ၽူႈမီးပုၼ်ႈၽွၼ်း ၼႂ်း RCSS/SSA ၸိူဝ်းတူၵ်း ပုၼ်ႈၽွၼ်း ၼႂ်းၸႄႈဝဵင်းမိူင်းၵိုင် သိုပ်ႇၾူၼ်းႁွင်ႉ ႁူဝ်ပဝ်ႈ ၶွမ်ႊမိတီႊၵမ်ႉၵႅမ်ၾၢႆႇၽွင်းငမ်း ၸႄႈဝဵင်းမိူင်းၵိုင် ဢိၵ်ႇပေႃႈ မႄႈၵူၼ်း ၸိူဝ်းသၢၼ်ၶတ်းမိူင်းထၢၼ်ႇႁိၼ် လႄႈ ၸဝ်ႈၶွင်ၶွမ်ႊပၼီႊ ၸိူဝ်းယိုၼ်ႈယွၼ်းၶုတ်း ထၢၼ်ႇႁိၼ်ၶဝ် ႁူပ်ႉထူပ်းတေႃႇၼႃႈဢုပ်ႇဢူဝ်းၵၼ် သၢမ်ၾၢႆႇ ႁႃတၢင်းဢွၵ်ႇပၼ်ႁႃ ဢၼ်ၵူၼ်းမိူင်း သၢၼ်ၶတ်း ႁၢမ်ႈၶုတ်းထၢၼ်ႇႁိၼ် မိူင်းၵိုင်။

ဝၼ်းထိ 13/1/2015 ၵၢင်ၼႂ် ဢိင်ၼိူဝ် ၽူႈမီးပုၼ်ႈၽွၼ်း ၼႂ်း RCSS ၸဝ်ႈႁၢၼ်ၸၢမ်ႇ၊ ၸဝ်ႈ ႁၢၼ် သေႃးၸိင်ႇ ဢွၼ်ႁူဝ်၊ ၾၢႆႇၶွမ်ႊပၼီႊ ၺဵင်းမဵတ်ႉတႃႇ၊ ပျီႉဢွင်ႇၺဵင်းသမ်ႉ ၼၢင်းယိင်းၶမ်း ဢွၼ်ႁူဝ် ၊ ၾၢႆႇၵူၼ်းမိူင်းသမ်ႉ လုင်းၸၢႆးလူင် ႁူဝ်ပဝ်ႈ ၶွမ်ႊမိတီႊၵမ်ႉၵႅမ်ၾၢႆႇၽွင်းငမ်း ၸႄႈဝဵင်းမိူင်းၵိုင် ဢွၼ်ႁူဝ်သေ ႁူပ်ႉထူပ်ႉဢုပ်ႇဢူဝ်းၵၼ် တီႈဝၢၼ်ႈသၢမ်ပူၼ်း ဢၼ်မီးၾၢႆႇဢွၵ်ႇမိူင်းၵိုင် မွၵ်ႈ 5 လၵ်း၊ ၽွင်းတႅၼ်း မိူင်းၵိုင်ၵေႃႈၶဝ်ႈႁူမ်ႈထွမ်ႇၸွမ်း။

မိူဝ်ႈဢုပ်ႇၵၼ်တွၼ်ႈၸဝ်ႉတင်းႁၢင်ႈၼၼ်ႉ ၾၢႆႇၶွမ်ႊပၼီႊ ၼၢင်းယိင်းၶမ်းၵေႃႈ လၢတ်ႈဝႃႈ ၵူၼ်း မိူင်းသၢၼ်ၶတ်းၵေႃႈလီ ဢမ်ႇသၢၼ်ၶတ်းၵေႃႈယဝ်ႉ ၼိုင်ႈၵေႃႈတိုၼ်းတေႁဵတ်း၊ သွင်ၵေႃႈတိုၼ်း တေႁဵတ်း၊ ၾၢႆႇၵူၼ်းမိူင်း လုင်းၸၢႆးလူင်ၵေႃႈလၢတ်ႈဝႃႈ ဢိင်ၼိူဝ်ပေႃႈမႄႈၵူၼ်းမိူင်း ယူႇလင် သၢၼ်ၶတ်းလႄႈ ၼိုင်ႈၵေႃႉၵေႃႈတိုၼ်းတေသၢၼ်ၶတ်း သွင်ၵေႃႈတိုၼ်းတေသၢၼ်ၶတ်း။ ထိုင်တီႈ ၾၢႆႇတပ်ႉသိုၵ်းၸိုင်ႈတႆး RCSS/SSA ၸဝ်ႈႁၢၼ်သေႃးၸိင်ႇၵေႃႈလၢတ်ႈဝႃႈ - "ၵူၼ်းမိူင်းၸိူဝ်းသၢၼ်ၶတ်းၼၼ်ႉ ႁႂ်ႇလူင်းၸိုဝ်ႈသဵင် တီႈယူႇပၼ်သဵင်ႈသဵင်ႈ တေလႆႈႁပ်ႉပုၼ်ႈၽွၼ်းလွင်ႈသၢၼ်ၶတ်း၊ သင်ႁွင်ႉၵႂႃႇႁူပ်ႉငဝ်ႈၸိုင်ႈၵေႃႈ တေလႆႈၵႂႃႇ။ ပဵၼ်ၵူၼ်းသိုၵ်းလႄႈ တၵ်းလႆႈၸွမ်းၶေႃႈၸီႉသင်ႇပႃႈၼိူဝ် ၸႂ်ႉတိမတ်ႉၵေႃႈ ၵႃႈတေလႆႈမတ်ႉ - ဝႃႈၼႆ။

သိုပ်ႇဢုပ်ႇၵၼ်တင်းႁိုင် - ၵမ်းလိုၼ်းသုတ်းလုင်းၸၢႆးလူင်ၵေႃႈ ပၼ်ၵႂၢမ်းမၼ်ႈဝႃႈ - တၢႆၵေႃႈ ယဝ်ႉ ၶီးၵေႃႈလီ တေတၢင်တူဝ်ပေႃႈမႄႈၵူၼ်းမိူင်းသေသၢၼ်ၶတ်းၵႂႃႇ ။ သင်ငဝ်ႈၸိုင်ႈလွႆတႆးလႅင်း ႁွင်ႉၵႂႃႇႁူပ်ႉ ပိူဝ်ႈတႃႇၵႄႈလိတ်ႈ ပၼ်ႁႃ ထၢၼ်ႇႁိၼ် မိူင်းၵိုင် တိုၼ်းတေၵႂႃႇ ဝႃႈၼႆ။ ၾၢႆႇ ၶွမ်ႊပၼီႊ ၵေႃႈႁပ်ႉပၢၵ်ႇၸွမ်းဝႃႈ - ၾၢႆႇၶွမ်ႊပၼီႊ ႁၼ်လီၼိူဝ်တပ်ႉသိုၵ်းၸိုင်ႈတႆး RCSS/SSA လႄႈ ပေႃး ၾၢႆႇ RCSS/SSA ပၼ်ၶႂၢင်ႉၵေႃႈ တေၶုတ်း၊ ပေႃးဢမ်ႇပၼ်ၶႂၢင်ႉၵေႃႈ တေဢမ်ႇၶုတ်းယဝ်ႉ ဝႃႈၼႆလႄႈ - ၸင်ႇတေ ၶွတ်ႇယွတ်ႈပၢင်ၵုမ်ယဝ်ႉတူဝ်ႈပၢင်ၵုမ်လႆႈသေ ၵိၼ်ၶဝ်ႈႁူမ်ႈမူႇၵၼ်။

ၶွမ်ႊပၼီႊ ၺဵင်းမဵတ်ႉတႃႇ တင်း ၶွမ်ႊပၼီႊ ပျီႉဢွင်ႇၺဵင်းၼႆႉ လႆႈဝႂ်တႃႇၶုတ်းတူၺ်း မိူင်ထၢၼ်ႇႁိၼ် ၼႂ်းဢိူင်ႇဝၢၼ်ႈယၢတ်ႇ တင်း ဝၢၼ်ႈႁူၺ်ႈဢွၼ်ႇ - 2200 ဢေႊၶိူဝ်ႉပၢႆ ၊ တီႈတေၶုတ်း ထုင်ႉသၢႆႁူဝ်ၼမ်ႉၶီႈသၢင် (ႁိုဝ် ၼမ်ႉၶီတၢင် - ၸွမ်းၼမ်ႉပိုၼ်းၶုၼ်သၢမ်လေႃး ၼၢင်းဢူဝ်ႈပဵမ်ႇ မီးၼၼ်ႉ ၽီပႂ်ႉၼမ်ႉၵေးၶီတၢင် ဢၼ်ၶဝ်သွင်ၸဝ်ႈတေႁူပ်ႉပိုၼ်းႁၢႆႉ လႄႈ ၸပ်းၸိုဝ်ႈ ၼမ်ႉၶီႈတၢင် ဝၢႆးမႃး ယဵၼ်းၵႂႃႇပဵၼ် ၼမ်ႉၶီသၢင်) ႁူဝ်ဝဵင်းမိူင်းၵိုင် ယၢၼ်မွၵ်ႈ 2 လၵ်း။

ၵူၼ်းမိူင်းတႄႉ ယုမ်ႇယမ်ဝႃႈ ပေႃးၶွမ်ႊပၼီႊမႃးၶုတ်းထၢၼ်ႇႁိၼ် တေယႃႉပႃႇပႅၵ်ႇထိူၼ်ႇ သၽႃဝ တၢင်းႁၢင်ႈလီႈဝဵင်းမိူင်းၵိုင်၊ တူင်ႈၼႃး ႁဵင်ဢေႊၶိူဝ်ႊပၢႆ တေဢမ်ႇၸၢင်ႈၽုၵ်ႇ၊ တူဝ်သတ်းမႅင်း ဢၼ်ပိုင်ႈႁူမ်ႈ ယူႇသဝ်းၸွမ်းၵႄးၼမ်ႉ တေလူႉတၢႆ ။ ၾၢႆႇၶွမ်ႊပၼီႊသမ်ႉဝႃႈ တေဢမ်ႇပၼ် တုမ်ႉ တိူဝ်ႉ။ ၵူၼ်းမိူင်းၶႂ်ႈလႆႈၾၢႆၵေႃႈတေႁဵတ်းပၼ် ။ တၢင်ႇတီႈၵေႃႈ ၶုတ်းယူႇႁဵတ်းၼႆ ႁဵတ်းသင်ဢမ်ႇ ၵႂႃႇသၢၼ်ၶတ်း။ ၽိူဝ်ႇတႃႉပၼ်ၶွမ်ႊပၼီႊပိူၼ်ႈတၢင်ႇဢၼ်မႃးၶုတ်း ၶွမ်ႊပၼီႊ တႆးႁဝ်းၶုတ်း ဢမ်ႇလီႁိုဝ် - ဝႃႈၼႆ။ ၾၢႆႇၵူၼ်းမိူင်းတႄႉလၢတ်ႈဝႃႈ ဢၼ်တေယႃႉထိူၼ်ႇ၊ ၵႄးၼမ်ႉ၊ တူင်ၼႃး သၽႃဝ မိူင်းၵိုင်ၼၼ်ႉ တိုၼ်းတေဢမ်ႇပၼ်ၽႂ် မႃးၶုတ်း။ ဝၢၼ်ႈမိူင်းၵေႃႈ ပႆႇၵတ်းယဵၼ်။ ၵူၼ်း မိူင်းၵေႃႈ ဢမ်ႇမီးသုၼ်ႇလႆႈၸၢမ်ႇပူၺ်ႈသင်။ ဢၼ်တေလႆႈၵိၼ်ၸွမ်း မီးၵူၼ်းၵမ်ႈၽွင်ႈၸိူဝ်း ၵမ်ႉထႅမ်ၵူၺ်းလႄႈ ၽႂ်မႃးၶုတ်းၵေႃႈ တိုၼ်းတေသၢၼ်ၶတ်း။ တိုၼ်းတေ ဢမ်ႇလူင်းလၢႆးမိုဝ်း သၢင်ႈပိုၼ်းႁၢႆႉ တေၵႅတ်ႇၵင်ႈပၼ် ၵူဝ်လုၵ်ႈလၢၼ်လႆႈထုၵ်ႇႁၢမ်းႁႅၵ်းမိူဝ်းၼႃႈ - ဝႃႈၼႆ။