ၸၢဝ်းၶႄႇၵူၼ်းမိူင်းၶႄႇ 6 ၵေႃႉ၊ ဢၼ်ၾၢႆႇမၢၼ်ႈ တီႉၺွပ်းလႆႈ ၽွင်းၶဝ်ႈၵႂႃႇတီႉၺွပ်း မႆႉၸုမ်းဝႃႉ တီႈထိူၼ်ႇမႆႉ ႁူၺ်ႈၼမ်ႉသႂ် ပွတ်းမိူင်းၶိတ်ႈၼၼ်ႉ လူင်ပွင်ၸိုင်ႈမၢၼ်ႈ တေတိတ်းတေႃႇမွပ်ႈပၼ် တီႈလူင်ပွင်ၸိုင်ႈမိူင်းၶႄႇ၊ ဢမ်ႇပၼ်ၶိုၼ်း တီႈၸုမ်းဝႃႉ။

မႆႉဢၼ်တႅပ်းယဝ်ႉ ၼႂ်းမိူင်းတႆးတီႈၼိုင်ႈ (ႁၢင်ႈသႂ်ႇၸွမ်းၶၢဝ်ႇ၊ ဢမ်ႇၵဵဝ်ႇၶွင်ႈၶၢဝ်ႇ)

ပူၼ်ႉမႃးမိူဝ်ႈဝၼ်းသဝ် တီႈ 20/06/2015 ၵႅမ်ၽူႈၵွၼ်းသိုၵ်းသုင်သုတ်း ၸွမ်သိုၵ်းလူင်ၸူဝ်းဝိၼ်း မႃးႁူပ်ႉထူပ်းၸုမ်းဝႃႉ (တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA ၼႃႈလိၼ်သိုၵ်း 171) တီႈမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။ လႆႈႁူႉဝႃႈ ၾၢႆႇၸုမ်းဝႃႉ ပဵၼ်တူဝ်ဝိူၺ်ႉသႅဝ်ႇယိၼ် ၵႂႃႇႁူပ်ႉထူပ်းဢုပ်ႇဢူဝ်း။ သွင်ၾၢႆႇလႆႈၸႂ်တူၵ်းလူင်းၵၼ် လၢႆလွင်ႈလၢႆပိူင်။ လွင်ႈဢၼ်ၾၢႆႇလူင်ပွင်ၸိုင်ႈမၢၼ်ႈ တီႉၺွပ်းၵူၼ်းၸၢဝ်းၶႄႇ 6 ၵေႃႉဝႆႉၼၼ်ႉ ၾၢႆႇမၢၼ်ႈ တေဢမ်ႇမွပ်ႈပၼ် တီႈၼႂ်းမိုဝ်းၸုမ်းဝႃႉ၊ တေတိတ်းတေႃႇၸဝ်ႈၼႃႈတီႈ တၢင်းမိူင်းၶႄႇသေ မွပ်ႈပၼ်ၼႂ်းမိုဝ်း လူင်ပွင်ၸိုင်ႈၶႄႇ။ လွင်ႈၵၢၼ်မႆႉၼၼ်ႉ လႆႈၸႂ်ၵၼ်ဝႃႈ ၾၢႆႇလူင်ပွင်ၸိုင်ႈမၢၼ်ႈ တေပၼ်ၸုမ်းဝႃႉႁပ်ႉသိုဝ်ႉ ၶိုၼ်းတင်းမူတ်း- ၼႆယဝ်ႉ။

ၸၢဝ်းၶႄႇ 6 ၵေႃႉၼၼ်ႉ ၵမ်ႈၽွင်ႈဝႃႈ တိုၵ်ႉထုၵ်ႇၵုမ်းၶင်ဝႆႉ ယူႇတီႈမိူင်းသၢတ်ႇ၊ ၵမ်ႈၽွင်ႈၵေႃႈဝႃႈ ၵႂႃႇမီးတီႈၵဵင်းတုင်ယဝ်ႉ။ ႁၢၼ်ႉတေႃႇမိူဝ်ႈလဵဝ် တူဝ်ၶဝ်မီးတီႈလႂ်တႄႉတႄႉၼၼ်ႉ ယင်းပႆႇႁူႉလႆႈတႅတ်ႈတေႃး။

ၸၢဝ်းၶႄႇၸိူဝ်းၼႆႉမီးတီႈလႂ် ဢမ်ႇယိုၼ်ယၼ်လႆႈသေတႃႉ ၵူၼ်းၸမ်ၸႂ်ပလိၵ်ႈၸႄႈမိူင်း ဢၼ်ပၵ်းလုမ်း တီႈၵဵင်းတုင် ၵေႃႉၼိုင်ႈလၢတ်ႈဝႃႈ- ၸဵမ်မိူဝ်ႈၸူဝ်းဝိၼ်း ပႆႇမႃးတီႈမိူင်းတူၼ်ၼၼ်ႉ ၾၢႆႇၸုမ်းဝႃႉ ပေႃးႁူႉဝႆႉလူင်ႈၼႃႈဝႃႈ ၾၢႆႇမၢၼ်ႈတေဢဝ်ၸၢဝ်းၶႄႇ 6 ၵေႃႉၼၼ်ႉ မွပ်ႈပၼ်တီႈၸဝ်ႈၼႃႈတီႈမိူင်းၶႄႇ၊ တေဢမ်ႇမွပ်ႈပၼ်တီႈၸုမ်းဝႃႉ- ၼႆယဝ်ႉ။

မႆႉတင်းသဵင်ႈ ဢၼ်ထုၵ်ႇၾၢႆႇပလိၵ်ႈမၢၼ်ႈ တင်းသိုၵ်းမၢၼ်ႈ (လူင်ပွင်ၸိုင်ႈ) တီႉၺွပ်းၵႂႃႇၼၼ်ႉ တင်းမူတ်းတႃႇ 300 တၼ်ႊ။ ဢိင်ၼိူဝ်ၶေႃႈလႆႈၸႂ်ၵၼ် ၸုမ်းဝႃႉပဵၼ်ၾၢႆႇႁပ်ႉသိုဝ်ႉၶိုၼ်း တင်းမူတ်းသေ မိူဝ်ႈဝႃး (ဝၼ်းတီႈ 22/06/2015)ၼႆႉ ၾၢႆႇဝႃႉၸၢႆႇပၼ်ငိုၼ်းယဝ်ႉ- လႆႈႁူႉၼင်ႇၼႆ။

ၾၢႆႇၼိုင်ႈတၢင်းၼိုင်ႈ ပဵၵ်ႉသမ်ႉဝႃႈ ၽူႈယႂ်ႇၵူၼ်းလူင် ၸၼ်ႉၽူႈၼမ်းမၢၼ်ႈ တင်းၸၼ်ႉၽူႈၼမ်းဝႃႉ ႁူပ်ႉဢုပ်ႇၵၼ်တီႈမိူင်းတူၼ်၊ လႆႈၸႂ်တူၵ်းလူင်းၵၼ်သေတႃႉၵေႃႈ တၢင်းမိူင်းၶိတ်ႈၼၼ်ႉ လွင်ႈၶဵင်ႈၶႅင် ၵၢၼ်သိုၵ်းတေႃႇၵၼ် ဝူင်ႈၵၢင်သွင်ၾၢႆႇ ဢမ်ႇလူတ်းယွမ်းသင်။ ဢၼ်ၶုတ်းလုၵ်းထႅၼ်ႉလုၵ်းပဵမ်ႇ၊ ႁဵတ်းတပ်ႉႁဵတ်းတႃႇၶိုၵ်ႉၶမ်ႇၼႅၼ်ႈၼႃၸိူဝ်းၼႆႉ ၾၢႆႇဝႃႉတင်းၾၢႆႇမၢၼ်ႈ တိုၵ်ႉႁဵတ်းၼင်ႇၵၼ်၊ ၵၢၼ်သိုၵ်းၵေႃႈသွင်ၾၢႆႇယင်းပႆႇထွၼ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵမ်ႈၽွင်ႈထတ်းသၢင်ဝႃႈ- သွင်ၾၢႆႇမီးၶေႃႈလႆႈၸႂ် တူၵ်းလူင်းၵၼ်ယဝ်ႉသေတႃႉ၊ ဢိင်ၼိူဝ်ၵုၼ်းမုၼ် (သရေႇ)ၼႃႈတႃသေ ၾၢႆႇလႂ်ၵေႃႈလႅပ်ႈတေဢမ်ႇၶႂ်ႈထွၼ်၊ ၸင်ႇငႃၵၼ်ဝႆႉႁဵတ်းၼၼ်- ဝႃႈၼႆ။

ဢိင်ၼိူဝ်ငဝ်းလၢႆး ပႆႇသုၵ်းပႆႇလိပ်းသေ ၵူၼ်းဝၢၼ်ႈၵူၼ်းမိူင်း ပွတ်းမိူင်းသၢတ်ႇၸိူဝ်းၼႆႉ ယင်းပႆႇတမ်းၸႂ်လႆႈ။ ၵမ်ႈၽွင်ႈၵေႃႈ ပၢႆႈၶဝ်ႈၼႂ်းဝဵင်း၊ ၸိူဝ်းမီးငိုၼ်းတွင်းၵမ်ႈၽွင်ႈၵေႃႈ ပၢႆႈၶဝ်ႈၵႂႃႇယူႇၼႂ်းဝဵင်းယႂ်ႇဝဵင်းလူင် ၼႂ်းတႃႈၶီႈလဵၵ်းၸိူဝ်းၼႆႉ ႁၢၼ်ႉတေႃႇမိူဝ်ႈလဵဝ် ယင်းပႆႇပွၵ်ႈၶိုၼ်း။

ရူတ်ႉၵႃးၸိူဝ်းလႅၼ်ႈၼိူဝ်သဵၼ်ႈတၢင်း မိူင်းသၢတ်ႇ- မိူင်းတူၼ်- တႃႈၶီႈလဵၵ်းၸိူဝ်းၼႆႉၵေႃႈ ယင်းတိုၵ်ႉႁတ်းလႅၼ်ႈၵမ်ႈၽွင်ႈၵူၺ်း၊ ယင်းပႆႇလႅၼ်ႈၶွၼ်ႈၵိုၼ်းၶိုၼ်းမိူၼ်ၵဝ်ႇ။