ပႃႊတီႊႁူဝ်သိူဝ် SNLD ဢွၵ်ႇၶၢဝ်းတၢင်း လူင်းပိုၼ်ႉတီႈ ပိုတ်ႇပၢင်ၽိုၵ်းၽွၼ်ႉ ပဵၼ်ၶူးပူင်သွၼ် ၵဵဝ်ႇၵပ်းပိုၼ်ႉႁူႉ ၵၢၼ်လိူၵ်ႈတင်ႈ တႃႇပီ 2015 တီႈဝၢၼ်ႈႁႆး။

မိူဝ်ႈဝၼ်းတီႈ  22/06/2015  ၶၢဝ်းယၢမ်း ၵၢင်ၼ်ႂ  9 မူင်း ၼၼ်ႉ ပႃႊတီႊႁူဝ်သိူဝ် ဢွၼ်ႁူဝ်သေ တႄႇပိုတ်ႇပၢင်သွၼ် ၵဵဝ်ႇၵပ်းလူၺ်ႈၵၢၼ်မိူင်း ပၢင်လိူၵ်ႈတင်ႈ။ မိူဝ်ႈဝၼ်းပိုတ်ႇပၢင်သွၼ်  ဝၼ်းတီႈ  22  ၼၼ်ႉ ၽူႈၶဝ်ႈႁူမ်ႈမီး 80 ၵေႃႉ၊  ၶူးပူင်သွၼ် 7 ၵေႃႉ၊ ၽူႈလဵပ်ႈႁဵၼ်းမီး 70 ၵေႃႉ၊ ၵူၼ်းလူင်ၼႂ်းပႃႊတီႊ ၶိုၼ်ႈႁွတ်ႈ 3 ၵေႃႉ ။

ၵႅမ်ၽူႈၼမ်းၼႂ်းၵူႈလွင်ႈလွင်ႈ ၼႂ်းပႃႊတီႊႁူဝ်သိူဝ် ၸၢႆးလဵၵ်ႉ လူဢၢၼ်ႇၼႄ ႁူဝ်ၶေႃႈ ဢၼ်တေပူင်သွၼ်ၵႂႃႇတႃႇၶၢဝ်းတၢင်း 10 ဝၼ်း၊  ၸိူင်ႉၼင်ႇ လၢႆးတၢင်းၻီႊမူဝ်ႊၶရေႊၸီႊပဵၼ်ႁိုဝ် ၊ လၢႆးႁၢင်ႈႁႅၼ်း တႃႇတေၶဝ်ႈၸူးၵူၼ်းမိူင်း ၊ ၽႄႊတရႄႊပဵၼ်သင်၊ ပိူင်ငဝ်ႈပိုင်းမိူင်း(လၵ်းမိူင်း) 2008 ဢၼ်ၸုၵ်းၼိူဝ် ပႅတ်ႇၸႄႈမိူင်းပဵၼ်သင်ၸိူဝ်းၼႆႉ။


လိူဝ်သေၼၼ်ႉ ၽူႈၼမ်းၼႂ်းၵူႈလွင်ႈလွင်ႈ ပႃႊတီႊမႂ်ႇသုင်ၸိုင်ႈတႆး  ၸဝ်ႈသိုၵ်းလူင်ၶုၼ်သႅင် ၵၢဝ်ႇလၢတ်ႈၶေႃႈၵႂၢမ်းဝႃႈ ႁဝ်းတေလႆႈႁူႉလွင်ႈယိူင်းဢၢၼ်းႁဝ်း ယွၼ်ႉဝႃႈမၼ်းလမ်ႇလွင်ႈ တႃႇပၢင်လိူၵ်ႈတင်ႈ ဢၼ်တေမႃး ၵူၺ်းဢမ်ႇၵႃး ပိူင်ငဝ်ႈပိုင်းမိူင်း(လၵ်းမိူင်း) 2008 ၼၼ်ႉၵေႃႈႁဝ်းၶႃႈထုၵ်ႇလႆႈမႄးၶိုၼ်းဢိူဝ်ႈ ဝႃႈၼႆ။

 ၶူးပူင်သွၼ်လူင် ၸၢႆးၾႃႈ ၵေႃႈလၢတ်ႈဝႃႈ ပၢင်သွၼ်ၼႆႉ ႁဝ်းၵႆႉၵႆႉလီလႆႈမီး၊ ၵႆႉၵႆႉလီလႆႈႁဵတ်း  ပေႃးႁဝ်းဢမ်ႇတၼ်းမီးပၢင်သွၼ်ၵေႃႈ လွင်ႈႁၢင်ႈႁႅၼ်းႁဝ်းၼႆႉတိုၼ်းထုၵ်ႇလီမီး ဝႆႉတႃႇသေႇ။ ယွၼ်ႉဝႃႈ ဢၼ်ႁဵတ်းယူႇဝၼ်းမိူဝ်ႈၼႆႉ ပဵၼ်ပုၼ်ႈတႃႇမိူဝ်းၼႃႈ ၵူၼ်းမိူင်းႁဝ်း၊ ႁဝ်းၶႃႈတေ ႁူႉလွင်ႈၵၢၼ်မိူင်း ဝႃႈၼႆ။


ပႃႊတီႊႁူဝ်သိူဝ်SNLD ဢၼ်ၸၢႆးလဵၵ်ႉဢွၼ်ႁူဝ်သေ လူင်းပိုၼ်ႉတီႈ ပၼ်ပၢင်သွၼ်လၢႆလၢႆဝဵင်းသေ မိူဝ်ႈဝၼ်းတီႈ 21/06/2015 မႃးပိုတ်ႇပၼ် ပၢင်သွၼ်တီႈ မိူင်းယႆ ဝၼ်းၼိုင်ႈ၊ ဝၼ်းတီႈ 22 ဝၼ်းၼႆႉ မႃးပိုတ်ႇတီႈဝၢၼ်ႈႁႆး၊ ဝၢႆးသေပိုတ်ႇတီႈဝၢၼ်ႈႁႆးယဝ်ႉ တေသိုပ်ႇၶၢဝ်းတၢင်းၵႂႃႇတၢင်းလွႆၵေႃႇ မိူင်းယၢင်းလႅင်သေ တေႁႂ်ႈၶူးပူင်သွၼ် ၵမ်ႈၽွင်ႈသွၼ်ပၼ်ၵႂႃႇတႃႇၶၢဝ်းတၢင်းသိပ်းဝၼ်း လႆႈႁူႉၼင်ႇၼႆ။