ဢိင်ၼိူဝ် ဝၼ်းလုၵ်ႉၽိုၼ်ႉ ၸိူဝ်ႉၸၢတ်ႈတဢၢင်း ၶွပ်ႈႁွပ်ႈတဵမ် 52 ပီသေ ယူႇတီႈတပ်ႉသိုၵ်းတဢၢင်း ဢွၵ်ႇလိၵ်ႈပိုၼ်ၽၢဝ်ႇ။ တဢၢင်းၶဝ်ႈပႃးၼႂ်း ၶၵ်ႉၵၢၼ်ငမ်းယဵၼ်မႃးသေတႃႉ တေႃႇထိုင်ၼႂ်းပီ 2014 ၼႆႉ ပဵၼ်ပၢင်တိုၵ်းၵၼ်တင်း သိုၵ်းမၢၼ်ႈမွၵ်ႈ 200 ပွၵ်ႈ။

TNLA-photo-TSYO

ပူၼ်ႉမႃးမိူဝ်ႈဝၼ်းတီႈ 12/01/2015 ၼႆႉ ဢိင်ၼိူဝ်ဝၼ်းလုၵ်ႉၽိုၼ်ႉၸိူဝ်ႉၸၢတ်ႈတဢၢင်း (ပလွင်ႈ) ၶွပ်ႈတဵမ် 52 ပီသေ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ဢွၵ်ႇလိၵ်ႈပိုၼ်ၽၢဝ်ႇ။ ဝၼ်းလုၵ်ႉၽိုၼ်ႉၸိူဝ်ႉၸၢတ်ႈတဢၢင်း ၶွပ်ႈတဵမ် 52 ပီယဝ်ႉ၊ တေႃႇထိုင်ၼႂ်းပီ 2014 ၼႆႉ ႁဵတ်းတႃႇလွင်ႈငမ်းယဵၼ်သေတႃႉ တိုၵ်ႉပဵၼ်ပၢင်တိုၵ်း ၼႂ်းၵႄႈတပ်ႉသိုၵ်းမၢၼ်ႈ တင်း တပ်ႉသိုၵ်းတဢၢင်း ဢမ်ႇယွမ်း 200 ပွၵ်ႈ- ၼႆယဝ်ႉ။

လိၵ်ႈၶေႃႈပိုၼ်ၽၢဝ်ႇ လၢတ်ႈဝႃႈ- ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) ၶဝ် တင်းလူင်ပွင်ၸိုင်ႈ ၶတ်းၸႂ်ပိူဝ်ႈတႃႇႁူပ်ႉထူပ်းၵၼ်၊ ပိူဝ်ႈတႃႇလူင်းလၢႆးမိုဝ်း ၵိုတ်းယိုဝ်းပတ်းပိုၼ်ႉၸိုင်ႈမိူင်း ၸိူဝ်းၼႆႉ ယူႇတီႈၾၢႆႇတဢၢင်း လႆႈၶဝ်ႈႁူမ်ႈၸွမ်းမႃးယူႇသေတႃႉ၊ ၾၢႆႇၸဝ်ႈၼႃႈတီႈမၢၼ်ႈၶဝ်သမ်ႉ ၶႂ်ႈႁူၼ်ထွႆလင်ၶိုၼ်း၊ ၶေႃႈလႆႈၸႂ်ၵၼ်ၸိူဝ်းၼၼ်ႉၵေႃႈ လူပ်းယႃႉၶိုၼ်း။ ၵွပ်ႈၼၼ် ဝၢႆးမႃးၾၢႆႇတပ်ႉသိုၵ်းမၢၼ်ႈ လႆႈထႅမ်ႁႅင်းသိုၵ်းသေ ယိုဝ်းသိုၵ်းတဢၢင်းမႃးၶိုၼ်းလႄႈ သွင်ၾၢႆႇလႆႈပဵၼ်ပၢင်တိုၵ်းၵၼ်မႃး၊ သိုၵ်းမၢၼ်ႈဢဝ်ၵွင်ႈလူင် ယိုဝ်းတပ်ႉသိုၵ်းတဢၢင်းမႃးၸိူဝ်းၼႆႉ လႆႈပဵၼ်ၾိုၼ်းပဵၼ်ၾႆးမႃးၶိုၼ်း၊ ၵူၼ်းဝၢၼ်ႈၵူၼ်းမိူင်းၵေႃႈ လႆႈလူႉႁၢႆတၢႆၸွမ်းၼမ်- ၼႆယဝ်ႉ။

ပဵၼ်ႁိုဝ်ၵေႃႈယဝ်ႉ ၼႂ်းပီ 2015 ၼႆႉ ဢၼ်တေလႆႈႁူပ်ႉထူပ်းထႅင်ႈ ပၼ်ႁႃၵၢၼ်မိူင်းၸိူဝ်းၼႆႉ ႁဝ်းၵူၼ်းမိူင်းတင်းသဵင်ႈ တေလႆႈမီးသတိ၊ မီးတၢင်းႁူႉၵၢၼ်မိူင်း/ ၵၢၼ်ၻီႊမူဝ်ႊၶရေႊၸီႊ၊ ႁဝ်းၶႃႈထုၵ်ႇလႆႈႁူမ်ႈမိုဝ်းၵၼ်သေ ၶတ်းၸႂ်ႁႂ်ႈၽၢၼ်ႇပူၼ်ႉလႆႈၵႂႃႇလီငၢမ်း- တိုၵ်းသူၼ်းပႃးၼင်ႇၼႆ။

တပ်ႉသိုၵ်းတဢၢင်း (TNLA) ၼႆႉ မီးဢဵၼ်ႁႅင်း 21 တပ်ႉၵွင်၊ တပ်ႉၸုမ်းလူင် 3 ဢၼ်။ တူင်ႉၼိုင်ၼႂ်းၸႄႈဝဵင်း ၵျွၵ်ႉမႄး၊ မိူင်းမိတ်ႈ၊ မိူင်းၵုတ်ႈ၊ ၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉတူႈ၊ သီႇပေႃႉ၊ လႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ ၼမ်ႉၶမ်း၊ မူႇၸေႈၸိူဝ်းၼႆႉ။

မီးယိူင်းဢၢၼ်းလူင်- ပိူဝ်ႈတႃႇၽဵဝ်ႈမူၺ်ႉယႃႈမဝ်းၵမ်။ တႃႇၸိူဝ်ႉၸၢတ်ႈတဢၢင်း တေလႆႈလွင်ႈၽဵင်ႇပဵင်း။ ပိူဝ်ႈတႃႇၸိူဝ်ႉၸၢတ်ႈတဢၢင်း ပူၼ်ႉလွတ်ႈၼႂ်းမိုဝ်းၽူႈၶဵၼ်လႄႈ ၶိုၼ်ႈယႂ်ႇမႂ်ႇသုင်။ ပိူဝ်ႈတႃႇႁႂ်ႈလႆႈၻီႊမူဝ်ႊၶရေႊၸီႊ လႄႈ လွင်ႈငမ်းယဵၼ်။