RCSS/ SSA ၸတ်းႁဵတ်းပၢင်ၵုမ်ငဝ်ႈငုၼ်း ပွၵ်ႈၵမ်းတီႈ 15 တီႈငဝ်ႈၸိုင်ႈလွႆတႆးလႅင်း ။ ႁူဝ်ပဝ်ႈလူင် ၸဝ်ႈယွတ်ႈသိုၵ်း ပိုတ်ႇ လၢတ်ႈ ၶေႃႈၵႂၢမ်း ဝႃႈႁႂ်ႈလႆႈပဵၼ် ပၢင်လူင်းလၢႆးမိုဝ်း ၵိုတ်းယိုဝ်းပတ်ႉပိုၼ်ႉၸိုင်ႈမိူင်း ဝႆးဝႆး။

ဝၼ်းတီႈ 12 – 14 လိူၼ်ၵျႅၼ်ႊၼိဝ်ႊရီႊ 2015 ၶွင်ႊသီႊဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/ SSA ၸတ်းႁဵတ်းပၢင်ၵုမ်ငဝ်ႈငုၼ်း ပွၵ်ႈၵမ်းတီႈ 15 တီႈငဝ်ႈၸိုင်ႈလွႆတႆးလႅင်း ။ ႁူဝ်ပဝ်ႈလူင် ၸဝ်ႈယွတ်ႈသိုၵ်း ပိုတ်ႇ လၢတ်ႈ ၶေႃႈၵႂၢမ်း ဝႃႈႁႂ်ႈလႆႈပဵၼ်ပၢင်လူင်းလၢႆးမိုဝ်းၵိုတ်းယိုဝ်းပတ်ႉပိုၼ်ႉၸိုင်ႈမိူင်းဝႆးဝႆးဝႃႈၼႆ။

ၵူၼ်းၶဝ်ႈႁူမ်ႈပၢင်ၵုမ်ၵေႃႉၼိုင်ႈၵေႃႈလၢတ်ႈဝႃႈ “ၸဝ်ႈယွတ်ႈသိုၵ်း လၢတ်ႈဝႃႈပေႃးၵုမ်ႇယိုတ်ႈၶၢဝ်းယၢမ်း တႃႇ လူင်းလၢႆးမိုဝ်းၵိုတ်းယိုဝ်းပတ်းပိုၼ်ႉၸိုင်ႈမိူင်း ႁႂ်ႈႁိုင်လိူဝ်ၼႆႉထႅင်ႈတႄႉ ၸၢင်ႈတုမ်ႉတိူဝ်ႉလွင်ႈငမ်းယဵၼ်။ ယွၼ်ႉ ၼၼ်လႄႈၼင်ႇႁိုဝ်တေၸဵဝ်းလူင်းလၢႆးမိုဝ်းလႆႈ ၼၼ်ႉၶႂ်ႈႁႂ်ႈၵူႈပႃႈၵူႈၾၢႆႇ  ၶဝ်ႈႁႃၵၼ်ႁူမ်ႈမိုဝ်းၵၼ် ” - ဝႃႈၼႆ။

ၼႂ်းပၢင်ၵုမ်ၼၼ်ႉဢုပ်ႇၵုမ်သပ်းလႅင်းဝႃႈ - ပီ 2014 ၼႆႉ ၶွင်ႊသီႊဢဝ်ၶိုၼ်းၸိုင်ႈတႆး တင်း တပ်ႉသိုၵ်းလူင်ပွင် ၸိုင်ႈ မၢၼ်ႈလႆႈပဵၼ်ပၢင်တိုၵ်း ၵၼ်ဢမ်ႇယွမ်း 21 ပွၵ်ႈ။ ၾၢႆႇသိုၵ်းမၢၼ်ႈတၢႆ 47 ၵေႃႉ မၢတ်ႇၸဵပ်း 30 ပၢႆ။ ၾၢႆႇ တပ်းသိုၵ်း ၸိုင်ႈတႆး လႆႈလုတၢႆ 5 ၵေႃႉ ဝၢတ်ႇၸဵပ်း 3 ၵေႃႉ။

လိူဝ်သေၾၢႆႇတပ်ႉသိုၵ်းလူင်ပွင်ၸိုင်ႈ ဢမ်ႇၸွမ်းၶေႃႈတူၵ်းလူင်း ၵိုတ်းယိုဝ်းယဝ်ႉ ယင်းဢဝ်တိုဝ်ႉတၢင်းၼႆႉသေ သွၵ်ႈတဝ်ထိူၼ်ႇ ၸွမ်းၼႂ်းႁူၺ်ႈၼႂ်းလွႆ တေႃႇပေႃးႁူႉၸၵ်းၵူႈၵိဝ်ႇၵူႈငွၼ်ႈယဝ်ႉလႄႈ ယၢမ်းလဵဝ်ယင်းဢမ်ႇတၢပ်ႈဢဝ် ၵူၼ်းသူင်ႇတၢင်းယဝ်ႉဝႃႈၼႆ။

ၽူႈလႆႈၶဝ်ႈႁူမ်ႈပၢင်ၵုမ်လၢတ်ႈထႅင်ႈဝႃႈ “ ပေႃးတူၺ်းသိုၵ်းမၢၼ်ႈ  သွၵ်ႈထိူၼ်ႇၸွမ်းတူၼ်းႁၢဝ်းသၼ်လွႆမိူင်းတႆး ၊  ၾၢႆၼိုင်ႈၵေႃႈ  တင်ႈတပ်ႉပၢင်သဝ်းတိၵ်းတိၵ်း၊ ၾၢႆႇၼိုင်ႈတေႃႇသူင်ႇ ၶိူင်ႈသိုၵ်း ၵွင်ႈၵၢင်ႇဢမ်ႇထၢတ်ႇဢမ်ႇဝၢႆး  ၼႆႉတႄႉ ဢမ်ႇၸႂ်ႈငဝ်းလၢႆးလီ တႃႇငမ်းယဵၼ်။ ၵွပ်ႈၼၼ်လႄႈ ၶႂ်ႈႁႂ်ႈပဵၼ်ပၢင်ၵို်တ်း ယိုဝ်း ပတ်းပိုၼ်ႉၸိုင်ႈမိူင်းၵၼ် ဝႆးဝႆး ” - ဝႃႈၼႆ။

တီႈၼႂ်းပၢင်ၵုမ်လူင်ၼႆႉလႆႈၸႂ်တူၵ်းလူင်းမၵ်းမၼ်ႈပၵ်းပိူင်ၶွင်ႊသီႊဢဝ်ၶိုၼ်းၸိုင်ႈတႆးဢၼ်ႇမႂ်ႇ ဢၼ်မီး 13 တွၼ်ႈ။  လိူဝ်ၼၼ်ႉ လႆႈၸႂ်တူၵ်းလူင်းၵၼ်ဝႃႈတေသိုပ်ႇယိပ်းတိုဝ်း  ၶေႃႈတူၵ်းလူင်းၵိုတ်းယိုဝ်း 31 ၶေႃႈ ၊ ဢိၵ်ႇ ၶေႃႈတူၵ်းလူင်း လၢႆလၢႆၶေႃႈ။

ဝၢႆးလင်ပၢင်ၵုမ်ယဝ်ၶွင်ႊသီႊဢဝ်ၶိုၼ်းၸိုင်ႈတႆး လႆႈဢွၵ်ႇလိၵ်ႈပိုၼ်ၽၢဝ်ႇ 9 ၶေႃႈ။  ၼႂ်းၼၼ်ႉယင်းပႃး ၶေႃႈဢၼ်ဝႃႈ- ၼင်ႇႁိုဝ် ၶူဝ်းၶွင်သၽႃႇဝ ၼႂ်းမိူင်းတႆးတေဢမ်ႇလူႉလႅဝ်ၼၼ်ႉ တေၵႅတ်ႇၶႄ ႁႄႉၵင်ႈၵႂႃႇ။ ပေႃႈလဵင်ႉၵူၼ်းၵႃႉလႄႈ ၶွမ်ႊပၼီႊ ၸိူဝ်းမႃးၵႃႉၶၢႆ မႃးႁႃၵိၼ်ၼႂ်းမိူင်းတႆးၼၼ်ႉ တေဢဝ်တၢင်းၸွႆႈ ထႅမ်တီႈၶဝ် ၵႂႃႇ- ၸဵမ်ၸိူဝ်းၼႆႉလူးၵွၼ်ႇ။

ပၢင်ၵုမ်ၶွပ်ႈၶူပ်ႇပွၵ်ႈၵမ်း 15  RCSS/SSA ၸတ်းႁဵတ်းတီႈငဝ်ႈငုၼ်းလွႆတႆးလႅင်း 3 ဝၼ်း။  တီႈၵိူဝ်းၵုမ်၊ ၵေႃၵမ်ၵၢၼ်ပွင် ၵၢၼ်လူင် ၊ ၵေႃၵမ်ၵၢၼ်ဢွၼ်ႁူဝ်ငဝ်ႈၸိုင်ႈ ၊ၵေႃၵမ်ၵၢၼ် ငဝ်ႈၸိုင်ႈ ၊ ၽူႈၵွၼ်းႁွင်ႈၵၢၼ်လူင် ၊ ၽူႈၵွၼ်း တပ်ႉသိုၵ်းလႄႈၽူႈမီးပုၼ်ႈၽွၼ်း 272 ၵေႃႉ ၶဝ်ႈႁူမ်ႈ။