ၸုမ်းၸၢဝ်းၶိူဝ်း NCCT တင်း သုၼ်ၵၢၼ်လွင်ႈငမ်းယဵၼ် မၢၼ်ႈ MPC ႁူပ်ႉဢုပ်ႇၵၼ် ၼႂ်းၵဵင်းမႆႇ ၸိုင်ႈထႆး။ ဢုပ်ႇဢူဝ်းၵၼ် ဢၼ်တိုၵ်ႉၶွင်ႉၶမ်ၵၼ်လၢႆၶေႃႈ လႄႈ ပိူဝ်ႈတႃႇၶဝ်ႈဢုပ်ႇဢူဝ်းၵၼ် တင်း UPWC ၼႂ်းမိူင်းမၢၼ်ႈ။

MPC တင်း ၸုမ်းၸၢဝ်းၶိူဝ်း NCCT ႁူပ်ႉထူပ်းၵၼ် တီႈမိူင်းထႆး မိူဝ်ႈဝၼ်းတီႈ 27/11/2014

ဝၼ်းတီႈ 15/12/2014 ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) တင်း သုၼ်ၵၢၼ်လွင်ႈငမ်းယဵၼ်မၢၼ်ႈ (MPC) ႁူပ်ႉထူပ်းၵၼ် ၼႂ်းၵဵင်းမႆႇ ၸိုင်ႈထႆး။ ဢုပ်ႇဢူဝ်းၵၼ် ပိူဝ်ႈတႃႇႁႂ်ႈလႆႈမိူဝ်းဢုပ်ႇဢူဝ်းၵၼ်တင်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) လႄႈ ၶွမ်ႊမတီႊငဝ်ႈငုၼ်း ၶိုင်ပွင်လွင်ႈငမ်းယဵၼ် (UPCC) တီႈၼႂ်းမိူင်းမၢၼ်ႈ- ၼႆယဝ်ႉ။

ဢွၼ်ၼႃႈၼႆႉ မိူဝ်ႈဝၼ်းတီႈ 30/11/2014 NCCT ႁွင်ႉပၢင်ၵုမ်တီႈၼႂ်းၵဵင်းမႆႇ။ ထိုင်မႃးဝၼ်းတီႈ 1-2/12/2014 NCCT ႁူပ်ႉထူပ်းၵၼ်တင်း MPC ။ ယူႇတီႈ NCCT လႆႈယိုၼ်ႈလိၵ်ႈၸူး UPWC  ပိူင်လူင်မၼ်းမီး 5 ၶေႃႈ 1.ႁႂ်ႈလႆႈတွပ်ႇၵႄႈပၼ် လိူင်ႈဢၼ်ပဵၼ်မႃးတီႈလၢႆႇၸႃႇ ၼႂ်းတၢင်းဢၼ်ၸိုဝ်ႈၸႂ်ႈလႄႈ ပဵၼ်လွင်ႈလီၶိုၼ်ႈ။ 2.ၼင်ႇႁိုဝ် ပိူင်ပဵၼ်မိူၼ်ၼင်ႇတီႈလၢႆႇၸႃႇ တေဢမ်ႇၵိူတ်ႇၶိုၼ်ႈထႅင်ႈၼၼ်ႉ တေလႆႈမီးလွင်ႈဝၢင်းၽႅၼ် ၸတ်းၵၢၼ်။ 3.ႁႂ်ႈလႆႈသႂ်ႇၸႂ် လွင်ႈႁူမ်ႇလူမ်ႈၶွင် NCCT မိူဝ်ႈၵႂႃႇဢုပ်ႇဢူဝ်းၵၼ်တီႈၼႂ်းမိူင်းမၢၼ်ႈ လိူဝ်သေၵဝ်ႇ။ 4.ပေႃးဝႃႈ ဢုပ်ႇဢူဝ်းၵၼ်ၸိုင် (ၵူႈပွၵ်ႈမီး UN တင်းၶႄႇ မႃးပဵၼ်ၽူႈႁူႉႁၼ်ၸွမ်းၵူၺ်း) ႁႂ်ႈလႆႈမီးပႃး ၸုမ်းမိူင်းဝၼ်းတူၵ်း ၸိူဝ်းဢၼ်မႃးၵမ်ႉၸွႆႈလွင်ႈငမ်းယဵၼ်။ 5. ႁႂ်ႈလႆႈဢုပ်ႇဢူဝ်းၵႄႈလိတ်ႈ ဢၼ်ၶွင်ႉၶမ်ၵၼ်ဝႆႉ 18 ၶေႃႈ ၸိူဝ်းၼႆႉ။

ၵဵဝ်ႇၵပ်းၶေႃႈတီႈ 5 ၼႆႉ ဢွၼ်ၼႃႈၼႆႉ မိူဝ်ႈ NCCT တင်း MPC  ပႆႇႁူပ်ႉထူပ်းၵၼ် ၼႂ်းၵဵင်းမႆႇ၊ ၼႂ်းလိူၼ်သႅပ်ႊထႅမ်ႊၿိူဝ်ႊ (2014) တၢင်းၾၢႆႇဢူးဢွင်ႇမိၼ်း ၼႄႉၼမ်းမႃးဝႃႈ- ၶႂ်ႈၵႄႈလိတ်ႈ ဢၼ်ၶွင်ႉၶမ်ယူႇ 18 ၶေႃႈ။ မိူဝ်ႈသွင်ၾၢႆႇ မႃးႁူပ်ႉဢုပ်ႇၵၼ် ၼႂ်းလိူၼ်သႅပ်ႊထႅမ်ႊၿိူဝ်ႊၼၼ်ႉ ၾၢႆႇ NCCT ၶိုၼ်းတွပ်ႇဝႃႈ - ဢၼ်သူၸဝ်ႈၼႄႉၼမ်းမႃးၼႆႉ ႁဝ်းၶႃႈၶႂ်ႈၽိူမ်ႉထႅမ်ထႅင်ႈ ၼႆသေ ၶိုၼ်းတွပ်ႇၵႂႃႇ လႄႈလႆႈထၢမ်ဝႃႈ လွင်ႈၼႆႉ တၢင်းၼေႇပျီႇတေႃႇ (UPWC လႄႈ UPCC) ႁၼ်ထိုင်ၸိူင်ႉႁိုဝ်- ၸိူဝ်းၼႆႉ။

ပၢင်ႁူပ်ႉထူပ်းဢုပ်ႇဢူဝ်းပွၵ်ႈၼႆႉ ၾၢႆႇ MPC မီးဢူးလႃႉမွင်ႇသူၺ်ႇ၊ ၻွၵ်ႊတိူဝ်ႊမိၼ်းၸေႃႇဢူး၊ ဢွင်ႇၼၢႆႇဢူး ၸိူဝ်းၼႆႉ။ လႆႈႁူႉဝႃႈ ပၢင်ဢုပ်ႇဢူဝ်းမီးလွင်ႈလီၶိုၼ်ႈသေ ပိူဝ်ႈတႃႇမိူဝ်းဢုပ်ႇဢူဝ်းၵၼ်တင်း UPWC ၼႂ်းမိူင်းၼၼ်ႉ မိူဝ်ႈၼႆႉ (16/12/2014) တၢင်း NCCT လႆႈသူင်ႇၸိုဝ်ႈသဵင်သၢႆမၢႆဝႆႉယဝ်ႉ။ သွင်ၾၢႆႇတေႁူပ်ႉၵၼ် ၼႂ်းဝၼ်းတီႈ 21-23/12/2014 - ၼႆယဝ်ႉ။

ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) မီးၻွၵ်ႊတိူဝ်ႊၸၢႆးမွၵ်ႇၶမ်း ပဵၼ်ႁူဝ်ပဝ်ႈ။ ၶွမ်ႊမတီႊငဝ်ႈငုၼ်း ၶိုင်ပွင်လွင်ႈငမ်းယဵၼ် (UPCC) မီးၸွမ်ၸိုင်ႈတဵင်းၸဵင်ႇ ပဵၼ်ႁူဝ်ပဝ်ႈ။