ပႃႊတီႊႁူဝ်သိူဝ် SNLD ငဝ်ႈငုၼ်းၻီႊမူဝ်ၶရေႊၸီႊ ၸိူဝ်ႉၶိူဝ်းတႆး လႆႈပိုတ်ႇလုမ်း ၼႂ်းမိူင်းယၢင်းလႅင် ပဵၼ်ပွၵ်ႈဢွၼ်တၢင်းသုတ်း  3 တီႈ၊ ႁူဝ်ပဝ်ႈလူင်ၸဝ်ႈၶုၼ်ထုၼ်းဢူး ဢွၼ်ႁူဝ်ၼမ်းၼႃႈ ပိုတ်ႇလုမ်း၊ မီးၽူႈၶဝ်ႈႁူမ်ႈတင်းၼမ် ။

ဝၼ်းတီႈ 24/06/2015 မိူဝ်ႈၼႆႉ ၶၢဝ်းယၢမ်းၵၢင်ၼႂ် 09.00 မူင်း ပႃႊတီႊႁူဝ်သိူဝ် တႄႇပိုတ်ႇလုမ်း ၼႂ်းဝဵင်းလွႆၶေႃ(လွႆၵေႃႇ)၊ လေႃးပီႇတလႄႈလိၼ်ပုင်လူင် ၼႂ်းမိူင်းယၢင်းလႅင် ပဵၼ်ပွၵ်ႈၵမ်းဢွၼ်တၢင်းသုတ်း ႁူမ်ႈၵၼ်ပိုတ်ႇၼႂ်းဝၼ်းလဵဝ် 3 တီႈ၊ ႁူဝ်ပဝ်ႈလူင်ၸဝ်ႈၶုၼ်ထုၼ်းဢူးလႄႈ ၸုမ်းပွင်ၵၢၼ်ငဝ်ႈငုၼ်း မိူၼ်ၼင်ႇၵႅမ်ႈၽူႈၼမ်း ၼႂ်းၸၢႆးလဵၵ်ႉ၊ ႁူဝ်ပဝ်ႈပႃႊတီႊႁူဝ်သိူဝ်တူၼ်ႈတီးလုင်းၶမ်းပိူင်ၾႃႉ၊ ၽူႈသူၼ်းတုမ်လုင်းၸၢႆးဢႅၵ်ႉၵ၊ ၽွင်းတႅၼ်းၵျွၵ်ႉမႄးၸၢႆးတၢၼ်းမွင်ႇ၊ ၽွင်းတႅၼ်းမိူင်းယႆ လုင်းၸၢမ်ႇၽေႇ၊ ၽွင်းတႅၼ်းၼမ်ႉၸၢင် ၸၢႆးတူႇရဵင်ႇဢူးဢိၵ်ႇတင်း ၽူႈမီးပုၼ်ႈၽွၼ်း ၼႂ်းပႃႊတီႊတင်းလၢႆ ၶဝ်ႈႁူမ်ႈပိုတ်ႇပၢင်ဢွၼ်ႁူဝ်ၵႂႃႇပိုတ်ႇ ။
ပူၼ်ႉမႃးမိူဝ်ႈဝၼ်းတီႈ 23/06/2015 ဝၼ်းဢင်းၵၢၼ်း မိူဝ်ႈၶၢဝ်းယၢမ်း 11.00 မူင်း ၵၢင်ဝၼ်း ၵေႃႈ ၸဝ်ႈၶုၼ်ထုၼ်းဢူးဢွၼ်ႁူဝ်ၼမ်းၼႃႈၽူႈပွင်ၵၢၼ်ၼႂ်းၸုမ်းပႃႊတီႊႁူဝ်သိူဝ် ၵႂႃႇပိုတ်ႇလုမ်း တီႈဝဵင်းမိူင်းပၢႆးၸႄႈဝဵင်းၾၢႆၶုၼ်ႇၸိုင်ႈတႆးပွတ်းၸၢၼ်းလႄႈမီးၽူႈၶဝ်ႈႁူမ်ႈ တင်းၵူၼ်းမိူင်းၼႂ်းပိုၼ်ႉတီႈမွၵ်ႈ 500 ၵေႃႉပၢႆ ၼႆယဝ်ႉ။ ႁူဝ်ပဝ်ႈၸဝ်ႈၶုၼ်ထုၼ်းဢူး၊ ၽူႈသူၼ်းတုမ်လုင်းၸၢႆးဢႅၵ်ႉၵလႄႈ ၽွင်းတႅၼ်းဝဵင်းၵျွၵ်ႉမႄးၸၢႆးတၢၼ်းမွင်ႇၸိူဝ်ႉၼႆႉ ၵၢဝ်ႇလၢတ်ႈလၢတ်ႈၶေႃႈၵႂၢမ်း ပိုတ်ႇပၢင်လၢႆးႁဵတ်းလၢႆးသၢင်ႈ ပႃႊတီႊႁူဝ်သိူဝ်။

ႁူဝ်ပဝ်ႈလူင်ၸဝ်ႈၶုၼ်ထုၼ်းဢူးယင်းၵၢဝ်ႇလၢတ်ႈဝႃႈ ပေႃးဝႃႈမုင်ႈမွင်း တႃႇၵၢၼ်သုၼ်ႇတူဝ်သေ ၶႂ်ႈႁဵတ်းၵၢၼ်မၢၵ်ႈမီးတႄႉ ယႃႇပေၶဝ်ႈမႃးၼႂ်းပႃႊတီႊႁူဝ်သိူဝ်လႃးလႃး။ ပႃႊတီႊႁူဝ်သိူဝ်ႁဝ်းၼႆႉ ဢမ်ႇၸႂ်ႈပႃႊတီႊဢၼ်တေဢိင်ၼိူဝ်ၵၢၼ်မိူင်းသေႁဵတ်းၵိၼ်မၢၵ်ႈမီးသုၼ်ႇတူဝ်။ ပေႃးတေၶဝ်ႈၶႄႉပၢင်လိူၵ်ႈတင်ႈၵေႃႈ ၽွင်းတႅၼ်းတီႈၽႂ်မၼ်း ႁႂ်ႈၵူၼ်းမိူင်းပိုၼ်ႉတီႈၽႂ်မၼ်း လိူၵ်ႈတၢင်ႇမႃးႁင်းၵူၺ်း၊ လုၵ်ႉတီႈငဝ်ႈငုၼ်း တေဢမ်ႇၸီႉသင်ႇလိူၵ်ႈပၼ်လႆႈသူၸဝ်ႈ၊  တူဝ်တႅၼ်းသူၸဝ်ႈမီးၼမ်ႉၵတ်ႉလီၵေႃႈ တေပေႉၵၢၼ်လိူၵ်ႈတင်ႈ၊ ပေႃးပေႉပၢင်လိူၵ်ႈတင်ႈၵေႃႈ သူတေလႆႈၽွင်းတႅၼ်းလီ၊ သူၸဝ်ႈလိူၵ်ႈမႃးၵေႃႉၵႅၵ်းၵေႃႈ သူတေလႆႈၽွင်းတႅၼ်းၵေႃႉၵႅၵ်း ၵွပ်ႈၼႆလႄႈ သူၸဝ်ႈထုၵ်ႇမေႃႁႃတူၺ်းလီလီသေ မေႃလိူၵ်ႈၽူႈတႅၼ်းသူၸဝ်ႈ၊ လွင်ႈလီလွင်ႈၸႃႉမၼ်းၵေႃႈ သူတေလႆႈဢဝ်ပုၼ်ႈၽွၼ်း ဝႃႈၼႆ။

ပႃႊတီႊႁူဝ်သိူဝ်လႆႈပိုတ်ႇလုမ်းၼႂ်းမိူင်းယၢင်းလႅင် ပဵၼ်ၵမ်းဢွၼ်တၢင်းသုတ်း 3 တီး၊ တင်းမူတ်းဢၼ်ပႃႊတီႊလႆႈပိုတ်ႇလုမ်းၵႂႃႇႁူမ်ႈပႃးယၢင်းလႅင် 3 တီႈသေမီးမွၵ်ႈ 60 တီႈပၢႆယဝ်ႉ ဝႃႈၼႆ။