ပၢင်တွၼ်ႈႁပ်ႉ RCSS ယဵမ်ႈၸႂ်းၸႄႈဝဵင်းပၢင်လွင်း

ဝၼ်းတီႈ 18/02/2015 ၵၢင်ၼႂ် ၵေႃႉပဵၼ်ၽူႈၵွၼ်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇပဢူဝ်း၊ ႁူဝ်ပဝ်ႈၸုမ်းၸိူဝ်ႉၸၢတ်ႈပဢူဝ်း ဢူးၸၢၼ်ႇလုၼ်ႇ ဢွၼ်ႁူဝ်ၼမ်းၼႃႈ ၸွမ်းသူင်ႇပၼ်ၸုမ်းၸိူဝ်း ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) ဢၼ်ၸွမ်သိုၵ်းယွတ်ႈသိုၵ်း ဢွၼ်ႁူဝ် ၵႂႃႇဢႅဝ်ႇယဵမ်ႈတူၺ်းၼႂ်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း။

မူႇၸုမ်း RCSS/SSA ဢၼ်ၸဝ်ႈယွတ်ႈသိုၵ်းဢွၼ်ႁူဝ်ၼႆႉ လႆႈႁူပ်ႉထူပ်းၵၼ်တင်း ၽူႈၵွၼ်းၸႄႈဝဵင်းပၢင်လွင်းလႄႈ ၸဝ်ႈၼႃႈတီႈၵူႈၾၢႆႇ ၵူႈၸၼ်ႉထၢၼ်ႈ၊ တင်းသြႃႇၸၢႆးၸၢမ်ႇလႃႉ ၵေႃႉပဵၼ်ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လွင်း၊ ၸၢႆးဢွင်ႇၸူဝ်း တင်း ပေႃႈမႄႈပီႈၼွင်ႉၵူၼ်းမိူင်း ၼႂ်းၸႄႈဝဵင်းပၢင်လွင်း 500 ပၢႆ၊ လႆႈႁူပ်ႉထူပ်းၵၼ်တီႈ ဝတ်ႉ/ၵျွင်းမူၺ်ႇတေႃႇ ဝဵင်းပၢင်လွင်း။

RCSS ႁူပ်ႉထူပ်းၵူၼ်းမိူင်း ၸႄႈဝဵင်းပၢင်လွင်း

ၽွင်းမိူဝ်ႈလႆႈႁူပ်ႉထူပ်းၵၼ်တင်း ပီႈၼွင်ႉၵူၼ်းမိူင်းပၢင်လွင်းၼၼ်ႉ ၸဝ်ႈယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်းဝႃႈ- တေပူၵ်းပွင်ၵေႃႇတင်ႈဝၢၼ်ႈမိူင်း လူၺ်ႈလွၵ်းပိူင်ၻီႊမူဝ်ႊၶရေႊၸီႊ၊ ၵွပ်ႈၼႆလႄႈ ၼင်ႇႁိုဝ်ပီႈၼွင်ႉၵူၼ်းမိူင်းတႆးၵူႈၵေႃႉ တေလႆႈႁူႉလွင်ႈၻီႊမူဝ်ႊၶရေႊၸီႊၵူႈၵေႃႉၼၼ်ႉ ႁႂ်ႈလႆႈလဵပ်ႈႁဵၼ်းၵၼ်၊ ႁႂ်ႈလႆႈဢၢၼ်ႇလိၵ်ႈလၢႆးၼမ်ၼမ်- ဝႃႈၼႆ။

တီႈပၢင်ႁူပ်ႉထူပ်းၵၼ် တင်းၵူၼ်းမိူင်းပၢင်လွင်းၼၼ်ႉ ၽူႈဢွၼ်ႁူဝ်ပဢူဝ်း ဢူးၸၢၼ်ႇလုၼ်ႇ ၵေႃႈလႆႈလၢတ်ႈဝႃႈ- တႃႇႁဝ်းၶႃႈတေလႆႈမႃးႁူပ်ႉထူပ်းၵၼ်ပွၵ်ႈၵမ်းၼႆႉ မၼ်းပဵၼ်တိုဝ်ႉတၢင်းဢၼ်ယၢပ်ႇယဵၼ်းတႄႉတႄႉ။ ၵွပ်ႈၼႆ ဢၼ်ႁဝ်းလႆႈမႃးႁူပ်ႉထူပ်းၵၼ်ပွၵ်ႈၼႆႉ လႆႈဝႃႈပဵၼ်တိုဝ်ႉတၢင်းလီတႄႉတႄႉ။ ပဵၼ်ပၢင်ႁူပ်ႉထူပ်းၵၼ် ပိူဝ်ႈတႃႇႁူမ်ႈမိုဝ်းၵၼ်ႁဵတ်းသၢင်ႈ တႃႇၸိုင်ႈမိူင်းႁူမ်ႈတုမ်၊ တႃႇမိူဝ်းၼႃႈ/ဢၼႃၵၢတ်ႈ မိူင်းတႆး၊ မၼ်းလမ်ႇလွင်ႈတႄႉတႄႉ- ဝႃႈၼႆ။

ပီႈၼွင်ႉၵူၼ်းမိူင်း ၸႄႈဝဵင်းပၢင်လွင်း ပႂ်ႉႁပ်ႉတွၼ်ႈ

ဝၢႆးသေႁူပ်ႉထူပ်းၵူၼ်းမိူင်းယဝ်ႉ ၸွမ်သိုၵ်းယွတ်ႈသိုၵ်း တင်းမူႇၸုမ်းၼႆႉ ယူႇတီႈႁူဝ်ပဝ်ႈၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းပၢင်လွင်းဢွၼ်ႁူဝ်သေ လႆႈၵႂႃႇဢႅဝ်ႇယဵမ်ႈတူၺ်းတီႈႁေႃၵဝ်ႇ (ႁေႃၸဝ်ႈၾႃႉ) ပၢင်လွင်း။ ၸဝ်ႈယွတ်ႈသိုၵ်း လႆႈလၢတ်ႈၼႄတီႈ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လွင်းဝႃႈ တေၶတ်းၸႂ်သႂ်ႇႁႅင်း ပဵၼ်ၵဝ်ႉပဵၼ်ၵၼ်းသေ တေၸွႆႈထႅမ်ငိုၼ်း ပိူဝ်ႈတႃႇမႄးၵုမ်းၵေႃႇၶိုၼ်း ႁေႃၵဝ်ႇၼႆႉ၊ ၸဝ်ႈယွတ်ႈသိုၵ်း- ဝႃႈၼႆ။

ပိူင်ငဝ်ႈပိုင်းမိူင်း (2008) တတ်းမၵ်းဝႆႉ ၸႄႈဝဵင်းႁူဝ်ပူင်း/ သီႇသႅင်ႇ လႄႈ ပၢင်လွင်း ဢၼ်မီးၼႂ်းၸႄႈတွၼ်ႈ တူၼ်ႈတီး ၸိုင်ႈတႆးပွတ်းၸၢၼ်းၼႆႉ ပဵၼ်ၼႃႈလိၼ်ၽွင်းငမ်းတူဝ်ၵဝ်ႇပဢူဝ်း။ ဢၼ်ၽူႈဢွၼ်ႁူဝ်ပဢူဝ်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇပဢူဝ်း လႆႈဢွၼ်ႁူဝ်ၼမ်းၼႃႈ RCSS ဢႅဝ်ႇယဵမ်ႈၼႂ်းမိူင်းတႆးပွၵ်ႈၵမ်းၼႆႉ ပဵၼ်ပွၵ်ႈၵမ်းႁႅၵ်ႈ။

ႁေႃၸဝ်ႈၾႃႉၵဝ်ႇ တီႈၸႄႈဝဵင်းပၢင်လွင်း

ၸွမ်သိုၵ်းယွတ်ႈသိုၵ်းၼႆႉ ဝၼ်းတီႈ 18/02/2015 (မိူဝ်ႈဝႃး) ဝၢႆးသေႁူပ်ႉထူပ်းၵူၼ်းမိူင်းပၢင်လွင်းယဝ်ႉ လႆႈသိုပ်ႇၶၢဝ်းတၢင်းၵႂႃႇတၢင်း သီႇၵိပ်ႇ ၸႄႈဝဵင်းသီႇၵိပ်ႇသေ ပွၵ်ႈမႃးလိုဝ်ႈၼွၼ်းၶိုၼ်း ဝဵင်းတူၼ်ႈတီး။ မိူဝ်ႈၼႆႉ ဝၼ်းတီႈ 19/02/2015 တေသိုပ်ႇၶၢဝ်းတၢင်း ၵႂႃႇတၢင်းၸႄႈတွၼ်ႈလွႆလႅမ်၊ တေၵႂႃႇႁူပ်ႉထူပ်းပီႈၼွင်ႉၵူၼ်းမိူင်း ၼႂ်းၸိုင်ႈတႆးပွတ်းၸၢၼ်း ပွတ်းၵၢင်ထႅင်ႈ။

ပီႈၼွင်ႉၵူၼ်းမိူင်း ပႂ်ႉႁပ်ႉတွၼ်ႈၵၢၼ်ယဵမ်ႈၸႂ်း RCSS လႄႈ ၽူႈယႂ်ႇၵူၼ်းလူင် ၸႄႈဝဵင်းပၢင်လွင်း