မၢၵ်ႇတႅၵ်ႇတီႈတိၼ်လွႆၵိဝ်ႇလွၵ်ႇ ႁိမ်းဝၢၼ်ႈ သၢႆးၶၢဝ် ၼႂ်းၸႄႈတွၼ်ႈမူႇၸႄႈ၊ တိူဝ်ႉၺႃး သိုၵ်းမၢၼ်ႈ ဢၼ်ဢဝ်ႁူမ်ႇလူမ်ႈႁိမ်းၼၼ်ႉ ဝၢတ်ႇၸဵပ်းလိူဝ်ႁႅင်း 2 ၵေႃႉ။ ၵူၼ်းဝၢၼ်ႈ လႃႈၼမ်ႉ 2 ၵေႃႉ ဢၼ်ႁႃပႃႁိမ်း မၢၵ်ႇတႅၵ်ႇ ထုၵ်ႇသိုၵ်းမၢၼ်ႈတီႉၺွပ်း ထတ်းထၢမ် ပေႃႉထုပ်ႉ။

တိၼ်လွႆၵိဝ်ႇလွၵ်ႇ ႁိမ်းဝၢၼ်ႈသၢႆးၶၢဝ် ၸႄႈတွၼ်ႈမူႇၸႄႈ

ဝၼ်းတီႈ 18/02/2015 ဝၢႆးဝၼ်းယၢမ်း 4 မူင်း၊ မၢၵ်ႇတႅၵ်ႇတီႈတိၼ်လွႆၵိဝ်ႇလွၵ်ႇ တီႈႁိမ်းဝၢၼ်ႈသၢႆးၶၢဝ် ၼႂ်းၸႄႈတွၼ်ႈမူႇၸႄႈ ၸိုင်ႈတႆးပွတ်းႁွင်ႇ။ မၢၵ်ႇတႅၵ်ႇပွၵ်ႈၼႆႉ တိူဝ်ႉၺႃးသိုၵ်းမၢၼ်ႈ တပ်ႉၸုမ်းလူင် (တပ်ႉမ) 88 ဢၼ်တိုၵ်ႉတူင်ႉၼိုင်ဢႅဝ်ႇလဵပ်ႈဢဝ်ႁူမ်ႇလူမ်ႈ ႁိမ်းၼၼ်ႉ ဝၢတ်ႇၸဵပ်းဢမ်ႇယွမ်း 7 ၵေႃႉ- ပႃႈၼၢင်းပီး ၵူၼ်းဝၢၼ်ႈသၢႆးၶၢဝ် ဢၼ်ႁွတ်ႈတီႈထုင်ႉမၢဝ်းလၢတ်ႈ။

ၼၢင်းပီးလၢတ်ႈဝႃႈ- “သဵင်တႅၵ်ႇမၢၵ်ႇတႅၵ်ႇလင်ယွၼ်ႈႁႅင်း၊ လိၼ်မိူင်းပေႃးသၼ်ႇၵႂႃႇ။ ပေႃးဝႃႈမၢၵ်ႇတႅၵ်ႇယဝ်ႉၵမ်းၼိုင်ႈၵေႃႈ သိုၵ်းမၢၼ်ႈဢၼ်ဢဝ်ႁူမ်ႇလူမ်ႈၸွမ်းၸိူဝ်းၼၼ်ႉ လႃႈလီႈလၢမ်းလိမ်းယိုဝ်းၵွင်ႈလူင်းၵႂႃႇ ၼႂ်းႁူၺ်ႈၼႂ်းလွႆ ၼႂ်းထုင်ႉၼႃးၸိူဝ်းၼႆႉ သဵင်ပေႃးၼၼ်ႈၵႂႃႇသဵင်ႈ။ ယွၼ်ႉပိူဝ်ႈမၢၵ်ႇတႅၵ်ႇသေ သိုၵ်းမၢၼ်ႈတိူဝ်ႉဝၢတ်ႇၸဵပ်းလိူဝ်ႁႅင်း 2 ၵေႃႉ ဢဝ်ၵႂႃႇႁူင်းယႃမူႇၸႄႈယဝ်ႉ။ လိူဝ်သေၼၼ်ႉ ဝၢတ်ႇၸဵပ်းဢိတ်းဢွတ်းဢမ်ႇယွမ်းမွၵ်ႈ 7 ၵေႃႉ- ဝႃႈၼႆ။

ယွၼ်ႉပိူဝ်ႈမၢၵ်ႇတႅၵ်ႇသေ လႃႈၼမ်ႉ (တမ်ႇငႃႈ) 2 ၵေႃႉ၊ ၵူၼ်းဝၢၼ်ႈၸႄႈလၢၼ်ႉ ဢၼ်ႁႃပႃယူႇႁိမ်းၼၼ်ႉ တင်း ၸဝ်ႈႁႆႈၸဝ်ႈၼႃး ဢၼ်ႁဵတ်းၵၢၼ်ယူႇတီႈတိၼ်လွႆၵိဝ်ႇလွၵ်ႇ 3 ၵေႃႉ ထုၵ်ႇသိုၵ်းမၢၼ်ႈတီႉၺွပ်းဢဝ်ၵႂႃႇ ပေႃႉထုပ်ႉထတ်းထၢမ်- ၵူၼ်းၸမ်ၸႂ်ၽူႈၵွၼ်းဝၢၼ်ႈၸႄႈလၢၼ်ႉ ၵေႃႉၼိုင်ႈလၢတ်ႈ။

ၵူၼ်းၸမ်ၸႂ်ၽူႈၵွၼ်းဝၢၼ်ႈၸႄႈလၢၼ်ႉ လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- “ၵူၼ်းဝၢၼ်ႈၸႄႈလၢၼ်ႉ 2 ၵေႃႉ ဢၼ်ယူႇႁိမ်းမၢၵ်ႇတႅၵ်ႇၼၼ်ႉ ၶဝ်တိုၵ်ႉဢဝ်ပႅတ်ႊတိူဝ်ႊရီႊသေ သျွတ်ႊပႃၼႂ်းၼမ်ႉယူႇ၊ ၶဝ်ၵေႃႈဢမ်ႇပေႃးမေႃလၢတ်ႈၵႂၢမ်းမၢၼ်ႈလီလီ။ ယွၼ်ႉၼၼ်လႄႈ ၺႃးသိုၵ်းမၢၼ်ႈဢဝ်သူၼ်ႈငုၵ်းၵွင်ႈသွင်ႉသႂ်ႇႁူဝ်ၶဝ်၊ ႁဵတ်းႁႂ်ႈဝၢတ်ႇၸဵပ်းလွၵ်ႈလိူတ်ႈၵႂႃႇ၊ ၵူၺ်းၵႃႈ ဢမ်ႇထိုင်ၸၼ်ႉႁၢဝ်ႈႁႅင်း လႆႈမႆႈၸႂ်ၼင်ႇၵဝ်ႇ။ ၽိူဝ်ႇၵူၼ်းလူင်ဝၢၼ်ႈ ငိၼ်းၶၢဝ်ႇဝႃႈသိုၵ်းမၢၼ်ႈထတ်းထၢမ် ၵူၼ်းဝၢၼ်ႈမၼ်းၼႆၵေႃႈ မၼ်းႁိပ်ႈၼႅတ်ႈၵႂႃႇတူၺ်း၊ ၶဝ်သွင်ၵေႃႉၵေႃႈလွတ်ႈမႃးၶိုၼ်း၊ ပေႃးဢမ်ႇၼၼ် တေမိူၼ်ႁိုဝ်ဢမ်ႇႁူႉ”- ဝႃႈၼႆ။

တီႈထုင်ႉဢၼ်မၢၵ်ႇတႅၵ်ႇၼႆႉ မီးတပ်ႉသိုၵ်းမၢၼ်ႈ တပ်ႉမ 88 ၊ ၸုမ်းပီႇတုၸိတ်ႉလႄႈ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း တူင်ႉၼိုင်ဝႆႉ၊ ပဵၼ်ပိုၼ်ႉတီႈဢၼ်သိုၵ်းလၢႆၸုမ်းတူင်ႉၼိုင်။

တီႈႁိမ်းၼၼ်ႉ မိူဝ်ႈၽွင်းႁၢင်ပီ 2014 ၼၼ်ႉၵေႃႈ မၢၵ်ႇယၢမ်ႈတႅၵ်ႇပွၵ်ႈၼိုင်ႈယဝ်ႉ၊ မိူဝ်ႈၼၼ်ႉ တိူဝ်ႉၺႃးသိုၵ်းမၢၼ်ႈၵေႃႉၼိုင်ႈ၊ မၢၵ်ႇတႅၵ်ႇတီႈၼၼ်ႈ ပွၵ်ႈၵမ်းၼႆႉ ပဵၼ်ၵမ်းတီႈသွင်- ၼႆယဝ်ႉ။