တႃႇတေႁၢင်ႈႁႅၼ်း သွၼ်လိၵ်ႈတႆး ၼႂ်းႁူင်းႁဵၼ်း လူင်ပွင်ၸိုင်ႈၼၼ်ႉ  ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ ၸတ်းႁဵတ်းပၢင်ၵုမ်ၵၢၼ်ႁၢင်ႈႁႅၼ်း တီႈႁူင်းႁေႃး ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ။

မိူဝ်ႈဝၼ်းတီႈ 23/06/2015 ပူၼ်ႉမႃးၼၼ်ႉ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ လႆႈဢွၼ်ၸတ်းႁဵတ်းပၢင်ၵုမ် တႃႇတေႁၢင်ႈႁႅၼ်းၵၢၼ်သွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈၼႆလႄႈ တၢင်းၵေႃလိၵ်ႈလၢႆးလႄႈၾိင်ႈငႄႈတႆး လႃႈသဵဝ်ႈ ၸင်ႇလႆႈၸတ်းႁဵတ်းပၢင်ၵုမ်ၵၼ်ၵႂႃႇတီႈ ႁူင်းႁေႃးၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ ၼႂ်းပွၵ်ႉ (12) ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

တေႃႈလဵဝ် တႃႇတေလႆႈသွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈၼႆႉ လႆႈတႅပ်းတတ်းဝႆႉယဝ်ႉ၊ ၶူးသွၼ်ၸိူဝ်း ဢၼ်တေလူင်းသွၼ်လိၵ်ႈတႆး ပၼ်ၼႂ်းႁူင်းႁဵၼ်းလူင်ပွင်ၸိုင်ႈ တေလႆႈၶဝ်ႈပၢင်ၾိုၵ်းၾွၼ်ႉၵွၼ်ႇ ၸင်ႇတေလူင်းသွၼ်၊ လွင်ႈငိုၼ်းတႃႇတေၵမ်ႉထႅမ်ၶူးသွၼ် ဢိၵ်ႇတင်းလႆႈၶူၼ်ႉၶိုၼ်းၵၢၼ်ဢုပ်ႇဢူဝ်း လွင်ႈလႆႈႁဵတ်းမႃးမိူဝ်ႈပီပူၼ်ႉ။

ပၢင်ၵုမ်ၼႆႉတႄႇမိူဝ်ႈၶၢဝ်းယၢမ်း 10.00 မူင်းၵၢင်ၼႂ်ထိုင် 14.00 မူင်း တၢင်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ လႆႈဝွၵ်ႇၸိူၼ်းၽူႈမႃးၶဝ်ႈႁူမ်ႈ 25 ဝၢၼ်ႈတင်းမူတ်းမွၵ်ႈ 80 ၵေႃႉပၢႆ ။

ၶူးသွၼ်ယိင်း ယိင်းလၢတ်ႈဝႃႈႁဝ်းၶႃႈသွၼ်လိၵ်ႈတႆးၼႂ်းႁူင်းႁဵၼ်းလူင်ပွင်ၸိုင်ႈၼႆႉ လႆႈသွၼ်ၼွၵ်ႈၶၢဝ်းယၢမ်းႁူင်းႁဵၼ်းၵူၺ်း။ သင်ႁူင်းႁဵၼ်းလူင်ပွင်ၸိုင်ႈ တႄႇ 08.30 မူင်းၶိုင်ႈၼႆၵေႃႈႁဝ်းၶႃႈသမ်ႉတႄႇ မၢင်တီႈၵေႃႈ 06.00 မူင်း၊ မၢင်တီႈၵေႃႈ 06.30 မူင်းတေႃႇထိုင် ၶၢဝ်းယၢမ်းႁူင်းႁဵၼ်းလူင်ပွင်ၸိုင်ႈၶိုၼ်ႈ ဢၼ်ႁဝ်းတေလႆႈသွၼ်လိၵ်ႈတႆးၼႂ်းႁူင်းႁဵၼ်းလူင်ပွင်ၸိုင်ႈၼႆႉ ႁဝ်းၶႃႈလႆႈတၢင်ႇလိၵ်ႈမႃးဝႆႉ ဢိၵ်ႇတင်းလႆႈၶဝ်ႈသွၼ်မႃးမီးသွင်ပီယဝ်ႉ။

ပီၵၢႆၵေႃႈလႆႈသွၼ်ၼႂ်းႁူင်းႁဵၼ်း ပီၼႆႉၵေႃႈၶိုၼ်းသိုပ်ႇသွၼ်ထႅင်ႈၼႂ်းႁူင်းႁဵၼ်းၵူၺ်းၼင်ႇၵဝ်ႇ၊ ဢၼ်ႁဝ်းၶႃႈၶဝ်ႈသွၼ်တႄႉ တေသွၼ်ၸၼ်ႉဢွၼ်ႇ (ၸၼ်ႉမူလ) လူင်းပႃႈတႂ်ႈ ပေႃးၸၼ်ႉသုင်ၼႆၵူဝ်ၶဝ်ဢမ်ႇပႆႇၶိုတ်း။

သိုပ်ႇလၢတ်ႈထႅင်ႈဝႃႈ မိူဝ်ႈပီပူၼ်ႉမႃး ၶူးသွၼ်ႁဝ်းၶႃႈမီးမွၵ်ႈ 30 ၵေႃႉပၢႆ၊ ပီၼႆႉၶူးသွၼ်တေတိူဝ်းမႃးထႅင်းႁိုဝ်တေယွမ်းႁိုဝ်ဢၼ်ဝႃႈၼႆႉ ယင်းပႆႇလၢတ်ႈလႆႈ။

ၶူးသွၼ် တႃႇတေသွၼ်ၼႂ်းႁူင်းႁဵၼ်း လူင်ပွင်ၸိုင်ႈပီၼႆႉ ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းလႃႈသဵဝ်ႈ ၸွႆႈၵမ်ႉထႅမ်ငိုၼ်းလိူၼ်ၶူးသွၼ်မိူဝ်ႈပီပူၼ်ႉမႃး 1 ၵေႃႉ 30,000 ပျႃး။ လိူဝ်ၼၼ်ႉၵေႃႈ ၸွႆႈထႅမ်ပပ်ႉတႅမ်ႈ၊ ၵမ်တႅမ်ႈ၊ ပႅၼ်ႈၶဵၼ်လႄႈၶူဝ်းတွၼ်ႈၾၢၵ်ႇ ဢိတ်းဢွတ်း တႃႇလုၵ်ႈဢွၼ်ႇတႆး ။

တႃႇတေသွၼ်ႁူင်းႁဵၼ်း လူင်ပွင်ၸိုင်ႈပီၼႆႉ  ဢမ်ႇႁူႉတေတႄႇလူင်းသွၼ်လႆႈဝၼ်းလႂ်၊ ၼႂ်းလိူၼ်ၼႃႈၼႆႉ တေၸတ်းႁဵတ်းပၢင်ၾိုၵ်းၾွၼ်ႉပၼ်ၶူးသွၼ်။ ဝၢႆးၼၼ်ႉ ၸင်ႇတေလူင်းသွၼ် လႅပ်ႈတေပဵၼ်ၵၢင််ၵျူႊလၢႆႊ (လိူၼ် 7) ၵႂႃႇၼိုင်ႈဝၼ်း ၼိုင်ႈၸူဝ်ႈမူင်းၼႆယဝ်ႉ။