပူၼ်ႉမႃးမိူဝ်ႈဝၼ်းတီႈ 24/06/2015 ႁူဝ်ပဝ်ႈပႃႊတီႊႁူဝ်သိူဝ် ဝဵင်းတႃႈၶီႈလဵၵ်း လႆႈဢွၼ်ႁူဝ်ၼမ်းၼႃႈ လုၵ်ႈၸုမ်းပႃႊတီႊလူင်းသူၼ်းတုမ်ၵူၼ်းမိူင်း တီႈဝၢၼ်ႈၵွင်းၵဝ်ႇ ဢိူင်ႇမိူင်းလဵၼ်း ၼႂ်းၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈဝဵင်းတႃႈၶီႈလဵၵ်း ၸိုင်းတႆးပွတ်းဢွၵ်ႇၶူင်းသေ ၸီႉၸႅင်ႈသပ်းလႅင်းၼႄ ယိူင်းဢၢၼ်းပႃႊတီႊ၊ မီးလွၵ်းၸုၵ်းၸိူင်ႉႁိုဝ်၊ လၢႆးႁဵတ်းၵၢၼ်သမ်ႉပဵၼ်ၸိူင်ႉႁိုဝ်လႂ်ၸိူဝ်းၼႆႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ ထၢမ်ဝႃႈ တေႃႈလဵဝ် ပႃႊတီႊတႆးမီးၼမ်ၵႃႈၼႆႉ ႁဝ်းၶႃႈၵူၼ်းမိူင်းတေႁဵတ်းႁိုဝ်တွတ်းၶႅပ်းၵၢင်ၸႂ်လိူၵ်ႈၽႂ် ဝႃႈၼႆ။

ၽူႈၼမ်းၼႂ်းၵူႈလွင်ႈလွင်ႈ ဝဵင်းတႃႈၶီႈလဵၵ်း ၸၢႆးၼုမ်ႇတုၺ်ႈ လၢတ်ႈဝႃႈ ၵၢၼ်လိူၵ်ႈၽူႈတႅၼ်းၼၼ်ႉ ထုၵ်ႇလီလႆႈတူၺ်းဝႃႈ ႁဵတ်းတႃႇဝၢၼ်ႈမိူင်း၊ တႃႇၵူၼ်းမိူင်း၊ တႃႇၸိူဝ်ႉၶိူဝ်းတႄႉယူႇႁိုဝ်၊ ပႃႊတီႊၵိူတ်ႇပဵၼ်မီးမႃးပိူဝ်ႈတႃႇသင်။ မိူဝ်ႈပႆႇမီးပႃႊတီႊၼၼ်ႉ  ၵူၼ်းမိူင်းလႆႈၵူဝ်ႁႄသင်ၸိူင်ႉႁိုဝ်၊ မိူဝ်ႈလဵဝ်  ငဝ်းလၢႆးပဵၼ်ႁိုဝ် မိူဝ်ႈမီးငဝ်းလၢႆးၵေႃႈ ႁဝ်းဢမ်ႇထုၵ်ႇလီၵူဝ်၊ လွင်ႈသုၼ်ႇလႆႈသုၼ်ႇပဵၼ်ၼႆႉ ပေႃးႁဝ်းဢမ်ႇႁဵတ်းဢဝ် ဢမ်ႇမေႃဢဝ်ၵေႃႈတေဢမ်ႇၸၢင်ႈလႆႈ။ ၵွပ်ႈၼၼ် ႁဝ်းထုၵ်ႇလီလိူၵ်ႈၽူႈတႅၼ်းႁဝ်း ဢၼ်တေၸွႆႈႁဝ်း ဢၼ်တေပၼ်တၢင်ႁဝ်းလႄႈၵႅတ်ႇၶႄႁဝ်းလႆႈ ဝႃႈၼႆ။


ပႃႊတီႊႁူဝ်သိူဝ် ဝဵင်းတႃႇၶီႈလဵၵ်း လူင်းသူၼ်းတုမ်ပၼ်တၢင်းႁူႉၵူၼ်းမိူင်းၼႂ်းပိုၼ်ႉတီႈဝၢၼ်ႈၵွင်းၵဝ်ႇ ၼႂ်းၵိင်ႇၸႄႈဝဵင်းတႃႇလိူဝ်ႇ တေႃႇထိုင်ဝၢႆးဝၼ်း။

ၽူႈလူင်းသူၼ်းတုမ်ၵမ်းၼႆႉ မီးႁူဝ်ပဝ်ႈပႃႊတီႊႁူဝ်သိူဝ် ဝဵင်းတႃႈၶီႈလဵၵ်း လုင်းၸၢႆးတီ၊ ၵႅမ်ႁူဝ်ပဝ်ႈ လုင်းၸၢႆးၶုၼ်မျၢတ်ႈ၊ ၽူႈၼမ်းၼ်ႂ်းၵူႈလွင်ႈလွင်ႈ ၸၢႆးၼုမ်ႇတုၺ်ႈ ႁူမ်းပႃးလုၵ်ႈၸုမ်းပႃႊတီႊ၊ ၵူၼ်းၼႂ်းပိုၼ်ႉတီႈၶဝ်ႈႁူမ်ႈထွမ်ႇ မွၵ်ႈ 50 ၵေႃႉပၢႆ ။