ပၢင်ယွင်ႈၵုၼ်းမုၼ် ၽူႈၵတ်ႉၶႅၼ်ႇလိၵ်ႈ ၸၼ်ႉသိပ်း ၼၢင်းၽူၺ်းၼုမ်ႇ ဢၼ်တွပ်ႇလႆႈၶိုၵ်ႉတွၼ်း (လၢဝ်ၸွင်ႈ) 6 လုၵ်ႈ၊ ၶၼႅၼ်းၼမ်သုတ်း တီႈ 2 ၼႂ်းမိူင်းတႆးပတ်းပိုၼ်ႉ တင်းမူတ်းလႆႈၶၼႅၼ်း (မၢၵ်ႈ) 537 (မၢၵ်ႈ) ။

ပူၼ်ႉမႃး မိူဝ်ႈဝၼ်းတီႈ 21/06/2015 ၶၢဝ်းယၢမ်း 07.00 မူင်း ၵၢင်ၼႂ် ထိုင် 12.00 မူင်း ၵၢင်ဝၼ်း လႆႈၸတ်းႁဵတ်းပၢင်ယွင်ႈၵုၼ်းမုၼ် တီႈႁိူၼ်းလုင်းၸၢႆးလဢွင်ႇလႄႈပႃႈၼၢင်းယိင်း ၵေႃႉပဵၼ်ပေႃႈ/မႄႈ ၼၢင်းၽူၺ်းၼုမ်ႇ ဢႃယု (16)ပီ၊ တီႈဝၢၼ်ႈၼွင်ၸၢင်ႉ၊ ဢိူင်ႇထုင်ႉပူင်း၊ ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း၊ ၸတ်းႁဵတ်းပၼ်ပၢင်ယွင်ႈၵုၼ်းမုၼ် ၽူႈၵတ်ႉလိၵ်ႈၸၼ်ႉသိပ်း ၼၢင်းၽူၺ်းၼုမ်ႇ ဢၼ်တွပ်ႇလႆႈမၢႆၶိုၵ်ႉတွၼ်း (လၢဝ်ၸွင်ႈ) 6 လုၵ်ႈ၊ ၶၼႅၼ်း(မၢၵ်ႈ) 537 မၢၵ်ႈ လႆႈၼမ်သုတ်းတီႈ 2 ၼႂ်းမိူင်းတႆးပတ်းပိုၼ်ႉ ။

ၼၢင်းၽူၺ်းၼုမ်ႇၼႆႉ ၶိုၼ်ႈႁဵၼ်းၸၼ်ႉသိပ်း ၼႂ်းပီ 2014-2015 ႁဵၼ်းတီႈ ႁူင်းသဝ်းၵမ်ပေႃးသ ဝဵင်းဢွင်ႇပၢၼ်း ၸိုင်ႈတႆး ပွတ်းၸၢၼ်း၊ ၶၢမ်ႈပူၼ်ႉပီလဵဝ်။ မိူဝ်ႈႁဵၼ်းၸၼ်ႉငဝ်ႈထိုင်ၸၼ်ႉ 9 သမ်ႉ လႆႈၶိုၼ်ႈႁူင်းႁဵၼ်းတီႈၸၼ်ႉသုင်မၢႆ (6) တီႈတူၼ်ႈတီး။


ၼႂ်းပီ 2015 ၼႆႉ လုၵ်ႈဢွၼ်ႇတႆး ဢွင်ႇပူၼ်ႉၸၼ်ႉသိပ်း တွပ်ႇလႆႈၶိုၵ်ႉတွၼ်း(လၢဝ်ၸွင်ႈ) 6 လုၵ်ႈ၊ ၼႂ်းမိူင်းတႆး မီး 6 ၵေႃႉ၊ ၵေႃႉဢၼ်လႆႈလၢဝ်ၸွင်ႈ ၶၼႅၼ်း(မၢၵ်ႈ) ၼမ်သုတ်း ၼႂ်းမိူင်းတႆး 539 (မၢၵ်ႈ)၊ တီႈသွင်ပဵၼ်ၼၢင်းၽူၺ်းၼုမ်ႇ ၶၼႅၼ်း (537) မၢၵ်ႈ လိူဝ်ၼၼ်ႉၵေႃႈ တီႈ 3 တီႈ4 တီႈ 5 တီႈ 6 ။

ၼႂ်းပီ 2015 ၼႆႉ တီႈႁဵၼ်းၸၼ်ႉသုင်မၢႆ(4) ဝဵင်းတူၼ်ႈတီး ဢၼ်လႆႈမၢႆၶိုၵ်ႉတွၼ်း(လၢဝ်ၸွင်ႈ) 6 လုၵ်ႈ မီး 5 ၵေႃႉ၊ ၼႂ်း 5 ၵေႃႉၼၼ်ႉ ပဵၼ်လုၵ်ႈဢွၼ်ႇတႆး 4 ၵေႃႉ ၼႆယဝ်ႉ။