ၸဝ်ႈၼႃႈတီႈ SSPP/ SSA ႁွင်ႉပၢင်ၵုမ် ၽူႈၵွၼ်း ႁူင်းႁဵၼ်း မေႃသွၼ်(မၢၼ်ႈ)၊ မေႃသွၼ်လိၵ်ႈတႆး ၼႂ်းၸႄႈဝဵင်းသီႇပေႃႉ ။

ပၢင်ၵုမ် ၽူႈၵွၼ်း ႁူင်းႁဵၼ်း မေႃသွၼ်(မၢၼ်ႈ)၊ မေႃသွၼ်လိၵ်ႈတႆး ၼႂ်းၸႄႈဝဵင်းသီႇပေႃႉ

ဝၼ်းတီႈ 12 လိူၼ်တီႊသဵမ်ႊၿိူဝ်ႊ 2014 ၸဝ်ႈၼႃႈတီႈ SSPP/ SSA ႁွင်ႉပၢင်ၵုမ် ၽူႈၵွၼ်းႁူင်းႁဵၼ်း မေႃသွၼ်(မၢၼ်ႈ)၊ မေႃသွၼ်လိၵ်ႈတႆး ၼႂ်းၸႄႈဝဵင်းသီႇပေႃႉ ။

တီႈပၢင်ၵုမ်ၼၼ်ႉ ၽူႈၵွၼ်းႁူင်းႁဵၼ်း 10 လင် ၸိူဝ်းမီး ၼႂ်းၸႄႈဝဵင်းသီႇပေႃႉ၊ မိူင်းယႆ တင်း မေႃသွၼ် တင်း ၵူၼ်းဝၢၼ်ႈၸႄႈဝဵင်းသီႇပေႃႉ ၼႂ်းဢိူင်ႇၼႃးၼိဝ်ႉ၊ တူၼ်ႈၵႅင်း၊ ၼႂ်းၸေႈဝဵင်းမိူင်းယႂ်ႇသမ်ႉ ဢိူင်ႇမိူင်းၸိတ်ႇ တင်းမူတ်းမႃးၶဝ်ႈႁူမ်ႈ 250 ပၢႆ။ ပိူင်လူင်ဢုပ်ႇလွင်ႈ ပၼ်ႁႃ မေႃသွၼ်လိၵ်ႈတႆး ဢမ်ႇမီးငိုၼ်းလိူၼ်။ ပေႃးမႃးတူၺ်းၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈၸိုင် သမ်ႉတႅမ်ႈသုတ်း 85000 k ၊ တေႃႇ ႁူဝ်သႅၼ်၊ မေႃသွၼ်လိၵ်ႈတႆးသမ်ႉဝႃႈလူင်ပွင်ၸိုင်ႈတေၵမ်ႉၸွႆႈ လိူၼ် 20000 k  ၵူၺ်းႁၢၼ်ႉ တေႃႇယၢမ်းလဵဝ် ယင်းဢမ်ႇလႆႈ။

ၼင်ႇႁိုဝ်မေႃးသွၼ်လိၵ်ႈတႆး ပေႃးတေလႆႈငိုၼ်းလိူၼ်ၼၼ်ႉ တေၶတ်းၸႂ်ပၼ် ႁႂ်ႈပေႃးလႆႈ ငိုၼ်းလိူၼ် 35000 – 60000 k ၊ တေဢိင်ၼိူဝ်လုၵ်ႈႁဵၼ်းၼမ်ဢေႇသေ ငိုၼ်းၵွင်ၵၢင်ၼႂ်းပိုၼ်ႉတီႈသေ ၵမ်ႉၸွႆႈၵႂႃႇ - ၼႆၽူႈမီးပုၼ်ႈၽွၼ်းၸဝ်ႈၼိုင်ႈလၢတ်ႈၼႄၼင်ႇၼႆ။

“မိူဝ်ႈတႄႇတႄႉ သိူဝ်ၽိူၵ်ႇတေမႃး ဢွၼ်ႁဵတ်းသေ တေလၢတ်ႈလွင်ႈလၵ်းတင်ႈႁဵၼ်းၼႆဢေႃႈ။ ႁွင်ႉၵၼ်ဝႆႉ ဝၼ်းတီႈ 12 ၵၢင်ၼႂ်ၵဝ်ႈမူင်း ၶဝ်ႈသမ်ႉဢမ်ႇမႃး ႁဝ်းၶႃႈသမ်ႉပဵၼ်ၵူၼ်းႁွင်ႉပၼ်လႄႈ ၵႃႈလႆႈၶပ်းၶိုင်ၵႄႈလိတ်ႈၵႂႃႇပၼ်ႁႃ ဢၼ်မေႃသွၼ်ၶဝ်ႈႁူပ်ႉထူပ်းၼၼ်ႉဢေႃး။ လူင်ပူင်ၸိုင်ႈၵေႃႈ တမ်းဝႆႉ ပိူင်မီႈလၵ်းမိူင်း တႃႇသွၼ်လိၵ်ႈတႆး ၼႂ်းႁူင်းႁဵၼ်းယဝ်ႉၶႃႈလူးၼေႃႈ” - ၼႂ်းႁူင်းႁဵၼ်း 10 လင်ၼႆႉ ဢၼ်လႆႈတိုဝ်ႉတၢင်းပူင်သွၼ်လိၵ်ႈတႆး ၼႂ်းႁူင်းႁဵၼ်း ၶၢဝ်းယၢမ်းႁူင်းႁဵၼ်း လူင်ပွင်ၸိုင်ႈ မီး 2 လင်ၵူၺ်း။ လိူဝ်ၼၼ်ႉတႄႉ သွၼ်ၼွၵ်ႈၶၢဝ်းယၢမ်းႁူင်းႁဵၼ်းတင်းသဵင်ႈ၊ မိူၼ်ၼင်ႇၵွၼ်ႇပႆႇၶိုၼ်ႈႁဵၼ်း၊ ဢမ်ႇၼၼ် ဝၢႆးလူင်းႁူင်းႁဵၼ်းယဝ်ႉ - ဝႃႈၼႆ။